Sifundani Ebhukwini LikaJobe?

1-2. Kuzasinceda ngani ukubala ibhuku likaJobe?

ABANTU abanengi bayakukholisa ukubala ibhuku likaJobe. Lanxa labhalwa eminyakeni engaba ngu-3 500 eyadlulayo lilokhe libanceda abantu lamuhla. Abantu bayambabaza umuntu owabhala ibhuku leli ngoba wasebenzisa amabala azwisiseka lula lolimi oluhlabusayo. UJehova nguye owaphefumulela uMosi ukuthi abhale ibhuku likaJobe. Lokhu kwenza sizwisise ukuthi kungani lilezifundo eziqakatheke kangaka.—2 Thim. 3:16.

² Kungani uJehova wafaka ibhuku likaJobe eBhayibhilini? Lisinceda sizwisise ukuthi izingilosi kanye labantu kumele bazikhethele ukukhonza uJehova. Liphinda lisincede sibone ukuthi uJehova ulothando, uhlakaniphile, wahlulela kuhle lokuthi ulamandla. Ibhuku leli libiza uJehova ngokuthi “unguSomandla” izikhathi ezingu-31. Liphinda liphendule lemibuzo esikhathaze abantu abanengi. Omunye wakhona ngothi: Kungani uNkulunkulu evumela ukuhlupheka?

3. Sizaxoxa ngani esihlokweni lesi?

³ Ukubala ibhuku likaJobe singakufanisa lokuqansa intaba. Nxa umuntu esefikile esiqongweni uyabe esesenelisa ukubona izinto abengeke enelise ukuzibona esasephansi. Lathi sizazwisisa ukuthi kungani uNkulunkulu evumela ukuhlupheka nxa singabala ibhuku likaJobe. Esihlokweni lesi sizabona ukuthi ibhuku likaJobe lingasinceda njani nxa siphakathi kobunzima. Sizabona lokuthi indaba kaJobe ingabe yawanceda njani ama-Israyeli lokuthi ingasinceda njani lamuhla. Sizabona lokuthi singayisebenzisa njani indaba kaJobe ukuze sincede abanye.

UNKULUNKULU WAVUMELA UKUTHI UJOBE AHLUPHEKE

4. UJobe wayetshiyene njani lamanye ama-Israyeli ayeseGibhithe?

⁴ UJobe wayehlala elizweni lase-Uzi ngesikhathi ama-Israyeli eyizigqili eGibhithe. I-Uzi yayingaba seduze le-Arabhiya. Lanxa amanye ama-Israyeli ayekhonza izithombe eGibhithe, uJobe yena wayekhonza uJehova ethembekile. (Josh. 24:14; Hez. 20:8) UJehova wakhuluma ngoJobe wathi: “Kakho onjengaye emhlabeni.”a (Jobe. 1:8) UJobe wayenothile, edumile futhi ehlonitshwa kakhulu. (Jobe. 1:3) Kumele ukuthi kwakumcaphula uSathane ukubona indoda le ikhonza uJehova.

5. Kungani uJehova wavumela ukuthi uJobe ahlupheke? (UJobe 1:​20-22; 2:​9, 10)

⁵ USathane wathi nxa uJobe angehlelwa yibunzima uzatshiya ukukhonza uJehova. (Jobe. 1:​7-11; 2:​2-5) UJehova wayemthanda kakhulu uJobe kodwa wavumela uSathane ukuthi amlinge ukuze kukhanye ukuthi ayekutsho ngoJobe kwakuliqiniso kumbe hatshi. (Jobe. 1:​12-19; 2:​6-8) Kungakayi ngaphi uSathane wabangela ukuthi uJobe athathelwe izifuyo zakhe futhi wabulala labantwabakhe bonke. UJobe esathi ukubonile lokhu, uSathane wamtshaya ngamathumba abuhlungu kusukela ekhanda kusiya enyaweni. Lanxa inhlupho lezi zabuya zibhabhulene, uJobe waqhubeka ethembekile. (Bala uJobe 1:​20-22; 2:​9, 10.) Ngokuhamba kwesikhathi uJehova wamelapha, wamnika lenotho enengi wasembusisa langabantwana abalitshumi. UJobe waphinda waba yindoda emadodeni! UJehova wangezelela impilo kaJobe ngeminyaka engu-140, waphila waze wabona isizukulwane sakhe sesine. (Jobe. 42:​10-13, 16) Indaba kaJobe ingabe yawanceda njani ama-Israyeli futhi isinceda njani thina lamuhla?

