Bambelela KuJehova Ngesikhathi Ungezelela Imfundo

1-2. (a) Nxa usukhethe ukungezelela imfundo kuyini okumele uqhubeke ukwenza? (b) Utshoni umutsho othi ‘ukuhamba ngokuhleleka’? (UFiliphi 3:16)

BAKHONA abafowethu labodadewethu esikhonza labo abakhetha ukungezelela imfundo yabo. Bangabe besithi lokho kuzabanceda bathole umsebenzi besebezikhonzela uJehova kuhle. Nxa ukhethe ukungezelela imfundo, ungenzani ukuze uqhubeke ungumngane kaJehova? (Jak. 4:8a) Kungenzakala ukuthi wahlangana lezilingo ezinengi ngesikhathi usasesikolo kodwa wenelisa ukulwisana lazo. Lakhathesi ungaphambuki, ‘qhubeka uhamba endleleni’ eyiyo.—Bala uFiliphi 3:16.

² Umutsho wesiGrikhi ohunyutshwe ngokuthi ‘ukuhamba ngokuhleleka’ wawusetshenziswa nxa kukhulunywa ngamasotsha amatsha kanyekanye. Nxa lawe usukhethe ukungezelela imfundo yakho qhubeka umatsha labafowenu labodadewenu, ungami kumbe ubuyele emuva. Esihlokweni lesi sizaxoxa ngezimiso ezine ezizakunceda ukuthi wenze njalo. Uzananzelela lokuthi izimiso lezo zingaqhubeka zikunceda njengoba vele kuyizo ezikuncedileyo kuze kube khathesi.

HLALA UKHUTHELE EKUKHONZENI

3. Yibuphi ubunzima obungabakhona nxa ungakhetha ukungezelela imfundo?

³ Okumele ucabange ngakho: Ukungezelela imfundo kungenza ube lezinto ezinengi ezingacina sezikuphambanisa ekukhonzeni. Kungabalula ukuthi ucine usuqakathekisa isikolo kakhulu ukwedlula uJehova. Usungazithola usulova emihlanganweni yebandla lasekutshumayeleni, kumbe ungaselasikhathi sokuthandaza lesokubala iBhayibhili nsuku zonke.—Isam. 2:4.

4. Kungani kuqakathekile ukuhlala sikhuthele ekukhonzeni? (U-1 Khorinte 15:58)

⁴ Bala u-1 Khorinte 15:58. Umuntu ohamba ngebhayisikili kumele aqhubeke etshova ukuze angawi. Lawe kumele uqhubeke ukhuthele ekukhonzeni ukuze ubungane bakho loJehova buhlale buqinile. IBhayibhili lisikhuthaza ukuthi ‘sihlale sisenza okunengi emsebenzini weNkosi.’ Hlala ukhumbula ukuthi uJehova nguye okumele aze kuqala empilweni zethu besekulandela ezinye izinto. (Mat. 22:37) Udadewethu osakhulayo okuthiwa nguSamantha uthi: “Ngazitshela ukuthi nxa imfundo isingiphambanisa ekukhonzeni ngizahle ngitshiyane layo.”

5. Kuyini okuzakunceda ukuthi uhlale ungumngane kaJehova?

⁵ Okumele ukwenze ungakaqalisi ukungezelela imfundo: Woba leqiniso lokuthi ubeka uJehova kuqala empilweni yakho. Zibuze: Ngingenzani ukuze ngilungiselele imihlangano futhi ngiyingene? Ngingenzani ukuze ngibe lesikhathi sokubala iBhayibhili nsuku zonke lesokuya ekutshumayeleni? (Heb. 10:25; Josh. 1:8; Mat. 28:​19, 20) Usakhumbula yini ukuthi ngesikhathi usasesikolo kuyini okwakunceda ukuthi uhlale uqakathekisa ukukhonza? Ungaqhubeka yini ngowawukwenza kumbe kulalapho ongathuthukisa khona? Zimisele ukuhlala ubambelele kuJehova langesikhathi ungezelela imfundo. Lanxa ufuna sibili ukuphumelela ezifundweni zakho akumelanga ukhohlwe ukuthi okuqakatheke kakhulu yikuhlala ungumngane kaJehova.a—Mat. 6:24.

