“Veru Li Alla Jikkundanna lin-​Nies biex Jinħarqu fl-​Infern?”

“Qed tistudjaw it-​teoloġija?”

Din il-​mistoqsija ġiet għal għarrieda għal Joel u Carl. Iż-​żewġ ġuvintur, li jaqdu bħala volontieri fil-​kwartieri ġenerali tax-​Xhieda taʼ Jehovah fi Brooklyn, New York, kienu qed jagħtu titwila f’ħanut tal-​kotba fil-​qrib. Filwaqt li Joel kien qed jeżamina xi konkordanzi tal-​Bibbja, Carl beda jirrakkontalu esperjenza li kellu fil-​ministeru. Peress li semaʼ xi ftit minn dak li kienu qed jgħidu, wieħed raġel li kien bil-​wieqfa ħdejhom iddeċieda li jkellimhom.

Madankollu, ir-​raġel ried jistaqsihom xi ħaġa li kienet tinteressah ferm iktar minn jekk iż-​żewġ ġuvintur kinux qed jistudjaw it-​teoloġija. Hu spjegalhom: “Jiena Lhudi, u xi wħud minn sħabi li huma Kristjani qaluli li se ninħaraq fl-​infern minħabba li l-​Lhud ċaħdu lil Ġesù. Dan iħawwadni ħafna. Kastig bħal dan mingħand Alla taʼ mħabba ma jidhirx li hu ġust. Veru li Alla jikkundanna lin-​nies biex jinħarqu fl-​infern?”

Joel u Carl qalu lil dan ir-​raġel sinċier li huma jistudjaw il-​Bibbja bis-​serjetà. Huma wrewh mill-​Iskrittura li l-​mejtin m’huma konxji taʼ xejn, u li dawn sempliċement jinsabu reqdin fil-​mewt waqt li qegħdin jistennew l-​irxoxt. Għaldaqstant, la jsofru xi turment u lanqas ibatu f’xi nar taʼ l-​infern. (Salm 146:​3, 4; Koħèlet 9:​5, 10; Danjel 12:13; Ġwann 11:​11-​14, 23-​26) Wara konversazzjoni taʼ 45 minuta, ir-​raġel ta l-​indirizz tiegħu lil Joel u ’l Carl u staqsa għal iktar tagħrif fuq is-​suġġett.

Kieku l-​infern kien post taʼ turment bin-​nar, kien xi ħadd qatt se jitlob li jmur fih? Madankollu, il-​patrijarka Ġob, meta xtaq jaħrab mill-​istat imwiegħer tiegħu, talab hekk: “M’hux li kont taħbini f’Art l-​Imwiet [“fl-​infern,” Douay Version] fejn nistkenn sa ma tibred il-​korla tiegħek u tiffissali żmien li tiftakar fija.” (Ġob 14:13) B’mod ċar, Ġob ma kienx jemmen li l-​infern huwa post taʼ turment. Mhux talli hekk, talli hu fittex il-​kenn hemmhekk. Il-​mewt hija stat taʼ ineżistenza, u l-​infern tal-​Bibbja huwa l-​qabar komuni tal-​bnedmin.

Jekk tixtieq tkun taf iktar dwar x’jiġrilna meta mmutu u x’tama hemm għal wara l-​mewt, inti mistieden mill-​qalb biex twieġeb għall-​offerta li ġejja.