Jinstabu Teżori Spiritwali fil-​Ginea

GĦAL bosta sekli, l-​esploraturi rriskjaw ħajjithom biex ifittxu t-​teżori u lgħana. Uħud kuraġġużi li waslu l-​Ginea, fl-​Afrika tal-​Punent, sabu żewġ tipi differenti ħafna taʼ rikkezzi​—materjali u spiritwali. Il-​pajjiż, mogħni bi djamanti, deheb, trab tal-​ħadid, u bauxite taʼ kwalità għolja (il-materjal li minnu jieħdu l-​aluminju), għandu popolazzjoni taʼ iktar minn disaʼ miljun Ginejan.

Għalkemm ir-​reliġjonijiet tal-​Kristjaneżmu m’humiex predominanti fil-​pajjiż, il-​qima hija importanti, u ħafna jgħożżu t-​teżori spiritwali. X’inhuma eżattament dawn it-​teżori? Dawn huma l-​qaddejja leali taʼ Ġeħova, deskritti f’Ħaggaj 2:7 bħala “l-​ġid kollu tal-​popli.”

Teżori Spiritwali

It-​tħaffir fil-​fond fl-​art fit-​tfittxija għal teżori moħbijin tassew jirrikjedi sforz. Bl-​istess mod, fil-​ministeru Kristjan, hemm bżonn taʼ sforz ħabrieki biex jinstabu teżori spiritwali. Fil-​Ginea, ix-​xogħol taʼ l-​ippridkar tas-​Saltna beda fiċ-​ċentru tal-​pajjiż kmieni fis-​snin 50 u ma laħaqx Conakry, il-​belt kapitali, sal-​bidu tas-​snin 60. Issa, fil-​pajjiż kollu, hemm madwar 900 Xhud taʼ Ġeħova f’21 kongregazzjoni u grupp.

Il-missjunarji waslu fl-​1987 u ħadmu spalla maʼ spalla maʼ l-​unika kongregazzjoni f’Conakry. Issa hemm iktar minn 20 missjunarju fil-​belt kapitali u fiċ-​ċentru tal-​pajjiż. B’mod żeluż, huma jinkuraġġixxu l-​kongregazzjonijiet u jieħdu sehem fil-​ministeru flimkien maʼ l-​aħwa tal-​lokal.

Luc, li jgħix f’Conakry, esperjenza l-​ferħ meta studja l-​Bibbja m’Albert, tabib żagħżugħ. Albert kien fittex il-​verità f’diversi reliġjonijiet, u kien involut fi prattiki spiritistiċi. Hu kien jilbes ċurkett li kien tah wieħed li jikkuntattja l-​ispirti bil-​garanzija li dan kellu jġiblu l-​fortuna. Wara li ddiżappunta ruħu ferm mit-​tfittxija tiegħu għar-​reliġjon il-​vera, Albert rema ċ-​ċurkett li kellu u talab: “Alla, jekk int teżisti, agħmel li nsir nafek u naqdik. Inkella, jien se ngħix ħajti skond ix-​xewqat tiegħi stess.” Ftit taż-​żmien wara, Albert kien qed iżur id-​dar t’oħtu u beda jismaʼ lil waħda Xhud taʼ Ġeħova tikkonduċi studju tal-​Bibbja man-​neputija tiegħu. Malajr saru arranġamenti biex Luc jibda studju tal-​Bibbja m’Albert.

Kull ġimgħa, Luc bil-​ferħ kien jimxi għal iktar minn 5 kilometri ’l hemm u lura biex jikkonduċi l-​istudju. Għalkemm Luc kien irċieva ftit li xejn edukazzjoni formali, Albert, gradwat mill-​università, baqaʼ impressjonat ferm bil-​fidi soda li Luc kellu fl-​Iskrittura u bl-​applikar prattiku taʼ l-​għarfien mill-​Bibbja. Kemm kien ferħan Albert li sar jaf li t-​tbatija tal-​bniedem m’hijiex tort t’Alla iżda li, għall-​kuntrarju, Ġeħova għandu l-​iskop li jtemm it-​tbatija kollha u li jbiddel l-​art f’ġenna. (Salm 37:​9-​11) Il-​veritajiet Bibliċi flimkien mal-​kondotta mill-​aqwa li hu osserva fost il-​membri tal-​kongregazzjoni messew qalb Albert.

