“အာရာရတ်ပြည်” ၌ စစ်မှန်သောဝတ်ပြုရေးကို အထက်တရားရုံး ထောက်ခံ

ဆံဖြူ အာမေးနီးယန်းလူမျိုး ကလေးသုံးယောက်ရှိဖခင်တစ်ဦးသည် နိုင်ငံ့တရားလွှတ်တော်ရှေ့ ရောက်ရှိနေသည်။ သူနှင့် သူ၏ယုံကြည်သူချင်းတို့၏လွတ်လပ်မှု ဆုံးရှုံးမည့်အကြောင်းရှိသည်။ မိမိ၏ယုံကြည်ချက်များကို ကျမ်းစာဖြင့်ကိုးကားရှင်းပြသည့်အခါ ရုံးတော်က စူးစိုက်နားထောင်၏။ ဤကြားနာစစ်ဆေးခြင်းသည် ထိုနိုင်ငံတွင် စစ်မှန်သောဝတ်ပြုရေးအောင်ပွဲခံဖို့ မည်သို့ဖြစ်ပျက်လာခဲ့သည်ကို သိရှိနားလည်ရန် အမှု၏အခြေအနေ အဆင့်ဆင့်ကို သုံးသပ်ကြည့်ကြပါစို့။

အာမေးနီးယားပြည်သည် တူရကီနိုင်ငံ၏အရှေ့ဘက်၊ ကော့ကေးဆပ်တောင်တန်းရှည်၏ တောင်ဘက်စူးစူးတွင် တည်ရှိသည်။ ယင်း၏လူဦးရေမှာ သုံးသန်းကျော်ဖြစ်သည်။ ကမ္ဘာချီရေလွှမ်းမိုးပြီးနောက် နောဧသင်္ဘောတည်ဆိုက်ခဲ့သည်ဟု ထုံးတမ်းစဉ်လာကဆိုသည့် အာရရတ်တောင်ထိပ်နှစ်ခု၏ ရင်သပ်ရှုမောဖွယ်ရှုခင်းကို ထိုနိုင်ငံ၏မြို့တော် ယီရီဗာန်မှ မြင်တွေ့နိုင်သည်။—ကမ္ဘာဦး ၈:၄။a

ယေဟောဝါသက်သေတို့သည် ၁၉၇၅ ခုနှစ်ကတည်းက သူတို့၏ခရစ်ယာန်လုပ်ငန်းကို အာမေးနီးယားပြည်တွင် ဆောင်ရွက်ခဲ့ကြ၏။ ၁၉၉၁ ခုနှစ်တွင် အာမေးနီးယားပြည်သည် ယခင် ဆိုဗီယက်ပြည်ထောင်စုမှ လွတ်လပ်ရေးရပြီးနောက် ဝတ်ပြုရေးအဖွဲ့အစည်းများကို မှတ်ပုံတင်ရန် သာသနာရေးရာကောင်စီအဖွဲ့ကို စီမံဖွဲ့စည်းခဲ့သည်။ သို့သော် အဓိကအားဖြင့် ခရစ်ယာန်ကြားနေမှုကြောင့် ဤကောင်စီသည် ယေဟောဝါသက်သေများကို ထပ်ခါတလဲလဲပင် မှတ်ပုံတင်ခွင့်မပေးခဲ့ချေ။ သို့ဖြစ်၍ ၁၉၉၁ ခုနှစ်ကတည်းက အာမေးနီးယားရှိ သက်သေခံလူငယ် ၁၀၀ ကျော်သည် သူတို့၏ သမ္မာကျမ်းစာပေါ်အခြေပြုသည့် စစ်မှုမထမ်းခြင်းကိစ္စကြောင့် ပြစ်မှုကျူးလွန်သည်ဟု စီရင်ခံရပြီး အတော်များများ အကျဉ်းချခံခဲ့ရသည်။