6. Yiphi imibuzo ongazihlola ngayo? (Khangela umfanekiso.)

⁶ Ngesikhathi ungezelela imfundo kungaba kuhle ukuthi uhlale uzihlola. Mhlawumbe lokhu ungakwenza inyanga ngayinye. Nansi eminye imibuzo ongazibuza yona: Ngisakuqakathekisa yini ukukhonza uJehova? Ngizithola sengicabanga ngomsebenzi wesikolo yini ngapha mina ngisemihlanganweni yebandla? Sengikhetha ukungena imihlangano ngezempucuko yini kulokuthi ngiyehlangana labanye? Ngilokhu ngikukhuthalele yini ukubala iBhayibhili nsuku zonke lokuthandaza ngenhliziyo yonke? Ngisakukholisa yini ukutshumayela kumbe sengiphongukwenzela ukuthi kudlule? Nxa ungabona ukuthi usulomkhuba wokulova emihlanganweni kumbe usujayele ukuphuza, wohle ulungise masinyane. Ungavumeli imfundo ikubuyisele emuva ekukhonzeni.

NANZELELA INDLELA OCABANGA NGAYO

7. Ukungezelela imfundo kungamtshintsha njani umuntu?

⁷ Okumele ucabange ngakho: UmKhristu ongezelela imfundo kumele ananzelele ngoba angazithola esefundiswa izinto ezingamanga kumbe amafilosofi abantu. Phela kwezinye izifundo abantu bafundiswa ukuthi akulaNkulunkulu lokuthi izinto zazivelela. (Kol. 2:8) Imfundo le ingenza lowomuntu acine esezigqaja azibone angathi uyamangalisa. Omunye umfowethu osakhulayo uthi: “Babengasifundisi ukwenza umsebenzi kuphela kodwa babezama lokutshintsha indlela esicabanga ngayo. Ezinye izinto esasizifundiswa zazingahambelani lalokho okufunwa nguJehova. Safundiswa ukuthi nxa ufuna ukuthokoza kumele ulandele inhliziyo yakho. Ukuzwa izinto ezinjalo kwasekungenza ngithandabuze ukuthi ukukhonza uJehova kuyanceda yini.”

8. Kungani kumele unanzelele indlela ocabanga ngayo? (IZaga 5:​1, 2)

⁸ Bala iZaga 5:​1, 2. IBhayibhili lithi kumele sihlale ‘sisebenzisa kuhle ingqondo zethu.’ Lokhu kuqakathekile sibili ngoba uSathane labantu bomhlaba lo bafuna ukuphambanisa indlela esicabanga ngayo. (1 Phet. 5:8) Abantu abanengi kabalandaba lokuthi uJehova uthini ngokuziphatha. Kabakholwa ukuthi izinto zadalwa, abanye baze baphike lokuthi uNkulunkulu ukhona. Ukuba lobudlelwano labantu abanjalo kungenza ucine usucabanga njengabo. Ungathatheki ngemibono yabantu bomhlaba lo ngoba ungacina usubona angathi lokho abakufundisayo kungcono kulalokho okufundiswa nguJehova. Phela lanxa abantu bomhlaba lo bengazitshela ukuthi bahlakaniphile iqiniso yikuthi ‘bayizithutha kuNkulunkulu.’—1 Khor. 3:​18-20.

9. Ungenzani ukuze ungathatheki ngokukhulunywa ngabanye?

⁹ Okumele ukwenze ungakangezeleli imfundo: Woba leqiniso lokuthi awuthandabuzi ukuthi okufundiswa liBhayibhili kuliqiniso. Nansi imibuzo ongazibuza yona: ‘Kungani ngikholwa ukuthi uNkulunkulu ukhona? Kungani ngingathandabuzi ukuthi iBhayibhili liLizwi likaNkulunkulu? Ngiyakukholwa yini ukuthi okutshiwo liBhayibhili endabeni yokuziphatha kungcono kakhulu kulalokho okutshiwo ngabantu?’ Lalapha futhi kumele ubuyisele ingqondo emuva ucabange ngeminyaka leyana usasesikolo. Waphosa wakukholwa yini ukuthi abantu bavela enyamazaneni? Wake walingeka yini ukuthi wenze izinto ezimbi ezazisenziwa ngabanye abantwana esikolo? Nxa kunjalo, kuzamele ubophe ziqine ngoba kukhulu okuzayo. Lungiselela khathesi ukuze ungathatheki.—2 Thim. 2:​16-18.b

10. Yiphi imibuzo okumele uzibuze yona nxa usuqalisile ukufunda?

¹⁰ Nxa kuyikuthi usuqalisile ukufunda ungekeli ukuhlala uzihlola. Zibuze: ‘Sengicabanga njengabantu abangakhonzi uJehova yini? Ngiyawubona yini umehluko phakathi kwezinto eziliqiniso lemibono nje engelancedo elethwa ngabantu? Ngiyakholwa yini ukuthi nguMbuso kaNkulunkulu kuphela ozaqeda zonke inhlupho?’ Nxa ungahlala ubala iBhayibhili njalo ucabangisisa ngalokho okubalayo awusoze uphongukholwa konke nje okukhulunywa ngabantu. Phela uyabe ulazi mhlophe futhi ungaliphumputhi iqiniso eliseBhayibhilini.—1 Thim. 4:15.

