Esikufunda Ebhukwini LikaJobe Kungasinceda Nxa Siseluleka Abanye

1-2. Abangane bakaJobe bathola kunjani emzini wakhe?

ABANTU abanengi bezwa ukuthi umhlaba wawusumhlanekele uJobe. Phela wayeselahlekelwe phose yikho konke ayelakho. Kusenjalo amadoda amathathu ayengabangane bakaJobe angena umango aqonda e-Uzi esiyamkhalela. Amadoda la kwakungu-Elifazi, uBhilidadi kanye loZofari. Abakubonayo ngesikhathi befika lapho kwakuzwisa usizi, basala bebambe owangaphansi.

² Indoda le eyayinothile yathathelwa inkomo zonke kanye labobabhemi. Izimvu zayo zaqothulwa ngumlilo, kwazothi amakamela ayo wonke athunjwa. Izisebenzi zayo ezinengi zabulawa. Kumele ukuthi bayibona lendlu eyayidilikele phezu kwabantwana bakaJobe. Besathi bakubonile lokho, nangu uJobe laye uhlezi esilotheni, umzimba lo awukhangeleki uyaphihlika ngamathumba. Amadoda la ahlala laye okwamalanga ayisikhombisa kodwa akula ngitsho loyedwa wabo owake wakhuluma loJobe. (Jobe. 2:​12, 13) Kusenjalo, kwafika indoda okuthiwa ngu-Elihu layo yafika yahlala khonapho. Kwakulokhe kuthe cwaka, kwaze kwathi ngelikade uJobe wabhoboka, waqalekisa ilanga azalwa ngalo, waze wathi ufisa lokuthi ngabe uyazifela. (Jobe. 3:​1-3, 11) UJobe wayesebunzimeni sibili! Kambe ukuthi abangane bakhe babezakwenelisa yini ukumduduza? Kwakuzakhanya yini ukuthi bayamthanda lokuthi bayamzwela?

3. Sizaxoxa ngani esihlokweni lesi?

³ UJehova waphefumulela uMosi ukuthi abhale phansi lokho okwakhulunywa ngamadoda ayevakatshele uJobe. UMosi waphinda wabhala lalokho abakwenzayo. Kukhanya angani amanye amazwi u-Elifazi awakhulumayo wayewatshelwe lidimoni kodwa lokho okwakhulunywa ngu-Elihu kwakuvela kuJehova. (Jobe. 4:​12-16; 33:​24, 25) Yikho lanxa ibhuku likaJobe lilamacebo amahle kakhulu futhi angasinceda, iqiniso elikhona yikuthi ebhukwini leli kulamanye amazwi ayingozi kakhulu. Esihlokweni lesi sizaxoxa ngokuthi singakusebenzisa njani lokho esikufunda ebhukwini likaJobe nxa siseluleka abanye. Sizabona ukuthi yiziphi izifundo esizithola ku-Elifazi, uBhilidadi loZofari besesibona lokuthi singamlingisela njani u-Elihu. Sizabona lokuthi okwenziwa ngamadoda la kwakungawanceda njani ama-Israyeli lokuthi kungasinceda njani lathi.

OKWAKHULUNYWA NGAMADODA AMATHATHU

4. Kuyini okwenza abangane bakaJobe behluleka ukumduduza? (Khangela lomfanekiso.)

⁴ IBhayibhili lithi u-Elifazi, uBhilidadi loZofari basuka besiyaduduza uJobe ngenxa yobunzima obabumehlele. (Jobe. 2:11) Kodwa okudanisayo yikuthi abasakwenzanga lokho okwakubasuse phansi. Kungani sisitsho njalo? Amadoda la agijimela ukusola uJobe, awazange azinike isikhathi sokumlalelisisa. Asukela uJobe athi kulezono ayezenzile yikho uNkulunkulu wayesemjezisa.a (Jobe. 4:7; 11:14) Okwakhulunywa ngamadoda la akuzange kumduduze uJobe kodwa kwamzwisa ubuhlungu. (Jobe. 13:12) Kabili konke uBhilidadi watshela uJobe wathi ukhuluma kakhulu. (Jobe. 8:2; 18:2) UZofari yena wahle wathi uJobe kalangqondo. (Jobe. 11:12) Sekungenzakala sibili ukuthi amadoda la awazange amtshingele uJobe kodwa ameyisa. (Jobe. 15:​7-11) Amadoda la ayelokhe eqina ngokuthi kulento embi uJobe ayeyenzile.

