‘ဘုရားသခင့်နှုတ်မြွက်စကားတော်ကို မှန်ကန်စွာကိုင်တွယ်လော့’

“သင်မူကား၊ ဝန်ခံတော်မူသောသူ၊ ရှက်ကြောက်စရာအကြောင်းမရှိဘဲ၊ [အမှန်]တရားကို မှန်ကန်စွာပိုင်းခြား [“ကိုင်တွယ်၊” ကဘ] တတ်သော ဆရာသမားဖြစ်လျက် ဘုရားသခင့်ရှေ့၌ ကိုယ်ကိုကိုယ်ဆက်သခြင်းငှာ ကြိုးစားအားထုတ်လော့။”—၂ တိမောသေ ၂:၁၅။

၁၊ ၂။ (က) လုပ်သားများသည် ကိရိယာတန်ဆာများကို အဘယ်ကြောင့်လိုအပ်သနည်း။ (ခ) အဘယ်လုပ်ငန်း၌ ခရစ်ယာန်များပါဝင်နေကြသနည်း၊ ဘုရားသခင့်နိုင်ငံတော်ကို ရှေးဦးထားကြောင်း သူတို့မည်သို့တင်ပြကြသနည်း။

အလုပ်လုပ်သူတို့သည် အလုပ်ပြီးစီးရန် အသုံးပြုစရာကိရိယာတန်ဆာများ ရှိဖို့လိုသည်။ သို့သော် မည်သည့်ကိရိယာမျိုးမဆို ရှိရုံမျှနှင့် မပြီးပါ။ လုပ်သားတစ်ဦး၌ သင့်လျော်သည့်ကိရိယာရှိဖို့လိုပြီး ယင်းကို နည်းမှန်လမ်းကျအသုံးပြုတတ်ရပေမည်။ ဥပမာ၊ ဂိုဒေါင်တစ်လုံးဆောက်လုပ်နေစဉ် ပျဉ်နှစ်ချပ်ကိုကပ်ရိုက်လိုပါက တူနှင့်သံချောင်းများရှိဖို့ထက်မက လိုအပ်မည်။ သံချောင်းကိုမကွေးစေဘဲ သစ်သားထဲ ရိုက်သွင်းတတ်ရပေမည်။ တူကိုအသုံးမပြုတတ်ဘဲ သံရိုက်သွင်းဖို့ကြိုးစားခြင်းသည် အလွန်ခက်ခဲပြီး စိတ်ပျက်စရာပင်ဖြစ်လိမ့်မည်။ သို့သော် ကိရိယာတန်ဆာများကို ပိုင်ပိုင်နိုင်နိုင် ကိုင်တွယ်အသုံးပြုတတ်ခြင်းက လုပ်ငန်းများကို ကျေနပ်အားရစွာ ပြီးစီးစေသည်။

^၂ ခရစ်ယာန်များအနေနှင့် လုပ်ဆောင်စရာလုပ်ငန်းရှိ၏။ ထိုလုပ်ငန်းသည် အလွန်အရေးကြီးသည်။ ယေရှုခရစ်က ‘ဘုရားသခင့်နိုင်ငံတော်ကိုရှေးဦးစွာရှာ’ ပါဟု မိမိနောက်လိုက်များကို တိုက်တွန်းခဲ့သည်။ (မဿဲ ၆:၃၃) ယင်းကို မည်သို့ပြုလုပ်နိုင်မည်နည်း။ တစ်နည်းမှာ ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်း၌ စိတ်အားထက်သန်စွာ ပါဝင်ခြင်းဖြင့်ဖြစ်သည်။ နောက်တစ်နည်းမှာ ကျွန်ုပ်တို့၏ဓမ္မအမှုကို သမ္မာကျမ်းစာအပေါ် အခြေပြုထားခြင်းဖြင့်ဖြစ်သည်။ တတိယနည်းမှာ အမူအကျင့်ကောင်းခြင်းဖြင့်ဖြစ်သည်။ (မဿဲ ၂၄:၁၄; ၂၈:၁၉၊ ၂၀; တမန်တော် ၈:၂၅; ၁ ပေတရု ၂:၁၂) ဤခရစ်ယာန်လုပ်ငန်းတာဝန်ကို ထမ်းဆောင်စဉ် ထိရောက်မှုရှိပြီး ပျော်ရွှင်မှုရှိရန် သင့်လျော်သည့်ကိရိယာတန်ဆာများနှင့် ၎င်းတို့ကို မည်သို့လျောက်ပတ်စွာ အသုံးပြုရန်သိရှိဖို့လိုသည်။ ဤကိစ္စတွင် တမန်တော်ပေါလုသည် ခရစ်ယာန်လုပ်သားတစ်ဦးအဖြစ် ထူးခြားသောပုံသက်သေပြခဲ့ပြီး မိမိကိုအတုယူကြဖို့လည်း ယုံကြည်သူချင်းများအား တိုက်တွန်းခဲ့သည်။ (၁ ကောရိန္သု ၁၁:၁; ၁၅:၁၀) သို့ဖြစ်၍ ကျွန်ုပ်တို့၏လုပ်ဖော်ဆောင်ဖက် ပေါလုထံမှ အဘယ်အရာသင်ယူနိုင်သနည်း။

ပေါလု—စိတ်အားထက်သန်သော ဘုရားသခင့်နိုင်ငံတော်ကြွေးကြော်သူ

၃။ တမန်တော်ပေါလုသည် စိတ်ထက်သန်သော ဘုရားသခင့်နိုင်ငံတော်လုပ်သားတစ်ဦးဖြစ်သည်ဟု အဘယ်ကြောင့်ဆိုနိုင်သနည်း။

