42 UMARIYA
Wavumela Phezulu
UMARIYA wayehlala ngakibo eNazaretha yaseGalile. Ngelinye ilanga ezenzela imisebenzi yakhe wafikelwa yisivakatshi. Isivakatshi lesi sasingajayelekanga ngoba kwakuyingilosi futhi ibizo layo kwakuthiwa nguGabriyeli. Yamtshela ukuthi uJehova wayefuna ukumnika umsebenzi oqakathekileyo kakhulu owawungakaze wenziwe ngumuntu emhlabeni.
Ingilosi yabingelela uMariya yathi: “Sabona wena obusiswe kakhulu, uJehova ulawe.” UMariya wethuka esizwa umuntu angamaziyo embingelela ngalindlela. Esayethuswe yindlela le yokubingelela, ingilosi yaqhubeka yathi: “UNkulunkulu uyathokoza ngawe.” Yasimtshela ngomsebenzi omkhulu uJehova ayefuna ukumnika wona, yathi: “Uzazithwala ubelethe indodana.” Yaphinda yathi: “Izakuba ngumuntu oqakathekileyo futhi izabizwa ngokuthi yiNdodana yoPhezukonke. UJehova uNkulunkulu uzayipha isihlalo sobukhosi sikayise uDavida.”
UMariya wayengakatshadi kodwa kulejaha ayesethembisane lalo yikho waba lesibindi wabuza wathi: “Kuzakwenzakala njani lokho njengoba ngingakaze ngilale lendoda?” Ingilosi yamphendula yathi: “Umoya ongcwele uzakwehlela phezu kwakho, amandla oPhezukonke akugubuzele. Yikho umntwana ozazalwa uzabizwa ngokuthi ungcwele lokuthi uyiNdodana kaNkulunkulu.” Ingilosi yaphinda yatshela uMariya ukuthi isihlobo sakhe u-Elizabethi laye wayezithwele futhi wayezabeletha umntwana ongumfana lanxa wayesegugile. UMariya kazange abe esathandabuza, wahle wavumela phezulu wathi: “Ngiyincekukazi kaJehova! Akwenzakale kimi njengoba nje utshilo.” Wayethobekile ezibona eyincekukazi yeNkosi elothando uJehova. Wayengathandabuzi ukuthi uJehova uzamncedisa ukuthi enze umsebenzi omkhulu ayemnike wona.
Ngemva kwalokhu uMariya wavakatshela u-Elizabethi. Esefikile bakhuthazana ukwenza imisebenzi uJehova ayebaphe yona. Amazwi akhulunywa nguMariya ku-Elizabethi atshengisa ukuthi wayemthanda kangakanani uJehova. Lokhu kwenza sibone ukuthi wasithatha ngaphi isibindi sokuvuma ukwenza umsebenzi ayewuphiwe. Ngesikhathi bexoxa wacupha ka-20 amazwi aseMibhalweni yesiHebheru. UMariya wayehlala ecabangisisa ngeMibhalo. Lokhu kwamnceda ukuthi abe lokholo oluqinileyo, amazi kuhle uJehova futhi athembe ukuthi uzazigcwalisa izithembiso zakhe. Wahlala izinyanga ezintathu eku-Elizabethi. Kungenzeka ukuthi wayezidla izibindi ezibuza ukuthi wayezawethula njani umbiko wokuthi uzithwele kuJosefa. Wamtshela ukuthi kwakuhambe njani kodwa uJosefa kazange akukholwe ayekuzwa. Yikho ingilosi kaJehova yamchasisela ukuthi uMariya wayekhuluma iqiniso.
UMariya loJosefa batshada, basebelindela isikhathi sokuthi uMariya abelethe. Ngalezonsuku uKhesari wabeka umlayo wokuthi wonke umuntu owayengaphansi kombuso wakhe ayebhalisa ibizo lakhe. Bona kwasokumele bahambe umango omude ongaba ngamakhilomitha angu-150 besiyabhalisa eBhethilehema. UMariya wavuma lanxa wayesazi ukuthi wayezahamba egade idonki okomango wonke lowu. Bathi sebekhonale, safika isikhathi sokuthi abelethe wasebelethela esibayeni. Walalisa umntanakhe emkolweni wokudlela izifuyo. Lanxa izimo zazinzima waqhubeka ethemba uJehova ukuthi uzabancedisa balunakekele usana lwabo. UMariya kazange agoqe izandla wenza konke okusemandleni akhe ukuze alondle kuhle.
