Asebekhulile Baligugu Ebandleni
“UConnie oleminyaka engu-83 uthi: “Uyazi nxa ngicabanga izinto engangizenza kudala ngisala ngingelankani. Kodwa bantu ukuguga lokhu!”
Mhlawumbe lawe kulutshwana kakhulu osusenelisa ukukwenza ngenxa yokuluphala. Kungenzeka ukuthi usuleminyaka leminyaka ukhonza uJehova kodwa nxa uqathanisa lokho owawumenzela khona kudala lalokho omenzela khona khathesi uzwa udana uze ucabange ukuthi uJehova kasakuqakathekisi okwenzayo. Nxa ubona angathi ukuguga sokukubuyisela emuva, ungenzani ukuze uqhubeke ukhonza uJehova uthokoza?
KUYINI UJEHOVA AKHANGELELE UKUTHI UKWENZE?
Zibuze, ‘Kuyini uJehova akhangelele ukuthi ngikwenze?’ Amazwi akuDutheronomi 6:5 angakududuza. Athi: “Kumele umthande uJehova uNkulunkulu wakho ngenhliziyo yakho yonke langomphefumulo wakho wonke langamandla akho wonke.”
Ivesi le ikwenza kucace ukuthi uJehova uthokoziswa yikukubona umenzela lokho okwenelisayo kusiya ngezimo zakho. Phela inhliziyo yakho lamandla akho kutshiyene lokomunye umuntu, yikho uJehova kasoze akuqathanise laloba ngubani ngoba vele kalifanani. Okunye uJehova angasoze akwenze yikuqathanisa lokho omenzela khona khathesi usumdala kangaka lalokho owawumenzela khona ngensuku zobutsha bakho.
Nxa ungabuza abanengi asebegugile bazakutshela ukuthi ngensuku zobutsha babo basebenzela uJehova ngamandla abo wonke. Akulambuzo ukuthi yikho kanye lawe owawukwenza ngoba ngalesosikhathi izimo zazivuma. Kodwa njengoba usuluphele usungabona angathi akuselalutho olwenelisayo. Lanxa izimo sezitshintshile, ulokhe ukhonza uJehova ngenhliziyo yonke futhi indlela akubona ngayo kayitshintshanga.
Wamsebenzela ngenhliziyo yonke uJehova ngesikhathi usesemutsha futhi yikho olokhu ukwenza lakhathesi
KUNENGI ONGAKWENZELA ABANYE
Lanxa usuluphele kumele ukhumbule ukuthi kulezinto osusenelisa ukuzenza owawungeke uzenze kudala kwakho. Kulokuzikhathaza ngongasenelisi ukukwenza, zama ukucabanga ngalokho ongakwenzela abanye. Mhlawumbe ungazama ukwenza lokhu okulandelayo:
Yekela abanye bathaphe ulwazi kuwe. Nanka amanye amazwi akhulunywa ngabantu abasebekhulile:
Inkosi uDavida yathi: “Ngangimncane, khathesi sengimdala, kodwa angikaze ngibone olungileyo elahliwe, loba abantwabakhe beswele ukudla.”—Hubo. 37:25.
UJoshuwa wathi: “Mina sengizakufa. Kodwa lina likwazi kuhle ukuthi akukho lokukodwa uJehova uNkulunkulu wenu alithembisa khona okungazange kugcwaliseke. Konke kwenzakala, akula ngitsho lokukodwa akukhulumayo okungenzakalanga.”—Josh. 23:14.
Engxenye lawe wake wakhuluma amazwi ahambelana lalawa kudala ukuze uqinise abanye. Kodwa okwenza amazwi akhulunywa nguDavida loJoshuwa aba lesisindo futhi akhuthaza abanye yikuthi babekhuluma ngezinto ababehlangane lazo empilweni, babezibonele sibili indlela ezitshiyeneyo uJehova ayebancedise ngazo.
Nxa kuyikuthi lawe usuleminyaka eminengi ukhonza, kumele ukuthi kulokunengi obone uJehova ekwenzela abantu bakhe. Kuyini okukhumbulayo? Khululeka ukukuxoxela abanye ngoba kuzabanceda njengoba kwakunceda lawe. Kuzabanceda ukuthi bamthande njalo bamthembe kakhulu uJehova.—Rom. 1:11, 12.
