Indoda Yokuqala Eyalwela UJehova

UJEHOVA wathembisa umngane wakhe u-Abrahama isithembiso esiqakathekileyo esasizatshintsha impilo zabantu. Wathi: “Ngizakwenza ube yisizwe esikhulu.” UNkulunkulu watshengisa u-Abrahama ilizwe elihle lapho isizukulwane sakhe esasizahlala khona. (Gen. 12:2; 13:​14, 15) USathane wayezimisele ukutshabalalisa isizwe lesi singakabi khona lokuba khona. Wayekwazi ukuthi inzalo eyayithenjisiwe yayizavela esizweni lesi futhi inzalo le yayizatshabalalisa ukubusa kwakhe iphinde imtshabalalise laye ngokwakhe.—Gen. 3:15.

Kungakayi ngaphi u-Abrahama lemuli yakhe bahlaselwa. Umuntu owaqala ukuba senkingeni nguLothi. U-Abrahama wayethe uLothi kaqalise ukukhetha lapho ayefuna ukuhlala khona elizweni lesithembiso, futhi uLothi wakhetha indawo evundileyo. Yayiseduze ledolobho laseSodoma futhi abantu balapho “babexhwalile besenza izono ezinkulu phambi kukaJehova.” (Gen. 13: 8-13) Inkosi yaseSodoma yayenze isivumelwano lamanye amakhosi angu-5 aseKhenani. Amakhosi la ayesediniwe yikubhadala umthelo enkosini yase-Elami yikho ahlamuka. Inkosi yase-Elami yathi ikubona lokho yamanyana lamanye amakhosi angu-4 ayevela ezizweni ezikhatshana futhi anqoba amakhosi la aseKhenani. Yikho abuyela esethumbe impahla enengi labantu. ULothi lemuli yakhe babephakathi kwabantu ababethunjiwe.

Pho u-Abrahama kwasekumele enzeni? Mhlawumbe wayengacabanga ukuthi uLothi nguye ozithezele olulenkume. Kumbe acabange ukuthi nxa wayengazama ukuyakhulula uLothi kwasekumele alwe lamakhosi angu-4 futhi eyinye yakhona kuyileyo ebusa eShinari. U-Abrahama wayezazela ukwelusa engayisiloqhawe. Wayezawanqoba njani amakhosi la angu-4 alamandla? Okunye yikuthi u-Abrahama wayevele edabuka eShinari, mhlawumbe wayengacabanga ukuthi nxa engalwa lenkosi yeShinari kwakuzabanzima ukuthi kwelinye ilanga abuyele edolobheni le-Uri. Imicabango le ayizange ike ifike engqondweni ka-Abrahama ngoba wayekwazi ukuthi uJehova ufuna enzeni.

Ngalesosikhathi abantu ababehamba lo-Abrahama kufanele ukuthi basebesedlula 1 000. U-Abrahama waqoqa amadoda angu-318 ayekwazi ukulwa wahamba lawo empini. U-Abrahama lebutho lakhe bazixhuma ezithende izitha zabo baze bayazithola duze lakoDani. Wehlukanisa ibutho lakhe laba ngamaqembu amabili basebehlasela ebusuku. Lanxa babebalutshwana bazikhulela izitha zabo zaze zacela ezinyaweni. Amakhosi la amane lamabutho awo abaleka eqonde enyakatho. U-Abrahama waqhubeka ewaxotshanisa. Bathi sebeseduze leDamaseko, u-Abrahama wazitshaya wazibhuqa izitha zakhe futhi wathatha zonke izinto ababezithumbe eKhenani. ULothi lemuli yakhe bakhululwa.

UJehova wezwa njani ngesikhathi ebona ukuthi umngane wakhe ulesibindi futhi ulokholo? Impendulo yacaca ngesikhathi u-Abrahama edlula duze kwedolobho leSalema. Inkosi yedolobho lelo kwakunguMelikhezedekhi futhi wayengumphristi kaJehova. Inkosi le eyayingumphristi yaphuma edolobheni yahlangabeza u-Abrahama futhi yambusisa. U-Abrahama wanika uMelikhezedeki okwetshumi kwalokho okwakuthunjiwe.—Heb. 7:​1-4.