UMariya waphiwa umsebenzi oqakathekileyo ongakaze wenziwe ngomunye umuntu
Kunengi okwenzakala kuMariya okwakudinga ukuthi abe lesibindi. Kwakungalula ngesikhathi bebalekela eGibhithe ngoba uHerodi wayefuna ukubulala uJesu. Kwakunzima lokuthi bakhulise abantwababo abangu-7 loba abedlula lapho njengoba babengabayanga. Kufanele ukuthi kwabanzima kakhulu esefelwe ngumkakhe futhi kungenzeka ukuthi lokho kwenzakala uJesu engakabi nguMesiya. UMariya watshengisa lokuthi ulesibindi ngesikhathi uJesu esuka ngakibo esiyaqalisa inkonzo yakhe ngoba wayesezasala ekhulisa abanawakhe bakaJesu eseyedwa. Phezu kwakho konke lokhu wayesidinga sibili isibindi ngesikhathi ebona iNdodana yakhe imangalelwa, itshaywa njalo ibulawa kabuhlungu. Kanti njalo kwakumele abe lesibindi ukuze abe ngumlandeli kaJesu ngoba amaJuda ayebazonda abalandeli bakaJesu.
Kuyakhanya ukuthi uMariya wayelomsebenzi omkhulu okwakumele awenze. Pho wasithatha ngaphi isibindi sokwenza umsebenzi lo? IBhayibhili lisitshela ukuthi wayesithi angezwa into eqinisa ukholo ayigcine enhliziyweni futhi acabangisise ngayo. Wayelalela ngesikhathi kubalwa iLizwi likaNkulunkulu, okunye wayekutshelwa yingilosi lezinceku zikaNkulunkulu, okunye wayekutshelwa nguJesu ngokwakhe. Lokhu kwenza waba lezinto ezinengi ayengacabangisisa ngazo. Ukucabangisisa ngakho konke lokhu kwamnceda uMariya ukuthi abe lesibindi sokubekezelela loba yibuphi ubunzima obabuphambi kwakhe.
Bala indaba le eBhayibhilini:
Ingxoxo:
UMariya watshengisa njani ukuthi ulesibindi?
Julisa Ingqondo
1. Yibuphi ubufakazi obutshengisa ukuthi okubhalwe kuLukha 2:1-3 kuliqiniso? (g 4/11 11 ¶4-5-wcgr) A
British Library, London, UK, from the British Library archive/Bridgeman Images
Umfanekiso A: Umbusi weRoma owayebusa eGibhithe wakhipha umlayo wokuthi abantu babalwe ngo-104 C.E.
2. Kuyini okwakusenza uhambo lokuya eBhethilehema lubenzima kuMariya? (ia 153-155 ¶4-7)
3. UMariya watshelwa ukuthi “uzagwazwa yinkemba ende.” Amazwi la agcwaliseka njani? (Luk. 2:35; w08 3/15 30 ¶8-wcgr)
4. Yindaba sikholwa ukuthi uMariya wavuswa waya ezulwini? (w18.07 10 ¶14) B
Umfanekiso B: UMariya lamadodana akhe babeseJerusalema ngePhentekhosti lika-33 C.E.
Cabangisisa Ngezifundo
UMariya wavakatshela u-Elizabethi ukuze amqinise futhi amkhuthaze. (Luk. 1:39, 40) Yindaba kuqakathekile ukuthi sicele abanye basincedise nxa sisebunzimeni kumbe siphiwe umsebenzi esibona angani ungaphezu kwamandla ethu? C
Umfanekiso C
Lanxa uMariya wayesethembisane loJosefa, uJehova wathuma ingilosi yakhe ukuthi iyekhuluma loMariya kuqala. Lokhu kusifundisani ngendlela uJehova abona ngayo abesifazana abathembekileyo?
Ungatshengisa njani ukuthi ulesibindi njengoMariya?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
UMariya angabe wakhethwa ukuthi ayebusa loKhristu ezulwini. Kuyini okuthandayo ngaye okwenza uthi ufanele sibili ukuyabusa loKhristu?
Funda Okunengi
UMariya wasebenza nzima ukuze anakekele abantwabakhe. Bala uzwe okunengi ngendaba le.
“Isibonelo SikaMariya Sisifundisani?” (w09 1/1 5 ¶5–6 ¶2-wcgr)
Bukela ividiyo le ubone ukuthi uMariya wezwa njani ngesikhathi ingilosi imtshela ngomsebenzi oqakathekileyo okwakumele awenze.