Kungani Kwakumele Sihlawulelwe?

1-2. Kungani kumele abantu bahlawulelwe? (URoma 7:​22-24) (Khangela lomfanekiso.)

AKUCABANGE ngomuntu ophakathi kwesakhiwo. Ethi esalibele isakhiwo leso simdilikele, abandezelwe yizitina futhi alimale kabuhlungu. Akula olunye ulutho angalwenza ngaphandle kokuthi ahlabe umkhosi ecela uncedo.

² Wonke umuntu ufanana lendoda le edilikelwe yisakhiwo. Kungani sisitsho njalo? Ngesikhathi u-Adamu ehlamukela uJehova wahle wathela wonke umuntu emanyaleni. Bonke abantwana baka-Adamu bahle bazalwa belesono. Kungani isono lesi sisibandezele ngoba akulalutho esingalwenza ngaso ngaphandle kokukhala nje sicela uncedo. Umphostoli uPhawuli wafanisa abantu abalesono labantu abathunjiweyo. (Bala uRoma 7:​22-24.) Laye isono sasimthwalise nzima okokuthi waze wathi: “Ngubani ozangikhulula emzimbeni lo ozangibulalisa.” Wayekwazi mhlophe ukuthi isono esasithatha ku-Adamu sizamtshiya engcwabeni. (Rom. 6:23) Wonke umuntu olesono kumele ahlawulelwe.

3. Inhlawulo isinceda njani?

³ Ukuhlolisisa amazwi kaPhawuli kwenza sibone ukuthi wayelethemba, kazange azitshele ukuthi kwasekuphelile ngaye. Waphinda wathi: “Kabongwe uNkulunkulu ngoJesu Khristu iNkosi yethu!” (Rom. 7:25) Lapha umphostoli uPhawuli wayekhuluma ngenhlawulo kaJesu.a Esihlokweni lesi sizaxoxa ngokuthi (1) inhlawulo yenza ukuthi uJehova asithethelele izono zethu khathesi, (2) iphinde isinike lethemba lokuthi sizaphila emhlabeni omutsha sesingaselasono (3) njalo sizaphinda sibe ngabangane bakaJehova. Ukuxoxa ngezinto lezi kuzasinceda ukuthi simthande kakhulu uJehova uNkulunkulu osinika ithemba. (Rom. 15:13) Kuzasinceda lokuthi siyithande kakhulu iNdodana kaNkulunkulu ‘eyaba yinhlawulo yenza ukuthi sikhululwe njalo sithethelelwe izono zethu.’—Kol. 1:14.

INHLAWULO YENZA UKUTHI UJEHOVA ASITHETHELELE

4-5. Inhlawulo isinceda ngani? (UmTshumayeli 7:20)

⁴ Sonke siyaphambanisa ngesikwenzayo langesikukhulumayo. (Bala umTshumayeli 7:20.) Inhlawulo kaJesu yenza ukuthi uJehova athethelele izono zabantu kungelani lokuthi ngezinkulu kumbe ngezincane. Umthetho kaMosi wawusithi nxa umuntu angabulala kumbe alale lomfazi weyinye indoda kwakumele abulawe. (Levi. 20:10; Nani. 35:​30, 31) Kwesinye isikhathi umuntu angazitshela ukuthi wenze isono esingatsho lutho, okusalayo yikuthi isono yisono. Ngokwesibonelo, umhubi uDavida wathi: “Ngizananzelela engikwenzayo ukuze ngingoni ngolimi lwami.” (Hubo. 39:1) Siyabona-ke ukuthi kwesinye isikhathi singona ngesikukhulumayo.—Jak. 3:2.

⁵ Engxenye uyake uzisole ngento oyabe uyenzile kumbe uyikhulume komunye umuntu. Kodwa kuyabe kungelanto ongayenza ngoba ayabe esechithekile engasabutheki. IBhayibhili lithi: “Nxa sisithi ‘asilasono,’ siyaziyenga futhi iqiniso alikho kithi.”—1 Joh. 1:8.

6-7. Kuyini okwenza uJehova asithethelele? (Khangela lomfanekiso.)

⁶ Okwenza uJehova asithethelele yikuthi uJesu wasifela. (Efe. 1:7) Kambe ukuthi sokumele sizitshele ukuthi singenza loba yini ngenxa yokuthi siyakwazi ukuthi uJehova uzasithethelela? Hatshi. UJehova uyasizonda isono.—Isaya. 59:2.

⁷ Umthetho kaMosi wawusithi ama-Israyeli kumele enze imihlatshelo ukuze athethelelwe izono zawo. (Levi. 4:​27-31; 17:11) Umhlatshelo kaJesu wawungcono kakhulu kulaleyo eyayisenziwa ngama-Israyeli. Umphostoli uPhawuli wakucacisa lokhu ngesikhathi ebhalela amaKhristu ayeseKhorinte. Wathi eseqambe izinto ezimbi ababezenza bengakabi ngamaKhristu wasesithi: “Selageziswa lahlanzeka futhi selangcweliswa kwathiwa lilungile ngebizo leNkosi uJesu Khristu langomoya kaNkulunkulu wethu.”—1 Khor. 6:​9-11.

