Uzafunda Uyefika Ngaphi?

1-2. (a) Yibuphi ubunzima abasakhulayo abakhangelane labo? (b) Nxa sikhuluma ngokungezelela imfundo sitshoni? (Khangela “Ukuchasiswa Kwamabala.”)

UKHONA yini oyake akubuze ukuthi ungakhula ufuna ukuba yini? Engxenye kukanengi abantu bekubuza umbuzo lo. Into engcono kakhulu ongayenza empilweni yakho yikuba senkonzweni yesikhathi sonke kodwa lokho akutsho ukuthi akusamelanga udinge okokuziphilisa. (2 Thes. 3:10). Engxenye uyake uzibuze ukuthi uzakwenza msebenzi bani.

² Abanye abasakhulayo bajayele ukuxoxisana labazali babo babonisane ukuthi bangafunda bayefika ngaphi ukuze bathole umsebenzi. Engxenye lawe uyazibuza ukuthi ungaqeda isikolo ungafundela msebenzi bani. Esihlokweni lesi sizaxoxa ngezimiso ezingakunceda nxa ucabanga ukungezelela imfundo yakho.a Phela kuyabe kumele ucabangisise ukuze ungacini usenza into engakuhlupha kusasa. Lanxa isihloko lesi sibhalelwe ikakhulu abasakhulayo, singanceda loba ngubani ocabanga ukungezelela imfundo. Okuzakhulunywa ngakho esihlokweni lesi kuzanceda labazali ukuthi bancedise abantwababo.

UZAYINGEZELELA YINI IMFUNDO YAKHO?

3. Kuyini okungenza amanye amaKhristu akhethe ukungezelela imfundo yawo?

³ Kwezinye indawo umuntu usengathola umsebenzi esanda nje kuqeda isikolo ikanti kwezinye kuyabe kumele umuntu angezelele imfundo ukuze athole umsebenzi ongconywana. Kwezinye izikhathi lokho sokunganceda umKhristu ukuthi athole isikhathi sokutshumayela lesokwenzela uJehova okunengi. Lanxa kunjalo, nxa ufuna ukungezelela imfundo kumele ucabangisise sibili ngoba kwesinye isikhathi sokungakulethela inhlupho.

4. Ngubani olomthwalo wokutshela umuntu ukuthi angezelele yini imfundo yakhe? (Khangela lamabala angaphansi.)

⁴ IBhayibhili lithi umuntu ngamunye kumele ‘azithwalele umthwalo wakhe.’ (Gal. 6:5.) Yikho-ke umKhristu ngamunye kumele azikhethele ukuthi uzayingezelela yini imfundo yakhe kumbe hatshi.b Nxa abazali bengabafundisa kuhle abantwababo, kuzabalula ukuthi bakhethe kuhle endabeni le nxa sebekhulile.—Efe. 6:1; Zaga. 22:6.

5. Umuntu kumele aqalise nini ukucabanga ngendaba yokungezelela imfundo futhi kungani kumele enze njalo? (Khangela ongaphandle.)

⁵ Kungaba kuhle ukuthi abasakhulayo bahle bacabangisise ngokuthi bazayingezelela yini imfundo yabo. Lokho bangahle bakwenze bengakaqedi isikolo. Okungabanceda yikuhle baxoxisane labazali babo singakafiki isikhathi sokuthi bakhethe. Lokho kuzabapha isikhathi eseneleyo sokudingisisa ukuthi yikuphi okungcono abangakwenza. Sokungabanceda lokuthi bahle bakhethe izifundo ezizabanceda nxa sebesenza ikhosi abazayikhetha sebeqede isikolo. Manje kutshoni lokhu? Sekusitsho ukuthi vele umntwana kumele athi eqeda isikolo sokwenziwe isinqumo? Hatshi. (Zaga. 21:5) Abanye abasakhulayo bathi beqeda isikolo baqalise ukusebenza, baqalise lokuphayona ngapha besacabanga ukuthi bayingezelele yini imfundo yabo. Phela ukufunda akupheli, umuntu usengakhetha ukungezelela imfundo lanxa esemdala.

