Koto káxi “nu̱ú ña̱ʼa ña̱ va̱ása túvi íyo”

1, 2. Na̱ cristiano na̱ ni̱xi̱yo tá siglo nu̱ú, ¿nda̱chun xi̱niñúʼu kandíxana ña̱ʼa ña̱ ta̱ʼán kotona? (2 Corintios 4:18).

TA̱ APÓSTOL Pablo ni̱ka̱ʼa̱nra xíʼin na̱ cristiano na̱ ni̱xi̱yo tá siglo nu̱ú ña̱ keʼéna iin ña̱ʼa ña̱ kivi ixayo̱ʼvi̱ xíʼinna, ña̱ kandíxana iin ña̱ʼa ña̱ ta̱ʼán kunina (kaʼvi 2 Corintios 4:18). ¿Ndáaña xi̱kuni̱ra ka̱ʼa̱nra xíʼinna?

² Na̱ cristiano kán ku̱a̱ʼání nu̱ú tu̱ndóʼo ni̱ya̱ʼana nu̱ú. Ta̱ Pablo ni̱ka̱ʼa̱nra ña̱ va̱ása níxi̱kunda̱a̱-inina ndáaña keʼéna, saáchi xi̱ ixandi̱va̱ʼana xíʼinna ta xi̱ndiku̱nna sa̱tána (2 Cor. 4:8, 9). Xa̱ʼa̱ ña̱kán ni̱ka̱ʼa̱nra xíʼinna ña̱ ná kotona ña̱ʼa ña̱ va̱ása túvi íyo, ña̱yóʼo kúú ña̱ va̱ʼa ndakiʼinna chí nu̱únínu ta su̱ví ña̱ʼa ña̱ xítona, ta ña̱yóʼo kúú tu̱ndóʼo ña̱ xi̱kuumiína. Tá ná kuniso̱ʼona consejo yóʼo ndakiʼinna u̱vi̱ ña̱ va̱ʼa, ña̱ nu̱ú kundeé-inina ya̱ʼana nu̱ú tu̱ndóʼo, ña̱ u̱vi̱ tá ná keʼéna ña̱ va̱ʼa na̱ʼa̱na ña̱ kándíxana ña̱ ni̱ka̱ʼa̱n Jehová kuu (Heb. 11:1).

3. ¿Nda̱chun ndáyáʼviní ndakanixi̱níyó xa̱ʼa̱ ñuyǐví xa̱á?

³ Tiempo vitin ndóʼoyó nda̱a̱ táki̱ʼva ndo̱ʼo na̱ cristiano na̱ ni̱xi̱yo tá siglo nu̱ú saáchi ndiʼi tiempo yáʼayó nu̱ú tu̱ndóʼo, ta kivi kixáʼayó ndakanixi̱níyó xa̱ʼa̱ tu̱ndóʼo ña̱ yáʼayó nu̱ú. Xa̱ʼa̱ ña̱kán ndáyáʼviní ndakanixi̱níyó xa̱ʼa̱ ña̱ʼa ña̱ kǒo xítoyó tiempo vitin, ña̱yóʼo kúú ñuyǐví xa̱á ña̱ ni̱ka̱ʼa̱n Jehová taxira ndaʼa̱yó (Sal. 37:10, 11). Ni ndeéní xóʼvi̱yó ña̱yóʼo chindeétáʼan xíʼinyó ña̱ ndakaʼányó ña̱ loʼova tiempo xo̱ʼvi̱yó (2 Cor. 4:17).

4. ¿Ndáa ejemplo chíndeétáʼan xíʼinyó ña̱ vií koo ña̱ ndaka̱xinyó keʼéyó?