6. Indaba kaJobe yayingawanceda njani ama-Israyeli? (Khangela lomfanekiso.)

⁶ Ama-Israyeli ayengafundani? Kumele ukuthi indaba kaJobe yawanceda kakhulu ama-Israyeli ayeyizigqili eGibhithe. Ngokwesibonelo, uJoshuwa loKhalebhi bakhula beyizigqili njalo bahlala enkangala okweminyaka engu-40 ngenxa yokungalaleli kwamanye ama-Israyeli. Nxa kuyikuthi amanye ama-Israyeli ezwa ngendaba kaJobe kumele ukuthi azwisisa ukuthi ngubani obangela ukuhlupheka kwabantu. Akulambuzo ukuthi indaba le yanceda lezinye izizukulwane ezazizalandela njengoba uMosi wayibhala phansi. Izizukulwane lezi zazizazwisisa ukuthi uJehova uyabathanda abantu njalo uyababusisa labo abaqhubeka bethembekile.

7-8. Esikubala ebhukwini likaJobe kungasinceda njani nxa siphakathi kwenhlupho? Nika isibonelo.

⁷ Thina sifundani? Abantu abanengi bayazibuza ukuthi yindaba uNkulunkulu engangeneli njengoba ebona ukuthi abantu abalungileyo bayahlupheka. Lokhu kwenza bacabange ukuthi uNkulunkulu kalandaba labo. Asixoxeni ngoHazelb odabuka eRwanda. Esasemncane wayekholwa kuNkulunkulu kodwa lokhu kwatshintsha. Abazali bakhe badivosa, unina wasetshada leyinye indoda eyayimphatha kubi uHazel. Wathi esekhulakhulile wabanjwa iganyavu. Waqhubeka ehamba esontweni kodwa lokhu akuzange kumncede ngoba akulamuntu owamduduzayo. Ngokuhamba kwesikhathi uHazel wathandaza kuNkulunkulu esithi: “Ngakhuleka kuwe, ngazama lokwenza okuhle, kodwa kulokuthi ungibusise wangilethela inhlupho. Khathesi sengikutshiya, sengifuna ukwenza loba yini ezangenza ngithokoze.” Kuyadanisa ukuthi abanye abantu bangehlelwa zinhlupho njengoHazel, bacina bebona angani nguNkulunkulu obangela ukuthi bahlupheke.

⁸ Ibhuku likaJobe lisitshiya singathandabuzi ukuthi uSathane nguye obangela ukuhlupheka kwabantu. Okunye esesikufundile yikuthi ayisikho ukuthi abantu abahluphekayo bayabe bejeziselwa izinto ezimbi abayabe bezenzile. Phela iBhayibhili lithi abantu bonke “bafikelwa yisikhathi lezehlakalo ezibajuma belibele.” (Umtshu. 9:11; Jobe. 4:​1, 8) Sesifundile lokuthi nxa singaqhubeka sikhonza uJehova sithembekile lanxa sisebunzimeni siyabe sitshengisa ukuthi uSathane ungumqambimanga. (Jobe. 2:3; Zaga. 27:11) Iqiniso leli selisincede sazwisisa ukuthi kungani sonke sihlupheka. UHazel wafunda iBhayibhili laboFakazi bakaJehova futhi wacina esezwisisa ukuthi inhlupho zakhe zazingaveli kuNkulunkulu. Uqhubeka esithi: “Ngathandaza kuJehova ngenhliziyo yonke ngimtshela ukuthi laphana ngize ngithi angisafuni ukumkhonza ngangingakwazi lokuthi ngangisithini ngoba vele ngangingakabi kwazi lokuthi unguNkulunkulu onjani. Khathesi ngiyathokoza sibili ngoba sengikwazi ukuthi uJehova uyangithanda.” Siyambonga kakhulu uJehova ngokusinceda sizwisise ukuthi yindaba evumela ukuhlupheka. Khathesi asixoxeni ngokuthi okwenzakala kuJobe kungamnceda njani umuntu ophakathi kwenhlupho.

