အလှူငွေတွေကို ယေဟောဝါသက်သေတွေ ဘယ်လို အသုံးပြုသလဲ
ကျွန်တော်တို့ အဖွဲ့အစည်းရဲ့ ဘာသာရေးနဲ့ လူသားချင်း စာနာမှုပြတဲ့ လုပ်ဆောင်မှုတွေမှာ အလှူငွေတွေကို အသုံးပြုပါတယ်။ ခရစ်တော်ယေရှုရဲ့ တပည့် ဖြစ်လာအောင် လူတွေကို ကူညီပေးဖို့ဆိုတဲ့ အဓိကတာဝန်ရဲ့ ကဏ္ဍတစ်ခုအဖြစ် ဒီလုပ်ဆောင်မှုတွေကို ကျွန်တော်တို့ လုပ်ဆောင်ကြပါတယ်။—မဿဲ ၂၈:၁၉၊ ၂၀။
လူတစ်ဦးတစ်ယောက် ချမ်းသာဖို့ အလှူငွေတွေကို အသုံးမပြုပါဘူး။ အကြီးအကဲတွေ၊ အမှုထမ်းတွေကို လစာ မပေးပါဘူး။ တစ်အိမ်မှတစ်အိမ်သွားပြီး ကျမ်းစာအကြောင်း ပြောတဲ့ ယေဟောဝါသက်သေတွေကို အခမပေးဘူး။ အုပ်ချုပ်ရေး အဖွဲ့ဝင်တွေ အပါအဝင်၊ ဌာနခွဲရုံးနဲ့ ကမ္ဘာ့ဌာနချုပ်မှာ အမှုဆောင်သူတွေဟာ လခမယူဘဲ အလုပ်လုပ်နေကြပါတယ်။
ကျွန်တော်တို့ရဲ့ လုပ်ဆောင်မှုများ
ပုံနှိပ်ထုတ်ဝေခြင်း– နှစ်စဉ် သန်းနဲ့ချီတဲ့ ကျမ်းစာတွေ၊ ခရစ်ယာန်စာပေတွေကို ကျွန်တော်တို့ ဘာသာပြန်၊ ပုံနှိပ်၊ တင်ပို့ပြီး အခကြေးငွေ မယူဘဲ ဖြန့်ဝေပါတယ်။ jw.org ဝက်ဘ်ဆိုက်နဲ့ JW Library app မှာရှိတဲ့ ဒီဂျစ်တယ်စာပေတွေကိုလည်း အခကြေးငွေ မယူ၊ ကြော်ငြာတွေ မထည့်ဘဲ ဖြန့်ဝေပါတယ်။
ဆောက်လုပ်ရေးနဲ့ ပြုပြင်ထိန်းသိမ်းရေး– ကမ္ဘာတစ်ဝန်းမှာရှိတဲ့ အသင်းတော်တွေ အတူစုဝေးဖို့၊ ဘုရားသခင်ကို ချီးမွမ်းဖို့ သင့်တော်တဲ့ ဝတ်ပြုရာနေရာတွေကို ကျွန်တော်တို့ ဆောက်လုပ်တယ်၊ ပြုပြင်ထိန်းသိမ်းပါတယ်။ ဌာနခွဲရုံးတွေ၊ ဘာသာပြန်ရုံးတွေကိုလည်း ဆောက်လုပ်တယ်၊ ပြုပြင်ထိန်းသိမ်းတယ်။ အဲဒီအလုပ်အများစုကို စေတနာ့ဝန်ထမ်းတွေနဲ့ လုပ်ဆောင်လို့ ကုန်ကျစရိတ် သက်သာပါတယ်။
စီမံခန့်ခွဲရေး– ကမ္ဘာ့ဌာနချုပ်၊ ဌာနခွဲရုံးတွေ၊ ဘာသာပြန်ရုံးတွေ၊ နယ်လှည့်အမှုထမ်းတွေရဲ့ လုပ်ဆောင်မှုတွေကို ကမ္ဘာချီလုပ်ငန်းအတွက် လှူဒါန်းထားတဲ့ အလှူငွေနဲ့ ထောက်ပံ့ပါတယ်။
ဟောပြောခြင်း– ယေဟောဝါသက်သေတွေဟာ သတင်းကောင်း ဟောပြောခြင်း၊ “ဘုရားသခင်ရဲ့ တရားစကား” သွန်သင်ပေးခြင်းအတွက် အခကြေးငွေ မယူကြပါဘူး။ (၂ ကောရိန္သု ၂:၁၇) ဒါပေမဲ့ ပထမရာစု ခရစ်ယာန်တွေရဲ့ လုပ်ဆောင်မှုလိုပဲ ဟောပြောခြင်းလုပ်ငန်းမှာ မိမိတို့ရဲ့ အချိန်အများစုကို ပေးဆက်နေကြသူ လေ့ကျင့်ခံထားရတဲ့ အမှုဆောင်တွေဟာ သင့်တော်တဲ့ နေစရာနဲ့ နေ့စဉ် အခြေခံလိုအပ်ရာတွေ ရရှိကြတယ်။—ဖိ. ၄:၁၆၊ ၁၇။ ၁ တိ. ၅:၁၇၊ ၁၈။
သွန်သင်ခြင်း– ကျွန်တော်တို့ရဲ့ တိုက်နယ် အစည်းအဝေး၊ အစည်းအဝေးကြီးတွေအတွက် ကုန်ကျစရိတ်ကို လှူဒါန်းထားတဲ့ငွေနဲ့ သုံးပါတယ်။ အဲဒီအပြင် ကျမ်းစာကို အခြေခံတဲ့ ရုပ်သံအစီအစဉ်တွေလည်း ထုတ်လုပ်ပါတယ်။ တာဝန်တွေကို ထိထိရောက်ရောက် လုပ်ဆောင်နိုင်ဖို့ အကြီးအကဲတွေ၊ အချိန်ပြည့် အမှုဆောင်တွေကို လေ့ကျင့်ပေးတဲ့ သင်တန်းတွေလည်း လုပ်ပေးပါတယ်။
သဘာဝဘေး ကယ်ဆယ်ရေး– သဘာဝဘေး၊ လူကြောင့်ဖြစ်တဲ့ ဘေးတွေ ခံစားရသူတွေကို အစားအစာ၊ သောက်ရေနဲ့ နေစရာတွေ ထောက်ပံ့ပေးပါတယ်။ ဒီလို လူသားချင်း စာနာမှုလုပ်ငန်းကနေ “ယုံကြည်ခြင်းတူတဲ့သူတွေ” သာမက ယေဟောဝါသက်သေ မဟုတ်သူတွေလည်း အကျိုး ခံစားရတယ်။—ဂလာတိ ၆:၁၀။