Ibqaʼ Qrib Ġeħova Waqt li Tkompli l-Iskola

1-2. (a) Jekk tiddeċiedi li tkompli l-iskola, minn xiex trid tkun ċert? (b) Xi jfisser li “nibqgħu nimxu bl-istess mod”? (Filippin 3:16)

XI QADDEJJA taʼ Ġeħova ddeċidew li jkomplu l-iskola wara li jlestu s-sekondarja. Forsi jaħsbu li jekk ikomplu l-iskola, se jsibu xogħol li jgħinhom jaħdmu iktar għal Ġeħova. Jekk iddeċidejt li tkompli l-iskola, kif tistaʼ tagħmel ċert li tibqaʼ qrib Ġeħova? (Ġak. 4:8a) Bla dubju, matul is-snin, diġà kellek sitwazzjonijiet fl-iskola fejn ridt tibqaʼ togħġob lil Ġeħova. Issa trid ‘tibqaʼ miexi bl-istess mod,’ jiġifieri tibqaʼ taqdi lil Ġeħova lealment kif diġà għamilt.—Aqra Filippin 3:16.

² Bil-Grieg, il-frażi tradotta “nibqgħu nimxu bl-istess mod” kienet tfakkar lin-nies fis-suldati li kienu jibqgħu jimmarċjaw flimkien mingħajr ma jieqfu jew iduru lura. Jekk tiddeċiedi li tkompli l-iskola għandek bżonn tibqaʼ ‘timmarċja ’l quddiem’ f’li taqdi lil Ġeħova, la tibqaʼ fejn int u lanqas tmur lura. F’dan l-artiklu se naraw erbaʼ prinċipji mill-Bibbja li se jgħinuk. Inti diġà familjari magħhom. Dawn il-prinċipji diġà għenuk tieħu deċiżjonijiet tajbin f’ħajtek. U dawn se jgħinuk tibqaʼ viċin Ġeħova, waqt u anki wara li tlesti l-iskola.

ŻOMM IL-ĦBIBERIJA TIEGĦEK MA’ ĠEĦOVA B’SAĦĦITHA

3. Jekk tkompli l-iskola, liema sfidi tistaʼ tiffaċċja biex iżżomm rutina spiritwali?

³ L-isfida. Jekk tkompli l-iskola se tkun imħabbat ħafna u se jkollok iktar x’tagħmel kuljum. Ovvjament, minħabba li tkun trid tmur tajjeb fl-iskola, tistaʼ tibda tpoġġi l-affarijiet tal-iskola qabel Ġeħova. Tistaʼ saħansitra tibda titlef il-laqgħat, tnaqqas is-service, u tittraskura l-istudju persunali u t-talb.—Riv. 2:4.

4. X’jistaʼ jgħinek ‘ikollok ħafna x’tagħmel fix-xogħol tal-Mulej’? (1 Korintin 15:58)

⁴ Aqra 1 Korintin 15:58. Biex rota timxi, għandek bżonn taqdef. B’mod simili, biex jibqaʼ jkollok relazzjoni tajba ma’ Ġeħova jrid ‘ikollok ħafna x’tagħmel fix-xogħol tal-Mulej.’ Dan ma jfissirx kemm tqattaʼ ħin tagħmel affarijiet teokratiċi imma kemm ikunu importanti għalik. Ftakar li l-iktar ħaġa importanti f’ħajtek hi li taqdi lil Ġeħova u mhux li tkompli l-iskola. (Mat. 22:37) Oħt żagħżugħa jisimha Samantha tgħid, “Qabel komplejt l-iskola, wegħedt lili nnifsi li jekk l-affarijiet tal-iskola ħa jtellfuni milli naqdi lil Ġeħova, kont se nieqaf nistudja.”

