¿Á kivi chindeétáʼan Biblia xíʼinyó tá ndákava-iniyó?
Ña̱ káʼa̱n Biblia xa̱ʼa̱ ña̱yóʼo
Kiviva chindeétáʼanña xíʼinyó. Saáchi iinlá Ndióxi̱ kúú ta̱ kivi sandíko-ini “na̱ ndákava-ini” (2 Corintios 7:6).
¿Ndáa ki̱ʼva chíndeétáʼan Ndióxi̱ xíʼin na̱ ndákava-ini?
Táxira ndee̱ ndaʼa̱na. ¿Ndáa ki̱ʼva ndásandakú Ndióxi̱ ini na̱ ndákava-ini? Sana va̱ása sakútaʼavíra ndiʼi tu̱ndóʼo ña̱ yáʼana nu̱ú, soo kiviva taxira ndee̱ ndaʼa̱na ña̱ kundeé-inina ya̱ʼana nu̱ú ña̱yóʼo (Filipenses 4:13). Ta kǒo kaka-iniún chi xíniso̱ʼova Ndióxi̱ ña̱ káʼún xíʼinra, mií Biblia káʼa̱n ña̱yóʼo: “Jehová íyo yatinra nu̱ú na̱ xóʼvi̱; ta sáka̱kura na̱ ndákavaní-ini” (Salmo 34:18). Ndióxi̱ xíniso̱ʼovara ña̱ xákundáʼviún nu̱úra ña̱ chindeétáʼanra xíʼún, ni sava yichi̱ kǒo kúnda̱a̱-iniún ndáaña ka̱ʼún xíʼinra (Romanos 8:26, 27).
Ña̱ ndo̱ʼo sava na̱ káʼa̱n Biblia xa̱ʼa̱. Iin ta̱ ka̱ʼyi Salmos ni̱ka̱ʼa̱nra xíʼin Ndióxi̱ xa̱ʼa̱ ña̱ xi̱sandíʼi̱-inira, ka̱chira: “Kánai̱ yóʼó tá ndíʼi̱ní-inii̱”. ¿Ndáaña chi̱ndeétáʼan xíʼinra ña̱ va̱ása ndakavaka-inira? Ña̱ chi̱ndeétáʼan xíʼinra kúú ña̱ nda̱kaʼánra ña̱ kǒo kúni̱ Ndióxi̱ ña̱ ná xo̱ʼvi̱yó ndiʼi tiempo xa̱ʼa̱ ña̱ va̱ása va̱ʼa ke̱ʼéyó. Ta̱ ka̱ʼyi Salmo yóʼo ni̱ka̱ʼa̱nkara: “Tá ná kaʼyiún ndiʼi ña̱ va̱ása va̱ʼa kéʼéndi̱, kǒoví na̱ kuchiñu ka̱ku nu̱ú castigo chi ña̱ ndakiʼinna kúúvaña [...]. Saáchi yóʼó kúú ta̱ ndixa íxakáʼnu-ini xa̱ʼa̱ ku̱a̱chi na̱ yiví tasaá ixato̱ʼóna yóʼó” (Salmo 130:1, 3, 4).
Ña̱ keʼé Ndióxi̱ xa̱ʼa̱yó chí nu̱únínu. Tiempo vitin sándi̱kova Ndióxi̱ iniyó, soo saátu káʼa̱nra ña̱ sandíʼi-xa̱ʼa̱ra ndiʼi ña̱ sáxo̱ʼvi̱ miíyó xíʼin ña̱ sándakava-iniyó. Tá ná keʼéra ña̱yóʼo, va̱ása ndakaʼánkayó xa̱ʼa̱ ña̱ ku̱u xi̱naʼá [tá kúú ña̱ sándakava-iniyó] ta ni va̱ása ndakanika-iniyó xa̱ʼa̱ ña̱ ndo̱ʼoyó (Isaías 65:17).
Nota: Ndi̱ʼi̱ na̱ testigo Jehová kándíxavandi̱ ña̱ chindeétáʼan Jehová xíʼinndi̱ tá yáʼandi̱ nu̱ú tu̱ndóʼo, soo saátu xáʼa̱nndi̱ nu̱ú na̱ doctor ña̱ va̱ʼa taxina ta̱tán ndaʼa̱ndi̱ tá kúúmiíndi̱ iin kue̱ʼe̱ ña̱ ndeéka, tá kúú ña̱ naní depresión (Marcos 2:17). Va̱ása káʼa̱nndi̱ xíʼin na̱ yiví ndáa ta̱tán kúú ña̱ xíniñúʼu koʼona, chi iin tá iinna xíniñúʼu ndaka̱xinna ndáaña keʼéna tá kúúmiína iin kue̱ʼe̱.