‘Ippriedka l-​Ħelsien lill-​ Imjassrin’

FIL-​BIDU tal-​ministeru tiegħu, Ġesù ddikjara li parti mill-​inkarigu tiegħu kien li ‘jippriedka l-​ħelsien lill-​imjassrin.’ (Luqa 4:18) Billi jsegwu l-​eżempju taʼ Sidhom, il-​Kristjani veri jippridkaw l-​aħbar tajba tas-​Saltna lil “bnedmin taʼ kull xorta,” u b’hekk iġibulhom ħelsien mill-​jasar spiritwali u jgħinuhom itejbu ħajjithom.—1 Timotju 2:4.

Illum dan ix-​xogħol jinkludi li nippridkaw lill-​imjassrin letterali—nies li huma fil-​ħabs minħabba diversi atti kriminali u li japprezzaw il-​fatt li jistaʼ jkollhom ħelsien spiritwali. Gawdi dan ir-​rapport inkuraġġanti dwar l-​attivitajiet taʼ l-​ippridkar tax-​Xhieda taʼ Ġeħova fil-​ħabsijiet fl-​Ukraina u f’postijiet oħra fl-​Ewropa.

Minn Drogati Jsiru Kristjani

Serhiia għandu 38 sena u 20 sena minnhom qattagħhom fil-​ħabs. Hu saħansitra spiċċa l-​iskola fil-​ħabs. Hu jgħid: “Snin ilu ġejt mitfugħ il-​ħabs minħabba qtil, u għad baqagħli iktar żmien xi nqattaʼ hawnhekk. Fil-​ħabs aġixxejt taʼ bùli u l-​ħabsin l-​oħra kienu jibżgħu minni.” Kien dan iġagħlu jħossu ħieles? Le. Għal ħafna snin, Serhii kien skjav tad-​drogi, l-​alkoħol, u t-​tabakk.

Imbagħad, ħabsi ieħor beda jaqsam il-​verità tal-​Bibbja miegħu. Kien bħal raġġ taʼ dawl fid-​dlam. Ftit xhur wara, hu ħeles mill-​vizzji li kellu, sar predikatur taʼ l-​aħbar tajba, u tgħammed. Issa Serhii għandu ħajja bieżla fil-​ħabs għax jaqdi bħala ministru full-time taʼ Ġeħova. Hu għen lil sebaʼ kriminali biex ibiddlu ħajjithom u jsiru l-​aħwa spiritwali tiegħu. Sitta minnhom ħarġu mill-​ħabs, iżda Serhii għadu hemm. Hu m’huwiex imdejjaq minħabba dan għax iħossu ferħan li jistaʼ jgħin lil oħrajn biex jinħelsu mill-​jasar spiritwali.—Atti 20:35.

Wieħed mill-​istudenti taʼ Serhii kien Victor, li qabel kien drogat u traffikant tad-​droga. Meta ħareġ mill-​ħabs, Victor kompla jagħmel progress spiritwali u eventwalment iggradwa mill-​Iskola tat-​Taħriġ Ministerjali fl-​Ukraina. Issa hu jaqdi bħala pijunier speċjali fil-​Moldova. Victor jgħid: “Bdejt inpejjep meta kelli 8 snin, nabbuża mill-​alkoħol meta kelli 12, u nieħu d-​drogi meta kelli 14. Ridt inbiddel ħajti, iżda l-​isforzi kollha tiegħi fallew. Imbagħad, fl-​1995, hekk kif jien u marti konna qegħdin nippjanaw biex nitbiegħdu mill-​ħbieb ħżiena li kelli, kriminal marid bil-​ġenn tal-​moħħ qatel lil marti bid-​daqqiet taʼ sikkina. Ħajti saret assolutament miżerabbli. ‘Fejn hi marti issa? X’jiġri meta persuna tmut?’ Bqajt nistaqsi l-​mistoqsijiet iżda ma stajtx insib it-​tweġibiet. Ħadt iktar u iktar drogi biex nimla l-​vojt. Ġejt arrestat minħabba li kont nittraffika d-​droga u ġejt kundannat għal ħames snin ħabs. Hemmhekk, Serhii għenni biex insib it-​tweġibiet. Ipprovajt naqtaʼ d-​drogi bosta drabi, iżda kien biss bl-​għajnuna tal-​Bibbja li issa rnexxieli nagħmel dan. Il-​Kelma t’Alla tant hija qawwija!”—Ebrej 4:12.

