Ukuphrinta Amabhuku Lanxa Abanengi Sebesebenzisa Ezempucuko

Ujayele ukusebenzisani nxa ufuna ukubala iBhayibhili kumbe amabhuku esiwaphiwa yinhlanganiso? Abanengi bethu sisebenzisa amafoni kumbe ama-tablet, asisasebenzisi amabhuku aphrintiweyo. Kungenzakala ukuthi lesihloko lesi usibala efonini kumbe ekhompiyutheni. Siyambonga uJehova lenhlanganiso yakhe ngokuthi amabhuku ethu ayatholakala ku-JW Library laku-jw.org.

Kungani amabhuku ethu amanengi esephuma kwezempucuko? OFakazi abanengi bathanda ukubala amabhuku ethu kwezempucuko ngoba kwenza impilo ibe lula futhi bazithola masinyane izinto abangazisebenzisa nxa bechwayisisa. Kanti njalo nxa sitshumayela, esesikuqakathekisa kakhulu yikuqalisa izingxoxo lanxa siyabe silokhu sibanika amabhuku abantu.

Lokhu sekwenze ukuthi inani lamabhuku ebesiwaphrinta eminyakeni engu-10 edlulileyo lehle kakhulukazi. Ngo-2015, abantu abanengi bebengakaqalisi ukudawuniloda amabhuku ethu ku-JW Library, yikho imitshina yethu eminengi yokuphrinta ibisebenza okwamahora angu-16 ngelanga. Kanti njalo kwasekulabantu abanengi abafuna amabhuku aphrintiweyo okokuthi kwezinye indawo kwasekuhlelwa ukuthi kuphrintwe okwamahora angu-24 ngelanga. Kodwa khathesi ezindaweni ezinengi sokuphrintwa okwamahora angu-8 ngelanga.

Inhlanganiso yethu ayisiyo yodwa esiphrinta amabhuku amalutshwana. Abachwayisisayo abanengi sebenanzelele ukuthi eminyakeni le sekuphrintwa izinto ezilutshwane sibili. Kodwa kuyadingakala yini ukuthi siqhubeke siphrinta amabhuku njengoba abantu abanengi sebesebenzisa ezempucuko? Ye! Asiboneni ukuthi yindaba siqhubeka siphrinta amabhuku lokuthi iminikelo yenu isinceda njani ukuthi sikwenze lokhu.

Yindaba Kulokhu Kudingakala Amabhuku Aphrintiweyo?

Abanye abafowethu labodadewethu balokhu besebenzisa amabhuku aphrintiweyo. Zwana ukuthi abanye bakhona bathini:

“Ngisebenzisa amabhuku aphrintiweyo ngoba akula okunye engingakwenza. Angilamali yokuthenga ifoni loba i-tablet. Lanxa ngingayithola imali yakhona, kuyabe kunzima ukutshaja izinto lezo ngoba amagetsi ahlala ehambile ngapha. Yikho kungahlupha ukuthemba ezempucuko.”—U-Odete oweMozambique.

“Angilamali yokuthenga ifoni loba i-tablet. Lanxa ngingaze ngibe layo imali, amafoni lama-tablet atshiphileyo awaqinanga futhi kuyabe kumele uhlale uwalungisisa. Nxa isalungiswa ngiyabe ngingasela lapho engingabala khona amabhuku ethu.”—ULinley oweMalawi.

“Mina labantwabami ababili abangamankazana sisebenzisa ifoni eyodwa ngoba asilamali yokuthenga amanye. Emihlanganweni yebandla siyatshintshana: Nxa oyedwa esebenzisa ifoni, ababili bayabe besebenzisa amabhuku aphrintiweyo.”—USinine oweMicronesia.

Abanye abafowethu labodadewethu balawo amafoni lama-tablet abangabala khona amabhuku ethu kodwa bona bathanda aphrintiweyo. Zwana ukuthi bathini:

“Ngijayele ukusebenzisa ezempucuko nxa ngibala. Kodwa nxa ngilungiselela imihlangano ngithanda ukusebenzisa amabhuku aphrintiweyo. Ngiyakukholisa ukubala ibhuku eliphrintiweyo engiyabe ngizibambele lona ngezami. Ngithanda ukudwebela imicijo eqakathekileyo lokubhala engiyabe ngikuthandile eceleni. Lokho ngingakwenza lakwezempucuko kodwa nxa ngizibhalela ebhukwini eliphrintiweyo kuba lula ukukukhumbula lokukusebenzisa.”—UMárcia oweBrazil.

“Nxa ngibala kwezempucuko amehlo ami ayaphangisa ukudinwa, yikho ngikubona kulula ukuthi ngibale amabhuku aphrintiweyo. Okunye okungihluphayo yikuthi angizazi kangako ezempucuko. Ngithwala nzima ukubhala imicijo, ukudawuniloda izinto lokuthola engikudingayo.”—USelina oweMozambique.

