Udlakela Aluziqedi Inhlupho

Lamuhla abantu abanengi babona angathi ukuba lodlakela yikho okungaqeda ukungazwanani kumbe ezinye inhlupho ezingaba khona. Kodwa indlela le abacabanga ngayo ayivumelani lalokho okwakufundiswa nguJesu Khristu lalokho akwenzayo. Ake sixoxe ngezinye izinto azikhulumayo lazenzayo.

UJesu wathini?

Entshumayelweni yakhe yasentabeni, uJesu wafundisa ukuthi ukuzonda, ukuba lolaka kanye lodlakela ayisikho okuqeda ingxabano eziba khona phakathi kwabantu. Nanku okunye akukhulumayo:

• “Konke elifuna abantu bakwenze kini, lani kumele likwenze kubo.” (UMathewu 7:12; ULukha 6:31) Amazwi la atshengisa ukuthi kumele siphathe abanye ngendlela esifuna basiphathe ngayo.a Akulamuntu ofuna ukuphathwa kubi. Lokhu kutsho ukuthi kumele sihloniphe loba ngubani futhi sibe lomusa kuye lanxa siyabe singavumelani laye.

• “Loba ngubani okutshaya ngempama esihlathini sokudla, mnike lesinye isihlathi.” (UMathewu 5:38, 39; ULukha 6:29) Lapha uJesu wayengatsho ukuthi kumele siphonguyekela nje abantu basitshaye kumbe basiphathe kubi. Kodwa kukhanya kulabakhokheli benkolo ababefundisa ukuthi ukuphindisela kuqondile. Ngakho uJesu wayefuna ukutshela abalandeli bakhe ukuthi akuqondanga. Wayebafundisa ukuthi akumelanga baphindisele kodwa kumele baqhubeke bemnene lanxa bengaze baqalwe ngabantu.b

• “Qhubekani lithanda izitha zenu.” (UMathewu 5:43, 44; ULukha 6:27) UJesu wathi kumele sibe lomusa ebantwini abasizondayo kumbe abasiphatha kubi. Lanxa kunjalo wayengatsho ukuthi sekumele sivumelane lezinto ezimbi abazenzayo.c Kodwa nxa singaba lomusa ebantwini abasizondayo, bangehlisa ulaka lwabo, mhlawumbe baze bacine besiba lomusa kithi.

Okwenziwa nguJesu lalokho azakwenza

UJesu wafundisa abantu ukuthi udlakela aluziqedi inhlupho njalo lokho ayekufundisa yikho kanye ayekwenza. Wathi esebotshiwe, omunye umlandeli wakhe walimaza omunye umuntu ukuze amvikele. Kodwa uJesu wathi: “Buyisela inkemba yakho endaweni yayo ngoba bonke abasebenzisa inkemba bazakufa ngenkemba.” (UMathewu 26:52) UJesu watshengisa ukuthi uyazithanda izitha zakhe ngokuthethelela labo ababemphatha kubi, waze wabathandazela.—ULukha 23:33, 34; 1 UPhetro 2:23.

IBhayibhili lisithembisa ukuthi sekuseduze ukuthi uJesu, uMbusi Wokuthula, aqede lonke udlakela. (U-Isaya 9:6, 7) Ukuze ufunde okunengi ngendaba le bala isihloko esithi “Ngubani Ozaqeda Izimpi Lodlakela?”