IBhayibhili Lithini Ngamasonto Angenzi Okufunwa NguNkulunkulu?

Kukhona yini okwenziwa ngamanye amasonto okungakuphathiyo? Lanxa kulezinye izinto ezinhle ezenziwa ngamasonto ezinceda abantu, kulezinto ezimbi ezenziwa yiwo. I-Encyclopedia of Religion and War ithi: “Ezinye izimpi ezake zenzakala kudala zazibangelwa yikuthi amasonto asuke aba lemibono ehlukeneyo njengoba ekholwa izinto ezitshiyeneyo.” Izikhathi ezinengi abakhokheli bamasonto basebenzelana labezombusazwe becatsha ngelokuthi bayizikhonzi. Abanye bona bavala amacala enziwa ngabanye babo anjengokuhlukuluza abanye kwezemacansini kumbe ukutshontsha izimali.

Nxa okwenziwa ngamasonto kukudanisa ungacina uzibuza ukuthi uNkulunkulu yena uthini ngakho. IBhayibhili liyasitshela ukuthi uNkulunkulu kathokozi ngalokho okwenziwa ngamasonto amanengi. Liphinda lisitshele langeziphrofetho eziveza ukuthi uzakwenzani ngamasonto la. Liyasichasisela ukuthi sokuseduze ukuthi uNkulunkulu awasusele amanqe.

IBhayibhili lithi kuzakwenzakalani ngamasonto angenzi okufunwa nguNkulunkulu?

Isiphrofetho: Ibhuku leSambulo likhuluma ngowesifazana oyisifebe okuthiwa yiBhabhiloni Enkulu. Isifebe lesi sihlezi phezu kwesilo esibomvu gebhu. Kodwa ngemva kwesikhathi isilo lesi siyamhlamukela besesimbulala.—ISambulo 17:3, 5, 16.

Sitshoni? Isifebe lesi okuthiwa yiBhabhiloni Enkulu simela wonke amasonto amanga angemukelwa nguNkulunkulu.a Isilo esibomvu gebhu sona simela i-United Nations.b Ukuhlala kwesifebe phezu kwesilo esibomvu gebhu kutshengisa indlela amasonto amanga azame ngayo ukubusa phezu kwenhlanganiso ye-United Nations. Kodwa khonokho ukuthi isilo sizasibulala isifebe lesi kutshengisa ukuthi i-United Nations kanye lezizwe eziyisekelayo bazahlasela amasonto amanga bawatshabalalise. Lokhu kuzatshiya abantu bebambe owangaphansi ngoba kuyabe kuqala ukwenzakala into enjalo selokhu kwadabuka umhlaba.

Amasonto amanga azatshabalaliswa njani?

Isiphrofetho: ‘Impondo ezilitshumi ozibonileyo kanye lesilo zizasizonda isifebe zisithathele konke esilakho zisitshise ngomlilo size siphele du ngoba uNkulunkulu ukufake ezinhliziyweni zazo [inhliziyo zabakhokheli bomhlaba] ukuthi zenze umcabango wakhe. Zizawenza sibili umcabango munye ezilawo ngokunika isilo umbuso wazo. Yikho okuzakwenza yehlelwe zinhlupho ngelanga elilodwa, ukufa lokulila kanye lendlala futhi izatshiswa ngomlilo iphele du ngoba uJehovac uNkulunkulu oyahluleleyo ulamandla.’—ISambulo 17:16, 17; 18:8.

Sitshoni? UNkulunkulu uzafaka “umcabango wakhe” ezinhliziyweni zamazwe omhlaba. Azanika i-United Nations ‘umbuso wawo’ kumbe amandla awo kwezombusazwe. I-United Nations yona lezo izatshabalalisa wonke amasonto amanga asemhlabeni ngoba iyabe isilamandla amakhulu ewaphiwe yizizwe. Lokhu kuzakuba angani kwenzakale “ngelanga elilodwa” ngoba kuzakwenzakala masinyane langokucwayiza kwelihlo futhi kuzamangalisa abantu abanengi.—ISambulo 18:21.

Yindaba amasonto amanga ezabhujiswa?

Isiphrofetho: “Izono zayo sezibe yinqwaba zaze zayafika ezulwini njalo uNkulunkulu usezikhumbulile izenzo zayo ezingalunganga.”—ISambulo 18:5.

Sitshoni? Sekuleminyaka leminyaka amasonto amanga esenza izinto ezinengi ezimbi. Nanzi ezinye ‘izono zawo’ ezenze uNkulunkulu wathi uzawatshabalalisa.