^၃ ပေါလုသည် အဘယ်ကဲ့သို့သောလုပ်သားမျိုးဖြစ်သနည်း။ သူသည် အမှန်ပင် စိတ်အားထက်သန်စွာ လုပ်ကိုင်ခဲ့သည်။ ပေါလုသည် မြေထဲပင်လယ်ဒေသတစ်လျှောက် သတင်းကောင်းပျံ့နှံ့အောင် အားသွန်ခွန်စိုက်ဟောပြောခဲ့သည်။ ဘုရားသခင့်နိုင်ငံတော်ကို စိတ်အားထက်သန်စွာ မိမိကြွေးကြော်ရသည့်အကြောင်းရင်းကို ဇွဲကောင်းသောတမန်တော်က ဤသို့ဆိုသည်– “ငါသည်ဧဝံဂေလိတရားကိုဟောရုံပြုလျှင် ဝါကြွားခြင်းအကြောင်းမရှိသေး။ အဘယ်ကြောင့်နည်းဟူမူကား၊ မဟောဘဲမနေနိုင်။ မဟောဘဲနေလျှင် အမင်္ဂလာရှိ၏။” (၁ ကောရိန္သု ၉:၁၆) ပေါလုသည် သူသာ ကယ်တင်ခံရဖို့ စိတ်ဝင်စားခဲ့သလော။ မဟုတ်ပါ။ သူသည် တစ်ကိုယ်ကောင်းဆန်သူတစ်ဦးမဟုတ်ဘဲ အခြားသူများကိုလည်း သတင်းကောင်း၏အကျိုးကို ခံစားစေလိုသည်။ သူဤသို့ရေးသားခဲ့သည်– “ငါသည် သတင်းကောင်းကို အခြားသူများနှင့်အတူ ဝေမျှသူဖြစ်ခြင်းအလိုငှာ ထိုတရားအတွက် ခပ်သိမ်းသောအရာများကို ငါပြု၏။”—၁ ကောရိန္သု ၉:၂၃၊ ကဘ။

၄။ ခရစ်ယာန်လုပ်သားများ တန်ဖိုးအထားဆုံးကိရိယာကား အဘယ်နည်း။

^၄ တမန်တော်ပေါလုသည် မိမိစွမ်းရည်ကိုသာ အားမကိုးနိုင်ကြောင်း သိထားသည့် ကျိုးနွံသောလုပ်သားကောင်းတစ်ဦးဖြစ်သည်။ လက်သမားတစ်ဦးသည် သံရိုက်တူသုံးရသည့်နည်းတူ ဘုရားသခင့်အမှန်တရားကို ကြားနာသူများ၏ နှလုံးထဲရောက်စေဖို့ သင့်တော်သောကိရိယာကို ပေါလုအသုံးပြုဖို့လိုသည်။ အဘယ်ကိရိယာကို သူအဓိကအသုံးပြုခဲ့သနည်း။ ဘုရားသခင့်နှုတ်မြွက်စကားတော် သမ္မာကျမ်းစာဖြစ်၏။ ထိုနည်းတူ၊ တပည့်များဖြစ်လာစေဖို့ ကျွန်ုပ်တို့အဓိကအသုံးပြုရမည့်ကိရိယာမှာ သမ္မာကျမ်းစာဖြစ်သည်။

၅။ ထိရောက်သောဓမ္မအမှုဆောင်များဖြစ်ရန် ကျမ်းချက်များကို ကိုးကားခြင်းအပြင် အဘယ်အရာပြုလုပ်ဖို့ လိုသေးသနည်း။

^၅ သမ္မာကျမ်းစာကို မှန်ကန်စွာကိုင်တွယ်အသုံးပြုခြင်းတွင် ၎င်းမှကိုးကားခြင်းထက်မက ပြုဖို့လိုကြောင်း ပေါလုသိခဲ့သည်။ “ဖြားယောင်းသွေးဆောင်” ခြင်းကို သူသုံးခဲ့သည်။ (တမန်တော် ၂၈:၂၃) မည်သို့အသုံးပြုခဲ့သနည်း။ ပေါလုသည် ဘုရားသခင့်နိုင်ငံတော်အမှန်တရားကို လူအများ လက်ခံယုံကြည်လာစေရန် သမ္မာကျမ်းစာကို အောင်မြင်စွာ အသုံးပြုခဲ့သည်။ သူတို့နှင့် ကျိုးကြောင်းဆင်ခြင်ခဲ့သည်။ ဧဖက်မြို့တရားဇရပ်တစ်ခုတွင် ပေါလုသည် သုံးလပတ်လုံး “ဘုရားသခင်၏နိုင်ငံတော်အကြောင်းများကို ဆွေးနွေးနှီးနှော၍ ဖြားယောင်းသွေးဆောင်” ခဲ့သည်။ “အချို့သောသူတို့သည် ခိုင်မာသောစိတ်ရှိ၍ နားမထောင်ဘဲနေ” ကြသော်လည်း နားထောင်သူများစွာရှိ၏။ ဧဖက်မြို့တွင် ပေါလုဓမ္မအမှုဆောင်ခဲ့ခြင်းကြောင့် ‘ဘုရားသခင်၏နှုတ်မြွက်စကားတော်သည် တန်ခိုးနှင့်တိုးပွား၍ အောင်မြင်လေ၏။’—တမန်တော် ၁၉:၈၊ ၉၊ ၂၀၊ သမ္မာ။

၆၊ ၇။ ပေါလုသည် သူ၏ဓမ္မအမှုကို မည်သို့ဂုဏ်တင်ခဲ့သနည်း၊ ထိုသို့ ကျွန်ုပ်တို့မည်သို့ပြုလုပ်နိုင်သနည်း။

