Uzamdumisa Yini UJehova Ngelanga Lakho Lomtshado?

1-2. Kuyini uJehova akufisela ijaha lentombi abalungiselela ukutshada?

USANDA kulobola yini kumbe usulotsholiwe? Nxa kunjalo sikwenzela amhlophe! Kumele ukuthi liyagijigijima lilungisa lokhu lalokhuyana njengoba ilanga lenu lomtshado selisondele. UJehova ufuna lilikholise ilanga lenu lomtshado njalo liqhubeke lithokoza lalapho selitshadile.a—Zaga. 5:18; Ingoma. 3:11.

² Elizakwenza ngelanga lomtshado wenu kumele kutshengise ukuthi liyamhlonipha kakhulu uJehova. Kungani lokho kuqakathekile futhi lingakwenza njani? Esizaxoxa ngakho esihlokweni lesi kuzanceda labo abatshadayo, labo abacelwe ukuthi bancedise ekuhleleni okuzakwenziwa emtshadweni kanye lalabo abanxusiweyo.

KUNGANI KUMELE LIHLONIPHE UJEHOVA?

3. Kungani kumele labo abatshadayo bacabange ngokuthokozisa uJehova?

³ Ijaha lentombi kumele basebenzise lokho abakutshelwa nguJehova nxa behlela konke okuzakwenzakala ngelanga labo lomtshado. Kungani lokho kuqakathekile? Phela uJehova nguye owasungula umtshado ngesikhathi etshadisa u-Adamu lo-Eva. (Gen. 1:28; 2:24) Yikho kuqakathekile ukuthi labo abatshadayo babe leqiniso lokuthi abakwenzayo kuzamdumisa futhi kumthokozise uJehova.

4. Yiziphi ezinye izizatho ezizakwenza ukuthi lizimisele ukuthokozisa uJehova?

⁴ Kungani kumele licabange ngoJehova ngesikhathi lilungiselela umtshado? UJehova nguYihlo futhi ngumngane wenu yikho akufanelanga lenze loba yini ezayenza kukhanye angani alimhloniphi loba ezamzwisa ubuhlungu. (Heb. 12:9; Hubo. 25:14) Nxa likuqakathekisa lokho uJehova alenzele khona lalokho azaqhubeka elenzela khona lizazimisela ukumthokozisa.—Hubo. 116:12.

LINGATSHENGISA NJANI UKUTHI LIYAMHLONIPHA UJEHOVA?

5. Ukucabanga ngezimiso eziseBhayibhilini kuzabanceda njani labo abalungiselela umtshado?

⁵ IBhayibhili alilamithetho eminenginengi ngokuthi imitshado yamaKhristu kumele yenziwe njani. Yikho labo abatshadayo bakhululekile ukuhlela umtshado wabo kusiya ngezimo zabo kumbe lokho okujayelekileyo emphakathini. Lanxa kunjalo, amaKhristu eqiniso kumele alalele imithetho kahulumende endabeni yomtshado. (Mat. 22:21) Abatshadayo kumele basebenzise izimiso eziseBhayibhilini ukuze bathokozise uJehova njalo batshengise ukuthi bayamhlonipha. Khathesi asixoxeni ngezimiso elingacabanga ngazo nxa lilungiselela umtshado.

6. Kuyini okunye okumele kucatshangwe yilabo abalungiselela umtshado?

⁶ Landelani lokho okufunwa yiziphathamandla. (Rom. 13:​1, 2) Kwamanye amazwe ohulumende balemithetho okumele ilandelwe yilabo abalungiselela ukutshada. Uhulumende wakini uthini ngendaba yomtshado? Xoxani labadala nxa lifuna ukuncediswa ngendaba le.

7. Kuyini okunye okumele licabange ngakho nxa lilungiselela ukutshada?

⁷ Umtshado wenu kawudumise uJehova. (1 Khor. 10:​31, 32) Elizakwenza ngelanga lomtshado wenu kumele kutshengise ukuthi likhonza uJehova. Akumelanga lilingisele okwenziwa ngabantu bomhlaba. (Gal. 5:​19-26) Njengoba ijaha lizakuba yinhloko yomuzi, kumele libe leqiniso lokuthi zonke izinto zenziwa ngendlela eqondileyo. Okunye okuzanceda abatshadayo yikuba lentshumayelo yomtshado esekelwe eBhayibhilini. Umzalwane ozakwenza intshumayelo le kumele ayenze ngendlela ehloniphekayo ukuze ancede labo abatshadayo kanye labanxusiweyo bazwisise ukuthi umtshado awusomadlwane kodwa yisipho esivela kuJehova. Nxa kuyikuthi likhethe ukuthi umtshado wenu uzaqalisela eWolu yoMbuso kumele libhale incwadi kusaselesikhathi licela imvumo ebadaleni bebandla.