Ukungena kwezombusazwe. UJesu Khristu wafundisa abalandeli bakhe ukuthi bangangeni kwezombusazwe kodwa bathembele eMbusweni kaNkulunkulu. Lo nguhulumende wasezulwini ozakhipha yonke imibuso yabantu.d (UDanyeli 2:44; UMathewu 6:9, 10; UJohane 6:15; 18:36) Amasonto amanga wona enza khona kanye lokho uJesu atshela abalandeli bakhe ukuthi bangakwenzi. Isiphrofetho esikuSambulo sithi iBhabhiloni Enkulu ‘iyafeba’ futhi kuyifanele ukubizwa ngokuthi ‘iyisifebe esikhulu’ ngenxa yokuthi ingena kwezombusazwe kulokuthi ithembeke kuNkulunkulu.—ISambulo 17:1, 2; UJakhobe 4:4.



Udlakela. IBhayibhili litshengisa ukuthi amasonto amanga yiwo abangele ukufa kwabo “bonke ababuleweyo emhlabeni.” (ISambulo 18:24) Amasonto amanengi ayehluleka ukufundisa abalandeli bawo ukuthi babe lokuthula. Abanye babo basekela ezombusazwe baphinde bakhuthaze abantu ukuthi baye empini.



Ubuhwaba. Amasonto amanga ‘alenotho enengi.’ (ISambulo 17:4; 18:7) Amasonto amanengi asebenzisa amandla alawo kanye labantu abasezikhundleni eziphezulu ukuze athole inotho. Ubuhwaba obunjalo abumthokozisi ngitsho uNkulunkulu.—KuThithusi 1:7.



Amanga. Amasonto amanga akhuthaza abantu ukuthi benze izinto eziphikisana lalokho okutshiwo liBhayibhili lokuthi bakholwe izinto ezingamanga.e Ngenxa yokuthi amasonto amanga akhohlisa abantu futhi angcolisa lebizo likaNkulunkulu, iBhayibhili liwabiza ngokuthi ‘ngunina wezinto ezenyanyekayo’.—ISambulo 17:5; 18:23.

Wonke amasonto azabhujiswa yini?

Hatshi. Ibhuku leSambulo likhuluma ‘ngexuku elikhulu’ labantu abavela endaweni ezitshiyeneyo zomhlaba. (ISambulo 7:9) Abantu abasexukwini leli bagqoke “izembatho ezimhlophe” okutsho ukuthi bakhonza uNkulunkulu bethembekile futhi belandela izimiso zakhe. Bayabe besinde “ekuhluphekeni okukhulu” okutsho isikhathi lapho okuzabhujiswa khona amasonto amanga kanye lazo zonke izitha zikaNkulunkulu. (ISambulo 7:13, 14; 19:11, 19-21) Labo abasexukwini elikhulu eligqoke izembatho ezimhlophe bakhonza uNkulunkulu ngendlela ayifunayo futhi bazamkhonza kuze kube nini lanini.f

Ukubhujiswa kwamasonto amanga kukunceda njani?

Kuyaduduza ukwazi ukuthi uNkulunkulu kakuthandi ngitsho okubi okwenziwa ngamasonto amanga. Kungakwenza ube lethemba lokuthi maduzane nje kuyabe kungasekho ukukhonza okungamthokozisiyo uNkulunkulu njalo okubangela ukuthi abantu bahlupheke.

Okuhle yikuthi ikhona indlela yokukhonza uNkulunkulu ayamukelayo. IBhayibhili lithi ‘abantu abakhonza ngeqiniso bazakhonza uBaba ngomoya langeqiniso. UBaba udinga abanjalo ukuthi bamkhonze.’ (UJohane 4:23) Uthi: “Phumani kuyo bantu bami [iBhabhiloni Enkulu] nxa lingafuni ukuhlanganyela layo ezonweni zayo futhi lingafuni ukwamukela ezinye zezinhlupho zayo ngoba izono zayo sezibe yinqwaba zaze zayafika ezulwini njalo uNkulunkulu usezikhumbulile izenzo zayo ezingalunganga.” (ISambulo 18:4, 5) UNkulunkulu ufisa ukuthi abantu bamkhonze belandela iqiniso elitholakala eBhayibhilini. (1 KuThimothi 2:3, 4) Uthembisa bonke abamkhonzayo ukuthi bazathola ukuphila okungapheliyo.—1 UJohane 2:17.