ထိုကောင်စီအဖွဲ့က အစိုးရအမှုလိုက်ရှေ့နေရုံးကို ခရစ်ယာန်အကြီးအကဲတစ်ဦးဖြစ်သည့်အပြင် ဒေသခံအဏုမြူဓာတ်အားပေးစက်ရုံ၏ လုံ့လဝီရိယရှိ ရှေ့နေလည်းဖြစ်သူ လိုက်အိုဗာ မာဂါရန်အား စုံစမ်းထောက်လှမ်းရန် စေခိုင်းခဲ့သည်။ နောက်ဆုံး စည်းမျဉ်း ၂၄၄ နှင့် ညီအစ်ကိုမာဂါရန်ကို စွဲချက်တင်ခဲ့သည်၊ ထိုစည်းမျဉ်းသည် ခရုရှက်ခေတ် ဆိုဗီယက်ဥပဒေမှ အကြွင်းအကျန်ဖြစ်ပြီး ယေဟောဝါသက်သေများနှင့် အခြားဝတ်ပြုရေးအုပ်စုများကို ဖယ်ရှားပစ်ရန် ချမှတ်ထားခြင်းဖြစ်၏။

ထိုဥပဒေအရ ဝတ်ပြုရေးယုံကြည်ချက်များ ဟောပြောခြင်းအသွင်ဖြင့် ဝတ်ပြုရေးအုပ်စုဖွဲ့ခြင်း၊ သို့မဟုတ် ဦးစီးခြင်း၊ ‘မှတ်ပုံမတင်ထားသောဝတ်ပြုရေးအဖွဲ့တစ်ခု၏ အစည်းအဝေးများကိုတက်ရန် လူငယ်တို့ကို သွေးဆောင်ခြင်း’၊ နှင့် ‘အဖွဲ့ဝင်များအား နိုင်ငံ့တာဝန်တို့ကို မထမ်းဆောင်ဖို့ ဩဇာလွှမ်းမိုးခြင်း’ တို့သည် ရာဇဝတ်မှုဖြစ်သည်ဟုဆိုသည်။ သူ၏စွပ်စွဲချက်ကို ထောက်ခံရန် တရားလိုရှေ့နေက မိစာမောမြို့တွင် ညီအစ်ကိုမာဂါရန်ကြီးမှူးသော အစည်းအဝေးများ၌ ကလေးငယ်တို့ပါ တက်ရောက်ကြောင်း အဓိကဖော်ပြသည်။ ထို့ပြင် တရားလိုရှေ့နေက ညီအစ်ကိုမာဂါရန်သည် အသင်းတော်၏အဖွဲ့ဝင်လူငယ်များကို စစ်မှုမထမ်းဖို့ အကျပ်ကိုင်သည်ဟု စွပ်စွဲသေး၏။

စတင် တရားဆိုင်ခြင်း

၂၀၀၁ ခုနှစ်၊ ဇူလိုင်လ ၂၀ ရက်နေ့တွင် အာမာဗာခရိုင်တရားရုံး၌ တရားသူကြီး မာန်ဝဲလ် စီမိုယန် ဦးစီး၍ စတင်တရားဆိုင်ခဲ့သည်။ ၎င်းအမှုသည် ဩဂုတ်လဝက်အထိ ကြာသွား၏။ တရားရုံးတွင် ထွက်ဆိုချက်ကာလအတွင်း တရားလိုဘက်မှ သက်သေများက လုံခြုံရေးဌာန (ယခင် ကေဂျီဘီ) မှကိုယ်စားလှယ်တို့သည် ညီအစ်ကိုမာဂါရန်အား စွဲချက်တင်ရန် မည်သို့ရေးသားရမည်ကို နှုတ်တိုက်ချပေးပြီး ထိုစာတမ်းများကိုအတင်းအကျပ် လက်မှတ်ရေးထိုးစေခဲ့ကြောင်း နောက်ဆုံးဝန်ခံခဲ့ကြသည်။ ဖြစ်အင်တစ်ခုတွင် အမျိုးသမီးတစ်ဦးက လုံခြုံရေးဌာနမှ အရာရှိတစ်ဦးက သူ့ကို “ယေဟောဝါသက်သေများသည် ကျွန်မတို့၏အစိုးရနှင့် ဝတ်ပြုရေးကို ဆန့်ကျင်သည်” ဟု စွဲချက်တင်ရန် ညွှန်ကြားကြောင်း ပြောပြခဲ့သည်။ အဆိုပါအမျိုးသမီးက မိမိသည် ယေဟောဝါသက်သေတစ်ဦးကိုမျှမသိ၊ နိုင်ငံ့ရုပ်မြင်သံကြားမှသာ သူတို့အကြောင်းကြားသိခဲ့ရကြောင်း ဝန်ခံခဲ့သည်။