5. UJobe wezwa njani ngokwakukhulunywe ngabangane bakhe abathathu?

⁵ Amazwi akhulunywa ngu-Elifazi, loBhilidadi loZofari ahlaba ephukela enhliziyweni kaJobe yikho laye wayesebaphikisa ukuze atshengise ukuthi konanga lutho. (Jobe. 19:2) Phela amazwi ayekhulunywe ngabangane bakaJobe yiwo amenza wacina ekhuluma engacabanganga. (Jobe. 6:​3, 26) Lanxa amadoda la ayengananzeleli, asetshenziswa nguSathane ukuze achothoze uJobe. (Jobe. 2:​4, 6) Ehluleka ukumzwela yikho ayekhuluma lokho akucabangayo kulokuthi akhulume imicabango kaNkulunkulu. Indaba le yayingawanceda njani ama-Israyeli futhi thina isinceda njani?

6. Amadoda amadala ako-Israyeli angabe afundani ku-Elifazi, uBhilidadi loZofari?

⁶ Ama-Israyeli ayengafundani? UJehova wayekhetha amadoda amadala ukuze ahlulele abantu bakhe ngendlela eqondileyo. (Dute. 1:​15-18; 27:1) Amadoda la kwakumele aqale alalelisise engakacebisi muntu kumbe engakahluleli loba ngubani. (2 Imilan. 19:6) Kwakufanele aqale ayihluze indaba kulokuzitshela ukuthi azi konke. (Dute. 19:18) Okunye okwakumele akwenze yikukhuluma kuhle labantu ayefuna ukubancedisa. Yindaba lokhu kwakuqakathekile? Kwakuzanceda ukuthi labo abathwele nzima bakhululeke ukukhuluma khona kanye okusezinhliziyweni zabo. (Eks. 22:​22-24) Lezi ngezinye izifundo amadoda amadala ko-Israyeli ayengazithola endabeni kaJobe.

7. Ngamadoda amadala wodwa yini ayengacebisa abanye futhi amanye ama-Israyeli angabe afundani endabeni kaJobe? (IZaga 27:9)

⁷ Ngesikhathi sama-Israyeli umsebenzi wokucebisa abantu wawungapheleli emadodeni amadala kuphela. Kwakungelandaba lokuthi umuntu unganani loba ukuthi ngowesilisa kumbe owesifazana, wayesenelisa ukucebisa abanye. Ngokwesibonelo, wayengacebisa abanye endabeni zokukhonza kumbe abaxwayise ngengozi ethile. (Hubo. 141:5) Umngane weqiniso kesabi ukucebisa omunye wakhe. (Bala iZaga 27:9.) Kumele ukuthi okwenziwa ngu-Elifazi, loBhilidadi loZofari kwafundisa ama-Israyeli lokho okwakungamelanga akwenze kumbe akukhulume nxa eseluleka omunye umuntu.

8. Kuyini okungamelanga sikwenze nxa sicebisa abanye? (Khangela lemifanekiso.)

⁸ Thina sifundani? Sonke siyafisa ukuncedisa abafowethu labodadewethu nxa bephakathi kobunzima. Kodwa nxa sifuna ukukwenza lokhu akumelanga silingisele abangane bakaJobe abathathu. Akumelanga sihle sizitshele ukuthi kukhona okubi abakwenzayo yikho khathesi sebevuna abakuhlanyelayo. Nxa sicebisa abafowethu labodadewethu kumele sisebenzise iLizwi likaNkulunkulu kulokubatshela lokho esizicabangela khona, njengalokho okwenziwa ngu-Elifazi kuJobe. (Jobe. 4:8; 5:​3, 27) Kumele siwabeke kuhle amazwi ethu ngoba asifuni ukukhuluma izinto ezizabalimaza. Khumbula ukuthi amanye amazwi akhulunywa ngu-Elifazi labangane bakhe ayeliqiniso sibili ngoba amanye akhona aze aphindwa ngumphostoli uPhawuli. (Khangela uJobe 5:13 lo 1 Khorinte 3:19.) Lanxa kunjalo okunengi abakukhuluma ngoNkulunkulu kwakungamanga futhi kwamzwisa ubuhlungu kakhulu uJobe. Lokhu kwenza uJehova wabazondela kakhulu abangane bakaJobe waze wathi babekhuluma amanga ngaye. (Jobe. 42:​7, 8) Kumele sinanzelele nxa sinika abanye iseluleko ngoba asifuni ukuthi basale becabanga ukuthi uNkulunkulu kabathandi kumbe ukuthi ngeke benelise ukumthokozisa. Khathesi asixoxeni ngokuthi sifundani ku-Elihu.

