Ná kandíxakayó Jehová xíʼin ta̱ Jesús ta su̱ví ña̱ vatá ña̱ káʼa̱n ta̱ Ndi̱va̱ʼa

1. ¿Ndáaña kéʼé ta̱ Ndi̱va̱ʼa ña̱ va̱ʼa sakúxíkara miíyó nu̱ú Jehová?

TA̱ NDI̱VA̱ʼA xíʼin na̱ ta̱chí ndi̱va̱ʼa sáa̱ní-inina xínina miíyó tá kíxáʼayó ndásakáʼnuyó Jehová. Ta̱ Ndi̱va̱ʼa kúnda̱a̱-inira ña̱ kǒo kuchiñura xíʼinyó xa̱ʼa̱ ña̱ kándíxayó Jehová. Ña̱kán kéʼéra nda̱a̱ ndáaka ña̱ʼa ña̱ va̱ʼa sakúxíkara miíyó nu̱ú Ndióxi̱. Iin ña̱ kéʼéra kúú ña̱ sándaʼvira miíyó ña̱ ná ndakanixi̱níyó ña̱ kǒo kúni̱ Jehová xíʼin ta̱ Jesús xínina miíyó (2 Cor. 11:14; Sant. 1:6).

2. ¿Nda̱chun ndáyáʼviní kandíxayó Jehová xíʼin ta̱ Jesús?

² Tá xíyo guerra, na̱ soldado xíniñúʼu kandíxana ña̱ káʼa̱n na̱ níʼi yichi̱ nu̱úna chi tá ná kǒo kuniso̱ʼona ña̱ káʼa̱n na̱yóʼo, kivi kixáʼana keʼéna ña̱ kúni̱ miína ta nda̱a̱ kivi kuvina. Miíyó na̱ cristiano táki̱ʼva íyo na̱ soldado saá íyoyó chi kánitáʼanyó xíʼin na̱ ta̱chí ndi̱va̱ʼa (Efes. 6:12). Ta̱ Ndi̱va̱ʼa xíni̱ra tá va̱ása ndáa-iniyó Jehová xíʼin ta̱ Jesús, sana kǒo kandíxakayó ña̱ káʼa̱nna xíʼinyó. Xa̱ʼa̱ ña̱kán, ku̱a̱ʼání ña̱ʼa kéʼéra ña̱ va̱ʼa sandáʼvira miíyó. Nu̱ú artículo yóʼo kunda̱a̱-iniyó ndáa ki̱ʼva ke̱ʼéra ña̱yóʼo tá ya̱chi̱ ta ndáa ki̱ʼva kéʼéraña tiempo vitin. Saátu kunda̱a̱-iniyó ndáaña kivi keʼéyó ña̱ va̱ʼa kǒo sandáʼvira miíyó. Ta nu̱ú inka artículo kunda̱a̱-iniyó xa̱ʼa̱ inka u̱vi̱ ña̱ kéʼéra ña̱ va̱ʼa sandáʼvira miíyó.a

ÑA̱ VATÁ ÑA̱ NI̱KA̱ʼA̱N TA̱ NDI̱VA̱ʼA TÁ YA̱CHI̱

3. ¿Ndáa ki̱ʼva sa̱ndáʼvi ta̱ Ndi̱va̱ʼa ñá Eva ña̱ kǒo kandíxakañá Jehová?

