Tafda Int f’Alla li Hu Reali?

Spedizzjoni mibgħuta mill-​Mużew Amerikan taʼ l-​Istorja Naturali kienet fi triqitha biex tagħmel studju dwar art fl-​Artiku li l-​esploratur Robert E. Peary kien irrapporta li ra madwar sebaʼ snin qabel, fl-​1906.

MINN Cape Colgate, li jinsab propju fit-​tarfnett tal-​majjistral taʼ l-​Amerika taʼ Fuq, Peary kien osserva bħal qċaċet bojod f’art imbiegħda. Hu semmieha Crocker Land, għal wieħed minn dawk li għenuh finanzjarjament. Min jaf kemm ħassewhom eċċitati l-​membri taʼ l-​ispedizzjoni li ntbagħtet wara xi żmien meta lemħu quddiemhom medda art b’għoljiet, widien, u qċaċet miksijin bis-​silġ! Imma malajr irrealizzaw li dak li kienu qed iħarsu lejh ma kienx ħlief miraġġ Artiku. Dan l-​effett atmosferiku fuq l-​għajnejn kien qarraq bih lil Peary. Imma issa kien tard wisq, għax kienu diġà ħlew il-​ħin, l-​enerġija, u r-​riżorsi biex jiskopru xi ħaġa li ma kinitx reali.

Illum, ħafna nies juru devozzjoni u jiddedikaw il-​ħin tagħhom lil allat li jemmnu li huma reali. Fi żmien l-​appostli taʼ Ġesù, allat bħal Ermi (jew Ħermes) u Żews kienu jiġu meqjuma. (Atti 14:​11, 12) Illum, in-​nies qed iqimu miljuni taʼ allat f’reliġjonijiet bħal dawk Xintù, Ħindu, u oħrajn li jeżistu madwar id-​dinja. Tabilħaqq, sewwa sew bħalma tgħid il-​Bibbja, “hemm ħafna allat u ħafna sidien.” (1 Korintin 8:​5, 6) Jistaʼ jkun li dawn l-​allat kollha huma reali?

Allat li ‘Ma Jsalvaw’ lil Ħadd

Per eżempju, ikkunsidra x-​xbihat jew simboli li jintużaw fil-​qima. In-​nies li jafdaw fihom jew jitolbuhom biex jidħlu għalihom iqisu lil dawn l-​idoli bħala salvaturi b’poteri soprannaturali li jistgħu jippremjaw lin-​nies jew jeħilsuhom mill-​periklu. Imma jistgħu dawn verament isalvaw lil xi ħadd? Dwar dawn l-​oġġetti, is-​salmista għanna: “L-​idoli tal-​ġnus m’humiex ħlief deheb u fidda, xogħol taʼ id il-​bniedem: għandhom il-​fomm, u ma jitkellmux; għandhom l-​għajnejn, u ma jarawx; għandhom il-​widnejn, u ma jisimgħux; anqas nifs ma għandhom fi mnifsejhom.” Tabilħaqq, huma allat li ‘ma jsalvaw’ lil ħadd.—Salm 135:​15-17; Isaija 45:20.

Veru, dawk li jagħmlu dawn l-​idoli jistgħu jemmnu li xogħol idejhom għandu l-​ħajja u s-​setgħa. U dawk li jaduraw l-​idoli jpoġġu l-​fiduċja tagħhom fihom. “Iġorruh [l-idolu],” qal il-​profeta Isaija, “u jqegħduh f’postu u jibqaʼ hemm.” Hu żied: “Minn postu ma jiċċaqlaqx. Jekk xi ħadd isejjaħlu, ma jweġibx, u minn hemmu ma jeħilsux.” (Isaija 46:7) Il-​verità hi li idolu xorta jibqaʼ bla ħajja minkejja l-​fidi kbira li jkollhom dawk li għandhom fiduċja fih. Xbihat minquxa u statwi mdewbin bħal dawn huma allat bla valur.—Ħabakkuk 2:18.

Illum huwa komuni wkoll li ssib min jagħmel lil personalitajiet tad-​divertiment u taʼ l-​isports, lil sistemi politiċi, u lil ċerti mexxejja reliġjużi l-​idoli tiegħu u jagħtihom ġieħ jew iqimhom. Barra minn hekk, ħafna jagħmlu l-​flus l-​alla tagħhom. Hu x’inhu l-​każ, dwar dawn l-​idoli qed jgħidu li għandhom kwalitajiet u valuri li fir-​realtà m’għandhomx. Lil dawk li jemmnu fihom la qatt tawhom, u lanqas jistgħu jagħtuhom kulma jitolbuhom. Per eżempju, ir-​rikkezzi jistgħu jidhru li huma s-​soluzzjoni għal ħafna problemi, imma l-​qawwa tar-​rikkezzi hija qarrieqa. (Mark 4:19) Wieħed li jagħmel ir-​riċerki staqsa: “Kif jistaʼ jkun li xi ħaġa li hija daqshekk mixtieqa minn tant nies, u li hija meqjusa bħala s-​soluzzjoni taʼ kollox, wara li jirnexxilhom jiksbuha jkollha effetti differenti li jvarjaw minn diżappunt għal trawma?” Iva, biex wieħed jiġri wara r-​rikkezzi għandu mnejn li jkollu jissagrifika affarijiet li huma verament taʼ valur. Dawn jistgħu jkunu s-​saħħa fiżika tajba, il-​ħajja tal-​familja sodisfaċenti, il-​ħbieb tal-​qalb, jew ir-​relazzjoni prezzjuża mal-​Ħallieq. B’hekk l-​alla tiegħu ma jkunx ħlief ‘idolu fieragħ.’—Ġona 2:9 (2:​8, NW).

‘Ebda Tweġiba Ma Kien Hemm’

Xi bluha tkun li tasal biex tgħid li xi ħaġa hija reali meta mhix! L-​adoraturi taʼ l-​alla Bagħal fi żmien Elija dan tgħallmuh bid-​dnewwa. Huma kienu verament jemmnu li Bagħal kellu s-​setgħa li jġiegħel nar jinżel mis-​sema u jaħraq l-​annimal offrut bħala sagrifiċċju. Fil-​fatt, “bdew mis-​sbiħ sa nofsinhar isejjħu isem Bagħal u jgħajjtu: ‘Bagħal, weġibna!’” Kellu Bagħal widnejn li setgħu jisimgħu u fomm li setaʼ jitkellem? Ir-​rakkont jissokta: “Ma kien hemm ebda kelma, ebda tweġiba.” Tabilħaqq, ma kien hemm l-​“ebda widen.” (1 Slaten 18:​26, 29) Bagħal ma kienx reali, ma kienx ħaj, jew attiv.

Kemm hu vitali li nsiru nafu u nqimu lil dak Alla li hu reali! Imma min hu? U kif nistgħu nibbenefikaw jekk nafdaw fih?

[Stampi f’paġna 3]

Egingwah, sieħeb Peary, jittrombja lejn ix-​xefaq biex jara jekk jilmaħx xi art

Robert E. Peary

[Sorsi]

Egingwah: Mill-​ktieb The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Stampi f’paġna 4]

Ħafna jiġu mqarrqin bl-​affarijiet li d-​dinja qed tagħmilhom l-​idoli tagħha