Ukuphrinta Ngendlela Elula Ukuze Kuncedwe “Abantu Bemihlobo Yonke”

UJehova uNkulunkulu ufuna ‘abantu bemihlobo yonke bathole ulwazi oluqondileyo lweqiniso.’ (1 KuThimothi 2:3, 4) Kodwa abafowethu labodadewethu kanye lalabo esibatshumayezayo bakhuluma izindimi ezitshiyeneyo. Ngakho umnyaka ngamunye siphrinta amabhuku angaba yi-2 bhiliyoni ngalezondimi ukuze abantu bathole ulwazi olubaqinisa ukholo. Manje kuyini okwenziwe yinhlanganiso ukuze umsebenzi lo uphumelele ngapha iminikelo isetshenziswa kuhle?

Sesilemitshina Yokuphrinta Ethuthukisiweyo

Eminyakeni engaba ngu-40 edlulileyo, amabhuku ethu abephrintwa emazweni adlula 40. Lanxa kunjalo umsebenzi wokuphrinta ubulokhu uthuthukiswa njalo uhlelwa kutsha okokuthi khathesi ususenziwa ezindaweni ezingu-9 kuphela. Lenani lezindimi ezilamabhuku ahlala ephrintwa selikhule ngamaphesenti angaba ngu-500! Kwenzakala njani ukuthi kuphrintwe amabhuku amanengi kangaka kodwa kusetshenziswa indawo zokuphrintela ezilutshwana? Esinye isizathu yikuthi khathesi sesilemitshina yokuphrinta ethuthukisiweyo.

Imitshina le yenza kube lula ukuthi kuphrintwe amabhuku amanengi ngesikhathi esincane. Kusasetshenziswa imitshina emidala kwakuthatha isikhathi eside ukuthi imitshina yakhona iqalise ukuphrinta nxa sokuphrintwa okulandelayo. Njengoba sekusetshenziswa imitshina ethuthukisiweyo, ukwenza lokhu akusathathi sikhathi. Khathesi sekulula ukuthi kuphrintwe izinto ezinengi masinyane njalo ukuphrinta amabhuku amalutshwana ngezindimi ezikhulunywa ngabantu abangabanengi kangako lakho akusathathi sikhathi. Lanxa kunjalo imitshina le iyabe idinga ama-printing plates amatsha nxa kuyikuthi obekuphrintwa sekuphelile, sekumele kungene okunye. Esikhathini esisanda kwedlula, sisebenzise imali engaba yi-2 miliyoni ukuze sithenge ama-printing plates esiwasebenzise okwenyanga ezingu-12 kuphela.a Yikho nxa kuzaphrintwa amabhuku amalutshwana siphrinta ngemitshina engawasebenzisiyo ama-printing plates. Ukusebenzisa imitshina le konga imali ngenxa yokuthi isebenzisa izinto ezilutshwana ukuze iphrinte.

Eminyakeni emithathu edlulileyo kusetshenziswe imali edlula 10 miliyoni ukuze kuthengwe njalo kuthuthukiswe imitshina yokuphrinta leyokubambanisa amabhuku. Kuqala kwakulezinto ezedlula 40 okwakumele zenziwe nxa kuphrintwa iBhayibhili, okugoqela ukuquma, ukuthunga lezinye nje izinto ezenziwayo ukuze kucine sekuliBhayibhili. Kanti njalo izikhathi ezinengi amaBhayibhili ayethwalwa ngezandla nxa kusenziwa zonke izinto lezo. Manje khathesi sesiyisebenzisa njani imitshina ethuthukisiweyo ukuze siphrinte amaBhayibhili? Abafowethu sebesenza izinto ezingu-10 kuphela nxa bewaphrinta ngemitshina le emitsha futhi kulokuthi bawathwale ngezandla, imitshina yiyo esiwathwala. Akusadingeki ukuthi abafowethu basebenze nzima njengakuqala ngoba imitshina le isiyenze kwaba lula sibili. Kuqala eBhetheli yeJapan bekusenziwa amaBhayibhili angu-2 000 ngamahora angu-8 kodwa khathesi sekusenziwa angaba ngu-35 000.