^၆ ပေါလုသည် စိတ်ထက်သန်သော ဘုရားသခင့်နိုင်ငံတော်ကြွေးကြော်သူတစ်ဦးအဖြစ် ‘သူ၏ဓမ္မအမှုကိုဂုဏ်တင်ခဲ့’ သည်။ (ရောမ ၁၁:၁၃၊ ကဘ) မည်သို့အားဖြင့်နည်း။ သူသည် မိမိကိုယ်ကိုအမွှမ်းတင်ဖို့ စိတ်မဝင်စားခဲ့ချေ; ဘုရားသခင်၏လုပ်ဖော်ဆောင်ဖက်တစ်ဦးအဖြစ် အများသိမည်ကိုလည်း မရှက်ခဲ့ပါ။ ယင်းအစား သူ၏ဓမ္မအမှုကို ဂုဏ်အရှိဆုံးလုပ်ငန်းအဖြစ် ရှုမြင်ခဲ့သည်။ ပေါလုသည် သမ္မာကျမ်းစာကို ကျွမ်းကျင်လိမ္မာ၊ ထိရောက်စွာ ကိုင်တွယ်အသုံးပြုခဲ့သည်။ သီးပွင့်သော သူ၏လုပ်ငန်းကို အခြားသူများတွေ့ပြီး အားရှိလာရာ မိမိတို့၏ဓမ္မအမှုကို ပိုမိုအပြည့်အဝဆောင်ရွက်ရန် လှုံ့ဆော်ခံခဲ့ရသည်။ သူ၏ဓမ္မအမှုသည် ဤနည်းဖြင့်လည်း ဂုဏ်တင်ခံခဲ့ရသည်။

^၇ ပေါလုကဲ့သို့ ကျွန်ုပ်တို့လည်း သမ္မာကျမ်းစာကို မကြာခဏ၊ ထိရောက်စွာအသုံးပြုခြင်းအားဖြင့် ကျွန်ုပ်တို့၏ဓမ္မအမှုဆောင်ခြင်းလုပ်ငန်းကို ဂုဏ်တင်နိုင်ကြသည်။ ကျွန်ုပ်တို့၏လယ်ကွင်းဓမ္မအမှု ကဏ္ဍရပ်အားလုံးတွင် ကျွန်ုပ်တို့၏ပန်းတိုင်မှာ လူများနိုင်သလောက်များစွာအား သမ္မာကျမ်းစာမှ တစ်စုံတစ်ရာကို ပြောပြဖို့ဖြစ်သင့်သည်။ ထိုသို့ပြောဆိုရာတွင် မည်သို့သွေးဆောင်ပြောဆိုနိုင်သနည်း။ အရေးပါသောနည်း သုံးနည်းကို သုံးသပ်ကြည့်ပါ– (၁) သမ္မာကျမ်းစာကို လေးစားတန်ဖိုးထားစေနိုင်မည့်နည်းဖြင့် ယင်းကို အာရုံစိုက်စေပါ။ (၂) သမ္မာကျမ်းစာပါစကားကို လိမ္မာပါးနပ်စွာရှင်းပြပြီး သက်ဆိုင်ပုံကိုတင်ပြပါ။ (၃) ယုံကြည်လက်ခံနိုင်စေသောနည်းလမ်းဖြင့် ကျမ်းစာမှ ကျိုးကြောင်းဆင်ခြင်ပါ။

၈။ ယနေ့ ဘုရားသခင့်နိုင်ငံတော်သတင်း ဟောပြောခြင်းလုပ်ငန်းအတွက် အဘယ်ကိရိယာများရှိသနည်း၊ ၎င်းတို့ကို သင်မည်သို့အသုံးပြုခဲ့ပြီနည်း။

^၈ ပေါလုဓမ္မအမှုဆောင်စဉ်က မရှိခဲ့သောကိရိယာများ ယခုခေတ် ဘုရားသခင့်နိုင်ငံတော်ကြွေးကြော်သူများ ရရှိထားကြသည်။ ထိုတွင် စာအုပ်များ၊ မဂ္ဂဇင်းများ၊ ဘရိုရှာများ၊ လက်ကမ်းဝေစာများ၊ ဝေစာများ၊ အော်ဒီယိုနှင့် ဗီဒီယိုတိပ်ခွေများပါဝင်သည်။ လွန်ခဲ့သောရာစုနှစ်တွင် သက်သေခံကတ်ပြားများ၊ ဓာတ်ပြားစက်များ၊ အသံချဲ့စက်ပါကားများနှင့် ရေဒီယိုမှအသံလွှင့်နည်းများကိုလည်း အသုံးပြုခဲ့ကြသည်။ ကျွန်ုပ်တို့အသုံးပြုနိုင်သည့် အကောင်းဆုံးကိရိယာမှာ သမ္မာကျမ်းစာပင်ဖြစ်သည်၊ ဤမရှိမဖြစ် ကိရိယာတန်ဆာကို ကောင်းစွာ၊ သင့်လျော်စွာ အသုံးပြုဖို့လိုသည်။

ကျွန်ုပ်တို့၏ဓမ္မအမှုသည် သမ္မာကျမ်းစာအပေါ် အခြေပြုရမည်

၉၊ ၁၀။ သမ္မာကျမ်းစာကို အသုံးပြုခြင်းနှင့်ပတ်သက်၍ တိမောသေကို ပေါလုပေးခဲ့သော အကြံပေးချက်မှ ကျွန်ုပ်တို့အဘယ်အရာသင်ယူနိုင်သနည်း။

