Inhlanganiso Ezisemhlabeni Zingenelisa Yini Ukuletha Ukuthula?

Emhlabeni lo esiphila kuwo kugcwele izimpi lodlakela. Lokhu kwenza inhlanganiso yomanyano wamazwe, i-United Nations lezinye inhlanganiso zenze okusemandleni azo ukuthi zilethe ukuthula. Okunye ezikwenzayo yikuhambisa izithunywa zabo ezindaweni ezilezimpi behlose ukubhula umlilo. U-António Guterres ongunobhala jikelele we-United Nations uthi: “Amalunga e-United Nations enza okusemandleni awo ukuthi alamule izingxabano, yiwo esiwathembileyo kuyo yonke imizamo yethu yokuletha ukuthula emhlabeni.”

Eminyakeni edlulileyo, abantu abazama ukuletha ukuthula bake baphumelela ukwenza njalo. Ngokwesibonelo, sebeke bavikela abantu abahlaselwe yizimpi futhi babancedisa ngezinto ezitshiyeneyo, babuyisela iziphepheli emazweni azo baphinda bakha kutsha izakhiwo eziyabe zidilikile. Kodwa kunengi okuvimbela abantu laba ukuthi behluleke ukuletha ukuthula. Kambe ukuthula kuzake kube khona yini emhlabeni wonke? IBhayibhili lona lithini?

Okwenza kube nzima ukuthi kube lokuthula, lokutshiwo liBhayibhili

Umfanekiso otshengisa amadoda amabili agoqe izandla efulathelene.

Ubunzima: abantu ababambisani. Izikhathi ezinengi kuba nzima ukuthi inhlanganiso ezivela emazweni atshiyeneyo zibambisane, kungabe kuzinhlanganiso zezombusazwe kumbe ezinye nje. Okunye okuyake kwenze kube nzima ukuthi zibambisane yikungazwisisani lokuqakathekisa izinto ezitshiyeneyo.

Okutshiwo liBhayibhili: “UNkulunkulu osezulwini uzabeka umbuso . . . Uzayibhidliza yonke imibuso le [ohulumende abasemhlabeni] uyiqede du njalo yiwo wodwa ozakuma kuze kube nini lanini.”—UDanyeli 2:44.

Sekuseduze ukuthi uNkulunkulu aqede zonke izimpi abeseletha ukuthula emhlabeni wonke. (IHubo 46:8, 9) Uzasusa bonke ohulumende abasemhlabeni abesebeka uMbuso wakhe. Nxa sekulohulumende oyedwa obusa abantu abalokuthula, kuyabe kungaselasidingo sokuthi kube lenhlanganiso ezilamula izingxabano.

Umfanekiso otshengisa ibhokisi elivuliweyo.

Ubunzima: ukusilela kwezinto. Kwezinye izikhathi inhlanganiso ezizama ukuletha ukuthula ziyabe zingelazisebenzi ezeneleyo, lemali kanye lokunye nje okudingakalayo. Lokhu kuyazivimbela ukuthi ziphumelele ukwenza ezifisa ukukwenza. Kanti njalo izisebenzi zakhona ziyabe zithunyelwa ezindaweni eziyingozi lezingavikelekanga.

Okutshiwo liBhayibhili: ‘UNkulunkulu weNkosi yethu uJesu Khristu wamhlalisa esandleni sakhe sokudla ezulwini, phezu kwabo bonke ohulumende lababusi leziphathamandla.’—Kwabase-Efesu 1:17, 20, 21.

UJesu nguye obekwe nguJehovaa ukuthi abe yiNkosi yoMbuso wakhe. UJehova, uNkulunkulu uSomandla umnike konke akudingayo ukuze awenze kuhle umsebenzi wakhe wokubusa. (UDanyeli 7:13, 14 b) UNkulunkulu unike uJesu amandla amakhulu lolwazi lenhlakanipho kanye lokuqedisisa. Akulahulumende loba inhlanganiso engaba lazo zonke izinto lezo. (U-Isaya 11:2) UJesu uphinda abe lebutho lezingilosi ezilamandla. (ISambulo 19:14) Akulahlupho olungamehlula ukuthi alulungisise.