OKWAKHULUNYWA NGU-ELIHU

9. UJehova wasebenzisa bani ukuze aduduze uJobe njengoba amadoda amathathu ayesehlulekile?

⁹ Atshukana esatshukana amadoda amadala, okokuthi amazwi awo agcwala ezahlukweni ezingu-28 zebhuku likaJobe. Amadoda la amkhakhatha uJobe yikho laye waze wacina ecaphuka. Manje ngubani owayezamduduza futhi amqondise njengoba amadoda amathathu ayesehlulekile? UJehova wasebenzisa u-Elihu. Kanti u-Elihu wayethuleleni isikhathi sonke lesi amanye amadoda etshukana? Watshela amadoda amadala wathi: “Mina ngimncane, lina libadala ngakho ngilihloniphile ngathula.” (Jobe. 32:​6, 7) U-Elihu wayekwazi ukuthi asebecutha olumhlophe balokuhlakanipha lolwazi olunengi ukwedlula abasakhulayo ngoba kunengi asebekubonile empilweni. Ngemva kokulalela okwesikhathi eside lokho okwakukhulunywa nguJobe labangane bakhe, kwacina kumalela ukuthi athule. Wacina esithi: “Ukuba mdala akutsho ukuthi umuntu sehlakaniphile njalo abantu abadala ayisibo bodwa abakwaziyo okulungileyo.” (Jobe. 32:9) U-Elihu wayezawabeka njani amazwi akhe njengoba kwasekulithuba lokuthi akhulume?

10. Kuyini okwenziwa ngu-Elihu engakaqalisi ukukhuluma loJobe? (UJobe 33:​6, 7)

¹⁰ IBhayibhili lithi u-Elihu wazonda wabila ngenxa yalokho okwakukhulunywe ngu-Elifazi, uBhilidadi, uZofari kanye loJobe. (Jobe. 32:​2-5) Lanxa kunjalo, waqala wehlisa umoya engakakhulumi loJobe. Lokhu kwenza ukuthi akhulume laye kuhle kuhle futhi enelise ukumduduza. Watshela uJobe wathi: “KuNkulunkulu weqiniso mina lawe siyafanana.” (Bala uJobe 33:​6, 7.) U-Elihu waphinda watshela uJobe ukuthi wayelalelisisile ngesikhathi uJobe ekhuluma. Waze waphinda lamanye amazwi ayekhulunywe nguJobe. (Jobe. 32:11; 33:​8-11) Kukhanya angani u-Elihu wayeqala akhumbuze uJobe lokho ayekukhulumile engakameluleki.—Jobe. 34:​5, 6, 9; 35:​1-4.

11. U-Elihu wameluleka njani uJobe? (UJobe 33:1)

¹¹ Ngesikhathi u-Elihu encedisa uJobe wakhuluma laye ngendlela eyayitshengisa ukuthi uyamhlonipha, kazange ameyise. Uzakhumbula lokuthi u-Elihu wabiza uJobe ngebizo kodwa kukhanya angani amadoda lawana amathathu wona kawazange alisebenzise. (Bala uJobe 33:1.) U-Elihu wanika uJobe ithuba lokuthi laye akhulume. Phela wayekwazi ukuthi kubuhlungu njani ukuthi abanye bakhulume kodwa bengakuniki ithuba lokuthi lawe uke uveze owakho umbono. (Jobe. 32:4; 33:32) U-Elihu wancedisa uJobe wabona ukuthi ezinye izinto ayezikhulume ngoJehova zazingaqondanga. Wasemkhumbuza ukuthi uJehova ulenhlakanipho ejulileyo, lamandla, uhlala esahlulela kuhle futhi ulothando oluqotho. (Job 36:​18, 21-26; 37:​23, 24) Indlela u-Elihu akhuluma ngayo loJobe yenza kwaba lula ukuthi alalelisise ngesikhathi uJehova esekhuluma laye. (Jobe. 38:​1-3) Ama-Israyeli angabe afundani ku-Elihu futhi thina sifundani?