^၉ သမ္မာကျမ်းစာကို ထိရောက်သောကိရိယာတစ်ခုအဖြစ် မည်သို့အသုံးပြုနိုင်သနည်း။ လုပ်ဖော်ဆောင်ဖက် တိမောသေအား ပေါလုပြောဆိုခဲ့သော ဤစကားများကို ဂရုပြုခြင်းအားဖြင့်ဖြစ်သည်– “သင်မူကား ဝန်ခံတော်မူသောသူ၊ ရှက်ကြောက်စရာအကြောင်းမရှိဘဲ၊ [အမှန်]တရားကို မှန်ကန်စွာပိုင်းခြား [“ကိုင်တွယ်၊” ကဘ] တတ်သော ဆရာသမားဖြစ်လျက် ဘုရားသခင့်ရှေ့၌ ကိုယ်ကိုကိုယ်ဆက်သခြင်းငှာ ကြိုးစားအားထုတ်လော့။” (၂ တိမောသေ ၂:၁၅) ‘အမှန်တရားကို မှန်ကန်စွာကိုင်တွယ်’ ဖို့ အဘယ်အရာပြုလုပ်ရမည်နည်း။

^၁၀ ‘မှန်ကန်စွာကိုင်တွယ်’ ဟုဘာသာပြန်ဆိုထားသော ဂရိစကားလုံးသည် စာသားအရ “ဖြောင့်တန်းစွာညှပ်ခြင်း” သို့မဟုတ် “လမ်းကြောင်းတည့်တည့်ဖြတ်ခြင်း” ဖြစ်သည်။ ခရစ်ယာန်ဂရိကျမ်းစာတွင် တိမောသေအား ပေါလုတိုက်တွန်းပြောဆိုခဲ့သည့်စကား၌သာ ထိုအသုံးအနှုန်းကို အသုံးပြုထားသည်။ လယ်ကွင်းတွင် ထယ်ကြောင်းဖြောင့်ဖြောင့်ထိုးခြင်းအား ဖော်ပြရန် အဆိုပါစကားလုံးကို အသုံးပြုနိုင်သည်။ ဝါရင့်လယ်သမားတစ်ဦး၏ ထယ်ကြောင်းသည် ကွေ့ကောက်နေလျှင် သူအမှန်ပင် စိတ်အနှောင့်အယှက်ဖြစ်ပေမည်။ ‘ရှက်ကြောက်စရာအကြောင်းမရှိသော အမှုတော်ဆောင်တစ်ဦး’ ဖြစ်ရန် သမ္မာကျမ်းစာ၏ စစ်မှန်သောသွန်သင်ချက်များမှ သွေဖည်၍မရဟု တိမောသေ,သတိပေးခံခဲ့ရသည်။ သူသည် ကိုယ်ပိုင်အယူအဆအတိုင်း သွန်သင်ပေးခွင့်မရှိပါ။ သူ၏ဟောပြောခြင်းနှင့် သွန်သင်ခြင်းကို ကျမ်းစာအပေါ် လုံးလုံးအခြေပြုရပေမည်။ (၂ တိမောသေ ၄:၂-၄) ဤနည်းဖြင့် စိတ်ရိုးဖြောင့်သူများသည် လောကအတွေးအခေါ်ကို လက်မခံဘဲ၊ ကိစ္စရပ်များကို ယေဟောဝါရှုမြင်သည့်နည်းတူ ရှုမြင်ရန် လမ်းညွှန်ခံရကြလိမ့်မည်။ (ကောလောသဲ ၂:၄၊ ၈) ယနေ့လည်း ထိုနည်းအတိုင်းပင်ဖြစ်သည်။

ကျွန်ုပ်တို့၏အမူအကျင့် ကောင်းရမည်

၁၁၊ ၁၂။ ကျွန်ုပ်တို့၏အမူအကျင့်သည် သမ္မာကျမ်းစာကို မှန်ကန်စွာကိုင်တွယ်ခြင်းအပေါ် အဘယ်အကျိုးသက်ရောက်နိုင်သနည်း။

^၁၁ သမ္မာကျမ်းစာ၏စကားတော်ကို ကြွေးကြော်ခြင်းအားဖြင့် ယင်း၏အမှန်တရားများကို မှန်ကန်စွာကိုင်တွယ်ရုံထက်မကပြုမူရမည်။ ကျွန်ုပ်တို့၏အမူအကျင့်သည် ၎င်းနှင့်ကိုက်ညီရမည်။ “ငါတို့သည် ဘုရားသခင်၏လုပ်ဖော်ဆောင်ဖက်ဖြစ်ကြ” သောကြောင့် အယောင်ဆောင် လုပ်သားများ မဖြစ်ရပါ။ (၁ ကောရိန္သု ၃:၉၊ သမ္မာ) ဘုရားသခင့်နှုတ်မြွက်စကားတော်က ဤသို့ဆို၏– “သူတစ်ပါးကိုဆုံးမလျက်ပင် ကိုယ်ကိုမဆုံးမသလော။ ‘သူ့ဥစ္စာကိုမခိုးနှင့်’ ဟုတရားဟောလျက်ပင် ကိုယ်တိုင်ခိုးသလော။ ‘သူ့မယားကိုမပြစ်မှားနှင့်’ ဟုဆိုလျက်ပင် ကိုယ်တိုင်ပြစ်မှားသလော။ ရုပ်[ပုံ]ကိုစက်ဆုပ်ရွံရှာလျက်ပင် ဗိမာန်တော်ကို လုယူဖျက်ဆီးသလော။” (ရောမ ၂:၂၁၊ ၂၂) ထို့ကြောင့် ယခုခေတ် ဘုရားသခင်၏လုပ်သားများအနေနှင့် သမ္မာကျမ်းစာကို မှန်ကန်စွာကိုင်တွယ်နည်းတစ်နည်းမှာ ဤတိုက်တွန်းချက်ကို လိုက်နာခြင်းအားဖြင့်ဖြစ်သည်– ‘ထာဝရဘုရားသခင်ကို စိတ်နှလုံးအကြွင်းမဲ့ကိုးစားလော့။ ကိုယ်ဉာဏ်ကိုအမှီမပြုနှင့်။ သွားလေရာရာ၌ ထာဝရဘုရားသခင်ကိုမျက်မှောက်ပြုလော့။ သို့ပြုလျှင် သင်၏လမ်းခရီးတို့ကို ပဲ့ပြင်တော်မူမည်။’—သု. ၃:၅၊ ၆။

