“Abantwana Balilifa Elivela KuJehova”

KUFIKANI engqondweni yakho nxa usizwa ibala elithi “ilifa”? Engxenye ungacabanga ngemali, indlu, umhlabathi kumbe eyinye nje impahla eligugu okumele igcinwe kuhle emulini.

IBhayibhili lithi “abantwana balilifa elivela kuJehova.” (Hubo. 127:3) Abazali abathanda uJehova bayakwazi ukuthi abantwababo bayizipho abaziphiwe nguJehova. Yikho besenza konke abakwenelisayo ukuze babondle, babavikele njalo babafundise ngoJehova.

Kodwa okudanisayo yikuthi abanye abazali ababaqakathekisi abantwababo. (Isaya. 49:15; 2 Thim. 3:1-3) Abanye abazali bayafisa sibili ukubakhulisa kuhle abantwababo kodwa bayehluleka ngenxa yobunzima obutshiyeneyo abahlangana labo. Yibuphi lobo bunzima? UJehova ukhangelele ukuthi abazali babondle njani abantwababo? Abazali abakhonza uJehova bangenzani ukuze abantwababo bakhule bethanda uJehova?

UBUNZIMA

Okukhangelelwe yizihlobo labanye abantu emphakathini. Kwezinye izindawo abazali abalabantwana abanengi bayahlonitshwa kakhulu. Lokhu kwenza abazali bacine besiba labantwana abanengi lanxa kuzabathwalisa nzima ukuthi babondle.
Ukukhathazeka ngelakusasa. Kwezinye indawo abantwana bayafa besesebancane ngenxa yendlala, imikhuhlane loba ukuswelakala kwemithi. Lokhu yikho okwenza abanye abazali bacine besiba labantwana abanengi bezitshela ukuthi lanxa abanye abantwana bengafa bakhona abazakhula. Abanye bona bakhetha ukuba labantwana abanengi ukuze babe labantu abazabagcina nxa sebekhulile. Lokhu kwande kakhulu emazweni lapho okungelanhlelo zikahulumende ezokunakekela asebekhulile.
Ukwehluleka ukusebenzisa indlela zokuvikela ukuzithwala. Kwezinye indawo kunzima ukuthi omama bathole amaphilizi abangawanatha ukuze bangazithwali. Abanye bayesaba ukuthi ukusebenzisa izindlela lezi kungabangela imikhuhlane. Ikanti lezinye indlela ezingasetshenziswa ngabantu ziyadula.a

UJEHOVA UKHANGELELE UKUTHI ABAZALI BABONDLE NJANI ABANTWABABO?

Imuli iyazikholisela ephakhi. Ubaba ulalele indodakazi yakhe, umama udlala ibhora lendodana yabo. — Ncedisa umntwana ngamunye

Banakekele abantwabakho. UJehova ufuna ukuthi abazali babeleqiniso lokuthi abantwababo bayafunda, balokudla, lendawo yokuhlala kanye lezigqoko. Yikho abazali abangamaKhristu abasoze baphonguhambisa abantwababo ebhodingi kodwa kumele bahlale labo ukuze babeleqiniso lokuthi bakhula kuhle njalo bavikelekile. Abazali bangenelisa ukubakhulisa kuhle abantwababo lanxa bengelamali enengi. UJehova wakhetha uMariya loJosefa ukuthi babe ngabazali bakaJesu lanxa babenganothanga.—Mat. 13:55, 56; Luk. 2:24.

Okutshiwo liBhayibhili: “Nxa umuntu engabanakekeli abangabakhe ikakhulu labo abangamalunga emuli yakhe, uselulahlile ukholo futhi mubi kulomuntu ongakholwayo.”—1 Thim. 5:8.

UJehova uyakwazi ukuthi nxa abazali sebekhulile bangadinga ukuncediswa. Kungaba kuhle ukuthi abantwana abangamaKhristu bacabange ngokuthi bangabancedisa njani abazali babo nxa sebekhulile. (Eks. 20:12; 1 Thim. 5:4) Lanxa kunjalo uJehova uyathokoza kakhulu nxa ebona abazali kuyibo abanakekela abantwababo.—2 Khor. 12:14.

Bafundise ngoJehova. Abazali abangamaKhristu kumele bafundise abantwababo ngoJehova njalo babancedise ukuthi bamthande. Lo ngumsebenzi oqakatheke kakhulu okumele wenziwe ngumzali ngamunye.—Dute. 6:6, 7.

Okutshiwo liBhayibhili: “Qhubekani libakhulisa ngokulaya langokuxwayisa okuvela kuJehova.”—Efe. 6:4.