ညီအစ်ကိုမာဂါရန် ထွက်ဆိုဖို့အလှည့်ကျသောအခါ သူက ယေဟောဝါသက်သေတို့၏အစည်းအဝေးများကို မိဘခွင့်ပြုချက်ဖြင့် ကလေးငယ်များတက်ရောက်ကြကြောင်း တင်ပြသည်။ ထို့ပြင် စစ်မှုထမ်းခြင်းသည် ကိုယ်ပိုင်ဆုံးဖြတ်ချက်ဖြစ်ကြောင်းလည်း သူရှင်းပြခဲ့၏။ တရားလိုဘက်မှ ပြန်လှန်စစ်ဆေးမေးမြန်းခြင်းသည် ရက်အတော်အတန်ကြာခဲ့သည်။ ညီအစ်ကိုမာဂါရန်သည် မိမိ၏ယုံကြည်ချက်များနှင့် ပတ်သက်သောမေးခွန်းများကို သမ္မာကျမ်းစာအသုံးပြု၍ အေးဆေးစွာဖြေဆိုစဉ် တရားလိုရှေ့နေက သူ၏ကိုယ်ပိုင်ကျမ်းစာတွင် ကျမ်းကိုးကားချက်များကို ဆန်းစစ်ကြည့်ခဲ့သည်။

၂၀၀၁ ခုနှစ်၊ စက်တင်ဘာ ၁၈ ရက်နေ့တွင် တရားသူကြီးက ညီအစ်ကိုမာဂါရန်၏ဆောင်ရွက်မှုနှင့်ပတ်သက်၍ “ရာဇဝတ်မှုကျူးလွန်ခြင်း လုံးဝမတွေ့ရှိကြောင်း” အတည်ပြုပြောဆိုလိုက်ရာ “အပြစ်မရှိ” ဟုကြေညာခဲ့သည်။ အေပီသတင်း၌ ထိုအမှု၏သတင်းကို ဤသို့ဖော်ပြထားသည်– “အာမေးနီးယားရှိ ယေဟောဝါသက်သေခေါင်းဆောင်တစ်ဦးကို ဘာသာသွင်းခြင်းနှင့် လူငယ်တို့အား စစ်မှုထမ်းခြင်းမှရှောင်သွေရန်အတင်းပြုသည်ဟူသော စွဲချက်မှ ယနေ့ တရားသေလွှတ်လိုက်သည်။ နှစ်လကြာအမှုစစ်ဆေးပြီးနောက် အဆိုပါခေါင်းဆောင် လီဗောန် မာကရန် [လိုက်အိုဗာ မာဂါရန်] တွင် အပြစ်ရှိကြောင်း လုံလောက်သောသက်သေမရှိဟု တရားရုံးကဆုံးဖြတ်သည်။ သူသည် ငါးနှစ်အထိ အကျဉ်းကျရန် အကြောင်းရှိခဲ့၏။ . . . အာမေးနီးယားပြည်၏အခြေခံဥပဒေက ဝတ်ပြုရေးလွတ်လပ်ခွင့်ပေးထားသော်လည်း ဘာသာအသစ်များ မှတ်ပုံတင်ရန် အခက်အခဲရှိပြီး အာမေးနီးယားပြည်တွင် ကြီးစိုးနေသော ခရစ်တော်တမန်များအသင်းကိုသာ စည်းမျဉ်းများက မျက်နှာသာပေးသည်။” ၂၀၀၁ ခုနှစ် စက်တင်ဘာလ ၁၈ ရက်ထုတ် သတင်းစဉ်တွင် ဥရောပ လုံခြုံရေးနှင့် ပူးပေါင်းဆောင်ရွက်ရေးအဖွဲ့ (အိုအက်စ်စီအီး) က ဤသို့ဆိုသည်– “ဂျူရီလူကြီးတို့၏အဆုံးအဖြတ်ကို ဝမ်းမြောက်ဝမ်းသာလက်ခံပြီးဖြစ်သော်လည်း အိုအက်စ်စီအီးရုံးက အစကတည်းက ထိုပြစ်ချက်ဖြင့် တရားစွဲဆိုခဲ့ခြင်းကို ဝမ်းနည်းနေဆဲဖြစ်သည်။”