⁴ Ña̱ ndakanixi̱níyó ña̱ kutakuyó ndiʼi tiempo chindeétáʼanña xíʼinyó ña̱ ya̱ʼayó nu̱ú tu̱ndóʼo ta saátu chindeétáʼanña xíʼinyó ña̱ vií koo ña̱ ndaka̱xinyó keʼéyó vitin (Jud. 21). Ná ka̱ʼa̱nyó xa̱ʼa̱ iin ejemplo. Iin ñá ñúʼu se̱ʼe ndákanixi̱níñá xa̱ʼa̱ ña̱ loʼo se̱ʼeñá ndiʼi ki̱vi̱, ña̱ viíní ná kakuña ta kusi̱í-iniñá kooña xíʼinñá. Soo kǒo ndákani kuití xi̱níñá xa̱ʼa̱ ña̱ loʼo yóʼo chi kéʼéñá inkaka ña̱ʼa, viíní ndáañá miíñá ña̱ va̱ʼa kǒo kani kue̱ʼe̱ se̱ʼeñá. Saátu kivi keʼé miíyó kǒo xíniñúʼu ndakani kuití xi̱níyó xa̱ʼa̱ ña̱ kooyó ñuyǐví xa̱á chi xíniñúʼu keʼéyó inkaka ña̱ʼa. Tá kándíxayó ña̱ ni̱ka̱ʼa̱n Jehová keʼéra chí nu̱únínu vií koo ña̱ nda̱kaxinyó keʼéyó tiempo vitin. Nu̱ú artículo yóʼo ka̱ʼa̱nyó xa̱ʼa̱ sava na̱ xi̱ndasakáʼnu Ndióxi̱ tiempo xi̱naʼá, xa̱ʼa̱ ña̱ xi̱ndatuna ña̱ ni̱ka̱ʼa̱n Jehová keʼéra vií ni̱xi̱yo ña̱ nda̱kaxinna keʼéna. Saátu kunda̱a̱-iniyó ña̱ kandíxayó Ndióxi̱ chindeétáʼanña xíʼinyó kundeé-iniyó ya̱ʼayó nu̱ú tu̱ndóʼo ta vií koo ña̱ ndaka̱xinyó keʼéyó.

TA̱ ABRAHÁN XI̱NISO̱ʼORA NDIÓXI̱ CHI VA̱ʼANÍ KA̱NDÍXARARA

5, 6. a) ¿Ndáaña ni̱ka̱ʼa̱n Jehová xíʼin ta̱ Abrahán? b) ¿Ndáa ki̱ʼva ni̱na̱ʼa̱ ta̱ Abrahán xíʼin ñá Sara ña̱ xi̱kandíxana Ndióxi̱? (Génesis 17:1, 2, 6; koto na̱ʼná).

⁵ Jehová ni̱ka̱ʼa̱nra xíʼin ta̱ Abrahán ña̱yóʼo: “Taxii̱ bendición ndaʼún ta chindeétáʼi̱n xíʼin na̱ se̱ʼún ña̱ va̱ʼa xa̱a̱na nduuna iin ñuu káʼnuní” (Gén. 12:2). Ta̱ Abrahán xíʼin ñá Sara xa̱a̱ chéevana ta kǒo se̱ʼena níxi̱yo, soo va̱ʼaní xi̱kandíxana Ndióxi̱ ña̱ saxínura ña̱ ni̱ka̱ʼa̱nra xíʼinna, ta ni̱na̱ʼa̱naña xíʼin ña̱ ke̱ʼéna tá ni̱ka̱ʼa̱n Ndióxi̱ xíʼinna: “Sandákoo ñuún, na̱ táʼún [...] ta ka̱ʼi̱n xíʼún ndáa ñuu kúú ña̱ xíniñúʼu ku̱ʼún” (Gén. 12:1).

⁶ Ta̱ Abrahán xíʼin ñá Sara sa̱ndákoona veʼena chí ñuu Ur nu̱ú va̱ʼaní xi̱ndoona ta ni̱xa̱ʼa̱nna inka lugar ta xi̱ndoona veʼe válí (Heb. 11:8, 9). ¿Nda̱chun kúú ña̱ sa̱ndákoona ñuuna? Saáchi nda̱kanixi̱nína xa̱ʼa̱ ña̱ʼa ña̱ ta̱ʼán kunina, tá kúú ña̱ koo iin se̱ʼena ta ti̱xin veʼe ta̱yóʼo kana iin ñuu káʼnu (kaʼvi Génesis 17:1, 2, 6; Heb. 11:11). Xi̱kandíxana ña̱ ni̱ka̱ʼa̱n Jehová taxira ndaʼa̱na chí nu̱únínu. Ta xi̱xitona ña̱yóʼo nda̱a̱ táki̱ʼva xi̱xitona ña̱ʼa ña̱ xi̱xitona ñuu Ur. Tá ni̱ya̱ʼa ku̱a̱ʼá ku̱i̱ya̱ ka̱ku se̱ʼena ta̱ Isaac, tasaá ki̱xáʼa Jehová sáxi̱nura ña̱ ni̱ka̱ʼa̱nra xíʼina.