³ Tá ni̱ya̱ʼa loʼo tiempo ña̱ i̱xava̱ʼa Jehová ta̱ Adán xíʼin ñá Eva, ta̱ Ndi̱va̱ʼa sa̱kúxíkára na̱yóʼo nu̱ú ta̱ i̱xava̱ʼa miína. Ña̱ va̱ʼa sa̱ndáʼvira ñá Eva ña̱ nda̱kanixi̱níñá ña̱ yo̱ʼvi̱ní ña̱ ni̱ka̱ʼa̱n Jehová xíʼinna, ni̱nda̱ka̱tu̱ʼunra ña̱yóʼo miíñá: “¿Á mií ña̱ nda̱a̱ ni̱ka̱ʼa̱n Ndióxi̱ xíʼinndó ña̱ va̱ása kivi kaxíndó ku̱i̱ʼi ña̱ íyo ndaʼa̱ ndiʼi yitu̱n tú íyo jardín yóʼo?” (Gén. 3:1-5). Xa̱ʼa̱ ña̱ ni̱ka̱ʼa̱nra ña̱yóʼo, ñá Eva nda̱kanixi̱níñá ña̱ kǒo kúni̱ Jehová ña̱ si̱í kooñá. Ta̱ Adán xíʼin ñá Eva ka̱ndíxana ña̱ ni̱ka̱ʼa̱n ta̱ Ndi̱va̱ʼa ta ndu̱una contra xíʼin Jehová (Gén. 3:6).

4. ¿Ndáaña xi̱kuni̱ ta̱ Ndi̱va̱ʼa ná ndakanixi̱ní ta̱ Job?

⁴ Ta̱ Ndi̱va̱ʼa ni̱ka̱ʼa̱nkara ña̱ vatá xa̱ʼa̱ Jehová. Tá kúú, xi̱niñúʼura sava na̱ migo ta̱ Job ña̱ ni̱ka̱ʼa̱nna ña̱ vatá xa̱ʼa̱ Ndióxi̱. Ta̱yóʼo xi̱kuni̱ra ña̱ ná ndakanixi̱ní ta̱ Job ña̱ va̱ása kúni̱ Jehová xínirara ta va̱ása ndáyáʼviví ña̱ nda̱kú koo inira xíʼin Ndióxi̱ (Job 22:1-3). Ta̱ Ndi̱va̱ʼa nda̱kanixi̱níra tá ná saxóʼvi̱ra ta̱ Job, sandákoora ña̱ ndásakáʼnura Jehová. Soo ni ku̱a̱ʼání tu̱ndóʼo ni̱ya̱ʼa ta̱ Job nu̱ú, nda̱kú ni̱xi̱yo inira xíʼin Jehová (Job 27:1, 5).

5. ¿Ndáaña ke̱ʼé ta̱ Ndi̱va̱ʼa ña̱ va̱ʼa kǒo kundiku̱n na̱ yiví ta̱ Jesús? (Mateo 11:19).

⁵ Tá ki̱xi ta̱ Jesús nu̱ú ñuʼú yóʼo, ta̱ Ndi̱va̱ʼa ke̱ʼéra ku̱a̱ʼání ña̱ʼa ña̱ va̱ʼa kǒo kundiku̱n na̱ yiví ta̱ Jesús. Tá kúú, xi̱niñúʼura na̱ xi̱niʼi yichi̱ nu̱ú na̱ veʼe-ñu̱ʼu xíʼin inkaka na̱ yiví na̱ xi̱sa̱a̱-ini xi̱xini ta̱ Jesús ña̱ va̱ʼa ka̱ʼa̱nna ña̱ vatá xa̱ʼa̱ra. Ta xa̱ʼa̱ ña̱kán nda̱a̱ xa̱ʼnína ta̱ Jesús nda̱a̱ táki̱ʼva kéʼéna xíʼin na̱ kui̱ʼná (kaʼvi Mateo 11:19; 27:27-31; Mar. 14:55, 56; Juan 8:41-45).

6, 7. ¿Ndáa ki̱ʼva i̱xandi̱va̱ʼa ta̱ Ndi̱va̱ʼa xíʼin na̱ cristiano na̱ ni̱xi̱yo tá siglo nu̱ú?