SISEBENZISE KUHLE ISIKHATHI

11. Yibuphi obunye ubunzima ongahlangana labo?

¹¹ Okumele ucabange ngakho: Kuzakuba lemisebenzi yesikolo eminengi okumele uyenze njalo kuyabe kumele ubale okuzwayo ukuze upase. Ngakho kuhle ukuthi usisebenzise kuhle isikhathi sakho ngoba ungayekela usungahlala udiniwe futhi ukhathazekile. Okunye okuqakathekileyo yikuba lempilakahle, ungaphileli ibhuku kuphela.

12. Kumele ‘usisebenzise njani isikhathi sakho’? (U-Efesu 5:​15, 16)

¹² Bala u-Efesu 5:​15, 16. Kungaba nzima ukuthi usisebenzise kuhle isikhathi sakho ngoba uyabe ulezinto ezinengi okumele uzenze. Kumele ube lesikhathi eseneleyo sokubala izinto zesikolo, esokuba labangakini kanye labanye ebandleni. (Hubo. 133:1; Zaga. 18:1) Akumelanga uswele isikhathi sokuqinisa ubungane bakho loJehova. (Mat. 6:33) Nxa kuyikuthi uyasebenza, uzasithola yini isikhathi sokuya emsebenzini lesokuncedisa abanye emulini? Kumele uthole lesikhathi eseneleyo sokulala lesokuqeqetsha umzimba. (Umtshu. 4:6; 1 Thim. 4:8) Konke lokhu kudinga ukuthi uhlele kuhle isikhathi sakho.

13. Kuzakunceda njani ukuba ngumuntu ohlelekileyo?

¹³ Okumele ukwenze ungakangezeleli imfundo: IBhayibhili likwenza kucace ukuthi ukuhlela kuhle izinto ofuna ukuzenza kuyanceda. (Zaga. 21:5) Kuzakunceda kakhulu ukuba lohlelo olubhalwe phansi futhi unamathele kulo. Ukuze wenelise ukwenza njalo ungacabanga ngalokho owawukwenza ngesikhathi usasesikolo. Wawusenelisa yini ukwenza konke owawukuhlelile? Nxa kuyikuthi wawudonsa nzima ungenzani khathesi ukuze ungadlalisi isikhathi? Nxa uhlele kuhle uzenelisa ukwenza izinto ngesikhathi.c

14. Yiphi eminye imibuzo okumele uzibuze yona?

¹⁴ Nansi imibuzo ongazihlola ngayo: ‘Ngiyasithola yini isikhathi eseneleyo sokulala lesokuqeqetsha umzimba? Lokhe ngilaso yini isikhathi sokukwejisa labafowethu labodadewethu? Ngiyiqeda ngesikhathi yini imisebenzi yami yesikolo? Kuyini okwenza ngehluleke ukuyiqeda ngesikhathi? Yikubalisela yini kumbe izinto zakhona vele zinengi? Abangakithi labangane bami bathini ngendlela engisebenzisa ngayo isikhathi? Nxa ungananzelela ukuthi kulalapho okumele ulungise khona wohle ulungise. Mhlawumbe ungacela lamacebo kwabanye abasisebenzisa kuhle isikhathi sabo.—Zaga. 11:14.

QHUBEKA ‘UHAMBA LABAHLAKANIPHILEYO’

15. Yiluphi uhlupho olungabakhona?

¹⁵ Okumele ucabange ngakho: Abantu ofunda labo sebengafisa ukuthi libe ngabangane. Lokhu kuyazwisiseka ngoba liyabe litshona lonke futhi lisenza izinto ezifananayo. Usungabona angani abantu ofunda labo bayachaza kulabafowenu labodadewenu ebasebandleni. Nxa usucabanga njalo kumele unanzelele. Lanxa lifunda lonke, hlala ukhumbula ukuthi indlela eliphila ngayo itshiyene. Elikukholwayo lelikuqakathekisayo akufanani. Nxa usutshona labo usungacina usucabanga njengabo. (1 Khor. 15:33) Lokhu yikho kanye okwenzakala kuMichael owenza ikhosi yamagetsi eyamthatha iminyaka emine. Uthi: “Iviki ngayinye ngangichitha amahora edlula 40 ngilabantu engangifunda labo. Babengabahloniphi abesifazana, behlala bekhuluma inhlamba futhi lengoma ababezilalela zazingayenzi. Kancanekancane ngasengibona angani abakwenzayo akukubi kangako.”