8. Idili lenu kumele libe njani? (URoma 13:13)

⁸ Bala uRoma 13:13. Nxa lizakuba ledili lomtshado, kumele libe leqiniso ukuthi elikwenzayo akusoze kuphambanise ubungane benu loJehova. Ibala lesiGrikhi elihunyutshwe ngokuthi ‘amadili axokozelayo’ lisetshenziswa nxa kukhulunywa ngemicimbi elabantu abanatha baze bazikhohlwe, ngapha irediyo ivale ngci kuze kube phakathi kobusuku. Nxa kuyikuthi kuzabe kulotshwala wobani leqiniso ukuthi akulamuntu onatha aze adlulise amalawulo.b Nxa lizatshaya irediyo wobani leqiniso lokuthi ayidabuli abantu indlebe. Phela liyabe lifuna ukuthi abantu bazwanane nxa bexoxa. Okunye okumele likwenze yikuhlola zonke ingoma ezizatshaywa emtshadweni ukuze kungacini kukhala izingoma ezizakhuba abanye.

9. Yiphi eminye imibuzo okumele lizibuze yona ngedili lenu?

⁹ Okunye okungenza abantu bakholise edilini lenu lomtshado yikuba lemidlalo lezinye nje izinto zokubenza baveze elomhlathi. Kodwa lasendabeni leyo kumele libe leqiniso ukuthi izinto zakhona azibakhubi abanye. (Flp. 4:8) Umbuzo oqakathekileyo okumele lizibuze wona ngothi: ‘Kuzamthokozisa yini uJehova? Lingazibuza lokuthi ‘sizabe sitshengisa yini ukuthi siyabahlonipha abanye?’ ‘Abantu abasoze bacine bekhuluma kubi ngomtshado wethu yini?’ Akukubi ukuthi abantu bahleke futhi bazikholisele kodwa akumelanga kukhulunywe izinto zokuxhwala kumbe ezingenza abantu bacabange ngezemacansini. (Efe. 5:3) Labo elizabacela ukuthi bakhulume phambi kwenkundla kumele libakhumbuze izinto lezi.

10. Ukuthobeka kungabanceda njani abalungiselela ukutshada? (U-1 Johane 2:​15-17)

¹⁰ Lingaziphakamisi. (Bala u-1 Johane 2:​15-17.) UJehova uyabathanda kakhulu abantu abathobekileyo labangenzi izinto befuna ukubukwa. Yikho nxa lifuna ukuthokozisa uJehova alisoze libhulele yonke imali edilini lomtshado lisenzela ukuthi abantu basale bebabaza umtshado wenu. Kuzalinceda njani ukwehlisa izindleko edilini lenu? Omunye umfowethu okuthiwa nguMike ohlala eNorway uthi: “Asizange sibe lezikwelede njalo lokhu kwasinceda ukuthi siqhubeke siphayona. Umtshado wethu wawungelazinto ezinenginengi kodwa abantu bawukholisa kakhulu.” Udadewethu okuthiwa nguTabitha ohlala e-India yena uthi: “Kwakulula kakhulu ukuhlela umtshado wethu ngoba sasingelandaba lezinto ezinenginengi.”

11. Kungani kumele licabangisise ngendlela elizagqoka futhi lizilungise ngayo? (Khangela lemifanekiso.)

¹¹ Kudala umakoti lomyeni babesiba leqiniso lokuthi bacece okwamagama ngelanga labo lomtshado. (Isaya. 61:10) Lina selike lacabanga yini ukuthi lizagqokani ngelanga lenu lomtshado? Lanxa impahla elizazigqoka emtshadweni wenu zingabe zitshiyene lalezo elijayele ukuzigqoka nsuku zonke, lazo kumele zitshengise ukuthi liyamhlonipha uJehova njalo zingakhubi abanye. (1 Thim. 2:9) Kumele libe leqiniso lokuthi indlela elizagqoka ngayo lelizazilungisa ngayo ngelanga lenu lomtshado ayisoze ihambe isibatshazwa ngabantu.—1 Phet. 3:​3, 4.