7, 8. ¿Nda̱chun ka̱ndíxa ta̱ Abrahán so̱kóra se̱ʼera ta̱ Isaac?

⁷ Tá ni̱ya̱ʼa ku̱a̱ʼá ku̱i̱ya̱ Jehová ni̱ka̱ʼa̱nra xíʼin ta̱ Abrahán ña̱ ná so̱kóra se̱ʼera, ta tiempo saá 25 ku̱i̱ya̱ xi̱kuumií ta̱ Isaac. ¿Nda̱chun chi̱kaa̱-ini ta̱ Abrahán keʼéra ña̱yóʼo? Saáchi xi̱ndakanixi̱níra xa̱ʼa̱ ña̱ʼa ña̱ ta̱ʼán kotora ta xi̱ndaa-inira xi̱nu ña̱ ni̱ka̱ʼa̱n Jehová xíʼinra. Ña̱yóʼo kúú ña̱ ni̱ka̱ʼa̱nra xíʼin ta̱ Abrahán: “Saáchi ti̱xin na̱ veʼe ta̱ Isaac kúú ña̱ kixi na̱ koo se̱ʼún” (Gén. 21:12). Tiempo saá kǒo se̱ʼe ta̱ Isaac níxi̱yo soo ta̱ Abrahán kǒo níxi̱ka-inira ña̱ sandátakuva Jehová se̱ʼera ni ná kuvira (Heb. 11:19). Ta̱ Abrahán kǒo níxi̱ka-inira ña̱ sandátakuva Jehová se̱ʼera, ta ndákanda̱ní-iniyó xíʼin ña̱yóʼo chi tiempo saá ta̱ʼán ndataku nda̱a̱ ni iinna, soo ta̱yóʼo va̱ʼaní xi̱kandíxara Ndióxi̱ ta túvira ña̱ xi̱xitora na̱ va̱lí se̱ʼe ta̱ Isaac.

⁸ Tá si̱lóʼo kúma̱ní so̱kó ta̱ Abrahán se̱ʼera, ni̱ka̱ʼa̱n Jehová xíʼinra ña̱ ná kǒo kaʼnírara (Gén. 22:11, 12). Soo Biblia káʼa̱nña, táki̱ʼva íyo ta̱ xa̱a̱ ni̱so̱kóra nu̱ú Jehová saá ni̱xi̱yora (Heb. 11:17, 18). Xíʼin ña̱ ke̱ʼé ta̱ Abrahán ni̱na̱ʼa̱ra ña̱ xi̱kandíxaníra ña̱ ni̱ka̱ʼa̱n Ndióxi̱ xíʼinra.

VA̱ʼA NI̱XI̱YO ÑA̱ KE̱ʼÉ TA̱ MOISÉS CHI KA̱NDÍXANÍRA NDIÓXI̱

9. a) ¿Ndáa ki̱ʼva ni̱xi̱yo na̱ israelita tá ni̱xi̱yo loʼo ta̱ Moisés? b) Ta, ¿ndáa ki̱ʼva ni̱xi̱yo ta̱ Moisés?

⁹ Sana na̱ yivá ta̱ Moisés ni̱ka̱ʼa̱nna xíʼinra xa̱ʼa̱ ña̱ ni̱ka̱ʼa̱n Jehová xíʼi ta̱ Abrahán. Iin ña̱ ni̱ka̱ʼa̱nra xíʼinra kúú ña̱ taxina ñuʼú ña̱ Canaán ndaʼa̱na ndiʼi tiempo (Gén. 13:15). Ta, ¿ndáa ki̱ʼva xi̱nu ña̱yóʼo? Saáchi tiempo saá esclavo ni̱xi̱yo na̱ israelita ñuu Egipto. Soo ta̱ Moisés ti̱xin veʼe ta̱ faraón xa̱ʼnura chi ñá se̱ʼe ta̱yóʼo sa̱kúaʼnu miíra ta “sa̱kuaʼara ndiʼi ña̱ ndíchi ña̱ xi̱sanáʼa̱ na̱ ñuu Egipto” (Hech. 7:22). Ni va̱ʼaní ni̱xi̱yo ta̱ Moisés soo ni̱na̱ʼa̱ra ña̱ va̱ʼaní xi̱kandíxara ña̱ ni̱ka̱ʼa̱n Ndióxi̱.