6. Kuyini okunganceda umuntu akhethe kuhle endabeni yokungezelela imfundo?

⁶ Manje kuyini okungakunceda ukhethe kuhle endabeni yokungezelela imfundo? Okuqakatheke kakhulu okumele ukwenze yikukhuleka ucela ukuthi uJehova akuncedise. (Jak. 1:5) Nanku okunye okumele ukwenze: Okokuqala, zihlole uzibuze ukuthi yindaba ufuna ukungezelela imfundo. (Hubo. 26:2) Okwesibili, cabangisisa ngomsebenzi ofuna ukuwufundela. (Zaga. 14:15) Khathesi kasixoxeni kabanzi ngemicijo le.

ZIHLOLE

7. Kuyini umKhristu okumele acabange ngakho nxa efuna ukungezelela imfundo?

⁷ Nxa ufuna ukungezelela imfundo yakho into eyisiqokoqela okumele uzibuze yona yikuthi vele ujongeni. Yindaba ufuna ukungezelela imfundo? Okwenza abantu abanengi bangezelele imfundo yikuthi bayabe befuna ukuthola umsebenzi abazawukholisa lozabanika imali ethe xaxa. Khona akukubi ukuba lomsebenzi onjalo. (1 Thim. 5:8) Lanxa kunjalo, iBhayibhili liyasixwayisa ngengozi yokuqakathekisa kakhulu imali lokuthemba izinto zalumhlaba. (Zaga. 23:​4, 5; 1 Thim. 6:​8-10; 1 Joh. 2:17) Nxa ungangezelela imfundo uhlose ukuba lemali enengi lodumo, usengozini ngoba sekungakutshiya ukhatshana loJehova futhi ungasathokozi.

8-9. (a) AmaKhristu kumele akubone njani ukungezelela imfundo? (UMathewu 6:33) (b) Ufundeni kuJosefina loMorine lo-Iris?

⁸ Manje sithini ngokungezelela imfundo? Okumele sihlale sikukhumbula yikuthi ukukhonza uJehova yikho okuqakatheke kakhulu empilweni yethu. (Mat. 22:​37, 38; Flp. 3:8) Yikho-ke ukungezelela imfundo kumele sikubone kuyindlela nje yokusincedisa ukuthi sithole okokuziphilisa ukuze sikhonze uJehova ngenhliziyo yonke.—Bala uMathewu 6:33.

⁹ Zwana ukuthi abanye abasakhulayo bakwenza njani lokhu. UJosefina ohlala eChile uthi: “Ngangezelela imfundo yami ukuze ngithole umsebenzi owawuzangipha isikhathi sokukhonza uJehova. Ngaba leqiniso lokuthi umsebenzi wesikolo awungiphambanisi kulokho engangifuna ukukwenzela uJehova.” Udadewethu okuthiwa nguMorine yena wenza ikhosi yokuluka inwele eyamthatha umnyaka owodwa ngoba wayefuna ukuyancedisa lapho okulabamemezeli abalutshwana khona. Uthi yena: “Ukwenza ikhosi le kwanginceda. Ngathi sengiyiqedile ngasebesebenza ngathola imali eyanginceda ukuthi ngithuthele lapho okulabamemezeli abalutshwana khona. Sengikhonale kwabalula lokuthi ngithole umsebenzi wokuziphilisa.” Udadewethu okuthiwa ngu-Iris yena wenza ikhosi eyadonsa isikhathi eside efundela ukuba ngudokotela wamazinyo. Uthi yena: “Ukungezelela imfundo kulobuhle bakho sibili kodwa ayisikho okungakwenza uthokoze futhi uhlaliseke. Isizatho esikhulu esingenza umuntu athokoze yikuqakathekisa ukukhonza uJehova.” Nxa uJehova singamfaka kuqala empilweni yethu siqakathekise ubungane bethu laye, uzasincedisa ukuthi senze izinqumo ezizakwenza sihlale sithokoza.

