Ungathandabuzi Ukuthi UJehova Uzakuvikela

Bala AmaNani 13:25–14:4 ukuze ubone ukuthi kwasekuhambe njani ama-Israyeli esethandabuza ukuthi uJehova uzawavikela.

Hlolisisa indaba yonke. Kungani kwakungamelanga ama-Israyeli athandabuze ukuthi uJehova wayezaqhubeka ewasindisa? (Hubo. 78:​12-16, 43-53) Kanti kwasekutheni ukholo lwawo seluncipha? (Dute. 1:​26-28) UJoshuwa loKhalebhi batshengisa njani ukuthi babemthemba uJehova?—Nani. 14:​6-9.

Gebha ujule. Kuyini okwakumele kwenziwe ngama-Israyeli okwakuzawanceda ukuthi amthembe uJehova? (Hubo. 9:10; 22:4; 78:11) Ukuhlonipha uJehova kuzasinceda njani ukuthi simthembe?—Nani. 14:11.

Cabangisisa ngokuthi ufundani. Zibuze imibuzo elandelayo:

• ‘Yiziphi izimo ezingenza kube nzima ukuthi ngimthembe uJehova?’

• ‘Ngingenzani ukuze ngitshengise ukuthi ngiyamthemba uJehova khathesi futhi lokho kuzanginceda njani esikhathini esizayo?’

• ‘Kuyini okungamelanga ngikuthandabuze ngesikhathi sokuhlupheka okukhulu?’—Luk. 21:​25-28.