Kuyacaca-ke ukuthi impi leyo kwakuyimpi kaJehova. IBhayibhili likhuluma “ngebhuku lezimpi zikaJehova.” (Nani. 21:14) Kufanele ukuthi impi le eyalwiwa ngu-Abrahama yaba ngeyokuqala ukubhalwa ebhukwini lelo. Ngemva kweminyaka, ngesikhathi inzalo ka-Abrahama isilwa lamaKhenani ayesethethe ilizwe lesithembiso, uJehova wenza abantu bakhe abathembekileyo banqoba.

Kodwa kwakusithi ama-Israyeli angahlamukela uNkulunkulu laye wayesekela ukuwavikela. Ekucineni uJehova wasilahla isizwe leso ngoba saphika umntanakhe uMesiya. UJehova waqalisa ukubusisa iqembu labagcotshiweyo elikhokhelwa nguJesu. UJesu watshela abafundi bakhe ukuthi akumelanga balwe empini. (Mat. 26:52) Wafundisa abalandeli bakhe ukuthi kumele balwisane loSathane lemfundiso zamanga kanye lokuziphatha okubi. Indlela uJesu aphila ngayo elapha emhlabeni yatshengisa ukuthi umuntu kumele abe lesibindi ukuze anqobe empini le.

Bala indaba le eBhayibhilini:

• UGenesisi 14:​1-24

• KumaHebheru 7:​1-4

Ingxoxo:

U-Abrahama watshengisa njani ukuthi ulesibindi?

Julisa Ingqondo

1. 1. Yibuphi ubufakazi obatholwa ngabezembali obutshengisa ukuthi indaba le iliqiniso? (w89 7/1 5 ¶4–6 ¶1-wcgr)

   Bhala impendulo

2. 2. Yibuphi ubufakazi obutshengisa ukuthi okutshiwo liBhayibhili ngeSodoma leGomora kuliqiniso? (it “ULwandle Lwesawudo” ¶6-wcgr) A

   Bhala impendulo

   

   © Yadid Levy/age fotostock

3. 3. UMelikhezedeki wayeyinkosi lomphristi weSalema. ISalema yayingaphi? (it “ISalema”-wcgr)

   Bhala impendulo

4. 4. Kungani kuthiwa uMelikhezedekhi wayemela uJesu? (it “UMphristi Omkhulu” ¶27-28-wcgr) B

   Bhala impendulo

   

Cabangisisa Ngezifundo

• U-Abrahama wavumela uLothi ukuthi akhethe indawo enhle kakhulu. Singamlingisela njani u-Abrahama endleleni esiphatha ngayo abemuli, abafowethu labodadewethu labanye nje? C

  Bhala impendulo

  

• Ukuzimisela kuka-Abrahama ukuyakhulula uLothi kusifundisani?

  Bhala impendulo

• Kukuziphi ezinye izimo engingalingisela khona isibonelo sika-Abrahama?

  Bhala impendulo

Cabangisisa

• Indaba le ingifundisani ngoJehova?

  Bhala impendulo

• Indaba le ingenelana njani lenhloso kaJehova?

  Bhala impendulo

• Ngizambuzani u-Abrahama loba uLothi nxa esevusiwe?

  Bhala impendulo

Funda Okunengi

Bona ukuthi kuyini okwanceda u-Abrahama wamthemba kakhulu uJehova.

Lingisela Ukholo Lwabo—U-Abrahama, Ingxenye 1 (10:43)

U-Abrahama watshengisa njani ukuthi ulesibindi engakasuki e-Uri?

“U-Abrahama—Indoda Eyayilesibindi” (w12 1/1 6-7-wcgr)