⁶ Tá ni̱xi̱ʼi̱ ta̱ Jesús, ta̱ Ndi̱va̱ʼa xi̱kuni̱ra sandákavara-ini na̱ discípulo ña̱ va̱ʼa sandákoona ña̱ natúʼunna xa̱ʼa̱ ta̱ Jesús. Ña̱ nu̱ú, sa̱ndáʼvira na̱ yiví ña̱ ndakanixi̱nína ña̱ kǒo níndatakuví ta̱ Jesús, saáchi ni̱ka̱ʼa̱nra na̱ discípulo ta̱ Jesús nda̱kiʼinnara ku̱a̱ʼa̱n xíʼinna (Mat. 28:11-15). Tá ni̱ya̱ʼa loʼo tiempo, i̱xandi̱va̱ʼaníra xíʼin na̱ cristiano ña̱ va̱ʼa yi̱ʼvína ta ndakanixi̱nína, chiñu ña̱ xa̱ʼnda ta̱ Jesús yo̱ʼvi̱níña (Hech. 7:57–8:1; 12:1-3; 28:22).

⁷ Ni sava na̱ cristiano ni̱yi̱ʼvína, ku̱a̱ʼánína ndakú ni̱xi̱yo inina ta nda̱kundeéna na̱túʼunna xa̱ʼa̱ tu̱ʼun va̱ʼa. Na̱yóʼo xi̱kunda̱a̱-inina ta̱ Ndi̱va̱ʼa xíʼin na̱ ta̱chí ndi̱va̱ʼa kúú na̱ xi̱ ixandi̱va̱ʼa xíʼinna (Hech. 4:18-20; 1 Ped. 5:8). Ná ka̱ʼa̱nyó xa̱ʼa̱ tiempo ña̱ ndóoyó vitin, ¿ndáaña kéʼé ta̱ Ndi̱va̱ʼa ña̱ va̱ʼa sakúxíkara miíyó nu̱ú Jehová?

ÑA̱ VATÁ ÑA̱ KÁʼA̱N TA̱ NDI̱VA̱ʼA TIEMPO VITIN

8. ¿Ndáaña kéʼé ta̱ Ndi̱va̱ʼa ña̱ va̱ʼa kǒo kunda̱a̱-ini na̱ yiví ña̱ nda̱a̱ xa̱ʼa̱ Jehová xíʼin xa̱ʼa̱ ta̱ Jesús?

⁸ Tiempo vitin ta̱ Ndi̱va̱ʼa kǒo kúni̱ra ña̱ ná kunda̱a̱-ini na̱ yiví ña̱ nda̱a̱ xa̱ʼa̱ Jehová xíʼin xa̱ʼa̱ ta̱ Jesús. Xa̱ʼa̱ ña̱ kúúra “yivá na̱ káʼa̱n ña̱ vatá”, xíniñúʼura na̱ veʼe-ñu̱ʼu ña̱ va̱ʼa ka̱ʼa̱nna ña̱ vatá xa̱ʼa̱ Jehová xíʼin xa̱ʼa̱ ta̱ Jesús (Juan 8:44). Tá kúú, sákara xi̱ní na̱ yiví ña̱ va̱ása kunda̱a̱ káxi-inina xa̱ʼa̱ Jehová xíʼin xa̱ʼa̱ ta̱ Jesús (2 Cor. 4:3, 4). Ku̱a̱ʼání na̱ veʼe-ñu̱ʼu káʼa̱nna Jehová xíʼin ta̱ Jesús iin kúúna, tá kúú, iinlá xa̱ʼa̱ ta̱ Jesús káʼa̱n na̱ yiví ta iinlá ta̱yóʼo ndásakáʼnuna ta nándóso-inina xa̱ʼa̱ yivára. Ta̱ Jesús kúni̱ra ná ndasakáʼnuyó iinlá mií Jehová (Mat. 4:10; Juan 4:23). Ku̱a̱ʼání na̱ kándíxa ña̱ vatá ña̱ káʼa̱n ta̱ Ndi̱va̱ʼa kǒo xíínna kuniso̱ʼona miíyó, ta nda̱a̱ sásina nu̱úyó ña̱ natúʼunyó xíʼin na̱ yiví.

