Ufundani Ezimangalisweni Ezenziwa NguJesu?
UNGAMANGALA ukuthi nxa iBhayibhili lilandisa ngempilo kaJesu esemhlabeni alisebenzisi ibala elithi izimangaliso ngendlela elalisetshenziswa ngayo ekuqaleni. lbala lesiGrikhi elithi (dyʹna·mis) ngezinye izikhathi elihunyutshwa ngokuthi izimangaliso litsho “amandla.” (ULukha 8:46) Liphinde lisetshenziswe nxa kukhulunywa ngokwenza ‘okwenelisayo’ kumbe ‘imisebenzi yamandla.’ (UMathewu 11:20; 25:15) Esinye isikhwicamfundo sithi ibala leli elesiGrikhi “liveza imisebenzi emangalisayo eyenziweyo kumbe amandla okwenziwe ngawo umsebenzi lowo. Kuyabe kukhulunywa ngendlela amandla kaNkulunkulu asebenza ngayo.”
Elinye ibala lesiGrikhi elithi (teʹras) lihunyutshwa ngokuthi “izibonakaliso” kumbe “izimanga.” (UJohane 4:48; ImiSebenzi 2:19) Ibala leli liphinde litsho indlela abantu abezwa ngayo nxa bebone leso simanga. Kanengi abantu kanye labafundi babemangala futhi besala bengelankani ngenxa yemisebenzi yamandla eyayisenziwa nguJesu.—UMakho 2:12; 4:41; 6:51; ULukha 9:43.
Elinye ibala lesithathu elesiGrikhi ngelithi (se·meiʹon) nxa kukhulunywa ngezimangaliso ezenziwa nguJesu likubeka ngokuthi “isibonakaliso.” Isikhwicamfundo uRobert Deffinbaugh uthi ibala leli litsho okungangale kwesimangaliso. Uphinda athi: “Isibonakaliso sitsho isimangaliso esidlulisela iqiniso mayelana leNkosi uJesu.”
Yibuqili Yini Kumbe Ngamandla KaNkulunkulu?
Nxa iBhayibhili likhuluma ngezimangaliso ezenziwa nguJesu alitsho ukuthi kwakuyibuqili kumbe ukuthi kwakuyindlela yokwenza abantu bakholise. Kodwa kwakuyindlela yokubonakaliswa ‘kwamandla kaNkulunkulu amakhulu’ njengalapho kukhitshwa idimoni komunye umfana. (ULukha 9:37-43) Kambe ukuthi uNkulunkulu uSomandla wayengehlulwa yikwenza imisebenzi yamandla enjalo, njengoba echazwa ngokuthi nguye ‘olamandla amakhulu lokuqina okulamandla’? (U-Isaya 40:26) Kwakungeke kumehlule!
AmaVangeli akhuluma ngezimangaliso ezenziwa nguJesu ezingaba ngu-35. Kodwa iqiniso yikuthi asitshelwa inani lazo zonke izimangaliso azenzayo. Ngokwesibonelo uMathewu 14:14 uthi: “[UJesu] wabona nanti ixuku elikhulu, walizwela usizi, welapha abagulayo.” Lapha asitshelwa ukuthi welapha abantu abangaki.
Imisebenzi yamandla le yayiyibufakazi bokuthi uJesu wayeyiNdodana kaNkulunkulu, uMesiya othenjisiweyo. IMibhalo yakucacisa ukuthi uJesu wenza izimangaliso ngamandla ayewaphiwe kaNkulunkulu. Ekhuluma ngoJesu, umphostoli uPhetro wathi “UNkulunkulu wamveza egcekeni . . . walitshengisa yena ngemisebenzi emangalisayo lezimanga kanye lezibonakaliso azenza esebenzisa yena phakathi kwenu, njengoba lisazi.” (ImiSebenzi 2:22) Ngesinye isikhathi uPhetro wathi, “uNkulunkulu wamgcoba [uJesu] ngomoya ongcwele langamandla, wahamba esenza okuhle kulo lonke ilizwe futhi esilisa bonke ababecindezelwe nguDeveli, ngenxa yokuthi uNkulunkulu wayelaye.”—ImiSebenzi 10:37, 38.