ဆက်တရားဆိုင်

သို့ဖြစ်လျက်ပင် တရားလိုများဘက်မှ အယူခံဝင်ခဲ့သဖြင့် အယူခံဝင်အမှုစစ်ဆေးခြင်းကာလမှာ နောက်ထပ်လေးလ ဆက်ကြာသွားသည်။ အဆိုပါအမှုကို စစစ်ဆေးချိန်တွင် ညီအစ်ကိုမာဂါရန် သက်သေထွက်ဆိုရန်အလှည့်ကျသောအခါ ထိုအမှုစစ်အဖွဲ့၏ တရားသူကြီးတစ်ဦးက ပထမဦးဆုံးမေးခွန်းထုတ်ခဲ့သည်။ ညီအစ်ကိုမာဂါရန်ဖြေဆိုနေစဉ် သဘာပတိက ကြားဖြတ်ပြီး သူ့ကို တိုက်ခိုက်ပြောဆိုခဲ့သည်။ ၎င်းနောက် ထိုသဘာပတိအမျိုးသမီးသည် ညီအစ်ကိုမာဂါရန်အား မေးခွန်းတစ်ခုကိုမျှ အပြီးသတ်ဖြေဆိုခွင့်မပေးခဲ့ချေ။ ၎င်းပြင် အကြောင်းပြချက်မည်မည်ရရမရှိဘဲ ညီအစ်ကိုမာဂါရန်ကို တရားပြိုင်မေးသော မေးခွန်းအများစုကို အမှုတွဲမှ ပလပ်ပစ်လိုက်၏။ အမှုစစ်ဆေးနေစဉ် တရားရုံးတွင်ပြည့်နေသော သက်သေခံများကိုအတိုက်အခံပြုသည့် ဝတ်ပြုရေးအယူသီးသူတို့က ညီအစ်ကိုမာဂါရန်အား ထပ်ခါတလဲလဲ ဆဲရေးတိုင်းထွာခဲ့ကြသည်။ ထိုအကြိမ်ရုံးထိုင်ပြီးနောက် ရုပ်မြင်သံကြားမှ လိမ်လည်ပြောဆိုမှုနှင့် လိုရာဆွဲ၍ မမှန်မကန်ပြောဆိုချက်များကို ထုတ်လွှင့်ပြသ၏၊ ဥပမာအနေဖြင့် ညီအစ်ကိုမာဂါရန်သည် အပြစ်ရှိကြောင်း အမှန်ပင်ဝန်ခံခဲ့သည်ဟု ဆိုသည်။

