¿Á kivi chindeétáʼan Biblia xíʼinyó tá kúma̱ní xu̱ʼún nu̱úyó?

Ña̱ káʼa̱n Biblia xa̱ʼa̱ ña̱yóʼo

Kiviva. Yóʼo va̱xi ku̱mí consejo ña̱ kivi chindeétáʼan xíʼún tá níkáún xu̱ʼún á tá kúma̱níña nu̱ún.

1. Vií kuniñúʼún xu̱ʼún. “Mií ña̱ ndixa, na̱ va̱ʼaní káchíñu viíní kana ña̱ kúni̱na keʼéna; soo na̱ kamaní kúni̱ keʼé iin ña̱ʼa ndundáʼvina” (Proverbios 21:5). Kǒo kueún iin ña̱ʼa á sa̱táúnña xa̱ʼa̱ ña̱ sa̱núu kuitína ya̱ʼviña. Tavá ki̱ʼva nda̱saa xu̱ʼún kuniñúʼún ta nda̱saa ña̱kán kuití tiún.

2. Kǒo kuníkáún. “Na̱ ndúkútóo ña̱ʼa nu̱ú inkana nda̱a̱ táki̱ʼva íyo na̱ káchíñundáʼvi nu̱ú na̱kán saá íyona” (Proverbios 22:7). Tá xa̱a̱ ndu̱kútóún xu̱ʼún ta kǒo kívi chaʼviúnña, ka̱ʼa̱n xíʼin na̱ ta̱xitóo xu̱ʼún ndaʼún ndáaña kivi keʼún ña̱ va̱ʼa chaʼviún nu̱úna. Tá kúú, ka̱ʼa̱n xíʼinna á kivi taxiún inka ña̱ʼa ndaʼa̱na nu̱úka ña̱ taxiún xu̱ʼún ndaʼa̱na. Koto ndáaña káʼa̱n Biblia xíʼin na̱ kǒo níndakani vií xi̱ní tá ndu̱kúna xu̱ʼún ta kǒo kívi chaʼvinaña: “Kama ku̱ʼún nu̱úna ta kuakundáʼviún nu̱úna ña̱ ná ixakáʼnu-inina xa̱ʼún. Va̱ása ku̱su̱ún ta ni kǒo taxiún ndasi nduchúnu̱ún” (Proverbios 6:1-5). Tá kǒo xíínna kiʼinna ña̱ʼa ndaʼún chi xu̱ʼún kúni̱na, kǒo ndakava-iniún. Ndukú ki̱ʼva ña̱ chaʼviún nu̱úna.

3. Kǒo kundi̱ʼi̱ní-iniún xa̱ʼa̱ xu̱ʼún. “Na̱ kúini̱-ini kúni̱nína ndukúikána, soo va̱ása kúnda̱a̱-inina ña̱ ndundáʼvina” (Proverbios 28:22). Na̱ i̱ni̱ xíʼin na̱ kútóo kuumií ku̱a̱ʼání ña̱ʼa xáa̱na kúndáʼvina ta saátu kúxíkána nu̱ú Ndióxi̱.

4. Kusi̱í-ini xíʼin ña̱ kúúmiíún. “Ña̱kán, nani íyo loʼo ña̱ kuxuyó xíʼin ti̱ko̱to̱yó ña̱ kundixiyó ná kusi̱í-iniyó xíʼin ña̱yóʼo” (1 Timoteo 6:8). Ni íyo ku̱a̱ʼá xu̱ʼún nu̱ú iin na̱ yiví ña̱yóʼo kǒo kúni̱ kachiña ña̱ íyo si̱í-inina, saáchi sava na̱ yiví ni kǒo xu̱ʼúnna si̱íní íyona saáchi kúʼvi̱-ini na̱ veʼena xínina miína xíʼin na̱ migona ta saátu va̱ʼa kítáʼanna xíʼin Ndióxi̱ (Proverbios 15:17; 1 Pedro 5:6, 7).