စစ်နဲ့ ရာသီဥတုပြောင်းလဲမှုကြောင့် ပိုဆိုးလာတဲ့ ကမ္ဘာ့စားနပ်ရိက္ခာပြဿနာ—ကျမ်းစာအဆိုက ဘာလဲ

ယူကရိန်းစစ်နဲ့ ရာသီဥတုပြောင်းလဲမှုကြောင့် ကမ္ဘာတစ်ဝန်း စားနပ်ရိက္ခာ ထုတ်လုပ်ဖြန့်ဖြူးရေးပိုင်း အထိနာလာတယ်။ အထူးသဖြင့် ဖွံ့ဖြိုးဆဲနိုင်ငံတွေမှာ လူတွေ တစ်ဝမ်းတစ်ခါးအတွက် ပိုရုန်းကန်နေရတယ်။

• “နိုင်ငံရေးမတည်ငြိမ်မှု၊ ရာသီဥတုပြောင်းလဲမှု၊ စွမ်းအင်စျေးနှုန်းမြင့်တက်မှုနဲ့ တခြားအရာတွေကြောင့် စားသောက်ကုန် ထုတ်လုပ်ဖို့၊ လက်ဝယ်ရရှိဖို့ ခက်လာတယ်။”—ကုလသမဂ္ဂ အတွင်းရေးမှူးချုပ် အန်တိုနီရို ဂူတာရက်စ်၊ ဇူလိုင် ၁၇၊ ၂၀၂၃။

• “ကောက်နှံတင်ပို့မှု သဘောတူစာချုပ်ကနေ ရုရှား နုတ်ထွက်သွားလို့ ကမ္ဘာ့ စားနပ်ရိက္ခာ အကျပ်အတည်း ပိုဆိုးလာပြီး ရလဒ်အနေနဲ့ ဝင်ငွေနည်းတဲ့နိုင်ငံတွေမှာ၊ အထူးသဖြင့် အာဖရိကမြောက်ပိုင်းနဲ့ အရှေ့အလယ်ပိုင်းဒေသမှာ စားသောက်ကုန်စျေးနှုန်းတွေ အဆမတန် မြင့်တက်လာနိုင်တယ်လို့ ပညာရှင်တွေ ခန့်မှန်းကြတယ်။”—Atalayar.com ဝက်ဘ်ဆိုက်၊ ဇူလိုင် ၂၃၊ ၂၀၂၃။

စားနပ်ရိက္ခာပြဿနာနဲ့ အနာဂတ်အကြောင်း ကျမ်းစာအဆိုကို လေ့လာကြည့်ပါ။

စားနပ်ရိက္ခာပြဿနာအကြောင်း ကျမ်းစာကြိုပြောထား

• ယေရှု အခုလို ကြိုဟောခဲ့တယ်– “လူတစ်မျိုးနဲ့ တစ်မျိုး၊ တစ်နိုင်ငံနဲ့ တစ်နိုင်ငံ တိုက်ခိုက်ကြလိမ့်မယ်။ အစာခေါင်းပါးတာ . . . ဖြစ်လိမ့်မယ်။”—မဿဲ ၂၄:၇။

• ဗျာဒိတ်ကျမ်းမှာ မြင်းစီးသူရဲ လေးဦးအကြောင်း ဆိုထားတယ်။ မြင်းစီးသူရဲတစ်ဦးက စစ်ပွဲတွေကို တင်စားတယ်။ သူ့နောက်မှာ ကပ်လိုက်လာတဲ့ နောက်မြင်းစီးသူရဲတစ်ဦးက အစားအစာတွေကို ချိန်တွယ်စားသောက်ရမယ့်၊ မတန်တဆ ပေးဝယ်ရမယ့်အချိန်ဖြစ်တဲ့ အစာခေါင်းပါးမှုကို တင်စားတယ်။ “ငါကြည့်လိုက်သောအခါ မြင်းနက်တစ်ကောင်ကို တွေ့ရ၏။ မြင်းစီးသူရဲသည် ချိန်ခွင်ကို ကိုင်ထား၏။ . . . အသံတစ်ခုကို ငါကြားရ၏။ ထိုအသံက ‘ဂျုံဆန်တစ်ခွက်ကို တစ်နေ့စာလုပ်အားခ ပေးရ၏။’”—ဗျာဒိတ် ၆:၅၊ ၆၊ ခေတ်သုံးမြန်မာကျမ်း။

စားနပ်ရိက္ခာပြဿနာအကြောင်း အဲဒီကျမ်းစာကြိုဟောချက်တွေက “နောက်ဆုံးကာလ” လို့ ကျမ်းစာဆိုတဲ့ လက်ရှိအချိန်မှာ ပြည့်စုံနေပါတယ်။ (၂ တိမောသေ ၃:၁) “နောက်ဆုံးကာလ” အကြောင်း၊ ဗျာဒိတ်ကျမ်းထဲက မြင်းစီသူရဲလေးဦးအကြောင်း ပိုသိချင်ရင် ၁၉၁၄ ကစပြီး ဒီလောက ပြောင်းလဲသွား ဗီဒီယိုကို ကြည့်ပါ၊ “မြင်းစီးသူရဲလေးဦး—သူတို့ဟာ ဘယ်သူတွေလဲ” ဆောင်းပါးကို ဖတ်ပါ။

ကျမ်းစာ ကူညီပေးပုံ

• စားသောက်ကုန်စျေးနှုန်းတွေ ခေါင်ခိုက်လာတာ၊ အစားအစာ ရှားပါးလာတာတို့လို ဘေးကျပ်နံကျပ် အခြေအနေတွေကို ဖြေရှင်းနိုင်ပုံအကြောင်း လက်တွေ့ကျအကြံဉာဏ်တွေ ကျမ်းစာထဲမှာ ပါတယ်။ အကြံဉာဏ်တချို့ကို “ဝင်ငွေနည်းနည်းနဲ့ ဆက်ရပ်တည်နိုင်ပုံ” ဆောင်းပါးမှာ ဖတ်ကြည့်ပါ။

• အခြေအနေတွေ ပိုကောင်းလာမယ်ဆိုပြီး ကျမ်းစာက မျှော်လင့်ချက် ပေးထားတယ်။ ‘ကောက်နှံတွေ မြေပေါ်မှာ တောင်ပုံရာပုံ ရှိနေ’ မယ့်အချိန်၊ လူတိုင်း အလျှံအပယ် စားသောက်နိုင်မယ့်အချိန် ရောက်လာမယ်လို့ ကတိပြုထားတယ်။ (ဆာလံ ၇၂:၁၆) ဒီအနာဂတ်မျှော်လင့်ချက်အကြောင်း၊ ဒီမျှော်လင့်ချက် ဖြစ်လာမယ်ဆိုတာ ယုံကြည်နိုင်တဲ့အကြောင်း ပိုသိချင်ရင် “စစ်မှန်တဲ့ အနာဂတ် မျှော်လင့်ချက်” ဆောင်းပါးကို ဖတ်ပါ။