Imibuzo Ebuzwa Ngabafundi

Ngobani ‘abangakholwayo’ uPhawuli akhuluma ngabo ku-2 Khorinte 6:14?

U-2 Khorinte 6:14 uthi: “Lingabotshelwa ejogweni linye labangakholwayo.” Nxa singahlolisisa ivesi le njalo sikhangele lamanye amavesi kuyazicacela ukuthi uPhawuli wayekhuluma ngabantu abangasomalunga ebandla lobuKhristu. Lokhu sikubona kwamanye amavesi lapho uPhawuli asebenzisa khona ibala elithi ‘ongakholwayo’ kumbe ‘abangakholwayo.’

UPhawuli wasola amanye amaKhristu ayemangalela abazalwane ebantwini “abangakholwayo.” (1 KwabaseKhorinte 6:6) Abangakholwayo ayekhuluma ngabo lapha ngomantshi labahluleli ababesemthethwandaba weKhorinte. Encwadini yakhe yesibili watshela abaseKhorinte wathi uSathane ‘usevale ngeveyili ingqondo zalabo abangakholwayo.’ Amehlo alabo abangakholwayo awakuboni ukukhanya kwezindaba ezinhle. Kukhanya abangakholwayo laba babengakazimiseli ukuphenduka bakhonze uJehova yikho uPhawuli waze wathi: “Iveyili leyo iyasuswa emuntwini nxa ephendukela kuJehova.”—2 KwabaseKhorinte 3:16; 4:4.

Abanye abangakholwayo abalandeli umthetho kaNkulunkulu futhi bakhonza izithombe. (2 KwabaseKhorinte 6:15, 16) Lanxa kunjalo ayisibo bonke abaphikisana lalokho esikukholwayo. Abanye babo bayalamukela iqiniso njalo abanengi babo balamakhosikazi kumbe omkabo abangamaKhristu. (1 KwabaseKhorinte 7:12-14; 10:27; 14:22-25; 1 UPhetro 3:1, 2) UPhawuli walisebenzisa kanengi ibala elithi ‘abangakholwayo’ lapho ekhuluma ngabantu ababengasomalunga ebandla likaNkulunkulu lona elibunjwa ngabantu ‘abakholwa eNkosini.’—ImiSebenzi 2:41; 5:14; 8:12, 13.

Okutshiwo ku-2 Khorinte 6:14 kuyawanceda kakhulu wonke amaKhristu kodwa ikakhulu lawo afuna ukutshada. (UMathewu 19:4-6) UmKhristu ozinikeleyo njalo wabhabhathizwa ngeke afune ukutshada lomuntu ongakholwayo. Ngenxa yani? Lokhu kungenxa yokuthi izinto abazikholwayo zitshiyene, indlela okumele baziphathe ngayo kanye lalokho abangahlela ukukwenza kutshiyene kakhulu.

Kodwa-ke kuthiwani ngabamemezeli abangabhabhathizwanga kanye lalabo asebeqalisile ukufunda iBhayibhili njalo abangenayo imihlangano yebandla? Labo banjengalabana uPhawuli ababiza ngokuthi ngabangakholwayo yini? Hatshi. Phela abantu asebamukele iqiniso futhi abaqhubeka bethuthuka abasabizwa ngokuthi ‘ngabangakholwayo.’ (KwabaseRoma 10:10; 2 KwabaseKhorinte 4:13) Yikho uKhoneliyu wabizwa ngokuthi ‘yindoda ezinikele kuNkulunkulu futhi emesabayo’ lanxa wayengakabhabhathizwa.—ImiSebenzi 10:2.

Njengoba u-2 Khorinte 6:14 engatsho ummemezeli ongabhabhathizwanga, pho-ke kuqondile yini ukuthi umKhristu ozinikeleyo wabhabhathizwa athandane lommemezeli ongabhabhathizwanga? Hatshi. Kungani kungaqondanga? UPhawuli watshela abafelokazi abangamaKhristu wathi: “Nxa umkayo angafa ikhululekile ukutshada lomuntu emfunayo, kuphela nxa eseNkosini.” (1 KwabaseKhorinte 7:39) Wonke amaKhristu azinikeleyo kuJehova akhuthazwa ukuthi atshade labantu ‘abaseNkosini.’