Izimangaliso ezenziwa nguJesu zaziyingxenye yalokho ayekufundisa. UMakho 1:21-27 uveza indlela abantu abenza ngemva kokufundiswa nguJesu lokubona esinye isimangaliso asenzayo. UMakho 1:22 uthi abantu “bamangala kakhulu besizwa indlela ayefundisa ngayo,” uvesi 27 uthi abantu “basala bebambe owangaphansi” ngemva kokubona uJesu ekhipha idimoni. Yikho imisebenzi yamandla eyenziwa nguJesu kanye lalokho ayekufundisa kwaba yibufakazi bokuthi wayenguye uMesiya owayethenjisiwe.
UJesu kazange ahambe etshaya impembe ukuthi nguye owayenguMesiya. Kodwa okwenza kwazicacela ukuthi wayenguye uMesiya yindlela ayekhuluma ngayo, ayesenza ngayo lezimangaliso ayezenza ngenxa yamandla ayewaphiwa nguNkulunkulu. Ngesikhathi kuvuka imibuzo emayelana lamandla ayelawo langomsebenzi ayewenza, uJesu waphendula ngesibindi wathi: “Kodwa mina ngilobufakazi obedlula obukaJohane ngenxa yokuthi yona kanye imisebenzi uBaba athe ngiyenze, yona le engiyenzayo, iyafakaza ukuthi uBaba ungithumile.”—UJohane 5:36.
Ubufakazi Bokuthi Izimangaliso ZikaJesu Zaziliqiniso
Kuyini okungenza sibe leqiniso lokuthi izimangaliso ezenziwa nguJesu zaziliqiniso? Ake sihlole obunye ubufakazi.
UJesu kazange abukise ngemisebenzi yamandla ayeyenza. Kodwa waba leqiniso lokuthi loba yisiphi isimangaliso asenzayo, udumo lonke luyiswe kuNkulunkulu. Ngokwesibonelo, engakasilisi indoda eyayiyisiphofu, uJesu wahle wakucacisa ukuthi ukusilisa lokho kwakuzakwenzakala “ukuze imisebenzi kaNkulunkulu ibonakale ngayo.”—UJohane 9:1-3; 11:1-4.
UJesu kazange enze ubuqili, abukise, enze amasalamusi kumbe imithanithani leyo ejayele ukwenziwa yilabo abenza okwamasalamusi kumbe abathi basilisa ngezimangaliso. Kazange ake asebenzise izinto okuthiwa zingcwele. Akubone indlela uJesu asilisa ngayo amadoda amabili ayeyiziphofu. IBhayibhili lithi: “UJesu wawazwela usizi, wasewathinta amehlo. Khonokho nje aqalisa ukubona, asemlandela.” (UMathewu 20:29-34) Kazange ake enze imibuthano yokuthi abukwe ngabantu. Kanengi uJesu weyesenza izimangaliso kulabantu ababengakufakazela hatshi ekusithekeni. Kazange afune ukubonakala ngendlela abanye abakwenza ngayo kulezinsuku njengokufaka iziteji lezinye izinto zokusebenzisa ukuze kukhanye. Kanti njalo okwenziwa nguJesu kubhalwe phansi, kodwa okwalezinsuku akubhalwa phansi ngitsho.—UMakho 5:24-29; ULukha 7:11-15.
Ngezinye izikhathi uJesu wayebabaza ukholo lwalabo ayebenzela izimangaliso. Kodwa nxa umuntu wayengelakholo, uJesu kwakungamvimbi ukuthi enze isimangaliso. Ngesikhathi eseKhaphenawume eGalile, “abantu baletha kuye abanengi ababelamadimoni; futhi wawakhipha amadimoni ngelizwi nje, welapha bonke ababegula.”—UMathewu 8:16.
Izimangaliso ezenziwa nguJesu zazingezokunceda abantu hatshi ezokukholisisa abantu ababebukele. (UMakho 10:46-52; ULukha 23:8) Kanti njalo uJesu kazange enze izimangaliso ukuze athole inzuzo.—UMathewu 4:2-4; 10:8.