Kriminali Ħorox Jinbidlu

Vasyl qatt ma ħa d-​drogi, iżda hu ma ħelisx mill-​jasar. “Il-​kickboxing kien il-​vizzju tiegħi,” jispjega hu. “Ħarriġt lili nnifsi biex insawwat lin-​nies mingħajr ma nħalli ebda tbenġil.” Vasyl uża l-​modi vjolenti tiegħu biex jisraq lin-​nies. “Intbgħatt il-​ħabs tliet darbiet, u minħabba dan marti talbet id-​divorzju. Matul l-​aħħar ħames snin li kont il-​ħabs, bdejt naqra l-​letteratura tax-​Xhieda taʼ Ġeħova. Dan qanqalni biex naqra l-​Bibbja, iżda xorta waħda kont involut f’dak li kont tassew inħobb nagħmel—il-​kickboxing.

“Madankollu, wara li kont ilni naqra l-​Bibbja għal sitt xhur, inbdilt minn ġewwa. Meta kont nirbaħ ġlieda ma bqajtx inħoss is-​sodisfazzjon li kont inħoss qabel. Għalhekk, bdejt nanalizza ħajti bl-​għajnuna taʼ dak li hemm f’Isaija 2:4 u rrealizzajt li jekk ma naġġustax il-​mod kif naħsibha, kont se nqattaʼ l-​kumplament taʼ ħajti fil-​ħabs. Għalhekk, irmejt l-​apparat kollu li kelli tal-​ġlied u bdejt naħdem fuq il-​personalità tiegħi. Ma kienx faċli, iżda l-​meditazzjoni u t-​talb bil-​mod il-​mod għenuni biex nieqaf mill-​vizzji ħżiena li kelli. Xi drabi, tlabt bil-​ħerqa lil Ġeħova bid-​dmugħ f’għajnejja biex jagħtini s-​saħħa ħalli naqtaʼ għalkollox il-​vizzju li kelli. Fl-​aħħar irnexxieli.

“Wara li ħriġt mill-​ħabs, erġajt ngħaqadt mal-​familja tiegħi. Issa naħdem f’minjiera tal-​faħam. Dan jagħtini biżżejjed ħin biex nieħu sehem fix-​xogħol taʼ l-​ippridkar flimkien maʼ marti u nwettaq ir-​responsabbiltajiet tiegħi fil-​kongregazzjoni.”

Mykola u ħbiebu serqu bosta banek fl-​Ukraina. Minħabba dan Mykola spiċċa l-​ħabs għal għaxar snin. Qabel ma ntefaʼ l-​ħabs, hu kien mar darba biss il-​knisja—biex jipprepara ħalli jisraqha. L-​affarijiet ma rnexxewx, iżda dik iż-​żjara ġiegħlet lil Mykola jemmen li l-​Bibbja kienet mimlija stejjer tad-​dwejjaq dwar qassisin Ortodossi, xemgħat, u festi reliġjużi. Hu jgħid: “Ma nafx eżatt għaliex, iżda bdejt naqra l-​Bibbja. Bqajt mistagħġeb meta skoprejt li ma kien fiha xejn minn dak li kont immaġinajt!” Hu talab għal studju tal-​Bibbja u tgħammed fl-​1999. Meta tħares lejh issa, bilkemm temmen li dan il-​qaddej ministerjali umli darba kien ħalliel tal-​banek armat u mill-​agħar!

Vladimir ngħata s-​sentenza tal-​mewt. Waqt li kien qed jistenna l-​esekuzzjoni tiegħu, hu talab lil Alla u wiegħdu li jekk jinħeles kien se jaqdih. Sadanittant, inbidlet il-​liġi, is-​sentenza għall-​mewt inbidlet, u minflok kellu jqattaʼ ħajtu l-​ħabs. Biex ikun jistaʼ jżomm il-​wegħda tiegħu, Vladimir beda jfittex ir-​reliġjon vera. Hu nkiteb f’kors taʼ studju bil-​korrispondenza u rċieva d-​diploma minn knisja Avventista, iżda ma kienx sodisfatt.

Madankollu, wara li qara r-​rivisti t-​Torri taʼ l-​Għassa u Stenbaħ! fil-​librerija tal-​ħabs, Vladimir kiteb lill-​uffiċċju tal-​fergħa tax-​Xhieda taʼ Ġeħova fl-​Ukraina, u talabhom biex imorru jżuruh. Meta l-​aħwa lokali żaruh, hu kien diġà qed jikkunsidra lilu nnifsu bħala Xhud u kien qed jippriedka fil-​ħabs. Hu ġie megħjun biex jikkwalifika bħala pubblikatur tas-​Saltna. Sakemm inkiteb dan l-​artiklu, Vladimir u sebgħa oħra f’dak il-​ħabs kienu qed jistennew biex jitgħammdu. Iżda għandhom problema. Ladarba dawk il-​ħabsin li jkollhom iqattgħu l-​kumplament taʼ ħajjithom il-​ħabs jinżammu fiċ-​ċelel skond it-​twemmin tagħhom, Vladimir u sħabu l-​ħabsin fiċ-​ċella tiegħu huma kollha taʼ l-​istess twemmin. Għalhekk, lil min jistgħu jippridkaw? Huma jaqsmu l-​aħbar tajba mal-​gwardji tal-​ħabs u permezz taʼ l-​ittri.