UJEHOVA UZAKUNCEDISA

Indoda lomkayo bayaxoxa, phambi kwabo kuleBhayibhili elivuliweyo. — Xoxani ngokuthi lizakuba labantwana abangaki

Xoxani ngokuthi lizakuba labantwana abangaki. Nxa kuyikuthi lifuna ukuba labantwana kumele licabange ukuthi lizakuba labangaki. Ngokwesibonelo, lizenelisa yini ukuthi bonke bahambe esikolo, badle njalo babe lezigqoko ezeneleyo? Kuqakathekile ukuthi lixoxe ngezinto lezi ukuze lingacini selilabantwana abanengi beselisehluleka ukubanakekela ngendlela uJehova afuna libanakekele ngayo. Lanxa okunye kungasoze kuhambe ngendlela eliyabe lihlele ngayo, khumbulani ukuthi uJehova uzalincedisa ukuthi libakhulise kuhle abantwabenu.—Umtshu. 9:11

Okutshiwo liBhayibhili: “Amacebo abakhutheleyo azabenza baphumelele sibili kodwa bonke abalamawala bacina bengabayanga.”—Zaga. 21:5.

“Kambe ngubani phakathi kwenu ongathi efuna ukwakha umphotshongo angaqali ahlale phansi abale izindleko ukuze abone ukuthi izinto alazo ziyenela yini ukuthi awakhe awuqede?”—Luk. 14:28.

Khonzani uJehova liyimuli. Nxa kuyikuthi selilabo abantwana wobani leqiniso lokuthi umntwana ngamunye uyafunda ngoJehova. Kumele balalele esikufundiswa emihlanganweni yethu. Wobani lokukhonza kwemuli maviki wonke futhi lihambe labo ekutshumayeleni. Umsebenzi wokunakekela abantwana ngowakho njengomzali, ungazitsheli ukuthi bazagcinwa yizihlobo kumbe ukhangelele ukuthi abantwabakho asebekhulakhulile kube yibo abagcina abanawabo. Khona kungumsebenzi sibili ukufundisa abantwana ukuthi bathande uJehova kodwa nxa ungenza konke okusemandleni akho, uJehova uzakubusisa.

Okutshiwo liBhayibhili: “Akulanto engithokozisa ukwedlula ukuzwa ukuthi abantwabami baqhubeka behamba eqinisweni.”—3 Joh. 4.b

Mthembe uJehova. Kungelani lokuthi licabanga ukuba labantwana kumbe vele selilabo, okuqakathekileyo yikulandela lokho uJehova akutshoyo kulokuzikhathaza ngalokho okucatshangwa ngabantu emphakathini.

Umfanekiso: 1. Indoda lomkayo bahlezi lomntanabo ongumfana emhlanganweni webandla. Umfana uphakamise isandla ufuna ukuphendula. 2. Imuli isekutshumayeleni. Ubaba uhamba lendodakazi yabo esikhulile, umama yena uhamba lokungumfanyana lesicino sabo esiyinkazana. — Kungumsebenzi sibili ukufundisa abantwana ukuthi bakhule bethanda uJehova

Nxa kuyikuthi likhethe ukuba labantwana abalutshwana kumele limthembe uJehova ukuthi uzalinakekela nxa selikhulile. Lingazitsheli ukuthi kumele libe labantwana abanengi ukuze baligcine nxa selikhulile. UJehova ulithembise ukuthi kasoze alitshiye loba sekutheni njalo siyakwazi ukuthi uJehova uyazigcwalisa zonke izithembiso zakhe.—Josh. 23:14.

Okutshiwo liBhayibhili: “Themba uJehova ngenhliziyo yakho yonke, ungathembi okwakho ukuzwisisa. Mdinge kuzo zonke izindlela zakho, yena uzaqondisa izindlela zakho.”—Zaga. 3:5, 6.

“Ngangimncane, khathesi sengimdala kodwa angikaze ngibone olungileyo elahliwe loba abantwabakhe beswele ukudla.”—Hubo. 37:25.

“Ngakho qhubekani lifuna kuqala uMbuso kanye lokulunga kwakhe, kuzakuthi-ke zonke lezi ezinye izinto lazo liziphiwe.”—Mat. 6:33.

