Pawel Gluza/500Px Plus/Getty Images
HLALA ULINDILE!
Inani Lezinyamazana Selehle Ngamaphesenti Angu-73 Eminyakeni Engu-50 Edlulileyo—IBhayibhili Lithini?
Mhlaka 9 October 2024 inhlanganiso okuthiwa yi-World Wildlife Fund yakhipha umbiko odanisayo omayelana lalokho okwenziwa ngabantu ezinyamazaneni. Yathi: “Eminyakeni engu-50 edlulileyo kusukela ngo-1970 kusiya ku-2020, inani lezinyamazana lehlile sibili ngamaphesenti angu-73. Siyabe singaqambimanga nxa sisithi izinto zingaqhubeka zisenzakala ngalindlela okweminyaka emihlanu elandelayo, kuyasala kungaselanyamazana emhlabeni.”
Imibiko enjengale iyabethusa abantu abanengi ngoba siyawuthanda umhlaba wethu futhi kusizwisa ubuhlungu ukubona inyamazana ziphathwa kubi. Phela uNkulunkulu wayevele ehlose ukuthi sizigcine kuhle izinyamazana.—UGenesisi 1:27, 28; IZaga 12:10.
Mhlawumbe uyazibuza ukuthi, ‘Pho sizenelisa yini ukuvikela izinyamazana? IBhayibhili lithini?’
Ikusasa lisiphatheleni?
Abantu bangazama ukuzivikela izinyamazana, kodwa uNkulunkulu nguye kuphela ongenelisa ukuzivikela ukuthi zingatshabalali. KuSambulo 11:18, iBhayibhili lithi uNkulunkulu ‘uzabhubhisa abawonakalisa umhlaba.’ Ivesi le isitshela izinto ezimbili ezizakwenziwa nguNkulunkulu:
1. Kasoze avume ukuthi abantu baqhubeke besonakalisa umhlaba.
2. Sekuseduze ukuthi uNkulunkulu akwenze lokhu. Phela okwenziwa ngabantu lamuhla kungacina kubangele ukuthi inyamazana zitshabalale.
Manje uNkulunkulu uzalulungisa njani uhlupho lolu? Uzasebenzisa uMbuso wakhe, okutsho uhulumende wakhe osezulwini ozabusa umhlaba wonke. (UMathewu 6:10) UMbuso lo uzafundisa abantu abalungileyo ukugcina kuhle izinyamazana lokuzivikela.—U-Isaya 11:9.