Mill-​Ukraina, Nazar mar joqgħod iċ-​Ċekoslovakkja, fejn ngħaqad maʼ grupp taʼ ħallelin. Minħabba dan wasal biex qattaʼ tliet snin u nofs il-​ħabs. Waqt li kien il-​ħabs, hu wieġeb għaż-​żjajjar tax-​Xhieda taʼ Ġeħova mill-​belt taʼ Karlovy Vary, tgħallem il-​verità, u nbidel totalment. Meta ra dan, wieħed mill-​gwardji tas-​sigurtà qal lil wieħed mill-​ħabsin li kienu maʼ Nazar: “Kieku intom kollha ssiru bħal dak l-​Ukrain, kieku fl-​aħħar inkun nistaʼ nbiddel xogħli.” Ieħor qal: “Dawn ix-​Xhieda taʼ Ġeħova huma tassew esperti. Fil-​ħabs wieħed jidħol bħala kriminal, imma joħroġ raġel onest.” Issa Nazar mar lura lejn daru. Hu tgħallem is-​sengħa taʼ mastrudaxxa u żżewweġ, u flimkien maʼ martu qed jaqdi fil-​ministeru full-time. Kemm hu grat għaż-​żjajjar fil-​ħabs li sarulu mix-​Xhieda!

Apprezzament Uffiċjali

Il-​ħabsin m’humiex l-​uniċi nies li huma grati għas-​servizz provdut mix-​Xhieda taʼ Ġeħova. Miroslaw Kowalski, kelliemi għal wieħed mill-​ħabsijiet fil-​Polonja, qal: “Aħna napprezzaw ħafna ż-​żjajjar tagħhom. Xi wħud mill-​ħabsin ġejjin minn ħajja taʼ swied il-​qalb. Probabbilment, huma qatt ma ġew trattati bħala bnedmin. . . . L-​għajnuna [tax-Xhieda] għandha valur kbir għax m’għandniex biżżejjed ħaddiema u nies li jedukaw lill-​ħabsin.”

Gwardjan taʼ ħabs ieħor fil-​Polonja kiteb lill-​uffiċċju tal-​fergħa, u talab lix-​Xhieda biex iżidu l-​attività tagħhom fil-​ħabs tiegħu. Għala? Hu spjega: “Żjajjar iktar spissi mir-​rappreżentanti tat-​Torri taʼ l-​Għassa jistgħu jgħinu lill-​ħabsin biex jiżviluppaw kwalitajiet soċjevoli taʼ min jixtieqhom, u b’hekk ma jibqgħux aggressivi bejniethom.”

Gazzetta Ukraina rrapportat dwar ħabsi li kellu d-​dipressjoni u li pprova jikkommetti suwiċidju iżda mbagħad irċieva l-​għajnuna mix-​Xhieda taʼ Ġeħova. “Bħalissa, dan ir-​raġel bil-​mod il-​mod qed jirkupra emozzjonalment,” jgħid ir-​rapport. “Hu jżomm mar-​rutina tal-​ħabs u huwa t’eżempju għal ħabsin oħrajn.”

Benefiċċji Wara li Joħorġu mill-​Ħabs

Il-​benefiċċji tax-​xogħol li jsir mix-​Xhieda taʼ Ġeħova m’huwiex limitat għall-​ħabs biss. Wara li joħorġu mill-​ħabs, il-​ħabsin ikomplu jibbenefikaw mill-​għajnuna tax-​Xhieda. Żewġ Xhieda, Brigitte u Renate, ilhom jgħinu lill-​ħabsin nisa b’dan il-​mod għal diversi snin. Gazzetta Ġermaniża, Main-Echo Aschaffenburg, tirrapporta dwarhom: “Huma jieħdu ħsieb il-​ħabsin minn tlieta sa ħames xhur wara li joħorġu mill-​ħabs, u jinkuraġġuhom biex isibu skop f’ħajjithom. . . . Huma ġew rikonoxxuti uffiċjalment bħala uffiċjali volontiera li jieħdu ħsieb il-​ħabsin wara li joħorġu mill-​ħabs. . . . Għandhom ukoll kuntatt inkuraġġanti u pożittiv maʼ min jaħdem fil-​ħabs.” Għadd taʼ persuni ddedikaw ħajjithom lil Ġeħova bħala riżultat taʼ dan it-​tip t’għajnuna.