^၁၂ သမ္မာကျမ်းစာကို မှန်ကန်စွာကိုင်တွယ်ခြင်းမှ ကျွန်ုပ်တို့ အဘယ်အကျိုးကျေးဇူးများရနိုင်သနည်း။ စိတ်ရိုးဖြောင့်သူတို့၏ အသက်တာများအပေါ် အကျိုးသက်ရောက်နိုင်သော ဘုရားသခင့်နှုတ်မြွက်စကားတော်၏ အစွမ်းတန်ခိုးကို သုံးသပ်ကြည့်ပါ။

သမ္မာကျမ်းစာသည် ပြောင်းလဲစေနိုင်သောအစွမ်းရှိ

၁၃။ သမ္မာကျမ်းစာကို လိုက်လျှောက်ကျင့်သုံးခြင်းက လူတစ်ဦးတွင် အဘယ်အရာဖြစ်စေနိုင်သနည်း။

^၁၃ ဘုရားသခင့်နှုတ်မြွက်စကားတော်ကို ယုံကြည်စိတ်ချနိုင်သည်ဟု ယူမှတ်သောအခါ ၎င်း၏သတင်းတရားသည် လူတို့၏အသက်တာကို အံ့ဖွယ်ကောင်းလောက်အောင် ပြောင်းလဲစေနိုင်သည့်အစွမ်းရှိ၏။ ပေါလုသည် ဘုရားသခင့်နှုတ်မြွက်စကားတော်၏လုပ်ဆောင်မှုကို ကိုယ်တိုင်တွေ့မြင်ခဲ့ပြီး ရှေးခေတ်သက်သာလောနိတ်မြို့မှ ခရစ်ယာန်ဖြစ်လာသူများအပေါ် ယင်း၏ အကျိုးသက်ရောက်ပုံကို တွေ့မြင်ခဲ့သည်။ ထို့ကြောင့် သူတို့ကို သူဤသို့ပြောခဲ့သည်– “ငါတို့ဟောပြောသော ဘုရားသခင်၏နှုတ်[မြွက်]တရားကို သင်တို့သည်ကြားနာ၍ ခံယူကြသောအခါ လူ၏နှုတ်ထွက်စကားကဲ့သို့ မခံမယူဘဲ၊ ဘုရားသခင်၏ နှုတ်[မြွက်စကား]တော်အမှန်ဖြစ်သည်နှင့်အညီ ယုံကြည်ခြင်းသို့ရောက်သော သင်တို့အထဲ၌ပြုပြင်သော ဘုရားသခင်၏နှုတ်[မြွက်]တရားတော်ကဲ့သို့ ခံယူကြသည်အကြောင်းအရာကိုထောက်၍ ငါတို့သည်လည်း ဘုရားသခင်၏ကျေးဇူးတော်ကို အစဉ်မပြတ်ချီးမွမ်းကြ၏။” (၁ သက်သာလောနိတ် ၂:၁၃၊ သမ္မာ) ထိုခရစ်ယာန်များမက ခရစ်တော်၏ တပည့်စစ်တပည့်မှန်အားလုံးအတွက် မဖြစ်စလောက် လူ့တွေးခေါ်နိုင်စွမ်းသည် ဘုရားသခင်၏အမြင့်မြတ်ဆုံးဉာဏ်ပညာနှင့် နှိုင်းယှဉ်၍မရပါ။ (ဟေရှာယ ၅၅:၉) သက်သာလောနိတ်မြို့သားများသည် “ကြီးစွာသောဆင်းရဲခြင်းကိုခံရသော်လည်း၊ . . . ဝမ်းမြောက်ခြင်းနှင့်တကွ နှုတ်[မြွက်]တရားတော်ကိုခံယူ” ကြပြီး အခြားယုံကြည်သူများအတွက် ပုံနမူနာကောင်းများဖြစ်လာခဲ့ကြသည်။—၁ သက်သာလောနိတ် ၁:၅-၇။

၁၄၊ ၁၅။ သမ္မာကျမ်းစာ၏သတင်းတရားသည် မည်မျှအစွမ်းထက်သနည်း၊ အဘယ်ကြောင့်နည်း။

^၁၄ သမ္မာကျမ်းစာသည် ယင်း၏ရင်းမြစ် ယေဟောဝါကဲ့သို့ အင်အားကြီးမား၏။ ၎င်းသည် “မိုးကောင်းကင်ကို . . . ဖန်ဆင်း” သူ၊ ‘အသက်ရှင်တော်မူသောဘုရားသခင်’ ထံမှလာသော နှုတ်မြွက်စကားဖြစ်ပြီး ထိုနှုတ်မြွက်စကားတော်သည် အစဉ်သဖြင့် ‘စေခိုင်းသောကိစ္စ၌ အောင်မြင်’ မှုရှိသည်။ (ဟေဗြဲ ၃:၁၂; ဆာလံ ၃၃:၆; ဟေရှာယ ၅၅:၁၁) ကျမ်းပညာရှင်တစ်ဦးက ဤသို့မှတ်ချက်ချခဲ့သည်– “ဘုရားသခင်သည် မိမိကိုယ်ကို မိမိ၏နှုတ်မြွက်စကားတော်မှ သီးခြားခွဲမထားချေ။ မိမိနှင့်မဆိုင်သောအရာပမာ ယင်းနှင့်ဆက်နွှယ်နေမှုကို ကိုယ်တော်မငြင်းပယ်ချေ။ . . . ထို့ကြောင့် ယင်းသည် ဘယ်သောအခါမျှ အသက်မဲ့နေသောအရာမဟုတ်ချေ၊ နှုတ်တော်မှထွက်ပြီးနောက် ဖြစ်ချင်ရာဖြစ် မမှုတော့ဟူသည့်သဘောမဟုတ်ချေ; အကြောင်းမှာ ယင်းသည် အသက်ရှင်တော်မူသောဘုရားသခင်နှင့် စည်းလုံးထားသောနှောင်ကြိုးဖြစ်၏။”