Ukuphrinta Amabhuku Amalutshwana Kwehlisa Izindleko

Imitshina le ethuthukisiweyo isincede ukuthi sehlise imali ebisetshenziswa emsebenzini wokuphrinta. Khathesi lanxa sekuphrintwa amabhuku amalutshwana sekusenziwa ngendlela elula. Inani lamabhuku esiwagcinayo lapho okuphrintelwa khona selehlile. Umfowethu okuthiwa nguGary osebenza eBhetheli ye-United States uthi: “Ukuphrinta amabhuku amalutshwana kanenginengi bekukhanya kungelangqondo ekuqaliseni. Bekungani kungcono ukuthi kuphrintwe amabhuku amanengi kulokuphrinta amalutshwana siphindaphinda.” UGary uqhubeka esithi: “Ngomnyaka esaqalisa ngawo ukuphrinta amabhuku amalutshwane kanenginengi, indleko zokwenza amabhuku zakhwela ngamadola angu-60 000. Lanxa kunjalo ngalowomnyaka senelisa ukulondoloza imali edlula $1,5 miliyoni eyayingasetshenziswa ekugcineni amabhuku aphrintiweyo lamaphepha okuphrinta.” Imali le ingasetshenziswa ekwenzeni ezinye izinto ezinjengokwakhiwa kwamaWolu oMbuso kanye lokuncedisa labo abehlelwe ngumonakalo.

Ukugcina amaphepha okuphrinta lamabhuku amalutshwane kuyanceda ukuthi kusale kulezindawo ezingasetshenziselwa ukwenza ezinye izinto emaBhetheli. Kanti njalo ukuba lezindawo ezilutshwana esiphrintela kuzo kunceda ukuthi kungabi lamaBhetheli amanengi amakhulu. Ngokwesibonelo, ngo-2018 umsebenzi wokuphrinta owawusenziwa eBhetheli yeBritain watshintshwa wayakwenzelwa egatsheni leCentral Europe lakwezinye izindawo. Lokhu kuncede ukuthi kusetshenziswe imali encane ngesikhathi kusakhiwa iBhetheli eseChelmsford e-England.

“Ungikhumbulile”

Okuqakathekileyo ngentuthuko yonke le yikuthi incede abantu abanengi ukuthi basondele kuJehova. Khathesi sesinelisa ukuphrinta amabhuku ngezindimi ezinengi lanxa kuyikuthi kudingeka amabhuku amalutshwana awolimi oluthile. Ngokwesibonelo kulabantu abangaba yi-35 000 kuphela abakhuluma ulimi lwesiWallisian abahlala eNew Caledonia laseWallis laseFutuna. Lanxa kunjalo, ngo-August 2024 kwethulwa iNguqulo Yomhlaba Omutsha YeMibhalo Engcwele ngolimi lwesiWallisian. Omunye ummemezeli okuthiwa nguSelafina okhuluma ulimi lolo uthi: “Ngangijayele ukubala iBhayibhili lesiFrench kodwa ngingalizwisisi. Yikho ngesikhathi sithola iBhayibhili ngolimi lwethu zehla inyembezi. Ngakhuleka ngathi, ‘Ungikhumbulile Jehova. UnguNkulunkulu ongakhethiyo sibili!’”

Ibhuku elithi Ungathokoza Kuze Kube Nini Lanini! selitholakala ngolimi lwesiSanga olukhulunywa eDemocratic Republic of Congo lanxa abantu abalukhulumayo bengafiki i-500 000. UJosué ongena lebandla elikhuluma ulimi lwesiSanga uthi, “Kwakunzima kakhulu ukuchasisa amanye amabala njalo kwezinye izikhathi labo esasifunda labo iBhayibhili babengakuzwisisi ukuthi ibhuku esasibafundisa ngalo lithini. Kuyangijabulisa kakhulu ukuthi ibhuku leli selitholakala ngolimi lwesiSanga. Khathesi sekulula ukuthi engibafundisa iBhayibhili bakuzwisise kuhle lokho engibafundisa khona, akuselasidingo sokuthi ngibe ngizama ukubachasisela.”

Khathesi sesiphrinta amabhuku asekelwe eBhayibhilini ngezindimi ezinengi ukwedlula kudala futhi abantu abanengi bayawathola. Iminikelo yenu kanye laleyo esiyithola ku-donate.jw.org yiyo encedileyo ukuthi kwenziwe umsebenzi lo omkhulu kangaka. Siyalibonga kakhulu ngokuphana kwenu.