12. Kungani kumele abatshadayo bahlole imikhuba lamasiko ajayelekileyo emitshadweni?

¹² Lingalandeli amasiko angamthokozisiyo uJehova. (Isam. 18:4) Amanye amasiko enziwa kweminye imitshado ayabe elesidimoni kumbe esekela izinto eziphikisana lalokho okufundiswa liBhayibhili. UJehova uthi singaqali ukwenza izinto ezinjalo. (2 Khor. 6:​14-17) Qala uhlolisise ukuthi umkhuba kumbe isiko elithile laqalisa njani lokuthi iBhayibhili lithini ngalokho kulokuphongulandela okujayele ukwenziwa ngabanye.

13. Kuyini okumele abatshadayo bakukhumbule?

¹³ Kujayelekile ukuthi abantu bakhunge labo abatshadayo. Abatshadayo kumele bakhumbule ukuthi iminwe kayilingani yikho kumele bamukele loba yiziphi izipho abaziphiwayo. IBhayibhili lithi ukupha kwenza sithokoze. (Zaga. 11:25; Imiseb. 20:35) Kodwa akumelanga lenze elibanxusileyo babone angani sebelomlandu wokuthi balikhunge kumbe babone angani isipho abaliphe sona asincedi ngalutho. Kumele libenze bakhululeke ukulinika loba yini abayenelisayo.—2 Khor. 9:7.

AMACEBO ELINGAWASEBENZISA

14. Yibuphi obunye ubunzima abanye abahlangana labo nxa belungiselela imitshado yabo?

¹⁴ Ukuhlela umtshado wenu ngendlela ezathokozisa uJehova akutsho ukuthi konke elizakwenza kuzatshelela nje. Engxenye alifuni ukuthi emtshadweni wenu kube labantu abanengi kakhulu kumbe ukuthi ucine ulingenisa ezikweledeni. Umfowethu okuthiwa nguCharlie ohlala eSolomon Islands, uthi: “Kwakunzima kakhulu ukuthi sinxuse bani sitshiye bani ngoba silabangane abanengi kakhulu njalo ngokwesiko lethu vele akulamuntu oyabe efuna ukusala!” UTabitha yena uthi: “Kwakunzima ukuthi abazali bethu bakwamukele ukuthi sasifuna ukunxusa abantu abangaba ngu-100 kuphela. Phela lapho esihlala khona abantu bajayele imtshado elabantu abanengi kakhulu.” Udadewethu okuthiwa nguSarah ohlala e-India, yena uthi: “Abantu abanengi bayakuthanda ukubukwa futhi bayabe befuna kukhanye ukuthi bangomaliyavuza. Emitshadweni yabazawami kwasetshenziswa imali enengi kakhulu futhi abantu basala bebabaza. Khonokho kwangenza ngacabanga ukuthi nxa owami umtshado ungaba labantu abalutshwana ngiyabe ngizehlulekele.” Manje yiwaphi amanye amacebo angalinceda ukuthi liwulungiselele kuhle umtshado wenu?

15. Kungani kuqakathekile ukuthandaza nxa lilungiselela umtshado?

¹⁵ Lingakhohlwa ukuthandaza. Kumele licele uJehova aliqondise kukho konke eliyabe likwenza ngesikhathi lilungiselela umtshado wenu. (Flp. 4:​6, 7) Kumele limcele alincedise ukuthi lenze izinqumo ezizamthokozisa, alenze lihlaliseke lokuthi libe lesibindi sokwenza okuqondileyo. (1 Phet. 5:7) UJehova uzayiphendula sibili imithandazo yenu futhi lokho kuzakwenza ukuthi limthembe kakhulu. UTabitha esike saxoxa ngaye uthi: “Ngaso sonke isikhathi nxa sasihlangana ukuze silungiselele umtshado wethu sasiqala ngokuthandaza. Lokhu kwenza kwabalula ukuthi sihlele kuhle izinto zethu njalo kungabi lokungazwanani phakathi kwethu lezihlobo zethu.”

16-17. Kungani ukuxoxisana kuqakathekile?