5. X’tistaʼ tagħmel biex tibqaʼ involut f’li taqdi lil Ġeħova?

⁵ Dak li tistaʼ tagħmel qabel tkompli l-iskola. Agħmel ċert li se żżomm lil Ġeħova l-ewwel f’ħajtek. Saqsi lilek innifsek: ‘Jien kif se nagħmel ċert li b’mod regulari nibqaʼ nipprepara għal-laqgħat, nattendihom, noħroġ service, u naqra l-Bibbja?’ (Ġoż. 1:8; Mat. 28:​19, 20; Lhud 10:25) Aħseb ukoll, ‘Meta kont l-iskola qabel, kif irnexxieli nagħmel dawn l-affarijiet?’ Jekk tħoss li kien hemm xi affarijiet li stajt tagħmilhom aħjar, x’bidliet tistaʼ tagħmel? Kun determinat li tibqaʼ involut f’li taqdi lil Ġeħova waqt li tkompli l-iskola. Hu importanti li tmur tajjeb l-iskola, imma mhux li tuża ħafna ħin u enerġija li jżommuk lura milli tagħmel progress f’li taqdi lil Ġeħova.a—Mat. 6:24.

6. Biex tara jekk għadekx tpoġġi lil Ġeħova l-ewwel f’ħajtek, x’mistoqsijiet tistaʼ ssaqsi lilek innifsek? (Ara wkoll l-istampa.)

⁶ Biex tara jekk Ġeħova għadux l-iktar importanti f’ħajtek waqt li tkun qed tistudja, kull xahar eżamina lilek innifsek. Biex tagħmel hekk, tistaʼ ssaqsi lilek innifsek: ‘Jiena spiss nitlef il-laqgħat jew nasal tard? Jien spiss naħseb fuq l-affarijiet tal-iskola waqt il-laqgħat? Il-laqgħat qed nagħmilhom fuq Zoom minflok immur il-hall mal-aħwa?’ Ukoll, tistaʼ ssaqsi lilek innifsek, ‘Naqqast mill-qari tal-Bibbja u mit-talb tiegħi? Noħroġ service għax taʼ bilfors u jkolli ġenn biex nieqaf?’ Jekk weġibt iva għal xi waħda minn dawn il-mistoqsijiet, agħmel bidliet malajr. Tħallix l-iskola żżommok milli tpoġġi lil Ġeħova l-ewwel f’ħajtek.

TĦALLIX LIL OĦRAJN JINFLUWENZAW IL-MOD KIF TAĦSEB

7. L-istudju kif jistaʼ jaffettwa l-mod kif taħseb?

⁷ L-isfida. Skont il-kors li se tieħu, jistaʼ jkun titgħallem “filosofiji u r-raġunar falz,” bħall-ateiżmu u l-evoluzzjoni. (Kol. 2:8) Dan jistaʼ jwasslek ukoll biex tibda tafda wisq fik innifsek minflok f’Ġeħova. Ħu żagħżugħ qal: “Ma konniex biss qed nitgħallmu sengħa, imma konna qed nitgħallmu mod kif naħsbu li spiss ma kienx il-mod kif jaħseb Ġeħova. Pereżempju, kienu jgħallmu li jistaʼ jkollok suċċess bis-saħħa tiegħek stess. Dan beda jġegħelni naħseb li ma kellix bżonn lil Ġeħova biex inkun ferħan, u b’hekk sar iktar diffiċli biex nafda fih.”

8. Għala hu importanti li “taħseb b’mod ċar”? (Proverbji 5:​1, 2)

⁸ Aqra Proverbji 5:​1, 2. Il-Bibbja twissi biex toqgħod attent ħalli “taħseb b’mod ċar.” Biex tkompli tagħmel hekk, trid tagħmel sforz. Dan hu importanti għax ix-Xitan u s-sistema tiegħu l-ħin kollu jipprovaw iġegħluna naħsbu bħalhom. (1 Pt. 5:8) Il-mod kif jaħsbu n-nies dwar dak li hu tajjeb u ħażin, l-oriġini tal-ħajja, u jekk Alla jeżistix vera, jistaʼ jdaħħallek dubji dwar dak li jgħallem Ġeħova. L-għalliema u oħrajn jistgħu jġegħluk taħseb li l-ideat tagħhom dwar dawn l-affarijiet huma aħjar minn ideat oħrajn. Imma l-verità hi li l-ideat tagħhom huma “bluha għal Alla.”—1 Kor. 3:​18-20.