9. ¿Ndáa ki̱ʼva xíniñúʼu ta̱ Ndi̱va̱ʼa na̱ veʼe-ñu̱ʼu vatá ña̱ va̱ʼa kǒo kunda̱a̱-ini na̱ yiví xa̱ʼa̱ Jehová? (Jeremías 23:26, 27).

⁹ Tá xínitáʼanyó xíʼin iin na̱ yiví, ña̱ nu̱ú kéʼéyó kúú ña̱ ndáka̱tu̱ʼunyó ki̱vi̱na. Ta̱ Ndi̱va̱ʼa kǒo kúni̱ra ña̱ ná xa̱a̱ na̱ yiví kutáʼanna xíʼin Jehová, ña̱kán ku̱a̱ʼání ña̱ʼa kéʼéra ña̱ va̱ʼa ná kǒo kunda̱a̱-inina xa̱ʼa̱ ki̱vi̱ra. Xa̱a̱ ku̱a̱ʼání ku̱i̱ya̱ xíniñúʼura veʼe-ñu̱ʼu vatá ña̱ va̱ʼa sandáʼvina na̱ yiví ña̱ ná kǒo kuniñúʼuna ki̱vi̱ Ndióxi̱ (kaʼvi Jeremías 23:26, 27). Tá kúú, xíniñúʼura na̱ yiví ña̱ va̱ʼa ndakatana ki̱vi̱ Ndióxi̱ nu̱ú sava Biblia (Prov. 18:10). Saátu káʼa̱nra mií Ndióxi̱ sáxo̱ʼvi̱ miíyó, xa̱ʼa̱ ña̱yóʼo ku̱a̱ʼání na̱ yiví íxayo̱ʼvi̱ña xíʼinna ña̱ kuyatinna nu̱ú Ndióxi̱ ta xa̱a̱na koona migora (Sant. 4:8). Saátu ta̱ Ndi̱va̱ʼa kúni̱ra ña̱ miíyó na̱ xa̱a̱ ndásakáʼnu Jehová ná sandákooyó ña̱ ndasakáʼnuyóra.

10. ¿Ndáa xa̱ʼa̱ kúú ña̱ kivi sa̱a̱yó xíʼin Jehová?

¹⁰ Tá yáʼayó nu̱ú tu̱ndóʼo ta̱ Ndi̱va̱ʼa kúni̱ra ña̱ ná ndakanixi̱níyó ña̱ va̱ása ndíʼi̱ví-ini Jehová xa̱ʼa̱yó. Tá ku̱a̱ʼá tiempo ndóʼoyó ña̱yóʼo, kúni̱ra ña̱ ná sa̱a̱yó xíʼin Jehová xa̱ʼa̱ ña̱ táxira ña̱ ndóʼoyó ña̱yóʼo (Prov. 19:3). Tá ndóʼoyó saá, kivi kixáʼayó ndakanixi̱níyó ña̱yóʼo: “¿Nda̱chun xíniñúʼuví kandíxai̱ ña̱ káʼa̱n Jehová?”. Ña̱ ndakanixi̱níyó ña̱yóʼo i̱yoníña saáchi kivi sandáʼvi ta̱ Ndi̱va̱ʼa miíyó.

11. ¿Ndáaña xíniñúʼu ta̱ Ndi̱va̱ʼa ña̱ va̱ʼa kaka-iniyó xa̱ʼa̱ ña̱ káʼa̱n Jehová xíʼinyó? (Koto na̱ʼná).