10. ¿Ndáaña ke̱ʼé ta̱ Moisés tá xi̱kuumiíra 40 ku̱i̱ya̱ ta nda̱chun? (Hebreos 11:24-26; koto na̱ʼná).

¹⁰ (Kaʼvi Hebreos 11:24-26). Tá xi̱kuumií ta̱ Moisés 40 ku̱i̱ya̱ ke̱ʼéra iin ña̱ ndáyáʼviní: “Ka̱ndíxara xo̱ʼvi̱ra xíʼin na̱ ñuu Ndióxi̱”, ¿nda̱chun ke̱ʼéra saá? Biblia káʼa̱nña ña̱yóʼo: “Saáchi xi̱ndakaniníxi̱níra xa̱ʼa̱ ña̱ ndakiʼinra chí nu̱únínu”. Xi̱ndakanixi̱níra xa̱ʼa̱ ña̱ʼa ña̱ ta̱ʼán kunira, ña̱ saxínu Ndióxi̱ ña̱ ni̱ka̱ʼa̱nra xíʼin na̱ israelita ña̱ taxira ñuʼú ña̱ Canaán ndaʼa̱na. Xi̱ndayáʼvika xi̱nu ña̱ ni̱ka̱ʼa̱n Ndióxi̱ nu̱ú ta̱ Moisés nu̱úka ña̱ kuumiíra ña̱ ku̱i̱ká á ña̱ koora iin ta̱ ndáyáʼviní ñuu Egipto. Tá ni̱ya̱ʼa tiempo Jehová ni̱ka̱ʼa̱nra xíʼinra: “Yóʼó kúú ta̱ tavá na̱ ñui̱ na̱ israelita na̱ íyo chí Egipto” (Éx. 3:10).

11. Na̱ xi̱ndasakáʼnu Ndióxi̱ tiempo xi̱naʼá, ¿ndáa ki̱ʼva ni̱na̱ʼa̱na ña̱ xi̱kandíxana ña̱ ni̱ka̱ʼa̱n Ndióxi̱ xíʼinna? (Hebreos 11:39, 40).

¹¹ Biblia káʼa̱nña xa̱ʼa̱ ku̱a̱ʼání ta̱a xíʼin ná ñaʼá na̱ xi̱kandíxaní ña̱ ni̱ka̱ʼa̱n Ndióxi̱ (Heb. 11:31, 32). Nu̱ú miína ña̱ ni̱ka̱ʼa̱n Jehová xíʼinna nda̱a̱ táki̱ʼva íyo ña̱ xa̱a̱ ni̱xi̱nu saá ni̱xi̱yoña nu̱úna, soo nda̱a̱ tá ná ndatakuna nu̱ú ñuyǐví xa̱á, saá kotona ndiʼi ña̱ ni̱ka̱ʼa̱n Jehová xíʼinna keʼéra (kaʼvi Hebreos 11:39, 40). Xa̱ʼa̱ ña̱ va̱ʼaní xi̱kandíxana Ndióxi̱ vií ni̱xi̱yo ña̱ ke̱ʼéna ta chi̱ndeétáʼanna xíʼin Jehová ña̱ va̱ʼa xi̱nu ña̱ kúni̱ra keʼéra. Tá kándíxayó Ndióxi̱ nda̱a̱ táki̱ʼva ke̱ʼé na̱yóʼo kundeé-iniyó ya̱ʼayó nu̱ú tu̱ndóʼo ta vií koo ña̱ ndaka̱xinyó keʼéyó. Ná kotoyó ndáa ki̱ʼva keʼéyó ña̱yóʼo.

