Ittra Mingħand il-​Ġemgħa li Tiggverna

Għeżież Xhieda taʼ Ġeħova Sħabna:

Xi żminijiet eċċitanti qed ngħixu fihom! U x’ferħ qed ingawdu! Aħna tassew nieħdu gost naħdmu flimkien magħkom l-​għeżież ħutna—“spalla maʼ spalla,” biex ngħidu hekk—f’li nagħtu l-​akbar xhieda li qatt kien hawn lil Missierna tas-​sema, Ġeħova.—Sof. 3:9; Ġw. 14:12.

Il-​ferħ tagħna f’li naqdu lil Ġeħova ma jfissirx li aħna ma ngħaddux minn diffikultajiet serji. Matul is-​sena taʼ servizz li għaddiet, xi wħud minnkom ġarrabtu tbatijiet minħabba terremoti, għargħar, uragani, u diżastri naturali oħrajn li jheddu l-​ħajja. (Mt. 24:7) Ħafna jissieltu kuljum mal-​effetti li jħalluhom bla saħħa tal-​mard u l-​età avanzata. Ilkoll kemm aħna rridu nħabbtu wiċċna mal-​“uġigħ” li dejjem jiżdied. (Mt. 24:8) F’għadd taʼ pajjiżi, inkluż l-​Armenja, l-​Eritrea, u l-​Korea t’Isfel, ħafna minn ħutna jiġu mitfugħin il-​ħabs minħabba l-​fidi tagħhom.—Mt. 24:9.

X’għenna nżommu attitudni pożittiva minkejja dawn id-​diffikultajiet? L-​iskrittura għas-​sena 2010 fakkritna f’aspett importanti: ‘L-​imħabba kollox tissaporti. L-​imħabba ma tbatti qatt.’ (1 Kor. 13:7, 8) Iva, l-​imħabba tagħna għal xulxin—kif ukoll l-​imħabba tagħna għal Ġeħova—issaħħaħna biex nissaportu b’suċċess.

Ħafna li jsostnu li huma Kristjani jibqgħu mbellhin meta jaraw il-​kobor u l-​konsistenza tax-​xogħol tal-​ippritkar tagħna. Għalkemm forsi ma jaqblux mat-​twemmin u t-​tagħlim tagħna, xi wħud ġew imqanqlin jistqarru, “Intom qed tagħmlu x-​xogħol li suppost qed nagħmlu aħna!” X’inhu aspett wieħed li jgħin lix-​Xhieda taʼ Ġeħova jkomplu jippritkaw jum wara l-​ieħor? Għal darb’oħra t-​tweġiba hi l-​imħabba. Bħal Missierna tas-​sema, aħna ma rridu lil ħadd jinqered. (2 Pt. 3:9) Ix-​xewqa tagħna li kulħadd jasal għall-​indiema tidher fil-​quċċata ġdida taʼ 7,508,050 pubblikatur li ġiet rapportata matul is-​sena taʼ servizz li għaddiet. Liema organizzazzjoni reliġjuża oħra għandha daqstant nies li b’ħeġġa joffru ruħhom minn jeddhom biex joħorġu jippritkaw?

Aħna niġu inkuraġġiti meta naraw it-​twettiq li għadu għaddej tal-​profezija dokumentata minn Isaija: “Irid iseħħ li fl-​aħħar parti tal-​jiem il-​muntanja tad-​dar taʼ Ġeħova ssir stabbilita fis-​sod ’il fuq mill-​quċċata tal-​muntanji, u titgħolla ’l fuq mill-​għoljiet; u lejha jiġru l-​ġnus kollha.” (Is. 2:2-​4) Fost il-​folol kbar li qed jiġru lejn id-​dar taʼ Ġeħova hemm il-​294,368 ruħ li tgħammdu matul is-​sena taʼ servizz li għaddiet. Nilqgħu lil dawn l-​uħud għeżież fil-​familja tagħna. Jalla l-​imħabba Kristjana tagħna tqanqalna biex inkomplu ngħinuhom jiġġieldu kontra l-​attakki tal-​għadu tagħna Satana x-​Xitan.—1 Pt. 5:8, 9.

Nhar it-​Tlieta, 30 taʼ Marzu, 2010, kien hemm quċċata ġdida taʼ 18,706,895 ruħ li attendew it-​Tifkira. Dan jindika li hemm il-​potenzjal li saħansitra miljuni oħrajn jingħaqdu magħna f’li nqimu lil Ġeħova. Kemm nistgħu nkunu ferħanin li Ġeħova għadu ma ġabx din is-​sistema mill-​agħar fit-​tmiem! Sadanittant, l-​imħabba tagħna tgħinna nkomplu nissaportu.—2 Tess. 3:5.

Il-​Konvenzjonijiet Distrettwali “Ibqaʼ Qrib taʼ Ġeħova!” li l-​biċċa l-​kbira minnhom inżammu madwar id-​dinja fl-​2010, saħħew ir-​relazzjoni tagħna maʼ Missierna tas-​sema, Ġeħova. Kemm huwa minnu l-​kliem tas-​salmista: “Hieni l-​poplu li Alla tiegħu hu Ġeħova!” (Salm 144:15) Hemm x’hemm lest għalina fil-​futur, aħna nħossuna fiduċjużi li jekk għandna lil Ġeħova maġenbna, m’għandna xejn affattu minn xiex nibżgħu. (Salm 23:4) Ġeħova dalwaqt, permezz t’Ibnu, se “jkisser l-​għemejjel tax-​Xitan.” (1 Ġw. 3:8) Għandna sebaʼ mitt sena biex jasal dak il-​jum! Imma sadanittant, għandna ħafna xogħol x’nagħmlu.—1 Kor. 15:58.

Kun ċert li aħna “bla heda” dejjem insemmukom fit-​talb tagħna. (Rum. 1:9) Jalla ‘żżommu ruħkom fl-​imħabba t’Alla, waqt li qed tistennew il-​ħniena tal-​Mulej tagħna Ġesù Kristu bil-​ħajja taʼ dejjem quddiem għajnejkom.’—Ġuda 21.

Aħna nħobbukom kollha!

Ħutkom,

Il-​Ġemgħa li Tiggverna tax-​Xhieda taʼ Ġeħova