UNkulunkulu umnike amandla okuthi aqede izimpi kodwa lokho ayisikho kodwa azakwenza. Uzakwenza ukuthi bonke abantu abayabe bebuswa nguMbuso kaNkulunkulu bahlaliseke, babe lokuthula futhi bavikeleke.—U-Isaya 32:17, 18.

Umfanekiso otshengisa isando esisetshenziswa ngumahluleli.

Ubunzima: eminye imithetho iyavimbela ukuthi kulethwe ukuthula. Kwezinye izikhathi abantu abazama ukuletha ukuthula bayehluleka ukuwenza kuhle umsebenzi wabo ngenxa yemithetho engacaciyo abayabe beyifakelwe. Ngakho kuba nzima ukuthi benelise ukuvikela abantu kumbe ukwenza lokho abayabe bekuhlelile.

Okutshiwo liBhayibhili: UJesu wathi: “Sengiphiwe amandla wonke ezulwini lasemhlabeni.”—UMathewu 28:18.

UNkulunkulu ubeke uJesu ukuthi enze umsebenzi wokuletha ukuthula emhlabeni wonke njalo umnike lamandla okuthi aphumelele ukukwenza lokho. (UJohane 5:22) UJesu uzahlala esahlulela kuhle, kasoze abe lobugwelegwele. (U-Isaya 11:3-5) Yikho iBhayibhili limbiza ngokuthi “nguMbusi Wokuthula” njalo uMbuso wakhe uzamiswa “ngokulunga langokwahlulela okuhle.”—U-Isaya 9:6, 7.

UMbuso kaNkulunkulu yiwo ozaletha ukuthula kweqiniso

Inhlanganiso ezizama ukuletha ukuthula zingenelisa ukuletha ukuthula okwesikhathi esithile, mhlawumbe ziqede lempi eyabe isendaweni ethile. Kodwa kazenelisi ukwenza ukuthi abantu bengazondani, okuyikho okubangela udlakela.

‘Inhlanganiso eziletha ukuthula kazisoze zenelise ukulondoloza ukuthula ngoba vele akukho.’—UDennis Jett, owake waba ngummeli welizwe leMelika.

Kodwa uMbuso kaNkulunkulu yiwo ozaletha ukuthula kweqiniso ngoba uyenelisa ukunceda abantu ukuthi bathandane. Ngokwesibonelo, uJesu wathi esesemhlabeni wafundisa abantu ngamazwi langezenzo ukuthi babe lokuthula futhi bathandane. Nanzi ezinye izibonelo:

“Bayathokoza abenza kube lokuthula.”—UMathewu 5:9.

“Kumele uthande umakhelwane wakho ngendlela ozithanda ngayo.”—UMakho 12:29-31.

“Buyisela inkemba yakho endaweni yayo ngoba bonke abasebenzisa inkemba bazakufa ngenkemba.”—UMathewu 26:52.

“[UJesu] wathi ethethiswa kazange aphindisele ngokuthethisa. Wathi esebunzimeni kazange asongele muntu.”—1 UPhetro 2:23.

UJesu waphinda wathi abantu abazabuswa nguMbuso kaNkulunkulu bazakwaziwa ngokuthanda abanye. IBhayibhili likwenza kucace ukuthi abazonda abanye abasoze bavunyelwe ukuba seMbusweni kaNkulunkulu:

“Nxa lithandana, abantu bonke bazakwazi ukuthi lingabafundi bami.”—UJohane 13:34, 35.

“Wonke umuntu ozonda umfowabo ungumbulali.”—1 UJohane 3:15.

“Loba ngubani othanda uNkulunkulu kufanele athande lomfowabo.”—1 UJohane 4:20, 21.

UJehova uNkulunkulu nguye yedwa ongenelisa ukuletha ukuthula emhlabeni wonke ngoba nguye owadala abantu. UMbuso wakhe uzakwenelisa ukulungisa lokho obekusehlula inhlanganiso ezizama ukuletha ukuthula.

a UJehova libizo likaNkulunkulu. (IHubo 83:18) Bala isihloko esithi “Ngubani UJehova?”

b ‘Indodana yomuntu’ okukhulunywa ngayo kuDanyeli 7:13, 14 nguJesu Khristu.—UMathewu 25:31; 26:63, 64.