DINGISISA NGOMSEBENZI OFUNA UKUWUFUNDELA

10. UDutheronomi 32:29 angakunceda njani nxa ucabanga ngokungezelela imfundo?

¹⁰ Lanxa kungabe kulomsebenzi ofuna ukuwufundela, kungaba kuhle ukuqala udingisise langeminye etshiyeneyo kulokuthi uhle unamathele kuwonalowo wodwa. (Khangela loZaga 18:17.) Lezinsuku phela isiminengi imisebenzi futhi sokulezinye indlela zokungezelela imfundo ezazingekho kudala. Usungenelisa lokwenza ikhosi ethile uzihlalele ngekhaya usebenzisa ezempucuko. Ungakhohlwa lokuthi kwesinye isikhathi usungathola okokuziphilisa ungazange ungezelele imfundo. Ngokwesibonelo, uJohanna ohlala eFinland yena kazange angezelele imfundo yakhe. Uthi: “Ngathi ngiqeda isikolo ngathola umsebenzi ngahle ngaqalisa ukuphayona. Minengi imisebenzi esengike ngayenza futhi ngizibonele ukuthi uJehova uyasigcina isithembiso sakhe sokuthi uzahlala esinakekela.” Hlala ukhumbula ukuthi lanxa ukungezelela imfundo kungakunceda, sokungakulethela lenhlupho. Yikho zibuze: ‘Lanxa engifuna ukukwenza kuzanginceda sibili, akusoze kungiphambanise yini kumbe kungitshiye ngiphakathi kobunzima?’ (Bala uDutheronomi 32:29; 1 Khor. 10:23) Khathesi ake sibone okunye okungakunceda ucabangisise ngombuzo lo.

11. Kungani kumele ucabange ngesikhathi ozasithatha usenza ikhosi yakho iviki ngayinye? (Khangela lemifanekiso.)

¹¹ Uhlelo lwakhona luzakudlela isikhathi esinganani? Zibuze ukuthi umsebenzi wesikolo uzabe ukuthathela isikhathi esinganani ngeviki. Lizabe lifunda okwamahora amangaki? I-homework yona ke? Uzabe uchitha isikhathi esinganani uyibhala? Uzabe ulokhe ulaso yini isikhathi sokuqinisa ubungane bakho loJehova lesokwenza izinto okukhangelelwe ukuthi uzenze emulini? (Flp. 1:10) Akusoze kukutshiye udiniwe yini uze wehluleke lokulungiselela imihlangano kumbe ukuzibalela iBhayibhili uwedwa? Lokhu yikho kanye okwenzakala kuJeroz ohlala e-India. Uthi: “Ngasengidonsa nzima ekukhonzeni. Kwasekunzima ukuya ekutshumayeleni futhi kwakusiba nzima lokulalela emihlanganweni yebandla ngenxa yokudinwa. Kwesinye isikhathi ngasengilova lokulova. Uyazi ngiyazisola njani! Ngabe vele angiyenzanga ikhosi le ngoba yangiqedela isikhathi esinengi engangingasisebenzisa ekukhonzeni.” Kodwa akhona amanye amakhosi angathathi isikhathi, amanye vele uyabe ufunda amahora amalutshwane ngeviki, le-homework yakhona iyabe inganganani. Ngokwesibonelo, uRabeca ohlala eMozambique kazisoli ngekhosi ayenzayo. Uthi: “Thina sasifunda amahora amabili kuphela ngelanga. Lokhu kwanginceda ukuthi ngiqhubeke ngiphayona.”

12. Yiphi imibuzo okumele umuntu azibuze yona? (UmTshumayeli 12:1)

¹² Izadonsa isikhathi esinganani? Cabanga ngokuthi ikhosi yakhona izathatha izinyanga ezingaki kumbe iminyaka emingaki. Uyabe usisebenzise kuhle yini isikhathi sakho? (Efe. 5:​15-17) Nxa ungosakhulayo uyabe usisebenzise kuhle yini isikhathi sobutsha bakho? Uyabe uzakwenelisa yini ukungezelela inkonzo yakho, mhlawumbe ngokungena enkonzweni yesikhathi sonke? (Bala umTshumayeli 12:1.) Khumbula ukuthi kulezikolo lamakholeji alamakhosi angathathi isikhathi eside langaduli kangako kulaweyunivesithi. UMario ohlala eChile uthi: “Ngakhetha ukwenza ikhosi yeminyaka emibili futhi ayizange idule njengokuya eyunivesithi. Kwaba lula ukuthi ngiphayone ngapha ngisenza ikhosi yami ngoba ngangifunda amalanga amane kuphela ngeviki.”