ÑA̱ KÁNDÍXAYÓ NDIÓXI̱ CHINDEÉTÁʼANÑA XÍʼINYÓ YA̱ʼAYÓ NU̱Ú TU̱NDÓʼO

12. Ña̱ káʼa̱n Jehová xíʼinyó, ¿ndáa ki̱ʼva chíndeétáʼanña xíʼinyó ña̱ kundeé-iniyó ya̱ʼayó nu̱ú tu̱ndóʼo?

¹² Jehová ni̱ka̱ʼa̱nra taxira iin ña̱ʼa ndaʼa̱yó ña̱ ta̱ʼán kotoyó, ña̱yóʼo kúú, ñuyǐví xa̱á nu̱ú kusi̱í-iniyó ta kutakuyó ndiʼi tiempo (2 Ped. 3:13). Tá kándíxayó ña̱yóʼo kivi kundeé-iniyó nu̱ú tu̱ndóʼo. Tá kúú ná ka̱ʼa̱nna xíʼinyó ña̱ kúúmiíyó iin kue̱ʼe̱ ndeé, sana ndakava-iniyó soo loʼo tá loʼo ndi̱kova-iniyó, ¿nda̱chun? Xa̱ʼa̱ ña̱ kándíxayó ña̱ koo iin ñuyǐví xa̱á nu̱ú va̱ása ka̱ʼa̱nkayó, kúúmiíi̱ kue̱ʼe̱ (Is. 33:24). Ná keʼéyó nda̱a̱ táki̱ʼva ke̱ʼé ta̱ Abrahán, ñá Sara, ta̱ Moisés xíʼin inkaka na̱ xi̱ndasakáʼnu Ndióxi̱ tiempo xi̱naʼá ná ndakanixi̱níyó ña̱ xa̱a̱ ni̱xi̱nu ña̱ ni̱ka̱ʼa̱n Jehová.

13. a) ¿Nda̱chun iin ña̱ va̱ʼa kúú ña̱ ndakanixi̱níyó ña̱ xa̱a̱ íyoyó nu̱ú ñuyǐví xa̱á? b) ¿Ndáaña xíniñúʼu keʼéyó ña̱ va̱ʼa kandíxakayó Ndióxi̱?

¹³ ¿Ndáaña kivi keʼún ña̱ va̱ʼa kandíxakaún ña̱ káʼa̱n Ndióxi̱? Kivi ndakanixi̱níún ña̱ xa̱a̱ ndíka̱ún ñuyǐví xa̱á. Ta saátu ndakanixi̱ní ña̱ kǒoka kue̱ʼe̱ kúúmiíún, va̱ása kooka ku̱a̱chi ta vií ndakiʼún na̱ veʼún na̱ ndataku. Kivi kuniñúʼún na̱ʼná ña̱ va̱xi nu̱ú tutu ña̱ tává na̱ ñuu Ndióxi̱ ta saátu video. Soo íyoka inka ña̱ ndáyáʼvi kivi keʼún, nu̱úka ña̱ ndakani kuití xi̱niún xa̱ʼa̱ ñuyǐví xa̱á. Xíniñúʼu chika̱ún ndee̱ ña̱ kandíxakaún ña̱ káʼa̱n Ndióxi̱, nda̱ka̱tu̱ʼun ña̱yóʼo miíún: “¿Á íyo relato á profecía ña̱ va̱xi nu̱ú Biblia chíndeétáʼan xíʼi̱n ña̱ kandíxakai̱ ña̱ káʼa̱n Ndióxi̱ keʼéra? ¿Ndáa texto kúú ña̱ chíkaa̱ ndee̱ xíʼi̱n ña̱ ndixa xi̱nu ña̱ káʼa̱n Jehová keʼéra?”. Tavá tiempo ña̱ ndakanixi̱níún xa̱ʼa̱ ña̱yóʼo, tasaá va̱ʼaka xa̱ún kandíxaún Ndióxi̱ (Heb. 6:17, 18).

