41 UZAKHARIYA LO-ELIZABETHI
“Babelungile KuNkulunkulu”
UZAKHARIYA wayengomunye wabaphristi bosendo luka-Aroni. Ngelinye ilanga kwakumele enze into eqakathekileyo. Kwasekuyisikhathi sakhe sokuthi atshise impepha ethempelini. Le kwakuyinto eqakatheke kakhulu ngoba umphristi wayeyenza kanye kuphela okwempilo yakhe yonke. Yikho uZakhariya lomkakhe u-Elizabethi babethabe okwamagama ngalelolanga.
IBhayibhili lithi uZakhariya lo-Elizabethi babelungile phambi kukaNkulunkulu. Basebeleminyaka eminengi betshadile futhi uNkulunkulu wayebenzele izinto ezinengi ezinhle okwamagama. Lanxa kwakunjalo babekufuna ngenhliziyo yonke ukuba lomntwana. Phela ngalezonsuku ukungabi lomntwana kwakuyinto eyangisayo kakhulu. Yikho lanxa uZakhariya lo-Elizabethi basebebadala babeqhubeka bethandaza kuNkulunkulu belethemba lokuthi uzawuzwa umthandazo wabo, lanxa lokhu ababekucela kwakungakhanya angathi ngeke kwenzakale.
UZakhariya wangena endaweni engcwele ngesikhathi abantu bethandaza phandle. Esephakathi wabona ingilosi kaJehova imi eceleni kwe-alithare lokutshisela impepha. Ingilosi le yamtshela ukuthi uNkulunkulu wayeyizwile imithandazo yakhe futhi umkakhe u-Elizabethi wayezazithwala abesebeletha umntwana ongumfana. Umntwana lo kwakumele bamnike ibizo elithi Johane. Wayezakhula akhuthale emsebenzini kaJehova njengo-Elija futhi wayezakwenza umsebenzi omkhulu wokuncedisa abantu ukuthi babuyele kuJehova.
UZakhariya kazange akukholwe ayekutshelwa yingilosi, yikho wayibuza wathi: “Kambe kungenzakala khonokho?” Ingilosi yamqinisekisa ngamazwi athi: “NginguGabriyeli, ngima phambi kukaNkulunkulu.” Kumele ukuthi amazwi la amnceda uZakhariya wangathandabuzi ukuthi lokho okwakutshiwo yingilosi kwakuzakwenzakala. Ingilosi yaphinda yamtshela ukuthi wayezahlala engasenelisi ukukhuluma kuze kugcwaliseke izithembiso zikaNkulunkulu ngoba wayethandabuza. Yikho uZakhariya wathi ephuma ethempelini wayengasakhulumi, esesebenzisa izandla ukuze atshele abantu lokhu ayekubonile.
UZakhariya lo-Elizabethi basebebadala futhi bengelabantwana kodwa okwenzakalayo kwatshintsha impilo zabo
UZakhariya wabuyela emzini wakhe. Kumele ukuthi wathola indlela yokutshela umkakhe u-Elizabethi ukuthi uzakuba lomntwana. Lakanye ngemva kwesikhathi esithile u-Elizabethi wazithwala. Kazange aphume endlini okwenyanga ezinhlanu. Kwathi ngenyanga yesithupha wavakatshelwa yisihlobo sakhe okuthiwa nguMariya, indodakazi kaHeli weNazaretha. U-Elizabethi uthe esizwa uMariya embingelela usane olwalusesiswini sakhe lwakhabakhaba wagcwala umoya ongcwele wasebiza uMariya ngokuthi ngunina weNkosi yakhe. U-Elizabethi wayekwazi ukuthi uMariya wayezithwele umntwana owayezakuba nguMesiya. Kulokuthi abe lomhawu, yena wamkhuthaza wasemqinisekisa ngokuthi uJehova wayezamncedisa emsebenzini lo ayemuphe wona.
