X’Jistgħu Jgħallmuna l-​Għasafar

“ĦARSU lejn l-​għasafar tas-​sema; la jiżirgħu u lanqas jaħsdu u lanqas igeddsu fl-​imħażen, u madankollu Missierkom li hu fis-​smewwiet jitmagħhom! Intom ma tiswewx aktar minnhom?” (Mattew 6:26) Ġesù Kristu qal dan il-​kliem fi priedka famuża li ta fuq il-​muntanja viċin il-​Baħar tal-​Galilija. Fost dawk li kienu qed jisimgħuh ma kienx hemm biss is-​segwaċi tiegħu. Folla kbira taʼ wħud li kellhom il-​potenzjal li jsiru dixxipli u li ġew mill-​partijiet kollha tal-​pajjiż kienu preżenti. Ħafna minnhom kienu nies foqra li ġabu l-​morda għand Ġesù biex ifejjaqhom.—Mattew 4:​23–5:2; Luqa 6:​17-​20.

Wara li fejjaq lil dawk kollha li kienu morda, Ġesù dawwar l-​attenzjoni lejn l-​affarijiet iktar importanti, jiġifieri, il-​bżonnijiet spiritwali. Fost l-​affarijiet li għallem insibu dak li semmejna hawn fuq.

L-għasafar tas-​sema ilhom jeżistu għal żmien twil. Xi wħud minnhom jieklu l-​insetti, oħrajn il-​frott u ż-​żrieragħ. Jekk Alla għamel tant provvedimenti bħal dawn għall-​għasafar, kemm iktar hu kapaċi jgħin lill-​qaddejja tiegħu l-​bnedmin biex jiksbu l-​ħobża taʼ kuljum. Għandu mnejn jagħmel dan billi jgħinhom isibu xogħol sabiex ikunu jistgħu jaqilgħu l-​flus ħalli jixtru l-​ikel. Jew forsi jistaʼ jagħtihom suċċess f’li jkabbru l-​ikel tagħhom. Fi żmien taʼ xi emerġenza, Alla jistaʼ jqanqal il-​qlub taʼ ġirien u ħbieb taʼ qalb tajba biex jaqsmu l-​ikel li jkollhom maʼ wħud fil-​bżonn.

Hemm ħafna iktar x’nistgħu nitgħallmu jekk nosservaw kif jgħixu l-​għasafar. Alla ħalaq l-​għasafar b’istinti taʼ l-​għaġeb li jġagħluhom jagħmlu bejtiet fejn ikunu jistgħu jrabbu ċ-​ċkejknin tagħhom. Innota żewġ tipi differenti taʼ bejtiet. Fl-​istampa li hemm fuq ix-​xellug naraw bejta li tagħmel tip taʼ ħawwiefa magħrufa bħala l-​African rock martin. Hija mibnija fuq il-​wiċċ tal-​blat u mal-​ħajt taʼ xi dar. Is-​saqaf taʼ bejtiet bħal dawn huwa magħmul minn ġebla mqabbża ’l barra jew, kif inhu muri fl-​istampa, f’xi xifer taʼ xi bejt. L-​art tal-​bejta hija magħmula minn biċċiet żgħar tat-​tajn imwaħħlin flimkien f’forma taʼ tazza. Kemm l-​irġiel u kemm in-​nisa jaħdmu iebes biex jiġbru l-​biċċiet tat-​tajn u għandhom mnejn jieħdu ’l fuq minn xahar biex ilestu l-​bejta. Imbagħad jiksuha bil-​ħaxix u r-​rix. It-​tnejn jagħtu sehemhom f’li jitimgħu liż-​żgħar. Dik li tidher fl-​istampa t’isfel hija l-​bejta taʼ tip t’għasfur li jissejjaħ masked weaver. Dan l-​għasfur Afrikan bieżel jibni l-​bejta tiegħu billi juża weraq irqiq u strixxi taʼ ħxejjex oħra. Hu jistaʼ jlesti l-​bejta f’jum wieħed u jinseġ iktar minn 30 waħda fi staġun wieħed!

Il-lezzjoni x’inhi? Jekk Alla jagħti lill-​għasafar abbiltajiet bħal dawn u jagħtihom tant materjal biex jibnu l-​bejtiet tagħhom, kemm iktar jistaʼ jgħin lill-​qaddejja tiegħu l-​bnedmin biex jiksbu l-​post fejn jgħixu li tant għandhom bżonn. Biss, Ġesù wera li hemm bżonn xi ħaġa oħra jekk irridu lil Alla Jehovah jgħinna niksbu l-​affarijiet materjali li neħtieġu. Ġesù wiegħed: “Mela fittxu l-​ewwel is-​Saltna u l-​ġustizzja taʼ Alla, u dan kollu jingħatalkom ukoll.” (Mattew 6:33) Għandek mnejn taħseb, ‘X’inhu involut f’li nfittxu s-​Saltna t’Alla l-​ewwel?’ Ix-​Xhieda taʼ Jehovah, li jqassmu din ir-​rivista, se jkunu kuntenti jwiġbulek din il-​mistoqsija.