^၁၅ သမ္မာကျမ်းစာတွင်ပါသော သတင်းတရားသည် မည်မျှအစွမ်းထက်သနည်း။ လွန်စွာအားကြီး အစွမ်းထက်ပါသည်။ ယင်းကြောင့် ဆီလျော်စွာ ပေါလုဤသို့ရေးသားခဲ့သည်– “ဘုရားသခင်၏နှုတ်[မြွက်]တရားတော်သည် အသက်ရှင်ခြင်း၊ တန်ခိုးနှင့်ပြုပြင်ခြင်း၊ သန်လျက်တကာတို့ထက် ထက်ခြင်းနှင့်ပြည့်စုံသည်ဖြစ်၍၊ အသက်နှင့်စိတ်ဝိညာဉ်ကိုလည်းကောင်း ပိုင်းခြား၍ ထုတ်ချင်းခွင်းတတ်၏။ စိတ်နှလုံးအကြံအစည်များကိုလည်း သိမြင်တတ်၏။”—ဟေဗြဲ ၄:၁၂။

၁၆။ သမ္မာကျမ်းစာသည် လူတစ်ဦးကို မည်သို့လုံးလုံးလျားလျား ပြောင်းလဲစေနိုင်သနည်း။

^၁၆ သမ္မာကျမ်းစာပါ သတင်းတရားသည် “သန်လျက်တကာတို့ထက် ထက်” သည်။ သို့ဖြစ်၍ ထိုးဖောက်သိမြင်နိုင်စွမ်း ထက်မြက်သဖြင့် မည်သည့်လူသားလက်နက်ကိရိယာထက်မဆို သာလွန်သည်။ သမ္မာကျမ်းစာသည် လူတစ်ဦး၏အတွင်းအကျဆုံးအပိုင်းများကို ထိုးဖောက်သိမြင်နိုင်ပြီး သူ၏အတွင်းပိုင်းကို ပြုပြင်ပြောင်းလဲပေးနိုင်သည်၊ သူ၏တွေးခေါ်ပုံနှင့် သူကြိုက်နှစ်သက်ရာတို့အပေါ် သက်ရောက်မှုရှိကာ လက်ခံနိုင်ဖွယ်ဖြစ်သော၊ ဘုရားသခင်၏လုပ်သားတစ်ဦးဖြစ်စေနိုင်သည်။ တကယ့်အစွမ်းထက်လှသော ကိရိယာပင်!

၁၇။ သမ္မာကျမ်းစာ၏ ပြောင်းလဲစေနိုင်သောအစွမ်းတန်ခိုးကို ရှင်းပြပါ။

^၁၇ လူတစ်ဦးသည် မိမိကိုယ်ကို မည်သို့ပင်ထင်မြင်ယူဆပါစေ၊ အခြားသူများအရှေ့တွင် မည်ကဲ့သို့ပင်နေပြပါစေ သူ၏အတွင်းစိတ်ကို သမ္မာကျမ်းစာကအရှိအတိုင်း ဖော်ထုတ်ပြသည်။ (၁ ဓမ္မရာဇဝင် ၁၆:၇) တစ်ခါတစ်ရံ လူဆိုးတစ်ဦးပင်လျှင် စေတနာရှိသူ သို့မဟုတ် ဘုရားတရားကြည်ညိုသူ ဖြစ်ယောင်ဆောင်ပြီး မိမိ၏အတွင်းသဘောကို ဖုံးကွယ်ထားနိုင်သည်။ ဆိုးသွမ်းသူများသည် မကောင်းသောအကြံအစည်ဖြင့် အရေခြုံဟန်ဆောင်တတ်ကြသည်။ မာနကြီးသူတို့သည် စိတ်နှိမ့်ချသယောင်ရှိသော်လည်း စင်စစ်အားဖြင့် လူတို့၏ချီးမွမ်းသံကိုကြားလိုကြသည်။ သို့သော် သမ္မာကျမ်းစာသည် နှလုံးထဲ အမှန်တကယ်ရှိရာကို လှစ်ဟဖော်ပြခြင်းဖြင့် စိတ်နှိမ့်ချသူအား လူဟောင်းကိုချွတ်ပြီး “မှန်သောဖြောင့်မတ်ခြင်းနှင့် . . . တည်ကြည်ခြင်းဖြင့် ဘုရားသခင်၏အလိုတော်နှင့် အတူအမျှဖန်ဆင်းသောလူသစ်ကို ယူတင်ဝတ်ဆောင်” စေနိုင်သည်။ (ဧဖက် ၄:၂၂-၂၄၊ ကဘ) ထို့ပြင် သမ္မာကျမ်းစာ၏သွန်သင်ချက်များသည် ရှက်ကြောက်တတ်သူကို ယေဟောဝါ၏ရဲရင့်သောသက်သေများ၊ စိတ်ထက်သန်သော ဘုရားသခင့်နိုင်ငံတော်ကြွေးကြော်သူများဖြစ်စေနိုင်သည်။—ယေရမိ ၁:၆-၉။