12. Abaphrofethi babancedisa njani abantu bakaJehova futhi ama-Israyeli ayengafundani ku-Elihu?

¹² Ama-Israyeli ayengafundani? UJehova wayesebenzisa abaphrofethi ukuze afundise futhi aqondise ama-Israyeli. Ngokwesibonelo, ngezinsuku zabahluleli uJehova wasebenzisa umphrofethikazi uDibhora ikanti uSamuyeli waba ngumphrofethi kaJehova kusukela esasemncane. (Abahlu. 4:​4-7; 5:7; 1 Sam. 3:​19, 20) Ngezikhathi zamakhosi uJehova wayesebenzisa abaphrofethi ukuze bancedise abantu bakhe bamkhonze ngendlela eqondileyo futhi babakhuze nxa sebephambuka. (2 Sam. 12:​1-4; Imiseb. 3:24) Kumele ukuthi abaphrofethi kanye lamanye ama-Israyeli bafunda okunengi ku-Elihu. Bangabe bafunda lokho okwakumele bakwenze kumbe bakutsho nxa beseluleka abanye.

13. Singabaduduza njani abanye?

¹³ Thina sifundani? Abantu bakaJehova bayakuqakathekisa kakhulu okukhulunywa liBhayibhili. Yikho bayazama ukuthi nxa bekhuthaza kumbe beduduza abanye basebenzise lokho okuseLizwini likaNkulunkulu. (1 Khor. 14:3) Inhlupho abafowethu labodadewethu abahlangana lazo zingenza ukuthi kwezinye izikhathi bakhulume bengacabanganga. Yikho abadala kuyabe kumele babaduduze futhi bakhulume labo ngomusa.—1 Thes. 5:14; Jobe. 6:3.

14-15. Abadala bangamlingisela njani u-Elihu nxa beseluleka omunye? Sebenzisa umzekeliso.

¹⁴ Ake sithi omunye umdala webandla unanzelela ukuthi omunye udadewethu udanile, abesecela omunye umfowethu ukuthi amphelekezele bayemkhuthaza. Udade lo ufika abatshele indlela azizwa ngayo njalo abalandisele lokuthi uyatshumayela futhi angene lemihlangano kodwa kulokuthi athokoze uyabe elokhe edanile. Abafowethu laba bangamncedisa njani?

¹⁵ Okokuqala okumele bakwenze yikuzwisisa ukuthi yindaba udadewethu lo ezizwa ngaleyondlela. Okungabanceda yikuthi bambuze imibuzo futhi balalelisise nxa esethulula isifuba sakhe. Kambe kungabe kuyikuthi uyathandabuza yini ukuthi uJehova uyamthanda kumbe ‘inkathazo zokuphila’ zingabe zimthwalise nzima? (Luk. 21:34) Okwesibili okumele abadala bakwenze yikuncoma udadewethu ngokuthi lanxa edanile kumbe ehlulukelwe uyaqhubeka engena imihlangano futhi etshumayela. Okwesithathu okumele bakwenze yikusebenzisa iBhayibhili ukuze bamncedise abone ukuthi uJehova uyamthanda. Kuyabe sekulula ukuthi bakwenze lokho ngoba bayabe sebekwazi okukhathaza udadewethu.—Gal. 2:20.

QHUBEKA UTHOLA OKUNENGI EBHUKWINI LIKAJOBE

16. Ungenzani ukuze uqhubeke uthola okunengi ebhukwini likaJobe?

¹⁶ Zinengi sibili izifundo ezisincedayo ezitholakala ebhukwini likaJobe. Esihlokweni esidlulileyo, sibonile ukuthi kungani uNkulunkulu ebekezela kangaka lanxa ebona abantu behlupheka. Sixoxe langokuthi siyenelisa ukukhonza uJehova sithembekile kungelani lenhlupho ezingasehlela. Esihlokweni lesi sibonile ukuthi nxa sifuna ukucebisa kumbe ukweluleka abanye ngendlela ezabanceda kumele silingisele u-Elihu hatshi u-Elifazi, uBhilidadi loZofari. Mhlawumbe ungaqalisa ngokulibala futhi ibhuku likaJobe ungakacebisi kumbe weluleke omunye umuntu. Nxa usulesikhathi eside wacina ukubala ibhuku leli, kungaba kuhle ukuthi ulibuyelele ngoba uzaphinda ufunde okunengi.