UNkulunkulu Uziduduza Njani Iziphepheli?

Minyaka yonke amamiliyoni abantu ayabaleka emizini yawo esiyaphephela kwamanye amazwe. Sekwake kwenzakala kuwe yini lokho? Nxa kunjalo, kuzakududuza ukwazi ukuthi uNkulunkulu uzimisele ukukuncedisa. Uthembisa ukukunika ikusasa elihle njalo ikusasa lelo ungafunda ngalo eBhayibhilini.

Iziphepheli ziyakudinga ukududuzwa ukuze zibe lethemba futhi zingapheli amandla. Phela umuntu olethemba kakhalali. Uyenelisa ukuqhubeka ngempilo lanxa esebunzimeni. UChristos Stylianides, isiphathamandla senhlanganiso yomanyano wamazwe ase-Europea sithi, ‘Lanxa iziphephelib zikudinga ukuncediswa masinyane ngezinto ezithile, okunye ezikudingayo yikududuzwa ukuze zibe lethemba lokuthi izinto zizakuba ngcono.’

“Kwathi sekumele ngibaleke elizweni lakithi futhi ngitshiye lemuli yami, ngezwa angani umhlaba usungihlanekele. Ngangisesaba, ngidanile futhi ngikhathazeke kakhulu.”—U-Emmanuel oweHaiti.

Lawe uphakathi kobunzima obunjengobuka-Emmanuel yini? Nxa kuyikuthi utshiye umuzi wakho ngenxa yobunzima obuthile kuyini okungakududuza, kukunike lethemba? ILizwi likaNkulunkulu iBhayibhili lingakunceda. Njani?

ILizwi LikaNkulunkulu Liyasiduduza

IBhayibhili lithi: ‘UJehovac uyamthanda umuntu wesinye isizwe.’—UDutheronomi 10:17, 18.

IBhayibhili lithi: “UJehova useduze labantu bonke abambizayo.”—IHubo 145:18.

IBhayibhili lithi: ‘UNkulunkulu weqiniso ngeke enze okubi. USomandla kahluleli kubi.’—UJobe 34:10, 12.

Lokhu kutsho ukuthi uNkulunkulu ayisuye obangela ukuhlupheka ophakathi kwakho. Nxa usehlelwa yibunzima, ayisikho ukuthi uyabe ekulinga kumbe ekujezisa.

ILizwi LikaNkulunkulu Lenza Sibe Lethemba

IBhayibhili liyasitshela ukuthi uNkulunkulu uzasenzelani esikhathini esizayo. Zwana ukuthi ithemba esilithola eBhayibhilini lizincede njani ezinye iziphepheli.

IBhayibhili lithi: “[UNkulunkulu] uzakwesula zonke izinyembezi emehlweni abo. Ukufa akusoze kuphinde kubekhona, loba ukulila loba ukukhala loba ubuhlungu ngeke kusabakhona.”—ISambulo 21:4.

Lokhu kutsho ukuthi ukuhlupheka kuzaphela. UNkulunkulu uthembisa ukuthi esikhathini esizayo uzasusa zonke inhlupho ezenza sithwale nzima khathesi.

“Sekuseduze ukuthi uNkulunkulu asuse bonke abantu abaphatha abanye kubi kanye lezinto ezimbi ezisehlelayo. Isithembiso leso senza ngihlale ngicabanga ngesikhathi lapho uNkulunkulu azaqeda konke ukuhlupheka.”—UKarla owe-El Salvador.

IBhayibhili lithi: “Izinto zakuqala kazisoze ziphinde zikhunjulwe, njalo kazisoze zifike enhliziyweni.”—U-Isaya 65:17.

Lokhu kutsho ukuthi asisoze sibe sisathwala nzima sicabanga izinto ezibuhlungu ezasehlelayo. UNkulunkulu uzaba leqiniso lokuthi asisoze sikhathazwe yimicabango yezinto ezimbi ezasehlelayo.

“IBhayibhili lisithembisa ukuthi asisoze sizikhumbule izinto ezimbi ezake zenzakala kithi. Isithembiso lesi siyanginceda nxa ngisebunzimeni ngoba ngiyabe ngikwazi ukuthi sekuseduze ukuthi inhlupho ziphele.”—UNatalia owe-Ukraine.

IBhayibhili lithi: ‘UNkulunkulu osezulwini uzabeka uMbuso. UMbuso lowo uzayibhidliza yonke imibuso le uyiqede du.’—UDanyeli 2:44.

Lokhu kutsho ukuthi uhulumende lo osezulwini yiwo ozabe usubusa emhlabeni wonke. Uzaletha ukuthula lokuvikelela futhi abantu bonke bazabe sebehlezi kuhle, kungaselamuntu ophathwa kubi. Sekuseduze ukuthi uNkulunkulu asuse bonke ohulumende besekubusa owakhe.—UMikha 4:3, 4.