“Ngisebenzisa ifoni lekhompiyutha ilanga lonke. Kodwa nxa sengifuna ukufunda kuhle kuhle ngoJehova, ngiyatshiyana lezempucuko ngisebenzise amabhuku aphrintiweyo. Kungenza ngizibalele kuhle ngingaphanjaniswa ngamameseji ayabe elokhu engena.”—UGuillaume oweCanada.

“Nxa uxoxa lomuntu okokuqala ekutshumayeleni, akulula ukuthi uhle umcele inamba zakhe zefoni ukuze umthumezele ibhuku ngezempucuko, yikho esikwenzayo yikumnika ibhuku eliphrintiweyo. Okunye yikuthi indawo esitshumayela kuzo ziyingozi, yikho siyazama ukungasebenzisi kakhulu amafoni lama-tablet.”—Umbonisi wesiqinti oseSouth America.

Kuyini esikwenzayo ukuze sincede abafowethu labodadewethu abasebenzisa amabhuku aphrintiweyo?

Ukuphrintela Abafowethu Labodadewethu

Amabhuku ethu alokhu ephrintwa emagatsheni angu-9. Ngomnyaka wenkonzo ka-2025 siphrinte izinto ezitshiyeneyo ezedlula 1.5 bhiliyoni. Ngokwesibonelo siphrinte amaBhayibhili adlula 3 miliyoni, amabhuku adlula 18 miliyoni, lamaphetshana lezimemo okwedlula 941 miliyoni. Sisebenzise imali edlula 35 miliyonia ekuphrinteni izinto lezi. Kanti njalo eminyakeni emithathu edlulileyo, sisebenzise imali engange-10 miliyoni ukuze sithuthukise imitshina yethu ihambisane lesikhathi.

Siphrinta kuphela lokho abafowethu labodadewethu abakudingayo futhi lokhu kuyasinceda ukuthi siyisebenzise kuhle iminikelo. Lanxa sibanika amabhuku abantu, esesikuqakathekisa kakhulu yikuqalisa izingxoxo njengoba sike satsho. Yikho eminyakeni engu-10 edlulileyo, besilokhu sisehlisa inani labomagazini esibaphrintayo. Ngokwesibonelo, ummemezeli ngamunye ubephrintelwa omagazini okuthiwa yi-Vukani! abangu-86 ngomnyaka, kodwa khathesi usephrintelwa abangu-11 ngomnyaka. OFakazi abanengi sebesebenzisa kakhulu ama-contact cards, yikho sesiphrinta amanengi ukwedlula lawo esasiwaphrinta kungakabi ngu-2020.

“UNkulunkulu Uthanda Wonke Umuntu”

Abafowethu labodadewethu bayathokoza kakhulu ngenxa yokuthi siqhubeka siphrinta amabhuku. URicardo ohlala eBrazil uthi: “Ngiyazigqaja ngokuba senhlanganisweni elothando kangaka njalo eba leqiniso lokuthi amabhuku akhuluma ngeBhayibhili atholwa yiwo wonke umuntu okugoqela lalabo abangenelisi ukuwabala kwezempucuko. Lokhu kwenza ‘loba ngubani owomileyo laloba ngubani ofisayo’ ukuthi athole iqiniso elizakwenza asinde.” (ISambulo 22:17) UBernard ohlala eTahiti uthi: “Ngiyabonga kakhulu ukuthi inhlanganiso kaJehova iyasiphrintela amabhuku. Lokhu tshengisa ukuthi ilothando, iyazwisisa njalo yenza ngokuhlakanipha. Phela iba leqiniso lokuthi wonke umuntu uyazithola izindaba ezinhle zoMbuso kungelani lokuthi mncane kumbe mdala, unothile kumbe ungumyanga. Kuyazicacela ukuthi uNkulunkulu wethu ulendaba lomuntu ngamunye.”

U-Andréia ohlala eBrazil uyabonga ukuthi iminikelo yakhe iyancedisa ekuphrinteni amabhuku. Uthi: “Inhlanganiso yethu isebenzisa imali, isikhathi, iziphiwo lamandla alabo abazinikeleyo ukuze iphrinte amabhuku azasetshenziswa yilabo abangenelisiyo ukusebenzisa ezempucuko. Lokhu kwenza ngingathandabuzi ukuthi uNkulunkulu uthanda wonke umuntu. Lanxa iminikelo yami ingasetshenziswa ekuphrinteni amabhuku kuphela, angisoze ngiyekele ukunikela.”

Siyabonga kakhulu ngeminikelo yenu, okugoqela laleyo eliyenza ku-donate.jw.org. Isinceda siqhubeke siphrinta amabhuku azasetshenziswa yilabo abawadingayo kumbe abathanda ukusebenzisa aphrintiweyo.