INDABA KAJOBE INGASINCEDA UKUTHI SIQINISELE

9. Yibuphi ubunzima uJobe ayephakathi kwabo? (UJakhobe 5:11)

⁹ Akumcabange uJobe ehlezi yedwa esilotheni. Umzimba wonke ugcwele amathumba njalo kusegcekeni ukuthi uyafuthelwa. Umkhuhlane lo wawusumkhukhuze wamkhukhuza, engaselamandla okwenza loba yini ngaphandle kokuzihwaya ngocezwana lwembiza yomdaka ngapha ebubula ngenxa yobuhlungu ayebuzwa. Lanxa kunjalo uJobe waqhubeka eqinisela ekhonza uJehova ethembekile. (Bala uJakhobe 5:11.) Pho kuyini okwamnceda waqinisela?

10. Kuyini okutshengisa ukuthi uJobe wayengumngane kaJehova?

¹⁰ UJobe watshela uJehova khona kanye ayekucabanga lendlela ayezizwa ngayo. (Jobe. 10:​1, 2; 16:20) Ngokwesibonelo, kuJobe isahluko 3 sithola amanye amazwi abuhlungu akhulunywa nguJobe ngenxa yenhlupho ezazimehlele. Wayecabanga ukuthi inhlupho zakhe zivela kuNkulunkulu. Abangane bakhe abathathu babelokhu besithi uJobe ujeziswa nguNkulunkulu ngenxa yezono ayezenzile. Kodwa yena wayesithi akulalutho ayeluphambanisile. Amanye amazwi akhulunywa nguJobe atshengisa ukuthi wayesezibona elunge ukwedlula uNkulunkulu. (Jobe. 10:​1-3; 32:​1, 2; 35:​1, 2) Laye waze wavuma ukuthi kulokunye akukhuluma ‘engacabanganga.’ (Jobe. 6:​3, 26) Ngokwesibonelo kusahluko 31, uJobe wayefuna ukuthi uNkulunkulu ngokwakhe akhulume laye amtshele ukuthi wayengaphambanisanga lutho. (Jobe. 31:35) Kodwa lapha uJobe wayekhuthe ugatsha, ngoba kwasokungani ubamba uNkulunkulu ngamandla ukuthi amchasisele ukuthi kungani wayehlupheka.

11. UJehova wamphendula njani uJobe?

¹¹ Indlela uJobe akhuluma ngayo loJehova itshengisa ukuthi wayelobungane obuqinileyo laye lokuthi wayekwazi ukuthi uJehova uzamahlulela kuhle. Ngokuhamba kwesikhathi uJehova wamphendula uJobe. Kodwa kazange amtshele ukuthi ngubani owayebangela ukuthi ahlupheke kumbe amjezise ngenxa yezinto ayezikhulumile. UJehova wancedisa uJobe kuhle kuhle ukuze alungisise indlela ayesecabanga ngayo. UJobe wazisola ngalokho ayekukhulumile njalo wavuma ukuthi kulutshwana ayekwazi. (Jobe. 31:6; 40:​4, 5; 42:​1-6) Ama-Israyeli ayengafundani endabeni le njalo thina sifundani lamuhla?