TÁ KÁNDÍXAYÓ NDIÓXI̱ VIÍ ÍYO ÑA̱ NDÁKA̱XINYÓ KÉʼÉYÓ

14. Tá kándíxayó ña̱ ni̱ka̱ʼa̱n Ndióxi̱ keʼéra, ¿ndáaña kǒo xíniñúʼu kotoyó á kuniso̱ʼoyó?

¹⁴ Ña̱ ndakanixi̱níyó kooyó ñuyǐví xa̱á chindeétáʼanña xíʼiyó ña̱ vií koo ña̱ ndaka̱xinyó keʼéyó. Ndakanixi̱ní xa̱ʼa̱ ña̱ ndáka̱xiún kotoún á kuniso̱ʼún. Ku̱a̱ʼání película, yaa xíʼin ña̱ kána nu̱ú tele yáʼa na̱ xáʼní táʼanna, nu̱ú kísi̱ xíʼin táʼanna á ña̱ ta̱sí, nu̱ú ñuyǐví xa̱á va̱ása kooka ña̱yóʼo saáchi kúndasí Jehová xíniraña (Sal. 11:5; Apoc. 21:8). Ña̱kán kǒo xíniñúʼu kotoyó ña̱yóʼo saáchi tá ná keʼéyó saá va̱ása na̱ʼa̱yó ña̱ ndátuyó kooyó ñuyǐví xa̱á.

15. ¿Ndáaña kéʼé sava na̱ hermano ta nda̱chun? (Koto na̱ʼná).

¹⁵ Ná ka̱ʼa̱nyó xa̱ʼa̱ ndáa ki̱ʼva xíniñúʼuyó tiempoyó. Iin tá iin miíyó na̱ ndásakáʼnu Ndióxi̱ xíniñúʼu kotoyó ndáa ki̱ʼva xíniñúʼuyó tiempoyó. Tá kúú sava na̱ íyo se̱ʼe ña̱ va̱ʼa chindeétáʼanna xíʼin se̱ʼena ña̱ kandíxakana ña̱ káʼa̱n Ndióxi̱, távána tiempo ña̱ va̱ʼa chindeétáʼanna xíʼin na̱ va̱lí se̱ʼena ña̱ kuyatinkana nu̱ú Jehová xíʼi nu̱ú na̱ ñuura. Iin na̱ matrimonio na̱ sa̱kúaʼnu u̱ni̱ ná válí se̱ʼena káʼa̱nna ña̱yóʼo: “Tá xi̱xaʼa̱nndi̱ vacación, xi̱xaʼa̱nndi̱ Salón ña̱ Reino ta saátu xi̱xaʼa̱nndi̱ xi̱xitondi̱ Betel ña̱ va̱ʼa kunda̱a̱-ini ná va̱lí se̱ʼendi̱ ndáa ki̱ʼva íyo na̱ ñuu Jehová”. Inka na̱ matrimonio káʼa̱nna ndáaña ke̱ʼéna ña̱ va̱ʼa sa̱kúaʼnuna ta̱ loʼo se̱ʼena: “Xi̱tavándi̱ tiempo ña̱ va̱ʼa kotondi̱ ña̱ i̱xava̱ʼa Jehová, tá kúú xi̱xaʼa̱nndi̱ xi̱xitondi̱ nu̱ú ñúʼu kití, planta ta xi̱kaʼa̱nndi̱ xíʼin inka familia ña̱ ku̱ʼu̱nna xíʼinndi̱”. Xa̱ʼa̱ ña̱ xi̱tavána tiempo ña̱ xi̱xaʼa̱nna xi̱xitona ña̱ i̱xava̱ʼa Jehová ta saátu ña̱ xi̱ndakutáʼanna xíʼin inka na̱ hermano, ña̱yóʼo chi̱ndeétáʼan xíʼinna ndakanixi̱nína xa̱ʼa̱ ña̱ʼa ña̱ ta̱ʼán kotona.

16. Tá kándíxayó ña̱ káʼa̱n Ndióxi̱, ¿ndáa ki̱ʼva xíniñúʼu kotoyó ña̱ʼa ña̱ íyo ñuyǐví yóʼo? (1 Corintios 7:29-31; koto na̱ʼná).