Madankollu, bħalma djamant fl-​istat naturali tiegħu jrid jiġi maqtugħ b’reqqa li ma bħalha minn ħaddiem tas-​sengħa sabiex ileqq, hekk ukoll Albert kellu bżonn ineħħi bosta attitudnijiet ħżiena tad-​dinja sabiex iġib ħajtu fi qbil mal-​livelli ġusti t’Alla. Hu ma baqax jikkonsulta lil dawk li jikkuntattjaw l-​ispirti, waqaf jabbuża mill-​alkoħol, u qataʼ għalkollox il-​logħob taʼ l-​ażżard. Albert sabha iktar diffiċli li jieqaf ipejjep. Fl-​aħħar, meta hu talab bil-​ħrara lil Ġeħova għall-​għajnuna, hu rnexxielu. Sitt xhur wara llegalizza ż-​żwieġ tiegħu u martu bdiet tistudja l-​Bibbja. Issa t-​tnejn huma aduraturi mgħammdin taʼ Ġeħova.

Martin huwa djamant spiritwali ieħor. Hu beda jistudja l-​Bibbja f’Guéckédou meta kellu 15-il sena. Il-​ġenituri Kattoliċi tiegħu bdew jopponulu għax beda jattendi l-​laqgħat tax-​Xhieda taʼ Ġeħova. Huma qerdu l-​letteratura Biblika taʼ Martin, sawtuh, u keċċewh mid-​dar. Bħalma djamant jifforma meta l-​karbonju jitqiegħed taħt pressjoni estrema, hekk ukoll limħabba taʼ Martin għall-​verità tal-​Bibbja ssaħħet b’riżultat taʼ l-​oppożizzjoni. Maż-​żmien, il-​ġenituri tiegħu ma baqgħux daqshekk ebsin miegħu u hu reġaʼ mar lura d-​dar. X’wassal għal din il-​bidla fl-​attitudni tagħhom? Huma nnotaw id-​differenza kbira bejn il-​kondotta taʼ Martin u dik taʼ ħutu iżgħar li kienu żviluppaw spirtu ribelluż u kienu spiċċaw involuti fl-​immoralità sesswali. Konvint li l-​fidi l-​ġdida taʼ Martin kienet taʼ ġid għalih, missieru kien jilqaʼ l-​membri tal-​kongregazzjoni fid-​dar. Omm Martin irringrazzjat lill-​aħwa ħafna drabi għal dak kollu li għamlu biex jgħinu lil binha. Martin tgħammed meta kellu 18-il sena, u iktar tard attenda l-​Iskola tat-​Taħriġ Ministerjali. Issa qed jaqdi bħala pijunier speċjali.

Rikkezzi Spiritwali Importati

Filwaqt li l-​Ginea tesporta ħafna mir-​riżorsi naturali tagħha, ftit mir-​rikkezzi spiritwali tagħha ġew “importati.” Ħafna nies emigraw minn pajjiżi Afrikani oħra, spiss minħabba raġunijiet ekonomiċi. Oħrajn ġew biex jaħarbu minn gwerer kefrin u li ilhom għaddejjin.

Ernestine, mill-​Kamerun, waslet il-​Ginea 12-il sena ilu. Hi studjat max-​Xhieda taʼ Ġeħova u attendiet il-​laqgħat għal ħafna snin, mingħajr ma tgħammdet. Fl-​2003, għajnejha mtlew bid-​dmugħ hekk kif rat il-​magħmudija f’assemblea tas-​circuit tax-​Xhieda taʼ Ġeħova. Maħkuma minn sentimenti taʼ ħtija, hi talbet lil Ġeħova: “Issa għandi 51 sena, u m’għamilt xejn tajjeb għalik. Irrid naqdik.” Wara, Ernestine aġixxiet fi qbil mat-​talba umli tagħha. Hi spjegat lir-​raġel li kienet tgħix miegħu li setgħu joqogħdu flimkien biss jekk jiżżewġu b’mod legali. Hu qabel, u iktar tard hi bkiet biki taʼ ferħ fil-​magħmudija tagħha stess f’Novembru taʼ l-​2004.