¹⁶ Ukuxoxisana kuqakathekile. (Zaga. 15:22) Zinengi izinqumo okumele lizenze njengoba lilungiselela umtshado wenu. Kumele lixoxe ngokuthi lizatshada mhlaka bani, lizasebenzisa malini, ukuthi ngobani elizabanxusa lezinye izinto ezinenginengi. Lingakenzi izinqumo ngezinto zonke lezi kumele lihlole izimiso eziseBhayibhilini njalo lixoxe labafowethu labodadewethu abaqinileyo ekukhonzeni ukuze balincedise. Nxa liveza imibono yenu kwabemuli kumbe libatshela ngalokho eselikuhlelile kumele likwenze ngomusa njalo lilalelisise lemibono yabo. Ngokwesibonelo nxa bangacela ukuthi ezinye izinto zenziwe ngendlela ethile futhi lokho kungaphikisani lezimiso eziseBhayibhilini kungaba kuhle ukuthi likwenze lokho. Kumele likhumbule ukuthi lanxa kuyini elitshadayo, ilanga leli liqakathekile lakubo. Kodwa nxa lokho abacela ukuthi likwenze kungamthokozisi uJehova, kuyabe kumele libachasisele kuhle kuhle ukuthi kungani lingasoze likwenze. (Kol. 4:6) Kumele basale bezwisisa ukuthi lifuna ukuba lomtshado omnandi kakhulu njalo ozatshengisa ukuthi liyamhlonipha uJehova.

¹⁷ Nxa kuyikuthi abazali benu abasibo oFakazi kungaba ngumqanso ukuthi libachasisele indlela elifuna izinto zenziwe ngayo. Kodwa akumelanga lesabe ukukhuluma labo. Umfowethu okuthiwa nguSanthosh ohlala e-India uthi: “Sathatha isikhathi eside sizama ukuchasisela izihlobo zethu lokho esasesikukhethile futhi sayamukela imibono yezihlobo zethu eyayingaphikisani lalokho okufunwa nguJehova. Sabavumela ukuthi bakhethe ukuthi kwakuzadliwani edilini lomtshado. Sakhetha lokuthi kungatshaywa irediyo futhi kungagidwa ukwenzela ukuthi singabakhubi.”

18. Ukuhleleka kuzalinceda njani? (U-1 Khorinte 14:40) (Khangela lomfanekiso.)

¹⁸ Hlelani zonke izinto ngonanzelelo. Nxa konke kuhlelekile alisoze lithwale nzima ngelanga lenu lomtshado. (Bala u-1 Khorinte 14:40.) Umfowethu okuthiwa nguWayne ohlala eTaiwan, uthi: “Kwathi sekusele amalanga amalutshwane nje ukuthi sitshade, sahlangana lalabo ababezancedisa emtshadweni ukuze sibone ukuthi zonke izinto zazimi ngomumo yini. Sahle satshengisana ukuthi sizangena njani eWolu lokuthi sizahlala njani.” Nxa libahlonipha abantu elibanxusileyo emtshadweni wenu lizazama lokubamba isikhathi.

19. Kuyini okunye okumele licabange ngakho?

¹⁹ Kumele lihlale lilungisele ukuthi lizakwenzani nxa kungavuka izinto eliyabe lingazikhangelelanga ngelanga lomtshado. (Zaga. 22:3) Ngokwesibonelo, lizakwenzani nxa lingabona thutshu abantu elingabanxusanga? Okunye okungalinceda yikuchasisela izihlobo zenu ukuthi imitshado yaboFakazi bakaJehova yenziwa njani lokuthi yiphi imikhuba elingasoze liyenze. Mhlawumbe nxa kuvuma ungabacela ukuthi babale isihloko esithi: “Kuyini Okwenzakala Emitshadweni YaboFakazi BakaJehova?” esitholakala ku-jw.org. Nxa lifuna ukuba leqiniso lokuthi izinto zonke zihamba kuhle, khethani umzalwane ozazi kuhle izimiso eziseBhayibhilini ukuthi abe ngumphathi wedili. (Joh. 2:8) Nxa lingamchasisela khona kanye elikufunayo uzalincedisa ukuthi umtshado wenu ube muhle kakhulu njalo ube ngothokozisa uJehova.

20. Kuyini okumele likukhumbule nxa lilungiselela umtshado?

²⁰ Mhlawumbe sikhuluma sisenzenje ikhanda vele seliduma nxa ucabanga ngokuthi umkhulu kangakanani umsebenzi okumele wenziwe nxa ulungiselela ukutshada. Kodwa kumele likhumbule ukuthi umbuthano lo olungiselelwa kangaka ngowelanga elilodwa nje kuphela. Yikho hlelani umtshado ongasoze ube lezinto ezinenginengi futhi ozadumisa uJehova. Khumbulani ukuthi okuqakathekileyo yikuthi liqhubeke likhonza uJehova lithembekile. Nxa lingawasebenzisa wonke amacebo atholakala esihlokweni lesi kalisoze lizisole ngitsho nxa selicabanga ngelanga lenu lomtshado.—Hubo. 37:​3, 4.