Kun Kuraġġuż u Leali bħal Benaja

Benaja kien gwerrier kuraġġuż li qeda lir-Re David u r-Re Salamun. Għalkemm Benaja kien it-tifel taʼ qassis u normalment ma kienx imur għall-gwerra u juża l-armi, hu xorta ġġieled fil-gwerer taʼ Ġeħova. Hu wera kuraġġ kbir. Pereżempju, Benaja qatel iljun f’ħofra u rebaħ lil ġgant armat. David tant kien jafda lil Benaja li għamlu l-kap tal-gwardji persunali tiegħu.—2 Sam. 23:​20-23.

Benaja baqaʼ leali lejn David meta rribellaw Absalom u Adonija. (2 Sam. 8:18; 15:18; 1 Slat. 1:8) Meta David xjaħ, hu baqaʼ leali lejh billi għamel ċert li Salamun isir re. (1 Slat. 1:​32-40) Iva, Benaja kien leali lejn Ġeħova u lejn dawk li Ġeħova għażel, anki meta oħrajn m’għamlux hekk.

Aħna wkoll għandna bżonn il-kuraġġ biex niġġieldu kontra l-għadu b’saħħtu tagħna, Satana, u dawk li jappoġġawh. U hemm bżonn li nkunu determinati li nibqgħu ngħixu fi qbil mal-livelli taʼ Ġeħova. (Efes. 6:11; 1 Pt. 5:​8, 9) Anki jekk xi wħud jagħżlu li jitilqu lil Ġeħova, aħna nibqgħu leali lejh u fiduċjużi li hu se jippremjana.—2 Sam. 22:26.