¹⁶ (Kaʼvi 1 Corintios 7:29-31). Ña̱ kándíxayó ña̱ ni̱ka̱ʼa̱n Ndióxi̱, chíndeétáʼanña xíʼinyó ña̱ kǒo kuni̱yó kuumiíyó ña̱ ku̱i̱ká. Ndiʼivayó xíniñúʼu ña̱ kuxuyó, ña̱ kundixiyó xíʼin veʼe nu̱ú kooyó, soo ná kǒo kundayáʼvika ña̱yóʼo nu̱úyó. ¿Nda̱chun? Saáchi Biblia káʼa̱nña ña̱yóʼo: “Ndiʼi ña̱ʼa ña̱ kútóo na̱ yiví keʼéna ndiʼi-xa̱ʼa̱tu ña̱yóʼova, soo na̱ kéʼé ña̱ kúni̱ Ndióxi̱ kutakuna ndiʼi tiempo” (1 Juan 2:17). Tá vií íyo ña̱ ndáka̱xinyó kéʼéyó, náʼa̱yó ña̱ ndixa kúú ña̱ káʼa̱n Texto yóʼo. Xa̱ʼa̱ ña̱ ndátuyó kooyó nu̱ú ñuyǐví xa̱á kǒo kéʼéyó ndiʼi ña̱ íyo ñuyǐví yóʼo, chi siʼnaka Reino Ndióxi̱ ndíʼi̱-iniyó xa̱ʼa̱ (Mat. 6:33).

17. Na̱ hermano na̱ kándíxa ña̱ káʼa̱n Ndióxi̱ keʼéra ¿ndáaña ndáka̱xinna kéʼéna? (Koto na̱ʼná).

¹⁷ Tá kándíxayó ña̱ káʼa̱n Ndióxi̱ keʼéra, vií koo ña̱ ndaka̱xinyó keʼéyó chí nu̱únínu. Tá xáʼnu na̱ va̱lí ku̱a̱ʼa̱nna, sana ndakatu̱ʼunna ña̱yóʼo miína: “¿Ndáa chiñu kúú ña̱ keʼíi̱? ¿Á tindaʼíi̱? ¿Á koo se̱ʼi̱?”. Iin tá iinvana xíniñúʼu ndaka̱xin keʼé ña̱yóʼo. Nda̱a̱ ndáaka ña̱ ná ndaka̱xin na̱yóʼo keʼéna, koova ña̱ kivi ixayo̱ʼvi̱ xíʼinna (1 Cor. 7:28, 37, 38). Soo xíniñúʼu ndakanixi̱nína xa̱ʼa̱ ña̱yóʼo: “¿Á náʼi̱ xíʼin ña̱ kéʼíi̱ ña̱ si̱lóʼo tiempo kíndo̱o ta kixaa̱ ñuyǐví xa̱á?” (1 Tim. 6:19). Ku̱a̱ʼání na̱ va̱lí kúa̱an ndáka̱xinna kachíñuna ndiʼi tiempo nu̱ú Jehová ta va̱ása ndíkó-inina xa̱ʼa̱ ña̱yóʼo. Saáchi kíʼinna kuenta ña̱ ku̱a̱ʼání ña̱ va̱ʼa ndákiʼinna tá ndásakáʼnuna Ndióxi̱ xíʼin ndinuʼu-inina, ta kúsi̱í-inina xíʼin ña̱ xa̱a̱ kúúmiína (1 Tim. 6:6).

18. Ña̱ kandíxayó ña̱ ni̱ka̱ʼa̱n Jehová, ¿ndáa ki̱ʼva chíndeétáʼanña xíʼinyó tiempo vitin?

¹⁸ Nda̱a̱ táki̱ʼva xa̱a̱ ku̱ndaa̱-iniyó, ña̱ kándíxayó ña̱ ni̱ka̱ʼa̱n Jehová keʼéra chí nu̱únínu chíndeétáʼanña xíʼinyó tiempo vitin. Chíndeétáʼanña xíʼinyó kundeé-iniyó ya̱ʼayó nu̱ú tu̱ndóʼo, vií koo ña̱ ndaka̱xinyó keʼéyó ta saátu chíndeétáʼanña xíʼinyó ña̱ kuniñúʼu viíyó tiempoyó ta ndáaña kúú ña̱ siʼna xíniñúʼu kundi̱ʼi-iniyó xa̱ʼa̱. Xa̱a̱ kúni̱níyó ná xi̱nu ndiʼi ña̱ ni̱ka̱ʼa̱n Jehová keʼéra. Nani kíxaa̱ ki̱vi̱ kán ná koto káxiyó nu̱ú ña̱ʼa ña̱ ta̱ʼán kotoyó.