အမှုစစ်ဆေးချိန်အလယ်လောက်တွင် သုံးပွင့်ဆိုင်တရားသူကြီးအဖွဲ့၏သဘာပတိက ညီအစ်ကိုမာဂါရန်ကို အရေးယူဖို့ သာသနာရေးရာကောင်စီက အမှုလိုက်ရှေ့နေရုံးအား စေခိုင်းသည့်စာကို ဖတ်ပြလိုက်သောအခါ တရားရုံးတွင်ရှိသူများ အံ့အားသင့်သွားကြသည်။ ဥရောပကောင်စီ၌အသင်းဝင်ရန် အာမေးနီးယားပြည်၏လျှောက်လွှာတွင် ၎င်းအသိအမှတ်ပြုခဲ့သည်မှာ “ချာ့ချ်အားလုံး သို့မဟုတ် ဝတ်ပြုရေးအုပ်စုအားလုံး၊ အထူးသဖြင့် ‘ထုံးတမ်းစဉ်လာအတိုင်းမဟုတ်’ ဟု ရည်ညွှန်းထားသည့်အုပ်စုများကို ခွဲခြားဆက်ဆံခြင်းမပြုဘဲ သူတို့၏ဝတ်ပြုရေးကို ကျင့်သုံးစေမည်” ဟူ၍ဖြစ်ရာ ထိုတရားဆိုင်ခြင်းသို့ နိုင်ငံအသီးသီးမှရောက်ရှိ၍ လေ့လာသူတို့က ထိုစာကြောင့် စိတ်ချောက်ချားသွားကြ၏။

အမှုဆက်စဉ်ကာလ နောက်ရက်သတ္တပတ်များအတွင်း အဆိုပါတရားဆိုင်မှုအခြေအနေမှာ သာ၍တင်းမာလာလေသည်။ အတိုက်အခံပြုသူတို့က တရားရုံးအတွင်း၊ အပြင်တွင် သက်သေခံတို့ကို ဆက်လက်နှောင့်ယှက်တိုက်ခိုက်ကြသည်။ သက်သေခံအမျိုးသမီးများ၏ ညို့သကျည်းကို ခြေဖြင့်ကန်ကြသည်။ သက်သေခံတစ်ဦးသည် လက်ရောက်ကျူးလွန်ခံခဲ့ရသော်လည်း လက်တုံ့မပြန်သောအခါ သူ့ကိုနောက်ဘက်မှ ကန်လိုက်ရာ ကျောရိုးထိခိုက်သွားသဖြင့် ဆေးရုံတင်ခဲ့ရ၏။

ဤအတောအတွင်း အဆိုပါအမှုကိုကိုင်တွယ်ရန် တရားသူကြီးချုပ်အသစ်တစ်ဦးကို ခန့်အပ်လိုက်သည်။ တရားရုံးတွင်ရှိ ပရိသတ်ထဲမှအချို့က တရားပြိုင်ရှေ့နေကို ခြိမ်းခြောက်ရန်ကြိုးစားခဲ့ကြသည့်ကြားမှ ဤတရားသူကြီးချုပ်အသစ်သည် စည်းကမ်းဆက်ထိန်းချုပ်နိုင်ခဲ့၏၊ တရားပြိုင်ရှေ့နေကို အော်ဟစ်ခြိမ်းခြောက်နေသည့် အမျိုးသမီးတစ်ဦးကိုပင် တရားရုံးထဲမှ ရဲတို့ကိုခေါ်ထုတ်သွားစေခဲ့၏။

အာမေးနီးယားတရားရုံးချုပ်သို့ရောက်

နောက်ဆုံး ၂၀၀၂ ခုနှစ်၊ မတ်လ ၇ ရက်နေ့တွင် အယူခံတရားရုံးသည် အမှုစစ်ဆေးသောတရားရုံး၏ဆုံးဖြတ်ချက်ကို ထောက်ခံသည်။ ထူးဆန်းသည်ကား ဤဆုံးဖြတ်ချက်ကို မကြေညာမီ တစ်ရက်အလိုတွင် သာသနာရေးရာကောင်စီအဖွဲ့ကို ဖျက်သိမ်းလိုက်သည်။ အမှုစွဲဆိုသူ၏ တရားလိုရှေ့နေကထပ်မံ၍ အဆိုပါဆုံးဖြတ်ချက်ကို အယူခံဝင်ရာ ဤတစ်ကြိမ်တွင် အာမေးနီးယားတရားရုံးချုပ်ဖြစ်သည့် ကက်စေရှန်တရားရုံးသို့ ရောက်သွားသည်။ ယခု တရားလိုရှေ့နေများက “အပြစ်ရှိကြောင်းစီရင်ချက်ထုတ်ဆင့်” ရန် အမှုကိုပြန်စစ်ပေးဖို့ တောင်းဆိုပြန်သည်။