Eyinye indlela ongakhuthaza ngayo abanye ebandleni, yikungena labo imihlangano yebandla nxa kuvuma. Lokho kuzakunceda njalo kukhuthaze labanye. Udadewethu okuthiwa nguConnie uthi: “Ukuba semihlanganweni labafowethu labodadewethu lokuhamba labo ekutshumayeleni kuyangivuselela. Phela ngiyazibonela ukuthi abazalwane bayangithanda. Lami ngiyazama ukubatshengisa ukuthi ngiyabathanda ngokubanika izipho langokuxoxa labo.”
UJEHOVA UYAKUQAKATHEKISA OMENZELA KHONA
Kulezibonelo ezinengi eBhayibhilini ezitshengisa ukuthi uJehova uqhubeka ebathanda abantu bakhe lanxa bengasenelisi ukwenza okunengi ekukhonzeni. Mhlawumbe uyamkhumbula uSimiyoni, indoda eyayisiluphele ngesikhathi uJesu ezalwa. Nxa wayesiya ethempelini wayejayele ukubona abasakhulayo ababekhuthele emisebenzini ababeyiphiwe. Kodwa yena uSimiyoni wayezibona njani? Mhlawumbe wayecabanga ukuthi uJehova kaselandaba laye njengoba wayeseluphele. Kodwa uJehova wayembona eyindoda ‘elungileyo futhi ezinikeleyo’ okokuthi waze wambusisa ngokuthi abone uJesu eseselusane lokuthi aphrofethe ukuthi uJesu wayezakuba nguMesiya. (Luk. 2:25-35) UJehova wayemqakathekisa uSimiyoni ngenxa yokuthi wayelokholo oluqinileyo futhi waqhubeka emnika umoya ongcwele.
UJehova wabusisa uSimiyoni ngokuthi abone uJesu eseselusane lokuthi aphrofethe ukuthi wayezakuba nguMesiya
Kulokuthi udaniswe yikuthi kukhona ongasenelisi ukukwenza, hlala ukhumbula ukuthi uJehova uyakuqakathekisa konke omenzela khona. Phela yena uthokoziswa yikukubona umnika ‘lokho olakho’, kakhangelelanga ukuthi wenze okungaphezu kwamandla akho.—2 Khor. 8:12.
Zikhona izinto ongenelisa ukuzenza lanxa usuluphele. Ngokwesibonelo, zikhona ezinye indlela zokutshumayela ongazisebenzisa lanxa ungasoze ube usatshumayela okwesikhathi eside njengakudala. Ungenelisa ukufonela abazalwane loba ukubabhalela izincwadi ubakhuthaza. Lezi kungakhanya kuyizinto ezingatsho lutho kodwa nxa zisenziwa ngumuntu oselesikhathi eside ekhonza uJehova ziyabaqinisa kakhulu abanye.
Khangela ibhokisi elithi “Wayefuna Ukuzibulala.”
Nxa ungaqhubeka uthembekile, uqinisela futhi utshengisa ukuthi ulokholo uzabakhuthaza kakhulu abanye. Khumbula ukuthi: ‘UNkulunkulu kayisuye ongalunganga ukuthi usengaze awukhohlwe umsebenzi wakho lothando owamtshengisa lona ngokusiza abangcwele langokuqhubeka ubasiza.’—Heb. 6:10.
QHUBEKA UKHUTHELE
Okunye ukuhlolisisa okwenziwayo kuveza ukuthi abantu asebeluphele abaqhubeka bencedisa abanye baba lempilakahle futhi baphila isikhathi eside.
Lanxa kunjalo, ayisikho ukuthi ukunceda abanye kuzaqeda zonke inhlupho ezibangelwa yikuguga. Kumele lihlale likhumbula ukuthi uMbuso kaNkulunkulu yiwo ozaqeda isono esiyiso esibangela ukuthi abantu baguge futhi bafe.—Rom. 5:12.
Nxa ungaqhubeka usenzela uJehova okunengi futhi uncedisa abanye ukuthi babemazi uzaba lethemba lempilo engcono. Nxa kuyikuthi usuluphele woba leqiniso lokuthi uJehova uyathokoza ngalokho omenzela khona futhi labazalwane bayathokoza ukukhonza ndawonye lawe.