9. X’tistaʼ tagħmel biex ma tħallix lil oħrajn iġegħluk tiddubita dak li temmen?

⁹ Dak li tistaʼ tagħmel qabel tkompli l-iskola. Qabel tkompli l-iskola kun konvint li dak li tgħid il-Bibbja hu veru. Saqsi lilek innifsek: ‘Jien għala nemmen f’Alla? Kif naf li l-Bibbja hi l-Kelma t’Alla? Xi kkonvinċieni li l-morali tal-Bibbja huma aħjar minn dak li n-nies jgħidu li hu tajjeb u ħażin?’ Xi ħaġa oħra li tistaʼ tgħinek hi li taħseb kif ġejt affettwat mill-iskola. Tistaʼ ssaqsi: ‘Bdejt niddubita jekk Alla jeżistix minħabba li ħafna jemmnu fl-evoluzzjoni? Kont insibha diffiċli li ngħid le għal affarijiet ħżiena li jagħmlu sħabi tal-klassi? Jekk tħoss li fil-passat stajt tagħmel xi ħaġa aħjar, issa kif tistaʼ tkun iktar konvint?’ Kun determinat li ma tħallix lil oħrajn iġegħluk tiddubita dak li temmen.—2 Tim. 2:​16-18.b

10. X’tistaʼ tagħmel biex tibqaʼ konvint mit-twemmin tiegħek?

¹⁰ Meta tkompli tistudja, eżamina lilek innifsek b’mod regulari. Saqsi lilek innifsek: ‘Qiegħed ninfluwenza ruħi minn dawk taʼ madwari li qed jagħmlu affarijiet li ma jogħġbux lil Ġeħova? Ninduna jekk niġi mgħallem ideat taʼ bniedem minflok il-verità? Jien konvint għalkollox li s-Saltna t’Alla biss tistaʼ ssolvi l-problemi tal-bniedem?’ Biex tkun ċert li sħabek tal-klassi u l-għalliema mhux qed jinfluwenzaw il-mod kif taħseb, kompli aqra, immedita, u applika dak li titgħallem mill-Bibbja. Meta tagħmel dan, se tkun iktar ċert li dak kollu li tgħid il-Bibbja hu veru.—1 Tim. 4:15.

UŻA L-ĦIN TIEGĦEK SEW

11. Meta tkun qed tistudja, għala jistaʼ jkun diffiċli li tuża l-ħin sew?

¹¹ L-isfida. Meta tkompli l-iskola, ħa tiħodlok ħafna ħin, speċjalment meta jkollok xi eżami jew xi proġetti li trid tlesti. Jekk ma tużax il-ħin sew, se tispiċċa b’ħafna stress jew tħossok dejjem għajjien. Għalhekk, importanti ħafna li tieħu ħsieb is-saħħa fiżika u emozzjonali tiegħek.

12. X’inhuma xi affarijiet li trid tagħmel ħin għalihom? (Efesin 5:​15, 16)

¹² Aqra Efesin 5:​15, 16. Jistaʼ jkun diffiċli biex tuża “l-ħin bl-aħjar mod.” Dan għaliex ikollok ħafna affarijiet x’tagħmel. Pereżempju, hu importanti li tistudja imma hu iktar importanti li tagħmel ħin biex tkun mal-familja u l-aħwa tal-kongregazzjoni. (Slm. 133:1; Prov. 18:1) Ovvjament, l-iktar ħaġa importanti hi li tagħmel affarijiet li jżommuk qrib Ġeħova. (Mat. 6:33) Jistaʼ jkun ukoll li trid taħdem u tgħin fl-affarijiet tad-dar. Barra minn hekk, għandek bżonn tieħu ħsieb saħħtek billi tistrieħ biżżejjed u tagħmel l-eżerċizzju. (Ekk. 4:6; 1 Tim. 4:8) Biex tagħmel dan kollu hemm bżonn li tuża l-ħin sew.