8. Kuyini ongacabangisisa ngakho ngesikhathi seSikhumbuzo salonyaka?

⁸ Njengoba ulungiselela iSikhumbuzo salonyaka, zinike isikhathi sokucabangisisa ngendlela uJehova athethelela ngayo. Lokhu kuzakunceda ukuthi ungazikhathazi kakhulu ngezono owazenza kudala ngoba uJehova sewakuthethelela. Kodwa ungenzani nxa kukuthwalisa nzima ukukholwa ukuthi uJehova usekuthethelele? Khumbula ukuthi uJehova nguye okuthethelelayo njalo unike iNdodana yakhe umsebenzi wokwahlulela abantu. Ngakho-ke ayisikho kwakho ukuthi uzahlulele uzitshela ukuthi uJehova kasoze akuthethelele. IBhayibhili lithi: “Nxa sihamba ekukhanyeni njengoba yena [uJehova] esekukhanyeni, silobudlelwano laye njalo igazi leNdodana yakhe uJesu liyasihlambulula kuzo zonke izono.” (1 Joh. 1:​6, 7) Njengoba nje ungazithandabuzi izimfundiso eziseBhayibhilini, akumelanga uthandabuze lokuthi uJehova usekuthethelele. Kumele ukukholwe sibili ukuthi uJehova nguNkulunkulu olesihawu njalo uzimisele ukukuthethelela.—Hubo. 86:5.

INHLAWULO YENZA SIBE LETHEMBA LOKUTHI ISONO SIZAQEDWA

9. Yibuphi ubunzima obubangelwa yisono esazalwa silaso? (IHubo 51:5)

⁹ IBhayibhili lithi wonke umuntu wazalwa elesono. (Bala iHubo 51:5.) Isono lesi yiso esibangela ukuthi senze izinto ezimbi, sigule, siguge njalo sife. Yikho phela labantwana abancane begula njalo besifa lanxa beyabe bengonanga lutho. Abantu bonke bathwele nzima ngenxa yesono sika-Adamu.

10. U-Adamu lo-Eva bezwa njani sebewonile?

¹⁰ U-Adamu lo Eva bathi sebephule umthetho kaNkulunkulu imizwangedwa yabo yaqala ukubathonisisa. (Rom. 2:15) Babengasahlalisekanga ngitsho ngoba babesizwa ukuthi kukhona okwakungasahambi kuhle. Bavala ubunqunu babo basebezama lokucatshela uJehova. (Gen. 3:​7, 8) U-Adamu lo-Eva badliwa yisazela, bezwa ubuhlungu njalo basebekhathazekile. Impilo yabo yayisitshintshile sibili njalo babezaqhubeka bephakathi kobunzima baze bayengena egodini.—Gen. 3:​16-19.

11. Yiziphi inhlupho abantu abahlangana lazo ngenxa yesono?

¹¹ Lathi ngezinye izikhathi siyake sikhathazeke, sidane, sizwe ubuhlungu kumbe singahlaliseki ngenxa yokuthi silesono esasithatha ku-Adamu. Singaze silwise njani, iqiniso yikuthi kulezinye inhlupho esingeke sizibalekele ngoba singabantu abalesono. (Rom. 8:20) Bonke abantu bathwele nzima nje ngenxa yesono. Ngokwesibonelo ohulumende abanengi bayazama ukuthi baqede udlakela, bancedise abantu abangabayanga, baqede izimpi njalo bathuthukise lenhlalakahle yabantu. Kodwa bangaze bazame njani iqiniso yikuthi kabenelisi ukuqeda inhlupho zabantu. Manje kuyini okusinceda ukuthi sibe lethemba lokuthi izinto zizalunga?

12. Yiliphi ithemba esilalo?

¹² Inhlawulo yenza sibe lethemba lokuthi uJehova uzasiqeda du isono ebantwini. (Rom. 8:21) Nxa sesiphila emhlabeni omutsha singaselasono, akula phakathi kwethu ozagula kumbe akhathazeke. Akula ngitsho lomuntu ozabe edliwa yisazela kumbe azwe ubuhlungu. UJesu Khristu onguMbusi wokuthula uzakwenza ukuthi abantu bakukholise ukuphila emhlabeni kungasela lokukodwa okubakhathazayo.—Isaya. 9:​6, 7.

13. Kuyini okunye ongacabanga ngakho iSikhumbuzo singakafiki?

¹³ Cabanga nje ukuthi uzayikholisa njani impilo nxa ungaselasono. Uyazibona yini uvuka uqine saka, kungela ngitsho lento oyesabayo? Awukhathazekanga ngitsho ngokuthi wena kumbe izihlobo zakho zizakuthatha ngaphi ukudla. Awesabi ukuthi uzagula kumbe uzakufa, uzizwa nje uhlalisekile. Ukucabangisisa ngezithembiso zikaNkulunkulu kuzakunceda ukuthi ube lokholo oluqinileyo njalo uqinisele kuloba yibuphi ubunzima ongahlangana labo. (Heb. 6:​18, 19) Hlala ukhumbula ukuthi uJehova “uyabapha umvuzo labo abamdinga ngeqiniso.” (Heb. 11:6) Siyakubona sibili ukuqakatheka kwenhlawulo ngoba kungayisiyo ngabe kasilathemba.