တရားသူကြီး မဟာ ကချာထရိုက်ယန် သဘာပတိအဖြစ်ကြီးမှူးသော အဖွဲ့ဝင်ခြောက်ဦးပါဝင်သည့် တရားသူကြီးတို့သည် ၂၀၀၂ ခုနှစ်၊ ဧပြီလ ၁၉ ရက်နေ့ နေ့လယ် ၁၁:၀၀ နာရီတွင် စုရုံးခဲ့ကြသည်။ သူ၏အဖွင့်စကား၌ တရားလိုရှေ့နေများမှတစ်ဦးက ယခင်တရားရုံးနှစ်ခုသည် ညီအစ်ကိုမာဂါရန်အား အပြစ်ရှိသည်ဟုမစီရင်ခဲ့ခြင်းကို အလွန်အမင်းစိတ်ဆိုးကြောင်း ဖော်ပြသည်။ သို့သော် ဤတစ်ကြိမ်တွင် ထိုတရားလိုရှေ့နေကို တရားသူကြီးတို့မှလေးဦးက ကြားဖြတ်ပြီး အတိအလင်းစစ်ဆေးမေးမြန်းသည်။ ညီအစ်ကိုမာဂါရန်အား စွဲချက်တင်ရာတွင် စည်းမျဉ်း ၂၄၄ ၌ ရာဇဝတ်မှုအဖြစ် သတ်မှတ်ထားခြင်းမရှိသော ယေဟောဝါသက်သေများ ဟောပြောခြင်းလုပ်ငန်းနှင့် သူတို့၏မှတ်ပုံမတင်ထားသည့် အခြေအနေကိုဖော်ပြပြီး တရားရုံးကို ဘက်လိုက်စေရန် အားထုတ်ခဲ့ခြင်းအတွက် တရားသူကြီးတစ်ဦးက တရားလိုရှေ့နေကို ပြစ်တင်ပြောဆိုခဲ့သည်။ ထို့နောက် အဆိုပါတရားသူကြီးက တရားလိုရှေ့နေ၏လုပ်ရပ်မှာ “ရာဇဝတ်မှုပြုသည်ဟု စွပ်စွဲ၍ နှိပ်စက်ညှဉ်းပန်းခြင်း” ဖြစ်သည်ဟု ဖော်ပြခဲ့၏။ အခြားတရားသူကြီးတစ်ဦးက ယေဟောဝါသက်သေများသည် လူ့အခွင့်အရေးများဆိုင်ရာ ဥရောပညီလာခံ၏ကာကွယ်မှုရထိုက်သည့် “လူသိများသောဘာသာ” တစ်ခုအဖြစ် အသိအမှတ်ပြုခြင်းခံရကြောင်း ဥရောပတရားရုံး အမှုအသီးသီးကို တင်ပြပေးခဲ့သည်။ ဤသို့ပြောဆိုတင်ပြနေစဉ် တရားရုံးရှိ ခရစ်ယာန်ဘုန်းကြီးတစ်ဦးက ယေဟောဝါသက်သေတို့သည် နိုင်ငံကို စိတ်ဝမ်းကွဲစေသူတို့ဖြစ်၏ဟု အော်ဟစ်ပြောဆိုခဲ့သည်။ ထိုအခါ တရားရုံးက သူ့ကို တိတ်ဆိတ်စွာနေရန် အမိန့်ပေးခဲ့၏။