၁၈၊ ၁၉။ ဤအပိုဒ်များ သို့မဟုတ် လယ်ကွင်းလုပ်ငန်းမှ ကိုယ်ပိုင်တွေ့ကြုံမှုကိုအခြေပြု၍ ကျမ်းစာအမှန်တရားသည် လူတစ်ဦး၏သဘောထားကို မည်သို့ပြောင်းလဲစေနိုင်ကြောင်း ဖော်ပြပါ။

^၁၈ သမ္မာကျမ်းစာ၏ ပြောင်းလဲစေနိုင်သောအစွမ်းသည် အရပ်ရပ်ရှိလူတို့ကို ကောင်းကျိုးပြုသည်။ သာဓကအနေနှင့် ကမ္ဘောဒီးယားနိုင်ငံ၊ ဖနွမ်းပင်မြို့ရှိ ဘုရားသခင့်နိုင်ငံတော်ကြွေးကြော်သူများသည် ကမ်ပိုကဲမ်ပြည်နယ်တွင် တစ်လနှစ်ကြိမ် ဟောပြောခဲ့ကြသည်။ ယေဟောဝါသက်သေများကို အခြားတရားဟောဆရာများ အတိုက်အခံပြုပြောဆိုကြသည်ကိုကြားပြီးနောက် ဒေသခံတရားဟောဆရာမတစ်ဦးသည် ထိုပြည်နယ်သို့ သက်သေခံများနောက်တစ်ကြိမ်ရောက်လာလျှင် သူတို့နှင့်တွေ့ဆုံဆွေးနွေးဖို့ စီစဉ်ခဲ့သည်။ ပွဲနေ့များကျင်းပခြင်းအကြောင်း မေးခွန်းများတရစပ်မေးမြန်းပြီး သူတို့က ကျမ်းစာမှ ကျိုးကြောင်းဆင်ခြင်ပြသောအခါ သူအာရုံစိုက်နားထောင်ခဲ့သည်။ ထို့နောက် သူဤသို့ပြောဆိုလိုက်သည်– “ရှင်တို့နဲ့ပတ်သက်ပြီး ကျွန်မရဲ့လုပ်ဖော်ဆောင်ဖက် တရားဟောဆရာတွေပြောတာ မမှန်ဘူးဆိုတာ အခုကျွန်မသိပြီ! ကျမ်းစာကို ရှင်တို့မသုံးကြဘူးလို့ သူတို့ကပြောတယ်၊ ဒါပေမဲ့ ဒီမနက်မှာ ရှင်တို့ ကျမ်းစာကိုပဲသုံးနေကြတာ!”

^၁၉ ဤအမျိုးသမီးသည် သက်သေခံများနှင့် ကျမ်းစာဆက်လေ့လာ၏၊ တရားဟောဆရာမအဖြစ်မှ ဖယ်ရှားပစ်လိမ့်မည်ဟု ခြိမ်းခြောက်ခံရသော်လည်း သူ,မမှုခဲ့ပေ။ သူကျမ်းစာဆွေးနွေးနေကြောင်း မိတ်ဆွေတစ်ယောက်ကို ပြောပြလိုက်ရာ မကြာမီပင် သူ၏မိတ်ဆွေသည်လည်း သက်သေခံများနှင့် ကျမ်းစာစတင်လေ့လာသည်။ ထိုမိတ်ဆွေသည် သူလေ့လာနေသောအကြောင်းအရာများနှင့်ပတ်သက်၍ အလွန်စိတ်တက်ကြွလာရာ ချာ့ချ်ဝတ်ပြုစည်းဝေးတစ်ခုတွင် “ယေဟောဝါသက်သေတွေနဲ့ ကျမ်းစာလေ့လာကြ!” ဟုပြောဆိုမိသည်။ ထို့နောက် များမကြာမီ ချာ့ချ်အသင်းသားအဖြစ်မှ သူနုတ်ထွက်ခဲ့သည်။ ယခင်က သင်းအုပ်ဆရာမဖြစ်ခဲ့သူ၊ သူ၏မိတ်ဆွေနှင့် အခြားသူတို့သည် ယေဟောဝါသက်သေများနှင့် ကျမ်းစာစလေ့လာလေတော့သည်။

၂၀။ သမ္မာကျမ်းစာ၏အစွမ်းတန်ခိုးကို ဂါနာနိုင်ငံရှိ အမျိုးသမီးတစ်ဦး၏တွေ့ကြုံမှုက မည်သို့ဖော်ပြသနည်း။