Singakuthemba Yini Esikubala EmaVangelini?
Iqiniso elimayelana lezimangaliso ezenziwa nguJesu sazibhalelwa emaVangelini amane. Pho zikhona yini izizatho ezingenza sizithembe sibili izimangaliso ezibhalwe lapho okuthiwa zenziwa nguJesu? Yebo zikhona.
Njengoba kuke kwatshiwo, uJesu wenza izimangaliso phambi kwabantu. AmaVangeli okuqala abhalwa ngesikhathi abanye ababezibonele ngawabo besaphila. Nxa kukhulunywa ngokuba liqiniso kwamaVangeli, elinye ibhuku elithi The Miracles and the Resurrection lithi: “Ukusola ababebhala amaVangeli sisithi babezibhalela izindaba ezinengi okuthiwa yizimangaliso silenjongo yokusekela imfundiso ezingaqondanga akukuhle. . . . Ngoba labo ababebhala amaVangeli babethembekile sibili.”
Abaphikisi ababengamaJuda abazange bayiphike imisebenzi yamandla okukhulunywa ngayo emaVangelini. Bona ababekusola yikuthi amandla okwenza izimangaliso ayevela kubani. (UMakho 3:22-26) Akuzange kube labanye ngemva kwalokho abaziphikayo izimangaliso ezenziwa nguJesu. Kodwa ngemva kwesikhathi kwakulezinye indawo okwatholakala kubhalwe ngezimangaliso ezenziwa nguJesu. Kuyacaca ukuthi zikhona izizatho ezingenza sikholwe ukuthi ukulandisa okusemaVangelini mayelana lezimangaliso lezi kuliqiniso sibili.
Indoda Eyenza Izimangaliso
Ukuphonguthi izimangaliso ezenziwa nguJesu ayisiloqiniso ayisikho okungenza sisuthiseke ngokuthi kunjalo sibili, kumele sikhangele okunye. Nxa amaVangeli elandisa ngemisebenzi yamandla eyenziwa nguJesu ayabe ekhuluma ngendoda elemizwa ejulileyo, elozwelo futhi elendaba lempilo yabanye abantu.
Akucabange ngendoda eyayilobulephero, yalanda uJesu yamncenga yathi: “Nxa nje ufuna, ungangenza ngihlambuluke.” ‘Eyizwela usizi,’ uJesu welula isandla sakhe wayibamba wathi: “Ngiyafuna! Hlambuluka.” Indoda le yahle yasila. (UMakho 1:40-42) UJesu wakwenza kwacaca ukuthi uzwelo yilo olwalusenza ukuthi enze izimangaliso ngamandla ayewaphiwe nguNkulunkulu.
UJesu wenzani ngesikhathi ehlangana labantu ababesiya emngcwabeni eNayini? Ujaha owayefile wayenguye yedwa kunina futhi unina engumfelokazi. UJesu ‘wamzwela usizi’ owesifazana lo, wasemlanda wathi kuye: “Thula, ungakhali.” Ngemva kwalokho wayivusa indodana yakhe.—ULukha 7:11-15.
Esikufundayo ezimangalisweni ezenziwa nguJesu yikuthi wayefuqwa ‘luzwelo’ futhi lokhu wayekwenza ukuze ancede abantu. Izimangaliso lezi azibhalwanga ukuthi zibe yimbali nje kuphela. UHebheru 13:8 uthi: “UJesu Khristu ulokhu enguye izolo, lalamuhla, kuze kube nini lanini.” Khathesi uyiNkosi ezulwini futhi usekulungele ukuthi asebenzise amandla awaphiwe nguNkulunkulu ukuthi enze izimangaliso ezedlula lezo azenza esesemhlabeni. Sekusemnyango ukuthi uJesu asebenzise amandla la ukuze elaphe bonke abalalelayo. OFakazi BakaJehova bangathanda ukukuncedisa ukuthi ufunde okunengi ngethemba elihle ngekusasa.
[Pictures]
Izimangaliso ezenziwa nguJesu zaziyindlela yokubonakaliswa ‘kwamandla kaNkulunkulu amakhulu’
[Pictures]
UJesu wayeyindoda elemizwa ejulileyo