¹¹ Ta̱ Ndi̱va̱ʼa kúni̱ra ña̱ ná kaka-iniyó xa̱ʼa̱ ña̱ káʼa̱n Jehová xíʼinyó, ta iin ña̱ va̱ʼaníka xíniñúʼura ña̱ sándaʼvira miíyó kúú ña̱ va̱xi nu̱ú internet ña̱ káʼa̱nna xíʼin redes sociales. Nu̱ú ña̱yóʼo ku̱a̱ʼání na̱ yiví káʼa̱nna Biblia iin libro ña̱ yatání kúúña ta iin tá iin na̱ yiví kivi keʼéna ña̱ kúni̱ miína. Ta̱ Ndi̱va̱ʼa kúú ta̱ ndísochíñu ñuyǐví yóʼo ta sándaʼvira na̱ yiví ña̱ ná ndakanixi̱nína ña̱ va̱ása va̱ʼa kúú ña̱ va̱ʼa nu̱úna (Juan 14:30; Is. 5:20; 1 Tim. 4:1, 2).

12. ¿Nda̱chun va̱ása xíniñúʼu kuniso̱ʼoyó ña̱ vatá ña̱ káʼa̱n ta̱ Ndi̱va̱ʼa?

¹² Tá kándíxayó ña̱ vatá ña̱ káʼa̱n ta̱ Ndi̱va̱ʼa kivi loʼo tá loʼo kuxíkáyó nu̱ú Jehová. Iin ñá hermana ñá naní Shannonb káchiñá: “Xa̱ʼa̱ ña̱ ki̱xáʼíi̱ kítáʼi̱n xíʼin na̱ yiví na̱ va̱ása ndásakáʼnu Jehová ti̱xin escuela nu̱ú xi̱kaʼvii̱, kixáʼíi̱ ndákanixi̱níi̱ ña̱ su̱ví iin ku̱a̱chiví kúú ña̱ keʼéyó ña̱ va̱ása va̱ʼa. Tá ku̱a̱ʼáka tiempo xi̱kiʼvii̱ nu̱ú internet, nda̱a̱ xi̱kuni̱i̱ xa̱i̱ keʼíi̱ nda̱a̱ táki̱ʼva xi̱keʼé na̱ yiví kán. Loʼo tá loʼo ku̱xíkái̱ nu̱ú Jehová xíʼin nu̱ú na̱ veʼi̱ ta saátu nu̱ú na̱ congregación”. Ñá hermana yóʼo ndi̱kóvañá nu̱ú Jehová ta viíka ki̱xáʼañá kítáʼanñá xíʼinra, ¿ndáaña chi̱ndeétáʼan xíʼinñá?

13. ¿Ndáaña sákuaʼún xíʼin ña̱ ndo̱ʼo ñá Shannon?

¹³ Ñá Shannon ki̱ʼinñá kuenta ña̱ xi̱xiniñúʼu nasamañá ku̱a̱ʼání ña̱ʼa ña̱ va̱ʼa xa̱a̱ñá vií kitáʼanñá xíʼin Jehová ta saátu xíʼin ta̱ Jesús. Ñáyóʼo káchiñá: “Ni̱ka̱ʼi̱n xíʼin Jehová ta saátu ka̱ʼvii̱ ku̱a̱ʼání tutu ña̱ tává na̱ ñuura. Iin ña̱ va̱ʼaní chi̱ndeétáʼan xíʼi̱n kúú video ña̱ naní Los jóvenes preguntan... ¿Cómo conseguir amigos verdaderos?c Ñá hermana ñá kána nu̱ú video yóʼo ndo̱ʼoñá nda̱a̱ táki̱ʼva ndo̱ʼo miíi̱, soo vitání ni̱xi̱yo iniñá ta ni̱ka̱ʼa̱nñá xíʼin na̱ yiváñá ña̱ ná chindeétáʼanna xíʼinñá. Tasaá kúú ña̱ ke̱ʼé miíi̱, na̱ yivái̱, na̱ anciano xíʼin ná hermana ná xa̱a̱ xu̱xa-ini xíʼin tu̱ʼun Ndióxi̱ chi̱ndeétáʼanna xíʼi̱n ña̱ va̱ʼa kǒo kutáʼi̱n xíʼin na̱ yiví na̱ va̱ása ndásakáʼnu Jehová. Ki̱ʼii̱n kuenta ña̱ va̱ʼa kandíxai̱ Jehová va̱ása xíniñúʼu ku̱ʼu̱n kuitíi̱ reunión ta kuniso̱ʼi̱ ña̱ káʼa̱n na̱ yivái̱ xíʼi̱n, chi saátu xíniñúʼu kandíxai̱ ña̱ sákuaʼi̱ ña̱ nda̱a̱ kúúña ta xa̱i̱ vií kutáʼi̱n xíʼin Jehová”.