^၂၀ ဂါနာနိုင်ငံမှ ပေါ်လီနာဟူသော အမျိုးသမီးတစ်ဦး၏ အဖြစ်ကလည်း သမ္မာကျမ်းစာ၏အစွမ်းတန်ခိုးကို ဖော်ပြသည်။ ဘုရားသခင့်နိုင်ငံတော်သတင်းကို အချိန်ပြည့်ကြွေးကြော်သူတစ်ဦးသည် ထာဝရအသက်ကိုရစေသော အသိပညာaစာအုပ်ဖြင့် သူနှင့်ကျမ်းစာလေ့လာခဲ့သည်။ ပေါ်လီနာသည် မယားအများယူထားသည့်အိမ်ထောင်မှ ဇနီးတစ်ဦးဖြစ်ပြီး ပြောင်းလဲဖို့လိုကြောင်း သိမြင်ခဲ့သည်၊ သို့သော် သူ၏လင်ယောက်ျားနှင့် ဆွေမျိုးအားလုံးတို့က သူ့ကို အကြီးအကျယ်အတိုက်အခံပြုကြသည်။ အထက်တရားရုံးတရားသူကြီးနှင့် ချာ့ချ်လူကြီးတစ်ဦးဖြစ်သော သူ၏အဘိုးက မဿဲ ၁၉:၄-၆ ကိုတလွဲသုံးပြီး သူ့ကို ကြိုးစားဖျောင်းဖျခဲ့သည်။ တရားသူကြီးပြောသည်မှာ ခိုင်လုံစိတ်ချရပုံရှိသည်၊ သို့သော် ယေရှုခရစ်ကိုသွေးဆောင်စဉ်က ကျမ်းချက်များကို စာတန် မလိမ့်တပတ် လှည့်အသုံးပြုခဲ့ပုံနှင့် ဆင်တူကြောင်း ပေါ်လီနာ ချက်ချင်းသတိပြုမိသည်။ (မဿဲ ၄:၅-၇) ဘုရားသခင်သည် ယောက်ျားနှင့် မိန်းမများကိုမဟုတ်ဘဲ လူယောက်ျားနှင့်မိန်းမကို ဖန်ဆင်းခဲ့၍၊ ထိုသူသုံးယောက်မဟုတ်ဘဲ ထိုသူနှစ်ယောက်တို့သည် တစ်သားတစ်ကိုယ်တည်းဖြစ်လာသည်ဟု အဓိပ္ပာယ်သက်ရောက်သော အိမ်ထောင်ရေးဆိုင်ရာ ယေရှု၏ရှင်းလင်းသောဖော်ပြချက်ကို သူပြန်သတိရမိသည်။ သူဆုံးဖြတ်သည့်အတိုင်းပြုလုပ်ခဲ့ရာ နောက်ဆုံးတွင် မယားပြိုင်ထားသည့်အိမ်ထောင်မှ ထုံးတမ်းဥပဒေအရ ကွာရှင်းလိုက်သည်။ မကြာမီပင် သူသည် ပျော်ရွှင်သော၊ နှစ်ခြင်းခံပြီးသည့် ဘုရားသခင့်နိုင်ငံတော်ကြွေးကြော်သူတစ်ဦး ဖြစ်လာလေသည်။

သမ္မာကျမ်းစာကို မှန်ကန်စွာကိုင်တွယ်နေပါ

၂၁၊ ၂၂။ (က) ဘုရားသခင့်နိုင်ငံတော်ကြွေးကြော်သူများအနေနှင့် ကျွန်ုပ်တို့ မည်သို့စိတ်ပိုင်းဖြတ်လိုကြသနည်း။ (ခ) နောက်ဆောင်းပါးတွင် အဘယ်အကြောင်းဆွေးနွေးမည်နည်း။

^၂၁ ယေဟောဝါထံ နီးကပ်လာစေရန် သူတို့၏ဘဝကို ပြောင်းလဲနိုင်ဖို့ သူတစ်ပါးအား ကူညီပေးရာတွင် သမ္မာကျမ်းစာသည် အမှန်ပင်အစွမ်းထက်သော ကိရိယာတစ်ခုဖြစ်သည်။ (ယာကုပ် ၄:၈) ကျွမ်းကျင်သောလုပ်သားများသည် လုပ်ငန်းတစ်ခုကို ကောင်းစွာပြီးမြောက်စေဖို့ ကိရိယာများကို အသုံးပြုကြသည့်နည်းတူ ဘုရားသခင့်နိုင်ငံတော်ကြွေးကြော်သူများအဖြစ် ကျွန်ုပ်တို့ကို ဘုရားသခင်ပေးအပ်ထားသောလုပ်ငန်းတွင် ဘုရားသခင့်နှုတ်မြွက်စကားတော်၊ သမ္မာကျမ်းစာကို ကျွမ်းကျင်ပိုင်နိုင်စွာ ကြိုးစားအားထုတ်အသုံးပြုရန် စိတ်ပိုင်းဖြတ်ထားကြပါစို့။

^၂၂ တပည့်ဖြစ်စေခြင်းလုပ်ငန်းတွင် သမ္မာကျမ်းစာကို မည်သို့ပိုမိုထိရောက်စွာ ကိုင်တွယ်အသုံးပြုနိုင်သနည်း။ တစ်နည်းမှာ ယုံကြည်လက်ခံလာအောင် သွန်သင်တတ်သူများအဖြစ် မိမိတို့စွမ်းရည်များကို တိုးတက်စေခြင်းအားဖြင့်ဖြစ်သည်။ ကျေးဇူးပြု၍ နောက်ဆောင်းပါးကို အာရုံစိုက်ပါ၊ ထိုတွင် သွန်သင်နည်းများနှင့် ဘုရားသခင့်နိုင်ငံတော်သတင်းကို အခြားသူများလက်ခံလာစေနိုင်သောနည်းများကို အကြံပြုထားသည်။

[အောက်ခြေမှတ်ချက်]

သင်မှတ်မိသလော

• ဘုရားသခင့်နိုင်ငံတော်ကြွေးကြော်သူများသည် အဘယ်ကိရိယာများကို အသုံးပြုနိုင်သနည်း။

• ပေါလုသည် အဘယ်နည်းများဖြင့် အတုယူစရာ ဘုရားသခင့် နိုင်ငံတော်လုပ်သားတစ်ဦးဖြစ်ခဲ့သနည်း။

• သမ္မာကျမ်းစာကို မှန်ကန်စွာကိုင်တွယ်ခြင်းတွင် အဘယ်အရာ ပါဝင်သနည်း။

• ယေဟောဝါ၏ရေးသားထားသော နှုတ်မြွက်စကားတော်သည် မည်မျှအစွမ်းထက်သော ကိရိယာဖြစ်သနည်း။

[စာမျက်နှာ ၁၀ ပါ ရုပ်ပုံ]

ဘုရားသခင့်နိုင်ငံတော်ကြွေးကြော်ခြင်းလုပ်ငန်းတွင် ခရစ်ယာန်များအသုံးပြုသော ကိရိယာအချို့