12. Indaba kaJobe yayingawanceda njani ama-Israyeli?

¹² Ama-Israyeli ayengafundani? Kunengi ayengakufunda kulokho okwenzakala kuJobe. Asixoxeni ngokuthi uMosi wayengafundani. Kwakunzima ukuthi akhokhele abako-Israyeli ngoba babengamlaleli uJehova futhi lokhu kwakumdanisa uMosi. Ama-Israyeli ayehlala esola uJehova kodwa uMosi wayesithi nxa angahlangana lobunzima acele ukuthi uJehova amncedise. (Eks. 16:​6-8; Nani. 11:​10-14; 14:​1-4, 11; 16:​41, 49; 17:5) Kumele ukuthi indaba kaJobe yamnceda kakhulu uMosi ngesikhathi ekhuzwa nguJehova. Ngokwesibonelo, ama-Israyeli esezangena elizweni lesithembiso amzondisa uMosi waze ‘wakhuluma engacabanganga’ futhi wehluleka ukudumisa uJehova. (Hubo. 106:​32, 33) UJehova wamtshela ukuthi wayengasoze angene elizweni lesithembiso. (Dute. 32:​50-52) UMosi wezwa ubuhlungu obukhulu kodwa wakwamukela lokho okwasokukhulunywe nguJehova. Kungenzakala lokuthi indaba kaJobe yanceda ama-Israyeli aphila ngemva kokufa kukaMosi. Ukucabangisisa ngendaba le kwakuzawanceda ukuthi atshele uJehova khona kanye akucabangayo njalo akhumbule ukuthi kwakungamelanga azibone elunge ukwedlula uJehova. Kwakuzawanceda lokuthi athobeke avume ukukhuzwa nguJehova.

13. Sifundani ebhukwini likaJobe? (UHebheru 10:36)

¹³ Thina sifundani? Nxa sifuna ukukhonza uJehova sithembekile kumele siqinisele. (Bala uHebheru 10:36.) Kungenzakala ukuthi abanye bethu siyagula, sifelwe, sihlulukelwe kumbe siphakathi kobunye nje ubunzima. Kuthi kusenjalo omunye akhulume amazwi ahlabayo kumbe enze enye into esizwisa ubuhlungu, umuntu lowo kuyabe kungani uthela ibilebile esilondeni. (Zaga. 12:18) Kodwa esikuthola ebhukwini likaJobe kusifundisa ukuthi sikhululekile ukutshela uJehova indlela esizizwa ngayo. Lokho kuyabe kutshengisa ukuthi siyakholwa ukuthi uyasizwa lokuthi uyafuna ukusincedisa. (1 Joh. 5:14) UJehova kasoze asizondele nxa singathi sithandaza besesikhuluma angani asiselakholo. Kodwa uzasinika amandla kanye lenhlakanipho ukuze siqhubeke simkhonza sithembekile. (2 Imilan. 16:9; Jak. 1:5) Kumele sikwamukele ukuthi lathi uJehova uzasikhuza njengoba wakhuza uJobe. Lokhu angakwenza esebenzisa iBhayibhili, inhlanganiso yakhe kumbe omunye esikhonza laye. (Heb. 12:​5-7) Lathi akumelanga sephulele izigodo endlebeni nxa uJehova esikhuza ngoba ukukhuzwa kuyasinceda njengoba nje kwanceda loJobe. (2 Khor. 13:11) Kunengi sibili esikufunda ebhukwini likaJobe. Manje singakusebenzisa njani ukuze sincedise abanye?

NCEDISA ABANYE USEBENZISA IBHUKU LIKAJOBE

14. Singabancedisa njani abanye bazwisise ukuthi kungani sihlupheka?

¹⁴ Sokwake kwenzakala yini ukuthi usekutshumayeleni umuntu akubuze ukuthi kungani abantu behlupheka? Wamphendula njani? Engxenye wamtshela lokho okwenzakala ensimini yase-Edeni. Phela iBhayibhili lisitshela ukuthi uSathane waqambela u-Adamu lo-Eva amanga, bona basebekhetha ukuhlamukela uNkulunkulu. (Gen. 3:​1-6) Kungenzeka lokuthi wamchasisela ukuthi ukungalaleli kuka-Adamu lo-Eva yikho okubangela ukuthi sihlupheke futhi sife. (Rom. 5:12) Wasumtshela lokuthi okwenza uNkulunkulu abekezele yikuthi ufuna kube segcekeni ukuthi uSathane wayeqamba amanga. Khathesi abantu balethuba lokufunda ngoNkulunkulu lelokuzwisisa ukuthi uzakuqeda konke ukuhlupheka, abantu besebephila kuze kube nini lanini. (Isam. 21:​3, 4) Nxa wamchasisela ngalindlela kumele ukuthi wazwisisa.