Anki l-​uffiċjali tal-​ħabs jibbenefikaw mix-​xogħol t’edukazzjoni mill-​Bibbja tax-​Xhieda taʼ Ġeħova. Per eżempju, Roman kien maġġur militari u psikologu f’ħabs fl-​Ukraina. Meta x-​Xhieda żaruh f’daru, hu aċċetta li jibda studju tal-​Bibbja. Imbagħad sar jaf li x-​Xhieda ma setgħux jikkuntattjaw lill-​ħabsin fejn kien jaħdem hu. Għalhekk, hu staqsa lill-​gwardjan biex jieħu permess sabiex juża l-​Bibbja fix-​xogħol tiegħu mal-​ħabsin. Ix-​xewqa tiegħu ġiet aċċettata, u madwar għaxar ħabsin urew interess. B’mod regulari, Roman kien qed jaqsam l-​għarfien li dejjem kien qed jikseb minn fuq il-​Bibbja maʼ dawn il-​ħabsin, u l-​isforzi tiegħu ġabu riżultati tajbin ħafna. Wara li nħelsu, xi wħud minnhom komplew jagħmlu progress u saru Kristjani mgħammdin. Meta ra l-​qawwa tal-​Kelma t’Alla, Roman ħa l-​istudju tiegħu iktar bis-​serjetà. Hu telaq il-​militar u kompla bl-​attivitajiet tiegħu t’edukazzjoni mill-​Bibbja. Issa hu jieħu sehem fix-​xogħol tal-​ministeru maʼ raġel li qabel kien ħabsi.

“Hawnhekk aħna ngħixu permezz tal-​Bibbja, il-​pubblikazzjonijiet tal-​Bibbja, u l-​istudju tal-​Bibbja,” kiteb wieħed ħabsi. Dan il-​kliem juri l-​bżonn li hemm f’xi ħabsijiet għal-​letteratura Biblika. Kongregazzjoni waħda fl-​Ukraina tirrapporta dwar ix-​xogħol t’edukazzjoni mill-​Bibbja li qed isir f’ħabs lokali: “L-​amministrazzjoni hija grata għal-​letteratura li nipprovdu. Aħna nagħtuhom 60 kopja taʼ kull ħarġa tat-​Torri taʼ l-​Għassa u Stenbaħ!” Kongregazzjoni oħra tikteb: “Aħna nieħdu ħsieb ħabs li għandu 20 librerija żgħira. Fornejna kull librerija bil-​pubblikazzjonijiet ewlenin tagħna. Dan ammonta għal 20 kaxxa taʼ letteratura.” F’ħabs wieħed, il-​gwardji jżommu fajl bir-​rivisti tagħna fil-​librerija biex b’hekk il-​ħabsin ikunu jistgħu jibbenefikaw minn kull ħarġa.

Fl-​2002, l-​uffiċċju tal-​fergħa fl-​Ukraina stabbilixxa dipartiment għall-​korrispondenza mal-​ħabsin. S’issa, ġew kuntattjati madwar 120 ħabs u xi kongregazzjonijiet ġew inkarigati minn dan id-​dipartiment biex jieħdu ħsiebhom. Kull xahar jirċievu madwar 50 ittra mill-​ħabsin, li bosta minnhom jitolbu letteratura jew studju tal-​Bibbja. Il-​fergħa tibagħtilhom kotba, rivisti, u browxers sakemm l-​aħwa lokali jkunu jistgħu jikkuntattjawhom.

“Żommu f’moħħkom lil dawk li qegħdin marbutin fil-​ħabs,” kiteb l-​appostlu Pawlu lill-​Kristjani sħabu. (Ebrej 13:3) Hu kien qed jirreferi għal dawk li kienu fil-​ħabs minħabba l-​fidi tagħhom. Illum, ix-​Xhieda taʼ Ġeħova jżommu f’moħħhom lil dawk li qegħdin fil-​ħabs, iżuru l-​ħabsijiet, u ‘jippridkaw il-​ħelsien lill-​imjassrin.’—Luqa 4:18.

[Nota taʼ taħt]

[Stampa f’paġna 9]

Il-​ħajt tal-​ħabs, L’viv, l-​Ukraina

[Stampa f’paġna 10]

Mykola

[Stampa f’paġna 10]

Vasyl maʼ martu, Iryna

[Stampa f’paġna 10]

Victor