Isikhathi sika-Elizabethi sokubeletha sathi sesifikile wabeletha umntwana ongumfana. Izihlobo labomakhelwane zabavakatshela zasezisithi umntwana kaphiwe ibizo likayise. Kodwa u-Elizabethi wala ngoba wayekwazi ukuthi ingilosi yayitshele umkakhe ukuthi umntwana kumele aphiwe ibizo elithi Johane. Wathi kuzo: “Hatshi! Uzabizwa ngokuthi nguJohane.” Kodwa izihlobo azizange zimkholwe zasezibuza uyise womntwana ukuthi ufuna athiwe ngubani. UZakhariya wacela iplanka lokubhalela wasebhala ukuthi ibizo lomntwana nguJohane. Khonokho nje wahle waqalisa ukukhuluma.
Ngemva kwalokhu uZakhariya wagcwala umoya ongcwele waqalisa ukuphrofetha. Wakhuluma ngethemba uNkulunkulu ayelinike abantu bakhe lokuthi wayezabakhulula njalo abatshengise isihawu. Wakhuluma lokuthi indodana yakhe uJohane yayizahamba phambi kukaJehova ilungise izindlela zakhe. Lakanye yikho uJohane akwenzayo. UJesu Khristu engakaqalisi ukutshumayela ngoMbuso kaNkulunkulu, uJohane uMbhabhathizi wayesencedise abantu ukuthi bakulungele ukulalela izindaba ezinhle zoMbuso.
UJesu wafundisa abantu bakaNkulunkulu indlela entsha okwakumele baphathe ngayo labo ababebaphikisa. Engakabuyi emhlabeni izinceku zikaNkulunkulu ezinengi zazitshengisa ukuthi zilesibindi ngokuthwala izikhali ziyekulwa lezitha zikaNkulunkulu. Kodwa uJehova wayengasafuni ukuthi izinceku zakhe zilwe izimpi. Lanxa kunjalo kwakumele zibe lesibindi njengoZakhariya lo-Elizabethi ngoba basebenzisa kuhle isipho sabo sokukhuluma badumisa uJehova uNkulunkulu futhi batshela abanye izindaba ezinhle ngoJesu Khristu.
Bala indaba le eBhayibhilini:
Ingxoxo:
UZakhariya lo-Elizabethi batshengisa njani ukuthi balesibindi?
Julisa Ingqondo
1. UZakhariya lo-Elizabethi babelesono, manje yindaba iBhayibhili lisithi ‘babephila impilo engelasici’? (Luk. 1:6; it “Ukungabi Lesici” ¶2-wcgr)
2. IBhayibhili lisitshelani ngoGabriyeli? (it “UGabriyeli” ¶2-3-wcgr) A
Umfanekiso A
Umfanekiso A
3. UGabriyeli watshela uZakhariya ukuthi anike indodana yakhe ibizo elithi Johane. Litshoni ibizo leli? (it “UJohane” ¶1-wcgr)
4. Njengoba uZakhariya wayengasakhulumi, wayengasezwa yini lasendlebeni? (w08 3/15 30 ¶6-wcgr)
Cabangisisa Ngezifundo
Ngensuku zikaZakhariya abakhokheli abangamaJuda babevumela ukuthi indoda idivose umkayo nxa eyinyumba. Amadoda afundani kuZakhariya? B
Umfanekiso B
U-Elizabethi kazange alalele lokho ayekutshelwa yizihlobo labomakhelwane kodwa wasekela ayekutshelwe ngumkakhe. (Luk. 1:58-61) Amakhosikazi afundani kuye?
Ungamlingisela njani uZakhariya lo-Elizabethi?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Nxa kuyikuthi uZakhariya lo-Elizabethi balethemba lokuphila lapha emhlabeni ngizababuzani nxa sebevusiwe?a
Funda Okunengi
Bukela ividiyo le ukuze ubone ukuthi kwenzakalani uZakhariya esekhuluma.
UJehova wamncedisa njani uMariya ngesikhathi evakatshele u-Elizabethi futhi thina sifundani kulokhu?
a Nxa kuyikuthi uZakhariya lo-Elizabethi bafa iPhentekhosti lika-33 C.E. lingakafiki, bazavuswa baphile lapha emhlabeni.