Wawahlulela Umhlaba

NGEMVA kweminyaka u-Inokhi efile, ezinye izingilosi zahlamuka ezulwini. Zahawukela abesifazana ababesemhlabeni, yikho zatshiya imizimba yomoya zatshintsha zaba ngabantu. Zazithathela bonke abesifazana ezazibafuna zabenza abafazi bazo. Abantwabazo babebizwa ngokuthi ngamaNefilimi. Babeqine kakhulu futhi belodlakela. Kwasekugcwele ububi emhlabeni, abantu ababedalwe nguNkulunkulu basebewonakele. Kodwa kulomuntu oyedwa owayengafanani labo, nguNowa umzukulu ka-Inokhi.

UNowa wayeyindoda elungileyo njengo-Inokhi. IBhayibhili lithi: “UNowa wahamba loNkulunkulu weqiniso.” Ngokuhamba kwesikhathi uNowa watshada futhi yena lomkakhe bafundisa amadodana abo amathathu ukulalela uJehova. Lokhu yikho okwenza imuli le yangafanani labanye abantu ababesemhlabeni.

Ngelinye ilanga uJehova watshela uNowa ukuthi wayesefuna ukutshabalalisa bonke abantu ababi ababesemhlabeni. Kodwa uJehova waphinda wamtshela indaba ezinhle. UNowa kwakumele akhe umkhumbi ukuze yena labanye abantu basindiswe. Selokhu wazalwayo wayengakaze abone uZamcolo futhi wayengakaze akhe umkhumbi. Kodwa wamthemba uJehova, yikho waqalisa umsebenzi.

Kwakumele uNowa lemuli yakhe babe lesibindi ukuze benze umsebenzi lo. Kufanele ukuthi abantu babebahleka futhi bezama ukuphambanisa umsebenzi wabo. Izingilosi ezahlamukayo zazisesabeka futhi abantwabazo babelodlakela. Kodwa uNowa lomkakhe lamadodana abo amathathu kanye labomkabo baqhubeka belalela uJehova. Abantu laba abangu-8 basebenza okweminyaka engaba ngu-50 besakha umkhumbi.

Phezu kokwakha kulomunye umsebenzi owawusenziwa nguNowa. IBhayibhili lithi indoda le ‘yayingumtshumayeli wokulunga.’ Njengoba uNowa wayeyinhloko yemuli wakhokhela ekuxwayiseni abantu ngoZamcolo. Kodwa abantu bephulela izigodo endlebeni, ngitsho lezihlobo zabo azizange zizihluphe ngalokho okwakukhulunywa nguNowa. Abantu babengafuni ukutshintsha. UNowa wayelokholo, etshiyene labantu ayephila labo. Kuyacaca ukuthi kungani iBhayibhili lisithi: “Ngokholo lolu wawahlulela umhlaba.”

Wacina uphelile umsebenzi wokwakha. UNowa lemuli yakhe baqoqa izinto ababezazisebenzisa bazifaka emkhunjini. Kwasekusenzakala isimanga, yonke imihlobo yezinyamazana ezinduna lezinsikazi zazibuyela emkhunjini zihamba ngazimbili.

UNkulunkulu wayesemtshelile uNowa ukuthi angene emkhunjini lemuli yakhe ngoba izulu lalizakuna ngemva kwamalanga angu-7. Akubabone ngelihlo lengqondo bonke nje emulini kaNowa bedidizela beqoqa izinto ezitshiyeneyo bezifaka emkhunjini. Kufanele ukuthi abantu babebahleka kodwa bathi sebefake yonke into emkhunjini uJehova wavala umnyango. Kumele ukuthi abantu ababebahleka bayangeka. Izulu lathululeka, amanzi agcwala indawo yonke. Lana okwamalanga angu-40, amanzi aze avala lezintaba. UJehova wabaqeda bonke abantu abenza okubi.

UNowa lemuli yakhe bahlala emkhunjini bevikelekile okwesikhathi esedlula umnyaka. Ngalesosikhathi amanzi ayelokhu esehla emhlabeni. Ngokuhamba kwesikhathi umkhumbi wahlala phezu kwentaba, uJehova wasetshela uNowa ukuthi baphume. Yikho baphuma emkhunjini basebesenzela uJehova umhlatshelo bembonga ukuthi ubasindisile. UJehova wathembisa ukuthi wayengasoze aphinde alethe uZamcolo emhlabeni. Wenza umchilowamakhosikazi waba yisibonakaliso esitshengisa ukuthi uzasigcina isithembiso sakhe.

Wonke umuntu okhona lamuhla emhlabeni uyisizukulwane sikaNowa. Siyambonga kakhulu uNowa lemuli yakhe ngoba babalesibindi bazimisela ukuhlala bengafanani labantu ababephila labo.

Bala indaba le eBhayibhilini:

• UGenesisi 6:1–8:22; 9:​8-19

• KumaHebheru 11:7

• 2 UPhetro 2:5

Ingxoxo:

UNowa watshengisa njani ukuthi ulesibindi?

Julisa Ingqondo

1. 1. Abantu babenjani kungakafiki uZamcolo? (w02 3/1 5 ¶3–6 ¶4-wcgr)

   Bhala impendulo

2. 2. UNkulunkulu wamtshela nini uNowa ukuthi akhe umkhumbi? Wamtshela nini ukuthi uZamcolo wayesezaqalisa? (w12 4/15 23 ¶5-8-wcgr)

   Bhala impendulo

3. 3. Kuyini okwenza singathandabuzi ukuthi uZamcolo waba khona? (ijwbq isihloko 156 ¶2-5, ibhokisi) A

   Bhala impendulo

   

   Historic Collection/Alamy Stock Photo

4. 4. Kuyini okwenzakalayo ngemva kweminyaka edlula 100 kube loZamcolo futhi lokhu kungabe kwamphatha njani uNowa? (it “UNowa” No. 1 ¶12-wcgr) B

   Bhala impendulo

   

Cabangisisa Ngezifundo

• Isikhathi esiphila kuso sifanana njani lensuku zikaNowa? (Mat. 24:​36-39)

  Bhala impendulo

• Isibonelo sikaNowa sikufundisani endabeni yokuba ngumuntu . . .

  • ohlelekileyo? C

    Bhala impendulo

    

  • okhutheleyo? D

    Bhala impendulo

    

  • obekezelayo? E

    Bhala impendulo

    

• Ngingenzani ukuze ngibe lesibindi njengoNowa?

  Bhala impendulo

Cabangisisa

• Indaba le ingifundisani ngoJehova?

  Bhala impendulo

• Indaba le ingenelana njani lenhloso kaJehova?

  Bhala impendulo

• Ngizambuzani uNowa nxa esevusiwe?

  Bhala impendulo

Funda Okunengi

Bona ukuthi inhloko yemuli imlingisela njani uNowa.

Lingisela Ababelokholo, Ungalingiseli Ababengelalo—UNowa, Hatshi Omakhelwane Bakhe (2:57)

Ncedisa abantwabakho bafunde esibonelweni sikaNowa.

“UNowa Wayelokholo KuNkulunkulu” (ijwis isihloko 18-wcgr)