Nxa ulomntwana, hlala ukhumbula ukuthi leso yisipho esiligugu osiphiwe nguJehova futhi uyathokoza kakhulu nxa ekubona uzama ukumnakekela. Xoxani ngokuthi lizakuba labantwana abangaki, lokuthi lizakwenzani ukuze abantwabenu bakhule bemthanda uJehova. Lingaphonguthatheka ngokukhulunywa yizihlobo kumbe ngabanye abantu emphakathini licine selilabantwana abanengi elingenelisiyo ukubondla. Ngumsebenzi wenu ukuncedisa abantwabenu ukuze bakhule bevikelekile futhi bekwazi ukuthi liyabathanda. Kumele liligcine kuhle ilifa lenu eliliphiwe nguJehova.

Abazisoli

Ukuba labantwana abalutshwana kutsho ukuthi lizathwala nzima yini? Lo ngumbuzo okhathaza abazali abanengi abahlala emazweni angamanga kuhle kwezomnotho. Nanku okunye okwakhulunywa ngabazali abangamaKhristu abahlala emazweni lawo.

Bakhona yini abantu ababesithi libe labantwana abanengi?

“Ye bakhona, abanye babo ngabasebandleni lethu. Eyinye indoda lomkayo bathi, ‘Ungitshela ukuthi lifuna ukuba lomfana oyedwa nje kuphela? Lapha e-Africa vele kuyabe kungani awulamntwana. Nxa bengaba babili kuyabe kungani uloyedwa.’ Sathi seselamise ngenkazana baqhubeka besithi kumele sibe labanye abantwana futhi.”—UJeremias

Ukungabi labantwana abanengi kulenze lathwala nzima yini?

“Ngitsho lakancane! Ukuba labantwana abalutshwana kwasinceda ukuthi senelise ukubakhulisa kuhle lokuthi sithole isikhathi eseneleyo sokubafundisa ngoJehova. Ngakithi kwakulabantwana abanengi kakhulu futhi ngangizibonela ukuthi abazali bethu babethwala nzima ukuze basinakekele lokuthi basihambise esikolo.”—UJeremias

Abantwabenu bathini?

“Thina silabantwana ababili kuphela futhi bahlala besibonga ngoba bayazibonela indlela abanye abantwana abadubeka ngayo ngenxa yokuthi ngakibo bazalwa bebanengi.”—UFilipe

“Abantwabethu bakhula bekwazi ukuthi bayathandwa. Sasihlala sivakatshelwa ngabafowethu labodadewethu abanengi ngekhaya. Ingxoxo ababesiba lazo labantwabethu zabanceda ukuthi bakuqakathekise ukukhonza uJehova njalo bazimisele ukwenza okunengi emsebenzini wakhe.”—UCarlos

Kulincede njani ukuba labantwana abalutshwana?

“Akuzange kusithwalise nzima ukondla abantwabethu. Eminyakeni emithathu esanda kudlula ngaphelelwa ngumsebenzi owawunginika imali ezwayo kodwa akuzange kube nzima kangako ukuthi sivumelane lezimo ngoba vele sibalutshwane.”—UJeremias

“Ukungabi labantwana abanengi kusincede ukuthi sibondle kuhle futhi sibafundise ngoJehova. Senelisa lokuya ezindaweni lapho okulabamemezeli abalutshwana sisiyatshumayela. Sasizinika isikhathi eseneleyo sokuxoxa lomntwana ngamunye. Abantwabethu bonke bakhonza uJehova futhi bazimisele ukwenza okunengi emsebenzini wakhe.”—ULenadi

Ungabakhuthaza usithini abanye abazali?

“Ngizibonele ngawami ukuthi aliqiniso amazwi akuHubo 34:10b athi: ‘Labo abadinga uJehova abasoze baswele lutho oluhle.’ UJehova usibusisile kazange asilahle.”—URafael

a Indoda lomfazi abatshadileyo kumele baxoxe ngokuthi bazakuba labantwana yini, bazakuba labo nini lokuthi bazakuba labangaki. Nxa kuyikuthi abafuni ukuba labantwana kumele baxoxe ngokuthi yiziphi izindlela abazazisebenzisa ukuze umama angazithwali. Akulamuntu okumele abahlulele ngendlela abazakhetha ukuzisebenzisa. (Rom. 14:4, 10-13) Abatshadileyo kumele babe leqiniso lokuthi indlela zokuvikela ukuzithwala abazisebenzisayo aziphikisani lalokho okufunwa nguJehova. Kanti njalo amaKhristu atshadileyo kumele ahlale ekhumbula lokho okukhulunywa ku-1 Khorinte 7:3-5.

b Lanxa lapha umphostoli uJohane wayekhuluma ngabantu ayebafundise iqiniso, amazwi la ayasebenza kubo bonke abazali.