Kuzakuba Lokuthula Emhlabeni Wonke

Wonke umuntu uyakufisa ukuphila emhlabeni olokuthula. Kusukela kudala ababusayo bebelokhu bezama ukuqeda izingxabano ukuze kube lokuthula emhlabeni. Kwezinye izikhathi bayaphumelela ukukuletha ukuthula lokho kodwa kuba ngokwesikhatshana nje ngoba izingxabano ziphinda zibekhona futhi. Kambe ukuthi kuzake kube lokuthula emhlabeni? Ye! Ake sixoxe ngalokho uJesu azakwenza kanye lalokho akukhulumayo.

Kuyini uJesu azakwenza?

IBhayibhili lisitshela lokho uJesu azakwenza ukuze kube lokuthula emhlabeni.

• ‘[UJesu] uzabizwa ngokuthi . . . nguMbusi Wokuthula. Ukwanda koMbuso wakhe akuyikuba lomkhawulo, lokuthula akusoze kuphele.’ (U-Isaya 9:6, 7) UJesu uzaletha ukuthula okungasoze kuphele emhlabeni wonke ngoba useyiNkosi yoMbuso kaNkulunkulu.

• ‘Uzalamulela umyanga okhalela uncedo . . . laloba ngubani ongelamuntu ongamsiza.’ (IHubo 72:12-14) UJesu uzasebenzisa amandla akhe ukuze aqede izimpi lokuhlupheka abesesenza ukuthi wonke umuntu aphathwe kuhle.

• “Akulasizwe esizaphakamisela esinye inkemba, njalo azisoze ziphinde zifundele ukulwa impi.” (U-Isaya 2:4) Bonke abantu abazabe bebuswa nguJesu bazabe belokuthula ngoba abasoze baphinde bafundele ukulwa izimpi.

Ukuze ufunde okunengi ngokuthi uJesu uzakuletha njani ukuthula lokuthi kuzakunceda njani, bukela ividiyo emfitshane ethi Uyini UMbuso KaNkulunkulu?

Okwakhulunywa nguJesu

Okwafundiswa nguJesu kuyabanceda abantu abanengi lamuhla ukuthi babe lokuthula. Entshumayelweni ejayelekileyo ebizwa ngokuthi yiNtshumayelo yaseNtabeni, uJesu wafundisa abantu okumele bakwenze nxa befuna ukuba lokuthula. Ake sixoxe ngezinye izibonelo.

• “Bayathokoza abenza kube lokuthula.” (UMathewu 5:9) UJesu wakhuthaza abalandeli bakhe ukuthi bangaxabani labantu kodwa bazimisele ukwenza ukuthi kube lokuthula.

• “Qala uyekwenza ukuthi kube lokuthula phakathi kwakho lomfowenu, ubusuphenduka uzonikela ngesipho sakho.” (UMathewu 5:23, 24) UJesu watshela ababemlalele ukuthi baphangise ukulungisa loba yikuphi ukungazwanani okungabe kukhona. Wathi kuqakathekile ukuthi sihlalisane kuhle labanye nxa sifuna ukuba ngabangane bakaNkulunkulu.

• “Yekelani ukwahlulela ukuze lani lingahlulelwa.” (UMathewu 7:1) UJesu wathi akumelanga sahlulele abanye ngoba yikho okwenza kube lezingxabano. Waphinda wasikhuthaza ukuthi ‘siqhubeke sithethelela’ abanye, singakhangeli lokho abakuphambanisayo.—ULukha 6:37.

Bakhona abantu abakusebenzisayo lokho okwakhulunywa nguJesu. Lanxa abanye bakhona behlala ezindaweni ezigcwele udlakela lezingxabano sebenelisa ukulungisa loba yikuphi ukungazwanani bengazange bavuke ngolaka. Sebefunde ukuxolela abanye kanye lokuba lomusa kulabo abangabaphathi kuhle.

Ukuze ubone ukuthi okwakhulunywa nguJesu kubancede njani abanye ukuthi babe lokuthula, bala isihloko esithi “Okungakunceda Uhlaliseke Nxa Kulempi Loba Udlakela.”