15. Ungalisebenzisa njani ibhuku likaJobe ukuze uchasisele umuntu ukuthi kungani kulokuhlupheka? (Khangela lemifanekiso.)

¹⁵ Okunye okungasinceda ukuthi sichasisele kuhle abantu ukuthi yindaba sihlupheka yikusebenzisa indaba kaJobe. Mhlawumbe ungaqalisa ngokumncoma umuntu oyabe uxoxa laye ngokuthi ukubuze umbuzo lowo. Ungamtshela lokuthi kulendoda eyayilungile eyaphila kudala okwakuthiwa nguJobe eyehlelwa zinhlupho yaze yacina icabanga ukuthi zivela kuNkulunkulu. (Jobe. 7:​17-21) Umuntu oxoxa laye angaduduzeka nxa esizwa ukuthi umbuzo lo usuhluphe abantu abanengi kusukela kudaladala. Ngemva kwalokhu usungamchasisela ukuthi inhlupho ezazisehlela uJobe zazivela kuSathane. Phela uSathane uthi abantu bakhonza uNkulunkulu ngenxa yezinto ezinhle abanika zona kodwa nxa bangavele bahlangane lenhlupho bazakhalala ukumkhonza. Usungamtshela lokuthi uNkulunkulu uyakwazi ukuthi kulabantu abazamkhonza bethembekile. Lokhu kuyabe kutshengisa ukuthi uSathane wayehutshuza amanga aluhlaza tshoko. Kuzamele umchasisele lokuthi uJehova wambusisa kakhulu uJobe ngoba waqhubeka ethembekile. Kumele sibancede sibili abantu bazwisise ukuthi inhlupho abahlangana lazo kaziveli kuJehova.

16. Ibhuku likaJobe lamnceda njani uMario?

¹⁶ Ngelinye ilanga omunye udadewethu wathi etshumayela ngefoni waxoxa lenye indoda okuthiwa nguMario. Udadewethu wabalela uMario ivesi ekhuluma ngokuthi uNkulunkulu usithembisa izinto ezinhle kakhulu lokuthi uyayilalela imithandazo yethu. Bathi besaxoxa, uMario watshela udadewethu ukuthi ubebhala incwadi evalelisa abangakibo ngoba wayesefuna ukuzibulala. Waphinda wathi, “Ngiyakholwa sibili ukuthi uNkulunkulu ukhona kodwa angiboni ukuthi uyangithanda.” Udadewethu wathi esemfonela okwesibili waxoxa laye ngenhlupho ezehlela uJobe. UMario wahle wabona kungcono ukuthi alibale lonke ibhuku likaJobe. Udadewethu wamncedisa ukuthi adawunilode iBhayibhili ku-jw.org. UMario wavuma ukufunda iBhayibhili futhi kulokunengi asekufundile ngoJehova okugoqela lokuthi uyamthanda.

17. Ibhuku likaJobe lisinceda njani? (UJobe 34:12)

¹⁷ Kusegcekeni sibili ukuthi iLizwi likaNkulunkulu lilamandla okutshintsha impilo zabantu lokududuza abasebunzimeni. (Heb. 4:12) Siyambonga uJehova ngoba indaba kaJobe yabhalwa eBhayibhilini ukuze isincede. (Jobe. 19:​23, 24) Ibhuku likaJobe lenza sikholwe sibili ukuthi “uNkulunkulu kenzi okubi loba sekutheni.” (Bala uJobe 34:12.) Lisinceda sizwisise lokuthi yindaba uNkulunkulu evumela ukuhlupheka lokuthi singenzani ukuze siqhubeke sithembekile. Liyasinceda lokuthi siduduze labo abasebunzimeni. Esihlokweni esilandelayo sizabona ukuthi esikufunda ebhukwini likaJobe kungasinceda njani nxa siseluleka abanye.