Sa minn kmieni fis-​snin 90, il-​Ginea laqgħet eluf taʼ refuġjati mil-​Liberja u s-​Sierra Leone, inkluż mijiet taʼ qaddejja taʼ Ġeħova. Ftit wara li jaslu f’kamp tar-​refuġjati, l-​aħwa jieħdu ħsieb li jattendu l-​laqgħat b’mod regulari, jorganizzaw ix-​xogħol taʼ l-​ippridkar, u jibnu Sala tas-​Saltna. Xi wħud saru qaddejja taʼ Ġeħova waqt li kienu fil-​kampijiet tar-​refuġjati. Isaac hu wieħed minnhom. Wara l-​magħmudija tiegħu, lil Isaac ġietu l-​possibbiltà li jerġaʼ jkollu x-​xogħol li kellu qabel maʼ kumpanija kbira Liberjana. Minflok, hu għażel li jibqaʼ fil-​kamp tar-​refuġjati taʼ Lainé bħala pijunier regulari. Hu jispjega: “Issa m’għandix għalfejn nitlob permess mill-​imgħallem biex nattendi l-​laqgħat jew xi assemblea. Jien ħieles li naqdi lil Ġeħova.” F’Diċembru taʼ l-​2003 nżammet konvenzjoni distrettwali f’dan il-​kamp fl-​imwarrab għall-​150 Xhud li jgħixu fost it-​30,000 refuġjat. B’ferħ, attendew 591 ruħ, inkluż disaʼ persuni neqsin mis-​smigħ li segwew il-​programm bil-​lingwa tas-​sinjali. Tgħammdu tnax. L-​aħwa apprezzaw ferm l-​isforzi li saru biex jiġi provdut l-​ikel spiritwali għalihom.

“Il-​Ġid” Jagħmel il-​Bidliet Meħtieġa

Ebda ostaklu ma jidher li hu kbir wisq għal dawk li jfittxu d-​deheb u d-​djamanti. Madankollu, titgħaxxaq tara l-​isforzi li jagħmlu wħud ġodda biex jegħlbu l-​ostakli kollha sabiex jaqdu lil Ġeħova. Ikkunsidra l-​każ taʼ Zainab.

Fl-età taʼ 13-il sena, Zainab kienet imġiegħla taħdem bħala lsira. Hi ttieħdet lejn il-​Ginea mid-​dar tagħha f’pajjiż ieħor taʼ l-​Afrika tal-​Punent. Meta kellha 20 sena, hi semgħet il-​messaġġ tal-​Bibbja. Hi kienet ħerqana biex tapplika dak li kienet qed titgħallem.

Kien diffiċli għal Zainab biex tattendi l-​laqgħat Kristjani taʼ qima. Iżda hi apprezzat ferm il-​laqgħat u kienet determinata li ma titlifhomx. (Ebrej 10:​24, 25) Hi kienet taħbi l-​kotba tagħha barra biex imbagħad tiħodhom hi u sejra għal-​laqgħat. F’diversi okkażjonijiet, hi ġiet imsawta bl-​aħrax mis-​“sidien” tagħha talli attendiet dawn il-​laqgħat spiritwali.

Iktar tard, iċ-​ċirkustanzi nbidlu, u Zainab inħelset mill-​jasar. Hi mill-​ewwel bdiet tattendi l-​laqgħat kollha, u dan għenha tagħmel progress spiritwali malajr. Hi rrifjutat li taħdem f’xogħol b’paga tajba li kien se jwaqqafha milli tattendi l-​laqgħat u tirċievi t-​tagħlim Kristjan. Hi nkitbet fl-​Iskola tal-​Ministeru Teokratiku, saret pubblikatriċi tas-​Saltna mhix mgħammda, u iktar tard issimbolizzat id-​dedikazzjoni tagħha lil Ġeħova bil-​magħmudija fl-​ilma. Eżatt wara dan, hi bdiet taqdi bħala pijuniera awżiljarja. Sitt xhur wara applikat biex taqdi bħala pijuniera regulari.

Wara li attenda għadd taʼ laqgħat, individwu interessat qal: “Ma nħossnix fqir meta nkun hawnhekk.” Filwaqt li ħafna nies huma interessati biss fir-​rikkezzi materjali tal-​Ginea, dawk li jħobbu lil Ġeħova qed ifittxu r-​rikkezzi spiritwali bil-​ħerqa. Iva, illum “il-​ġid kollu tal-​popli” qed idur lejn il-​qima pura taʼ Ġeħova!

[Kaxxa f’paġna 8]

IL-​GINEA-2005

Quċċata fin-​numru taʼ Xhieda: 883

Studji tal-​Bibbja: 1,710

Attendenza għat-​Tifkira: 3,255

[Mappep f’paġna 8]

GINEA

Conakry

SIERRA LEONE

LIBERJA

[Stampa f’paġna 9]

Albert u Luc

[Stampa f’paġna 9]

Sala tas-​Saltna f’Conakry

[Stampa f’paġna 10]

Ernestine

[Stampa f’paġna 10]

Martin

[Stampa f’paġna 10]

Zainab

[Sors tal-Istampa f’paġna 8]

USAID