INHLAWULO YENZA SIBE NGABANGANE BAKANKULUNKULU

14. Kuyini okwenza abantu baqhelelane loNkulunkulu?

¹⁴ Okwenziwa ngu-Adamu lo-Eva kwahle kwaphambanisa impilo yabantu bonke. Lanxa kuyibo abonayo, iBhayibhili lithi wonke umuntu wahle waba yisitha sikaNkulunkulu. (Rom. 8:​7, 8; Kol. 1:21) Kusukela ngalesosikhathi abantu bahle baqhelelana loJehova ngoba yena uphelele futhi uyasenyanya isono. IBhayibhili lize lithi, ‘amehlo kaJehova ahlanzeke kakhulu, ngeke akhangele okubi futhi ngeke abekezelele izinto ezimbi.’ (Hab. 1:13) Inhlawulo yiyo eyenza ukuthi abantu baphinde babe ngabangane bakaJehova.

15. Usinceda ngani umhlatshelo kaJesu?

¹⁵ IBhayibhili lithi uJesu waba ngumhlatshelo wezono zethu ukuze sibuyisane loNkulunkulu. (1 Joh. 2:2) Umhlatshelo lo wenza ukuthi abantu baphinde babe ngabangane bakhe. (Rom. 3:​23-26) Umhlatshelo kaJesu uyasebenza ngitsho lasebantwini abaphila uJesu engakabhadali inhlawulo. UJehova wayebabona belungile lanxa uJesu wayengakabafeli. (Gen. 15:​1, 6.) Phela kuJehova kwasekungani kudala uJesu eyibhadele inhlawulo. (Isaya. 46:10) Kambe besizaba yini aluba uJesu kasihlawulelanga?

16. Kuyini okumele sikukhumbule ngobungane bethu loJehova? (Khangela lomfanekiso.)

¹⁶ Akulanto eqakatheke ukwedlula ukuba ngumngane kaNkulunkulu. Mhlawumbe nxa ukhuleka umbiza usithi ‘Baba’ kumbe ‘mngane’. Lanxa kunjalo kumele unanzelele ungacini usukhuluma laye angani ukhuluma losowenu. Kungani kuqakathekile ukukunanzelela lokhu? Ngoba akulalutho esasingalwenza ukuze sibe ngabangane bakaNkulunkulu. Nguye nje owasitshengisa isihawu sakhe esikhulu ngokunikela ngeNdodana yakhe uJesu. (Kol. 1:​19, 20) Siyambonga kakhulu uJehova ngoba sesisenelisa ukuba ngabangane bakhe lanxa silesono.

INHLAWULO ITSHENGISA UKUTHI UJEHOVA ULESIHAWU

17. Inhlawulo itshengisa njani ukuthi uJehova ulesihawu? (U-Efesu 2:​4, 5)

¹⁷ Inhlawulo itshengisa ukuthi uJehova ulesihawu esikhulu ngoba ‘wasenza saphila lanxa sasifile ngenxa yeziphambeko zethu.’ (Bala u-Efesu 2:​4, 5.) Abantu abathobekileyo futhi abafuna ukuphila okungapheliyo bayananzelela ukuthi kumele bakhululwe esonweni. (Imiseb. 13:48) UJehova uyabancedisa abantu laba ukuthi bafunde ngaye langeNdodana yakhe uJesu Khristu. (Joh. 17:3) Nxa kuyikuthi uSathane wayezitshela ukuthi ukuhlamuka kuka-Adamu lo-Eva kuzaphambanisa inhloso kaNkulunkulu, hayi-ke wayekhe phansi.

18. Yisiphi isizatho esiqakathekileyo esenza uJehova wanikela ngoJesu?

¹⁸ Kunengi esesikufundile ngenhlawulo esingacabangisisa ngakho ngesikhathi seSikhumbuzo salonyaka kodwa akumelanga sikhohlwe isizatho esiqakatheke kakhulu esenza uJehova wanikela ngeNdodana yakhe. Yisiphi leso sizatho? Wayefuna ukungcwelisa ibizo lakhe elalingcoliswe nguSathane ensimini yase-Edeni. (Gen. 3:​1-5, 15) Inhlawulo kaJesu yenza kukhanye ukuthi uSathane wayehutshuze amanga aluhlaza tshoko! Inhlawulo iphinda itshengise ukuthi uJehova uluthando yikho sibili efuna ukusikhulula esonweni lasekufeni. Lanxa silesono uJehova usinike isibusiso sokuthi siwaveze egcekeni amanga kaSathane. (Zaga. 27:11) Ungatshengisa njani ukuthi uyayiqakathekisa inhlawulo? Umbuzo lo sizawuphendula ngeviki ezayo.