13. X’tistaʼ tagħmel biex tuża l-ħin bl-aħjar mod?

¹³ Dak li tistaʼ tagħmel qabel tkompli l-iskola. Il-Bibbja tgħid li min jippjana jkollu suċċess. (Prov. 21:5) Għalhekk, agħmel skeda realistika qabel tkompli bl-istudju. Aħseb fis-snin meta kont l-iskola u saqsi lilek innifsek: ‘Irnexxieli nsib ħin biex nagħmel l-affarijiet importanti kollha?’ Jekk tħoss li fil-passat stajt tagħmel xi ħaġa aħjar, x’tistaʼ tirranġa? Kun determinat li inti tikkontrolla l-ħin u mhux il-ħin jikkontrolla lilek.c

14. X’mistoqsijiet jistgħu jgħinuk biex teżamina lilek innifsek?

¹⁴ Waqt li tkun qed tistudja, b’mod regulari ara kif qed tuża l-ħin. Saqsi lilek innifsek: ‘L-iskeda tiegħi qed tħallili ħin biex nistrieħ biżżejjed u nagħmel l-eżerċizzju? Għandi ħin biex inkun mal-aħwa tal-kongregazzjoni? Illesti l-homework fil-ħin? Jekk le, għax għandi ħafna x’nagħmel jew għax inħalli għall-aħħar? Tal-familja u oħrajn jaqblu li qed nuża l-ħin b’mod tajjeb?’ Jekk hemm bżonn li tirranġa l-iskeda jew iżżomm magħha aħjar, aħdem fuqha malajr. Int tistaʼ titkellem ma’ xi wħud li jużaw il-ħin tagħhom sew.—Prov. 11:14.

IBQAʼ ‘AGĦMILHA MAL-GĦORRIEF’

15. Waqt li tkun għaddej bil-kors, liema sfidi tistaʼ tiffaċċja?

¹⁵ L-isfida. Meta tkun għaddej bil-kors, sħabek tal-iskola jistgħu jibdew jistidnuk biex toħroġ magħhom. Forsi tkun tixtieq li tmur. Wara kollox, taqblu fuq ħafna affarijiet, speċjalment minħabba li tqattaʼ ħafna ħin magħhom l-iskola. Forsi saħansitra tħoss li taqbel iktar ma’ sħabek tal-iskola milli ma’ xi aħwa. Imma hemm bżonn li toqgħod attent. Għalkemm taqbel ma’ sħabek tal-klassi fuq xi affarijiet, int differenti minnhom għax trid togħġob lil Ġeħova u huma le. U iktar ma tqattaʼ ħin magħhom, iktar tistaʼ tibda taħsibha bħalhom. (1 Kor. 15:33) Hekk ġralu ħu jismu Michael, li ħa kors t’erbaʼ snin biex isir electrician. Hu jgħid, “Kont inqattaʼ iktar minn 40 siegħa fil-ġimgħa ma’ sħabi tax-xogħol li kienu jitkellmu ħażin, jisimgħu diski ħżiena, u li ma jurux rispett lejn in-nisa. Bdejt naħseb li dak li jgħidu u jagħmlu ma kienx daqshekk ħażin.”

16. Xi jfisser li ‘tagħmilha mal-għorrief’? (Proverbji 13:20)

¹⁶ Aqra Proverbji 13:20. Il-Bibbja twissina dwar il-periklu taʼ li nagħmluha ma’ kumpanija ħażina. Mill-banda l-oħra, “min jagħmilha mal-għorrief se jsir għaref.” Dan juri b’mod ċar li aħna ninfluwenzaw ruħna skont ma’ min nagħżlu li nkunu, kemm għat-tajjeb u kemm għall-ħażin. Għalhekk, agħżel ħbieb li jħobbu lil Ġeħova bħalek u li jixtiquk tkun vera ferħan.—Slm. 101:​6, 7; 119:63.