13. Yindaba kuqakathekile ukuzibuza ukuthi uzafunda uhlala ngaphi?

¹³ Uzabe ufunda uhlala ngaphi? Sokungenzakala ukuthi uthole ikhosi esikolo esiseduze okokuthi ungafunda usuka ngakini. Kodwa nxa kudingeka ukuthi uthuthele kwelinye idolobho kumbe kweyinye indawo kumbe uyefunda uhlala esikolo, uzakwenza njani? Lapho-ke sokumele unanzelele ngoba ukusuka ngakini kungaba yingozi ekukhonzeni ikakhulu nxa uzakuyahlala labantu abangamkhonziyo uJehova. (Zaga. 22:3; 1 Khor. 15:33) UMatias ohlala eMozambique wenza ikhosi engaduliyo eyathatha umnyaka owodwa kodwa uyazisola kakhulu. Yindaba? Uthi: “Ngangifunda ngihlala esikolo futhi nsuku zonke ngangilingeka ukuthi ngenze izinto ezingamthokozisiyo uJehova. Engingakutsho yikuthi nxa umuntu efuna ukungezelela imfundo kungabangcono ukuthi afunde ehlala labangakibo kulokuthi aye kweyinye indawo.” Udadewethu ohlala eRussia yena uthi: “Mina ngakhetha ukungezelela imfundo ngihlala labangakithi. Lokhu kwanginceda ukuthi ngihlale ngiseduze loJehova njalo ngibalekele lengozi ezinengi.” Kwesinye isikhathi usungazenzela ikhosi uhlala ngakini ufunda ngezempucuko.

14. Kuyini okunye okumele uzibuze khona nxa ucabanga ngokungezelela imfundo? (ULukha 14:28)

¹⁴ Ulayo yini imali yakhona? Amanye amakhosi awaduli kangako futhi kwezinye indawo uhulumende nguye obhadalayo. Endaweni ezinjalo kungabalula ukuthi ungezelele imfundo ube lolwazi oluzakunceda wenelise ukwenza umsebenzi owufunayo ungazange usebenzise imali enengi. Kodwa endaweni ezinengi ukungezelela imfundo kuyadula kakhulu. Ngokwesibonelo, ezinye izikolo ziyabe zingayisizo zikahulumende kumbe kungadingeka ukuthi udinge omunye umuntu ozabe umbhadala ukuthi akuncedise uzwisise lokho oyabe ukufunda. Amanye amakhosi atshiya abantu bephakathi kwezikwelede ezesabekayo. U-Adilson ohlala eMozambique uyazisola ngesinqumo asenzayo. Uthi: “Ukhulu logogo babeze bazincitshe ezinye izinto eziqakathekileyo ezinjengokudla ukuze bangibhadalele ikhosi yeminyaka emine engangiyenza.” Kuqakathekile ukuthi ungakakhethi umsebenzi ofuna ukuwufundela uzibuze ukuthi kuzafuneka malini lokuthi wena labangakini lilayo yini imali yakhona. Ungazibuza lokuthi akula yini eyinye ikhosi engaduliyo ehambelana laleyo ofuna ukuyenza. (Bala uLukha 14:28) Nxa kuyikuthi uzaboleka imali ukuze ufunde kuyabe kuzakuthatha isikhathi esinganani ukuthi ubhadale isikwelede leso? Akumelanga ukhohlwe ukuthi kuzamele ubhadale isikwelede futhi usale ulokuyimadlana kokuziphilisa.—Zaga. 22:7.

15. Kungani kuqakathekile ukuzibuza ukuthi uzawuthola yini umsebenzi ofuna ukuwufundela?

¹⁵ Umsebenzi ofuna ukuwufundela uyatholakala yini? Ungakakhethi ikhosi ofuna ukuyenza zibuze ukuthi yiphi imisebenzi etholakala lula lapho ohlala khona kanye lalapho ongathuthela khona ngelinye ilanga. Amanye amakhosi aphongutshiya umuntu esazi nje okusemabhukwini kodwa kungathiwa awenze umsebenzi wakhona kube yinkani. (Kol. 2:8) Omunye udadewethu ohlala e-India uthi: “Ikhosi engayenzayo yangigqiba ulwazi ekhanda kuphela. Nxa ngingathi ngatshengiswa ukuthi umsebenzi wakhona wenziwa njani sibisibili ngiyabe ngiqamba amanga. Kangizange ngiwuthole umsebenzi engangiwufundele ngoba ngangingakwazi lokuthi wenziwa njani.” Kwesinye isikhathi usungawufundela sibili umsebenzi kodwa kube nzima ukuthi uwuthole. USublime ohlala eCentral African Republic, wenza ikhosi yokulungisa amafriji lama-air conditioner. Uthi: “Lapho engihlala khona abantu abanengi bayazilungisela izinto lezi nxa zingafa, yikho akulula ukuthi ngithole umsebenzi.”

