Wahamba LoNkulunkulu

U-INOKHI wayekwazi ukuthi kunjani ukuba yindlubu ewele ephokweni. Wayetshiyene kakhulu labantu ayephila labo. Phakathi kwabantu bonke ababephila ngalesosikhathi, nguye yedwa iBhayibhili elithi, “waqhubeka ehamba loNkulunkulu weqiniso.” Lokhu wakwenza njani njengoba wayengumuntu nje ophila emhlabeni? Okwenzakala ku-Inokhi kusifundisani endabeni yokuba lesibindi?

U-Inokhi watshengisa ngendlela ezimbili ukuthi wayehamba loNkulunkulu. Kwakhanya ngalokho akhetha ukukwenza lalokho angazange avume ukukwenza. Kazange avume ukufanana labantu ababengamkhonzi uNkulunkulu ababephila ngalesosikhathi. Wayeyisizukulwane sesikhombisa kusukela ku-Adamu lo-Eva. U-Adamu wayesaphila kodwa wayeseluphele. (Khangela itshathi elithi “Kusukela Ku-Adamu Kusiya Kubahluleli.”) Abantu abanengi ngalesosikhathi babemhlamukela uNkulunkulu njengalokho okwakwenziwe ngu-Adamu lo-Eva. UKhayini wabulala umfowabo u-Abela, indoda yokuqala eyayilokholo. Abanye abazukulu bakaKhayini babelolunya njengaye futhi mhlawumbe bemdlula. (Gen. 4:​23, 24) U-Inokhi yena waba lesibindi, kazange avume ukucina eselodlakela njengabantu ayephila labo. Waqhubeka eyindoda elokuthula futhi ethokozisa uNkulunkulu.

Kusasele iminyaka ukuthi u-Inokhi azalwe, “abantu baqalisa ukubiza ibizo likaJehova.” (Gen. 4:26) Kukhanya abantu laba babelisebenzisa kubi ibizo likaJehova futhi bekhonza ngendlela angayifuniyo. U-Inokhi yena kazange akwenze lokhu. Yena wayelithanda futhi elihlonipha ibizo likaJehova elingcwele. Lokhu yikho okwenza wangafanani labantu ayephila labo.

U-Inokhi kwakumele abe lesibindi ukuze enze lokho uJehova ayemtshele khona. UNkulunkulu wayemnike umsebenzi oqakatheke kakhulu wokuba ngumphrofethi. Kwakumele atshele abantu umlayezo ovela kuNkulunkulu. Umlayezo wakhona wawusithi: “UJehova weza lezingilosi zakhe ezingcwele ezingamatshumi ezinkulungwane ezokwahlulela bonke abantu njalo ezobalahla ngecala bonke abangamesabiyo ngenxa yezenzo zabo ezimbi kakhulu langenxa yezinto ezethusayo izoni ezingamesabiyo uNkulunkulu ezazizikhuluma ngaye.”

Unanzelele yini ukuthi isiphrofetho sika-Inokhi sibhalwe angani uNkulunkulu wayesebahlulele kudala abantu? Lokhu kwakutshengisa ukuthi amazwi ka-Inokhi ayezakwenzakala sibili. Umlayezo wakhe wawungathambanga. U-Inokhi wabatshela ukuthi bangabantu abangamesabiyo uNkulunkulu futhi bayizoni. Kufanele ukuthi amazwi la abacaphula abantu ababemlalele. Lanxa kunjalo waba lesibindi sokubatshela lokho uJehova ayethe abatshele khona.

Pho abantu benzani? IBhayibhili alisitsheli. Kodwa litshengisa ukuthi kulesikhathi lapho u-Inokhi ayesesengozini khona. Phela iBhayibhili lithi: “Kazange aphinde abonakale ngoba uNkulunkulu wamsusa.” Wakwenzelani lokhu? Kukhanya abantu laba ababi basebemhlukuluza u-Inokhi. UJehova wayemthanda umngane wakhe yikho kazange avume ukuthi bamlimaze kumbe bambulale. Wenza u-Inokhi walala ekufeni futhi kwakungaselalutho ababengamenza lona. Lanxa u-Inokhi wayesefile, uJehova wayelokhu emkhumbula.

Kodwa u-Inokhi engakafi, uJehova wamnika isipho esiligugu. IBhayibhili lithi: “Engakasuswa wathola ubufakazi bokuthi wayemthokozise kakhulu uNkulunkulu.” Mhlawumbe uJehova watshengisa u-Inokhi umbono wempilo ayezayiphila ngesikhathi esizayo emhlabeni olipharadayisi ogcwele ukuthula. Yikho u-Inokhi engakalali ekufeni, kulento eyodwa ayeyazi engayiphumputhi. Wayekwazi ukuthi uJehova uyamthanda lokuthi uzambusisa ngenxa yokuthi ulokholo lesibindi.

Bala indaba le eBhayibhilini:

• UGenesisi 5:​21-24

• KumaHebheru 11:5

• UJuda 14, 15

Ingxoxo:

U-Inokhi watshengisa njani ukuthi ulesibindi?

Julisa Ingqondo

1. 1. Kutshoni ukuthi abantu baqalisa ukubiza ibizo likaJehova? (Gen. 4:26; w01 9/15 29 ¶3-wcgr)

   Bhala impendulo

2. 2. U-Inokhi waba ngumuntu wokuqala ukwenzani? Kuyini okwenza wenelisa ukwenza umsebenzi ayewuphiwe? (w01 9/15 31 ¶5-wcgr)

   Bhala impendulo

3. 3. Kuyini okungabe kwenza u-Inokhi wahle wabakwazi ukuthi kumele abe lesibindi lanxa wayengakabi ngumphrofethi? (w06 10/1 19 ¶13-14) A

   Bhala impendulo

   

4. 4. Ungachasisa njani ukuthi u-Inokhi kazange aye ezulwini? (Joh. 3:13; Heb. 11:​5, 13)

   Bhala impendulo

Cabangisisa Ngezifundo

• Kunini lapho okumele sibe lesibindi khona nxa sitshumayela? Isibonelo sika-Inokhi singasinceda njani? B

  Bhala impendulo

  

• UJehova uzwa njani nxa silesibindi? (Zaga. 27:11; Heb. 11:5)

  Bhala impendulo

• Ngingamlingisela njani u-Inokhi?

  Bhala impendulo

Cabangisisa

• Indaba le ingifundisani ngoJehova?

  Bhala impendulo

• Indaba le ingenelana njani lenhloso kaJehova?

  Bhala impendulo

• Ngizambuzani u-Inokhi nxa esevusiwe?

  Bhala impendulo

Funda Okunengi

Isibonelo sika-Inokhi singakunceda njani nxa uphila labantu abalodlakela?

Lingisela Ababelokholo, Ungalingiseli Ababengelalo—U-Inokhi, Hatshi ULamekhi (2:53)

Bona ukuthi kuyini okwanceda u-Inokhi waba lokholo.

“Hamba LoNkulunkulu Ngezikhathi Lezi Ezinzima” (w05 9/1 13-17-wcgr)