NÁ KANDÍXAYÓ JEHOVÁ XÍʼIN TA̱ JESÚS KÚÚNA MIGOYÓ

14. ¿Ndáaña chindeétáʼan xíʼinyó ña̱ ndakuniyó ña̱ vatá ña̱ káʼa̱n ta̱ Ndi̱va̱ʼa? (Koto na̱ʼná).

¹⁴ Ña̱ va̱ʼa vií kutáʼanyó xíʼin Jehová xíniñúʼu vií ndaka̱xinyó ndáana kutáʼan xíʼinyó (Sant. 4:4). Saátu xíniñúʼu kiʼinyó kuenta ña̱ kǒo kandíxayó ndiʼi ña̱ vatá ña̱ káʼa̱n na̱ ñuyǐví yóʼo. Tá kúú, kivi kaʼviyó á kuniso̱ʼoyó xa̱ʼa̱ iin ña̱ ku̱u, soo kivi ka̱ʼa̱nna ku̱a̱ʼáníka ña̱ vatá xa̱ʼa̱ ña̱yóʼo nu̱úka ña̱ ku̱u. Soo tá káʼviyó Biblia, tutu ña̱ tává na̱ ñuu Ndióxi̱ ta saátu kítáʼanyó xíʼin na̱ hermano, ña̱yóʼo chindeétáʼanña xíʼinyó ña̱ kǒo sandáʼvi inkana miíyó. Tá kúnda̱a̱ va̱ʼa iniyó xa̱ʼa̱ ña̱ nda̱a̱, va̱ása ixayo̱ʼvi̱ña xíʼinyó ña̱ ndakuniyó ña̱ vatá ña̱ káʼa̱n ta̱ Ndi̱va̱ʼa (Prov. 13:20; Hech. 17:11).

15. ¿Ndáaña chindeétáʼan xíʼinyó ña̱ kunda̱a̱-iniyó ña̱ ndíʼi̱va-ini Jehová xíʼin ta̱ Jesús xa̱ʼa̱yó?

¹⁵ Tá vií káʼviyó Biblia, xa̱a̱yó kandíxakayó Jehová ta saátu ta̱ Jesús ña̱ ndixa ndíʼi̱-inina xa̱ʼa̱yó (Prov. 22:19). Nu̱ú Biblia va̱xi ku̱a̱ʼání relato ña̱ káʼa̱n xa̱ʼa̱ na̱ xi̱ndasakáʼnu Ndióxi̱ tiempo xi̱naʼá ta viíní xi̱kiʼin Jehová xíʼin ta̱ Jesús kuenta xíʼinna. Tá ná ndakanixi̱níyó xa̱ʼa̱ na̱yóʼo, saá kandíxayó Jehová xíʼin ta̱ Jesús ña̱ kúúna migoyó. Saátu nu̱ú Biblia va̱xi ku̱a̱ʼání tu̱ʼun ña̱ livi ña̱ ni̱ka̱ʼa̱n Jehová xíʼin ta̱ Jesús ña̱ náʼa̱ nu̱úyó ña̱ kúni̱na xínina miíyó. Tá kúú, nu̱ú Biblia káʼa̱nña Jehová náʼa̱ra ña̱ ndeéníka kúʼvi̱-inira xínira na̱ ndásakáʼnu miíra nu̱úka ña̱ kúʼvi̱-ini iin ñaʼá xíniñá se̱ʼeñá (Is. 49:15). Na̱ kúʼvi̱-ini xíni miíra ndáyáʼvika na̱yóʼo nu̱úra (Mal. 3:16, 17, nota). Tá káʼviyó xa̱ʼa̱ ña̱ ke̱ʼé ta̱ Jesús xa̱ʼa̱yó, kíʼinyó kuenta ña̱ kúʼvi̱ní-inira xínira miíyó (Juan 15:12, 13).

