3 USARA
Kazange Acabange Emuva
USARA wayetshade lo-Abrahama. Babehlala eShinari edolobheni le-Uri elaligonjolozelwe ngumfula uYufrathe. Abantu ababehlala edolobheni lelo babekhonza izithombe. Kodwa u-Abrahama wayetshiyene labo ngoba wayekhonza uNkulunkulu weqiniso, uJehova. USara laye wayekholwa kuNkulunkulu weqiniso. Kodwa ngelinye ilanga kwasekumele atshengise ukuthi ulokholo lesibindi.
U-Abrahama wamtshela ukuthi uJehova wayekhulume laye. Kufanele ukuthi uSara wathaba esizwa lokho kodwa kumele ukuthi wadana esizwa ukuthi uJehova wayetheni. Kwasekumele batshiye umuzi wabo lezihlobo e-Uri baye endaweni ekhatshana. Babezahamba umango omude okuzwayo behlala ematendeni. Kwasekuphelile okokuhlala edolobheni elivikelweyo. Wayengasoze aphinde akubone ukuhlala endlini enhle elempompi zamanzi lokunye nje okuhle. Wayengasoze aphinde ayethenga izinto azifunayo emakethe ye-Uri. Wayezahlangana lobunzima obukhulu sibili. Lanxa kunjalo uSara wavuma watshengisa ukuthi ulokholo kuJehova. Wapakitsha impahla zakhe, wavalelisa izihlobo labangane, yena lomkakhe bangena indlela besiya lapho okungaziwa khona.
USara kazange atshone ehluphana lo-Abrahama efuna babuyele e-Uri. Kodwa wamsekela baya lapho uJehova ayethe baye khona
Kulokunye futhi okutshengisa ukuthi uSara wayelesibindi. Umphostoli uPhawuli wabhala ngaye lomkakhe wathi: “Aluba babehlala bekhumbula indawo ababesuke kuyo, babezalithola ithuba lokubuyela.” (Heb. 11:15) USara wayengacabanga ngomuzi wakhe kanye lendlela idolobho le-Uri elalivikeleke ngayo. Kodwa yena kazange acabange emuva.
Bathi sebefikile elizweni leKhenani, uSara wazibonela ukuthi kwakungelamfula omkhulu njengoYufrathe lapho abathengisi ababebuya khona lempahla besuka ezindaweni eziseduze lezikhatshana. Kwathi sekulendlala eKhenani kwasekumele zibotshwe futhi baye kweyinye indawo. USara kazange atshone ehluphana lomkakhe efuna ukuthi babuyele e-Uri. Kodwa wasekela umkakhe basuka belubangise eGibhithe.
USara wayemuhle, elitshatshazi ngokwalo. Yikho u-Abrahama wayesesaba ukuthi usengabulawa athathelwe umfazi. Ngakho babumba icebo lokuthi uSara athi ungudadewabo ka-Abrahama. Kodwa lokho akuzange kubafikise ndawo ngoba uFaro inkosi yaseGibhithe wezwa ukuthi kwakulecitshalanga elalifikile lapho. Yikho wahle wathi uSara ayelandwa azohlala esigodlweni. Kuliqiniso sibili ukuthi esigodlweni uSara wayengabe ethola yonke into futhi evikelekile ukwedlula ematendeni. Kambe wake walingeka ukuthi atshiye u-Abrahama ayendele kuFaro? Ngitsho! Watshengisa ukuthi ulesibindi, waqhubeka eqotho kumkakhe futhi uJehova wamkhulula. Masinyane nje wabuyela kumkakhe u-Abrahama.a
UJehova wayethembise u-Abrahama ukuthi isizukulwane sakhe sizakuba yisizwe esikhulu. Kodwa uhlupho olwalukhona yikuthi uSara wayengelamntwana futhi lokhu kwakumkhathaza kakhulu. Ngemva kweminyaka eminengi behlala eKhenani uJehova wambusisa uSara. UJehova wasigcwalisa isifiso sikaSara lanxa wayeseleminyaka engu-90. Wamnika umntwana wasesithi bamuphe ibizo elithi Isaka elitsho “Ukuhleka.” U-Abrahama loSara bahleka ngesikhathi besizwa ukuthi bazakuba lendodana futhi uSara wathi abantu babezahleka laye besizwa ngesimanga uJehova ayemenzele sona.
USara wamondla umntanakhe futhi wakhula waba yindoda elungileyo. Kwakumele abe lesibindi ukuze amvikele umntanakhe. USara kazange acabange ngempilo ayeyiphila kudala kodwa wayethe nhlo phambili elindele izithembiso zikaNkulunkulu. Ngesikhathi esizayo yena lemuli yakhe bazathokoza sebebona izithembiso zikaNkulunkulu zigcwaliseka.
Bala indaba le eBhayibhilini:
Ingxoxo:
USara watshengisa njani ukuthi ulesibindi?
Julisa Ingqondo
1. Kwakuqondile yini ukuthi uSara atshade lo-Abrahama yena wayengumfowabo? (wp17.3 12 ¶5, amabala angaphansi)
2. Yiziphi izinto uSara azitshiya e-Uri? (wp17.3 13 ¶3–14 ¶2) A
Photograph taken by courtesy of the British Museum
Umfanekiso A: Umceciso omuhle owavunjululwa edolobheni le-Uri
3. Kuyini okutshengisa ukuthi u-Abrahama wenza icebo elihle ngokufihla ukuthi uSara ngumkakhe? (wp17.3 14 ¶6–15 ¶2)
4. USara wayemhlonipha u-Abrahama, kodwa lokho sekusitsho ukuthi wayenguvumazonke yini? Chasisa. (g 1/08 29 ¶4-5-wcgr) B
Umfanekiso B
Cabangisisa Ngezifundo
Qathanisa uSara lomkaLothi:
Kungaphi lapho ababefanana khona? (Gen. 12:1; 13:5-7; 19:12, 15)
Kungaphi lapho ababetshiyene khona? (Gen. 19:17, 26; Luk. 17:28-32)
Izinqumo abazenzayo zisifundisani?
USara wayemuhle futhi umkakhe enothile. Isibonelo sakhe sisifundisani endabeni yobuhle lenotho? (Zaga. 31:30; 1 Thim. 6:17-19)
Ungamlingisela njani uSara endabeni yokuba lesibindi? C
Umfanekiso C
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Ngizambuzani uSara nxa esevusiwe?
Funda Okunengi
Isibonelo sikaSara sinceda amakhosikazi wodwa yini? Amadoda wona afundani esibonelweni sikaSara?
U-Abrahama loSara batshengisa njani ukuthi bayahloniphana?
“‘Ilangabi LikaJah’ Kalihlale Livutha” (w23.05 24-25 ¶15-17)
a Ngokuhamba kwesikhathi iNkosi u-Abhimeleki layo yathatha uSara ku-Abrahama. USara waba lesibindi walandela konke umkakhe ayemtshele khona futhi uJehova wamvikela.