17. X’tistaʼ tagħmel biex tevita kumpanija ħażina?

¹⁷ Dak li tistaʼ tagħmel qabel tkompli l-iskola. Iddeċiedi kemm se tqattaʼ ħin u kemm se tkun close ma’ sħabek tal-iskola. Xhud jismu Trenton jgħid: “Inkun dħuli ma’ sħabi tal-klassi imma ma nqattax ħin magħhom wara l-iskola. Huma biss sħabi tal-klassi u mhux ħbieb close tiegħi.” Int x’se tiddeċiedi li tagħmel? Biex twieġeb din il-mistoqsija saqsi lilek innifsek: ‘Fis-snin taʼ qabel meta kont l-iskola, kif għamilt dan?’ Jekk tħoss li fil-passat stajt għamilt xi ħaġa aħjar, x’tistaʼ tirranġa? Kun determinat li ‘tibqaʼ tagħmilha mal-għorrief’ u tevita li tagħmilha ma’ dawk li ma jħobbux lil Ġeħova.d

18. Liema mistoqsijiet għandek issaqsi lilek innifsek? (Ara wkoll l-istampa.)

¹⁸ B’mod regulari eżamina lilek innifsek billi tistaqsi: ‘Qed insir wisq close ma’ tal-klassi? L-affarijiet li jagħmlu, il-kliem li jgħidu, u l-attitudni tagħhom qegħdin jaffettwaw kif nitkellem u naħseb? Ġeħova kif iħossu dwar il-ħbiberija tiegħi ma’ sħabi tal-iskola?’ (Slm. 1:1) Jekk tinduna li għandek bżonn tbiddel xi ħaġa, agħmilha malajr. Kun ċert li l-aqwa ħbieb tiegħek iħobbu lil Ġeħova bħalma tħobbu inti. U żżommx lura milli tagħti xhieda lil sħabek tal-iskola. Int għandek l-aqwa opportunità biex tkellimhom dwar Ġeħova u l-Bibbja.

AĦSEB BIL-QUDDIEM BIEX TIBQAʼ TOGĦĠOB LIL ĠEĦOVA

19. Kif tistaʼ tipprepara lilek innifsek biex tibqaʼ togħġob lil Ġeħova waqt li tkompli l-iskola? Agħti eżempju.

¹⁹ Persuna li tkun sejra hike tagħmel ċert minn xi affarijiet qabel ma tibda. Għalkemm hi ma tkunx tistaʼ tgħid xi sfidi se tiffaċċja, hi tkun b’saħħitha biżżejjed, tilbes ħwejjeġ addattati, u tkun taf fejn sejra. Bl-istess mod, ipprepara lilek innifsek hekk kif tkun qed tieħu l-kors. Żomm il-ħbiberija tiegħek ma’ Ġeħova b’saħħitha billi tilbes “l-armatura sħiħa mingħand Alla,” u ftakar għala tixtieq tkompli tistudja. Il-mira tiegħek m’għandhiex tkun li ssir sinjur jew issir xi ħadd importanti f’din id-dinja, imma li togħġob lil Ġeħova f’kull ħaġa li tagħmel.—Efes. 6:​11-13; 1 Kor. 9:​26, 27; 10:31.

20. Kif tistaʼ ‘tkompli teżamina jekk intix qed tgħix fi qbil mal-fidi tiegħek f’Alla’?

²⁰ Il-Bibbja tħeġġiġna: “Komplu eżaminaw jekk intomx qed tgħixu fi qbil mal-fidi tagħkom f’Alla. Komplu agħtu prova taʼ dak li intom.” (2 Kor. 13:5) Tistaʼ tagħmel dan waqt li tkompli l-iskola. B’liema mod? Billi b’mod regulari, tagħmel eżami tiegħek innifsek biex tara kif int sejjer. Pereżempju, qed iżżomm rutina spiritwali tajba? Qed toqgħod attent li l-mod kif taħseb mhux jiġi influwenzat mill-mod taʼ kif jaħsbu n-nies fid-dinja? Qed tuża l-ħin sew? Qed tagħżel ħbieb mill-kongregazzjoni u tevita kumpanija ħażina? Dawn huma mistoqsijiet li trid issaqsi lilek innifsek jekk qiegħed l-iskola, fuq il-post tax-xogħol, jew xi mkien ieħor. Agħmel ċert li jibqaʼ jkollok ħbiberija b’saħħitha ma’ Ġeħova f’kull ċirkustanza li tistaʼ tiffaċċja. Serraħ moħħok li Ġeħova se jbierek l-isforzi tiegħek.—Prov. 3:​5, 6.