ထို့နောက် တရားသူကြီးများသည် ဤအထက်တရားရုံးတွင် အစဉ်အလာမရှိသည့်အမှု၊ လိုက်အိုဗာ မာဂါရန်ကို ပရိသတ်ရှေ့မှောက်ထွက်လာခဲ့ရန် ဆင့်ခေါ်လေသည်။ ထိုအခါ ညီအစ်ကိုမာဂါရန်သည် ယေဟောဝါသက်သေတို့၏ကိစ္စအသီးသီး၌ ခရစ်ယာန်ရပ်တည်ချက်အကြောင်း ကောင်းစွာသက်သေထွက်ဆိုခဲ့သည်။ (မာကု ၁၃:၉) အချိန်တိုအတွင်း အပြန်ပြန်အလှန်လှန်စိစစ်ပြီးနောက် ထိုတရားရုံးက “အပြစ်မရှိ” ဟုတညီတညွတ်တည်း အတည်ပြုဆုံးဖြတ်ချက်ချပြန်သည်။ ညီအစ်ကိုမာဂါရန်သည် အထင်အရှားပင် စိတ်ချမ်းသာသွားလေသည်။ တရားရုံး၏အဖြေလွှာတွင် ၎င်း၏ဆုံးဖြတ်ချက်ကို ဤသို့ဆင့်ဆိုသည်– “[လိုက်အိုဗာမာဂါရန်၏] ဤဆောင်ရွက်မှုသည် တည်ဆဲဥပဒေအရ ရာဇဝတ်မှုတစ်ခုဟု သတ်မှတ်၍မရချေ၊ ဤစွဲချက်မျိုးသည် အာမေးနီးယားအခြေခံဥပဒေ၏ စည်းမျဉ်း ၂၃ အပြင် ဥရောပညီလာခံ၏စည်းမျဉ်း ၉ တို့နှင့် ဆန့်ကျင်ဖီလာနေသည်။”

ထိုဆုံးဖြတ်ချက်၏အကျိုးဆက်များ

တရားလိုဘက်ကသာ အနိုင်ရခဲ့လျှင် အာမေးနီးယားတစ်နိုင်ငံလုံးရှိ အသင်းတော်များမှ အခြားသက်သေခံအကြီးအကဲတို့ကိုပါ တရားစွဲဆိုရန် လမ်းပွင့်သွားပေလိမ့်မည်။ ဤတရားရုံးမှ အတိအလင်းချမှတ်သည့်ဆုံးဖြတ်ချက်သည် နောက်တစ်ဖန် နှောင့်ယှက်ဟန့်တားခြင်းရှိစေတော့မည်မဟုတ်ဟု မျှော်လင့်စရာအကြောင်းရှိသည်။ ထိုအမှုကိုရှုံးခဲ့လျှင် ယေဟောဝါသက်သေများအား မှတ်ပုံတင်ခွင့်မပေးဖို့ အကြောင်းပြချက်တစ်ခု ဖြစ်လာနိုင်သည်။ သို့သော် ဤတရားရုံးသည် မခိုင်လုံသောအကြောင်းပြချက်ကို ယခု ဖယ်ရှားပစ်လိုက်သည့်အတွက် ကျေးဇူးတင်စရာပင်။

ဤနိုင်ငံတွင်ရှိသော ယေဟောဝါသက်သေ ၇,၀၀၀ ကျော်အား မှတ်ပုံတင်ခွင့် ပေးမပေးကို စောင့်ကြည့်ရပေမည်။ ဤအတောအတွင်း စစ်မှန်သောဝတ်ပြုရေးသည် “အာရာရတ်ပြည်” တွင် ဆက်လက်တိုးတက်အောင်မြင်ဆဲရှိသည်။

[အောက်ခြေမှတ်ချက်]

[စာမျက်နှာ ၁၂ ပါ ရုပ်ပုံ]

လိုက်အိုဗာမာဂါရန် အမှုစစ်ခံနေရချိန်

[စာမျက်နှာ ၁၃ ပါ ရုပ်ပုံ]

ညီအစ်ကိုမာဂါရန်နှင့် သူ၏မိသားစု