16. Sifundani kuZaga 13:20?

¹⁶ Bala iZaga 13:20. IBhayibhili likubeka kucace ukuthi ukujayelana labantu abenza okubi kuyingozi. Lisikhuthaza ukuthi sikhethe abangane abenza okuhle ukuze lathi kusihambele kuhle. Iqiniso esingeke silibalekele yikuthi abangane esibakhethayo bangasinceda kumbe basilimaze. Yikho nxa ufuna ukuhlala ungumngane kaJehova khetha abangane abamthandayo.—Hubo. 101:​6, 7; 119:63.

17. Kuyini okunye okumele ukwenze ukuze uhlale ungumngane kaJehova?

¹⁷ Ongakwenza ungakangezeleli imfundo. Kumele ucabange ngokuthi uzachitha isikhathi esinganani ulabantu ofunda labo. Umfowethu okuthiwa nguTrenton uthi: “Ngibaphatha kuhle sibili abantu engifunda labo kodwa angikwejisi labo nxa sesitshayisile. Sifunda sonke sibili kodwa ayisibo bangane bami.” Manje wena uzakwenzani ukuze ungacini usujayelana kakhulu labantu ofunda labo? Lalapha futhi kumele ucabange ngalokho owawukwenza usasesikolo. Nxa kuyikuthi wawudonsa nzima kuyini ongakwenza khathesi? Zimisele ukuqhubeka uhamba labahlakaniphileyo futhi uxwaye abantu abangamthandiyo uJehova.d

18. Yiphi eminye imibuzo ongazibuza yona? (Khangela lomfanekiso.)

¹⁸ Kuhle ukuthi ungahlalahlala uzihlole ukuthi wenza njani endabeni yabangane. Nansi imibuzo ongazihlola ngayo: Sengibajayele kakhulu yini abantu engifunda labo? Sokulemikhuba emibi esengiyifunde kubo yini? UJehova ubengathini ngabangane bami? (Hubo. 1:1) Ungabona ukuthi kulalapho okumele ulungise khona ungaphozisi amaseko, wohle ulungise masinya. Khetha abangane abathanda uJehova njengawe. Uyake ucabange ngokuxoxela abantu ofunda labo ngoJehova yini? Ungathikazi ukubaxoxela ngoba phela yibo abantu otshona labo.

LUNGISELELA KHATHESI

19. Kuyini okumele ukwenze nxa usukhethe ukungezelela imfundo?

¹⁹ Nxa umuntu elohambo uqala ngokulungiselela. Yikho nxa kuyikuthi usukhethe ukungezelela imfundo, lungiselela khathesi ukuze uhlale ulokholo oluqinileyo. Hlala ugqoke ‘zonke izigqoko zokuzivikela oziphiwe nguNkulunkulu.’ Inhloso yakho kayibe ngeyokudumisa uJehova kukho konke kulokufuna ukunotha kumbe ukwaziwa ngabantu.—Efe. 6:​11-13; 1 Khor. 9:​26, 27; 10:31.

20. Ungabona njani ukuthi lokhe ulokholo oluqinileyo?

²⁰ IBhayibhili lithi: “Qhubekani lizihlola ukuthi lisekukholweni yini, qhubekani lizihlolisisa ukuthi lingabantu abanjani.” (2 Khor. 13:5) Nxa usuqalisile ukungezelela imfundo, kuhle ukuhlala uzihlola usebenzisa lokho esixoxe ngakho esihlokweni lesi. Ungazibuza imibuzo enjengale: Lokhe ngikhuthele yini ekukhonzeni? Angikathatheki yini ngemicabango yabantu bomhlaba lo? Ngisisebenzisa kuhle yini isikhathi sami? Abangane bami ngabantu abathanda uJehova yini kumbe sengilobudlelwano labantu abangayisibo? Le yimibuzo sonke esingazibuza yona kungelani lokuthi sisesikolo, siyasebenza kumbe sikweyinye nje indawo. Zimisele ukuhlala ungumngane kaJehova ngaso sonke isikhathi. Nxa ungenza njalo uJehova uzakubusisa uhlale ungumngane wakhe.—Zaga. 3:​5, 6.