“Kuyangiduduza ukwazi ukuthi sokuzaphela ukucindezelwa, ukubandlululwa lokuhlala ucatshangelwa ukuthi uzakwenza into embi. Sekuseduze ukuthi uMbuso kaJehova uziqede du inhlupho ezinjengalezi.”—UMustafa oweMiddle East.

ILizwi LikaNkulunkulu Lisinika Amacebo Asincedayo

IBhayibhili lingakunceda nxa kuyikuthi wehlelwe yibunzima obukwenze wasuka lapho obuhlala khona. Lingaphinda likunike lamacebo angakunceda nxa izinto sezitshintshile empilweni yakho kumbe nxa kuyikuthi ulahlekelwe yimpahla yakho. Ake sibone amanye amavesi anganceda iziphepheli:

IBhayibhili lithi: “Lanxa umuntu elokunengi, izinto alazo ayisizo ezimnika impilo.”—ULukha 12:15.

Ivesi le ingakunceda njani? Nxa ubaleke emzini wakho ngenxa yezizatho ezithile, kumele ukuthi udane kakhulu futhi ungabe ucabanga izinto zakho ozitshiyileyo. Kodwa nxa ungacabangisisa ngokuthi impilo yiyo eqakatheke kakhulu ukwedlula lezozinto awusoze uzihluphe kangako.

“Impilo iqakatheke kakhulu ukwedlula loba yini esilayo. Kwezinye izikhathi izinto esilazo kumbe imali ngeke kusincede ngalutho.”—UNatalia owe-Ukraine.

IBhayibhili lithi: “Ungaze wathi, ‘Kungani insuku zakudala zazingcono kulalezi?’”—UmTshumayeli 7:10.

Ivesi le ingakunceda njani? Izinto zingabe zimi manzonzo sibili, kodwa ukucabanga ngensuku zakudala kungenza uhlale udanile.

“Ukwamukela ukuthi izinto sezitshintshile kuyanginceda ukuthi ngihlaliseke.”—U-Eli oweRwanda.

IBhayibhili lithi: “Nxa silokudla lezigqoko sizasuthiseka ngezinto lezo.”—1 KuThimothi 6:8.

Ivesi le ingakunceda njani? Zama ngamandla wonke ukusuthiseka ngalokho olakho empilweni. Ungenza njalo, awusoze ukhathazeke kakhulu futhi uzathokoza lanxa izinto zinzima.

“IBhayibhili lingincede ukuthi ngingakhathazeki kakhulu ngalokho esakutshiyayo. Mina lomkami siyabonga ukuthi lokhu siphila lokuthi lapho esesikhona sivikelekile.”—U-Ivan owe-Ukraine.

IBhayibhili lithi: “Konke elifuna abantu bakwenze kini, lani kumele likwenze kubo.”—UMathewu 7:12.

Ivesi le ingakunceda njani? Ukuba lomusa lokubekezela kuzakunceda ukuthi uzwanane labanye njalo kungenza ukuthi abantu bangakubandlululi lokuthi bakwamukele.

“Nxa ungahlonipha abantu abasendaweni osuhlala kuyo, ube lomusa futhi ubathande, labo bazakuthanda, besekusenza ukuthi lihlalisane kuhle.”—U-Angelo oweSri Lanka.

IBhayibhili lithi: ‘Bikelani uNkulunkulu zonke izicelo zenu. Nxa lingenza njalo, ukuthula kukaNkulunkulu kuzalinda ingqondo zenu.’—KwabaseFiliphi 4:6, 7.

Ivesi le ingakunceda njani? Thandaza kuNkulunkulu umtshele indlela ozizwa ngayo, lalokho okuswelayo, okwesabayo kanye lokukukhathazayo. Lokho kuzakunceda ukuthi ungakhathazeki kakhulu lanxa uyabe usuhlala endaweni ongayijayelanga.

“Nxa ngingaba lohlupho, angiyekeli ukuthandaza kuNkulunkulu futhi uyangiphendula. Esengikufunde eBhayibhilini kuyanginceda ukuthi ngihlaliseke.”—UYol oweSouth Sudan.

“Amacebo engiwathola eBhayibhilini ayanginceda ukuthi ngihlaliseke lanxa ngisebunzimeni.”—UValentina owe-Ukraine.

“Kuyangikhuthaza ukwazi ukuthi uJehova uNkulunkulu usithembisa impilo enhle esikhathini esizayo.”—U-Emmanuel oweHaiti

Nxa ufuna ukufunda okunye okutshiwo liBhayibhili okusiduduzayo, kusinike lethemba, cela uFakazi kaJehova akuvakatshele. Uzakutshela okunengi, akuncede uzwisise lokho iBhayibhili elikutshoyo.