Kutshoni ukuthi umuntu ‘useNkosini’ kumbe “kuKhristu”? KuRoma 16:8-10 loKholose 4:7 uPhawuli wakhuluma ngalabo ‘abaseNkosini’ kumbe ‘abakuKhristu.’ Nxa ungakhangela kuhle amavesi la uzananzelela ukuthi wayekhuluma ngabantu ayeke wasebenza labo. Abanye babo waze wababiza ngokuthi ‘ngabafowabo abathandekayo,’ ‘abamukelwa nguKhristu’ ikanti abanye wathi ‘bayizikhonzi ezithembekileyo.’

Umuntu uqalisa nini ukuba ‘yinceku yeNkosi’? Uqalisa lapho esenza lokho okwenziwa yisigqili, ukutshiya konke alakho anamathele eNkosini yakhe. UJesu wathi: “Loba ngubani ofuna ukungilandela kazidele athwale isigodo sakhe sokuhlutshwa aqhubeke engilandela.” (UMathewu 16:24) Umuntu utshengisa ukuthi usezimisele ukulandela uKhristu ngokuzinikela kuNkulunkulu abesebhabhathizwa njalo aqhubeke esenza intando kaNkulunkulu.a Ngakho-ke ‘ukutshada kuphela eNkosini’ kutsho ukutshada lomuntu osekwenze kwacaca konke lokhu njalo abantu bayabe bezibonela ukuthi umuntu lo ‘uyinceku kaNkulunkulu leyeNkosi uJesu Khristu.’—UJakhobe 1:1.

Umuntu ofunda iBhayibhili futhi othuthukayo kumele anconywe sibili. Kodwa lokho akutsho ukuthi usezinikele kuJehova futhi usezimisele ukuphilela ukwenza intando yakhe. Ngenxa yani? Ngenxa yokuthi kusasekunengi okusamele akutshintshe. Kusamele aqale afunde ukuthi kutshoni ukuzinikela abesebhabhathizwa. Ngemva kwalokho usengacabanga-ke ngokutshada.

Kuqondile yini ukuthi umKhristu athandane lomuntu osafunda iBhayibhili njalo azitshele ukuthi uzalinda umuntu lowo aze abhabhathizwe besebetshada? Hatshi. Lanxa umuntu lowo ethuthuka kuhle ekufundeni kwakhe, kuyabe kungaqondanga ukuthi umKhristu athandane laye ngoba sokungamphambanisa acine esefuna ukubhabhathizwa ngesizatho esingayisiso.

Izikhathi ezinengi umuntu uba ngummemezeli ongabhabhathizwanga okwesikhathi esincane abesebhabhathizwa nxa kuyikuthi uyathuthuka. Yikho umlayo wokuthi atshade kuphela eNkosini ngeke sithi uyacindezela. Kodwa kuthiwani ngomuntu okhuliswe ngabazali abangoFakazi futhi engena imihlangano njalo eseseminyakeni yokuthi angatshada kodwa elokhe engummemezeli ongabhabhathizwanga? Mhlawumbe usungazibuza ukuthi: Kuyini okumbambayo ukuthi azinikele kuJehova? Kungabe kukhona yini akuthandabuzayo kumbe angakuzwisisiyo? Umuntu onjalo ngeke sithi ngongakholwayo futhi ngeke sithi ‘useNkosini.’

Umlayo owakhulunywa nguPhawuli mayelana lomtshado unceda thina. (U-Isaya 48:17) Nxa abantu befuna ukutshada, bobabili kumele babe sebezinikele kuJehova babhabhathizwa. Lokhu kuzakwenza umtshado wabo uqine ngoba bayabe bengabangane bakaJehova. Bayabe beqakathekisa izinto ezifananayo empilweni futhi lokhu kuzenza bathokoze. Kanti njalo umuntu ‘otshada eNkosini’ uyabe etshengisa ukuthi uqotho kuJehova njalo uzathola izibusiso ezingapheliyo ngoba iBhayibhili lithi “emuntwini oqotho [uJehova] uqotho.”—IHubo 18:25.

[Amabala angaphansi]

[Umfanekiso osekhasini 31]

“Emuntwini oqotho [uJehova] uqotho”