16. Yiphi imibuzo ezakunceda ucabangisise ngekhosi ofuna ukuyenza?

¹⁶ Kuhle ukucabanga ukuthi uzathola umsebenzi onjani lokuthi uzawukholisa yini. (Umtshu. 3:​12, 13) Uzabe usebenza endaweni enjani futhi usebenza labantu abanjani? Umsebenzi wakhona awulazingozi ezinengi yini? Akula kuncintisana yini? Abakuqhatshileyo abasoze bakusebenzise gadalala yini okokuthi uzahlala udiniwe futhi ukhathazekile? Umsebenzi ofuna ukuwenza uyabhadala yini? Imali yakhona izakwenela yini? Umsebenzi wakhona ufuna ukuthi uhlale ungezelela imfundo yini? Okuqakatheke kakhulu okumele uzibuze khona yikuthi umsebenzi lo awusoze ukuphambanise ekukhonzeni yini? (Umtshu. 12:13) Kodwa-ke kwesinye isikhathi ngenxa yokuswelakala kwemisebenzi sesingacina sesidobha nje kuyonaleyo eyabe ikhona. Lanxa kunjalo nxa ukhethe kuhle ikhosi ofuna ukuyenza sokungaba lula ukuthi uthole umsebenzi ongcono. UTabitha ohlala e-India wenza ikhosi yokuthunga eyamthatha izinyanga eziyisithupha. Uthi: “Okwenza ngakhetha ikhosi leyi yikuthi ngananzelela ukuthi yayingaduli lokuthi umsebenzi wakhona wawuzanginika isikhathi sokuphayona ngoba ngiyabe ngizikhethela ukuthi ngifuna ukusebenza nini. Ngabona lokuthi abantu abanengi bazahlala befuna ukuthungisa.” Ikhosi le yanceda uTabitha ukuthi aqhubeke ezinakekela ngapha ephayona.

17. (a) Ungenzani ukuze uthole ulwazi olungakunceda ukhethe kuhle? (b) Yiziphi izimiso ongazisebenzisa ezingakunceda wenze isinqumo esihle? (Khangela lebhokisi elithi “Izimiso EziseBhayibhilini Ezingakunceda.”)

¹⁷ Sesixoxe ngezinto ezitshiyeneyo ezingakunceda nxa kuyikuthi ucabange ukungezelela imfundo. Okunye okungakunceda yikuya ezikolo uyebuzisisa ngamakhosi ongabe ufuna ukuwenza kumbe ungene kumawebhusayithi ezikolo lezo udingisise ngamakhosi lawo. Hlola ukuthi uzawuthola yini umsebenzi nxa usuqedile ikhosi yakho. Buza abanye abenza ikhosi leyo kumbe abenza umsebenzi lowo uzwe ukuthi kubahambela njani. (Zaga. 13:10) Babuze ukuthi kuyini abakuthandayo ngekhosi leyo kumbe ngomsebenzi lowo lokuthi yibuphi ubunzima obukhona. Dinga lamacebo kwabanye ebandleni. (Zaga. 15:22) Ungababuza ukuthi yiphi ikhosi kumbe umsebenzi abangakukhuthaza ukuthi uwenze. Kwesinye isikhathi bangakutshela ngento engakaze ifike ngitsho lasengqondweni yakho.

18. Kuyini okungamelanga sikukhohlwe?

¹⁸ Sesibonile ukuthi ukungezelela imfundo kungasinceda kodwa kulobunzima bakho. Yikho kuqakathekile ukuthi uthandaze futhi ucabangisise kuhle ngofuna ukukwenza. Ukungezelela imfundo kungakunceda uthole okokuziphilisa kodwa ungakhohlwa ukuthi okuzakwenza uthokoze sibisibili yikuhlala useduze loJehova. (Hubo. 16:​9, 11) UJehova uzahlala ebanakekela abantu bakhe kungelani lokuthi benza msebenzi bani kumbe bafunde bayafika ngaphi. (Heb. 13:5) Kodwa kuyini okungakunceda ukuthi uhlale useduze loJehova nxa kuyikuthi usukhethe ukungezelela imfundo? Asixoxeni ngalokho esihlokweni esilandelayo.