16. ¿Nda̱chun iin ña̱ va̱ʼa kúú ña̱ ndakanixi̱níyó ndáa ki̱ʼva xa̱a̱ chíndeétáʼan Jehová xíʼinyó ta saátu xíʼin na̱ hermano? (Salmo 118:5, 6).

¹⁶ Inka ña̱ chindeétáʼan xíʼinyó ña̱ kunda̱a̱-iniyó ña̱ kúni̱va Jehová xíʼin ta̱ Jesús xínina miíyó, kúú ña̱ ndakanixi̱níyó xa̱ʼa̱ ki̱ʼva ña̱ xa̱a̱ chíndeétáʼanna xíʼinyó. Tá saá ná keʼéyó ndasandakúña-iniyó. Saátu kivi nda̱ka̱tu̱ʼunyó na̱ hermano ndáa ki̱ʼva xa̱a̱ chíndeétáʼan Jehová xíʼinna (Prov. 22:17). Saá kúú ña̱ kandíxakayó Jehová xíʼin ta̱ Jesús ña̱ ndiʼi tiempo chindeétáʼanna xíʼinyó ni nda̱a̱ ndáaka ña̱ ná kundoʼoyó (kaʼvi Salmo 118:5, 6).d

17. Nda̱a̱ táki̱ʼva káʼa̱n Juan 10:29, ¿ndáaña káʼa̱n ta̱ Jesús xíʼin na̱ kándíxa miíra ta saátu yivára?

¹⁷ Ndiʼivayó kúni̱yó xa̱a̱yó kooyó migo Jehová xíʼin ta̱ Jesús. Soo nani ndátuyó ña̱ ndiʼi-xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa, xíniñúʼu chikaa̱yó ndee̱ ña̱ kandíxakayó Jehová xíʼin ta̱ Jesús (Apoc. 20:1-3, 10). Ña̱ vií kutáʼanyó xíʼin Jehová ta saátu xíʼin ta̱ Jesús, chindeétáʼanña xíʼinyó ña̱ kandíxayó ña̱ kúni̱nívana xínina miíyó ta ná kǒo taxiyó ña̱ sandáʼvi ta̱ Ndi̱va̱ʼa miíyó. Ná ndakaʼányó ña̱ ni̱ka̱ʼa̱n ta̱ Jesús: “Nda̱a̱ ni iinna kǒo kivi kindaa tí ndikachi ndaʼa̱ yivái̱” (kaʼvi Juan 10:29; Sant. 4:7).

18. ¿Ndáaña ka̱ʼa̱nyó xa̱ʼa̱ nu̱ú inka artículo?

¹⁸ Nu̱ú inka artículo ka̱ʼa̱nyó xa̱ʼa̱ inka u̱vi̱ ña̱ʼa ña̱ xíniñúʼu ta̱ Ndi̱va̱ʼa ña̱ va̱ʼa sandáʼvira miíyó. Ña̱ nu̱ú, kúni̱ra ndataʼvíra na̱ congregación, ta ña̱ u̱vi̱ chíkaa̱ra-ini na̱ yiví ña̱ ná ixandi̱va̱ʼana xíʼinyó. Saátu kunda̱a̱-iniyó ndáaña keʼéyó ña̱ va̱ʼa nda̱kú koo iniyó xíʼin Jehová.