Hemm Ġawhar Ħaj fin-Namibja!

IN-NAMIBJA tibqaʼ sejra kważi 1,500 kilometru max-xatt fil-lbiċ taʼ l-Afrika. Il-medda max-xatt tal-pajjiż kollu tikkonsisti minn duni tar-ramel, għoljiet kollha blat, u pjanuri vasti taż-żrar. Mal-ġebel tal-bajjiet mimlijin ċagħaq hemm imħallat ħaġar prezzjuż taʼ kull kulur li wieħed jistaʼ jimmaġina. Minn żmien għal żmien jinstabu saħansitra d-djamanti hemmhekk. Imma l-pajjiż għandu xi ħaġa ferm iktar prezzjuża minn dan il-ħaġar. In-Namibja għandha ġawhar ħaj—in-nies tal-bosta gruppi nazzjonali li fiha.

L-abitanti l-iktar bikrin tan-Namibja kienu jitkellmu b’familja taʼ lingwi msejħa Kojsan. Id-diskors tagħhom kien magħruf għall-ħsejjes li jċaqċqu tiegħu. Fost dawk li jitkellmu bil-Kojsan illum hemm id-Damara, li għandhom ġilda skura, in-Nama, li għandhom ġilda ċara u huma taʼ daqs żgħir, u s-San, kaċċaturi famużi. Ħafna tribujiet suwed ġew ukoll fin-Namibja f’sekli iktar reċenti. Dawn jaqgħu taħt tliet grupp nazzjonali prinċipali: l-Ovambo (l-akbar grupp etniku fin-Namibja), il-Ħerero, u l-Kavango. L-Ewropej bdew jgħixu fin-Namibja matul is-seklu 19. Iktar immigranti waslu wara li nstabu xi djamanti fir-ramel tad-deżert.

L-abitanti tan-Namibja huma prezzjużi għaliex huma parti mid-dinja taʼ bnedmin li Alla ta lil Ibnu għaliha, u b’hekk fetaħ it-triq għal ħajja taʼ dejjem. (Ġwann 3:16) Mijiet taʼ Namibjani minn ħafna tribujiet diġà wieġbu favorevolment għall-messaġġ taʼ salvazzjoni. Dawn jistgħu jitqabblu maʼ ġawhar ħaj għaliex huma fost “[i]l-ġid kollu tal-popli” li issa qed jinġabar lejn id-dar taʼ qima li għandu Jehovah.—Ħaggaj 2:7.

Jinbeda Xogħol Spiritwali fil-Minjiera

Kien fl-1928 li ngħata bidu għall-ġbir tal-ġawhar spiritwali fin-Namibja. Matul dik is-sena, il-fergħa tas-Soċjetà (Watch Tower) fl-Afrika t’Isfel impostat 50,000 pubblikazzjoni Biblika lil diversi nies mifruxin mal-pajjiż kollu. Is-sena taʼ wara waħda mill-Kristjani midlukin mill-Afrika t’Isfel, jisimha Lenie Theron, segwiet l-interess li kien intwera. Fi żmien erbaʼ xhur hi qasmet minn naħa għal oħra tal-pajjiż vast kollu waħedha, u qassmet iktar minn 6,000 għajnuniet għall-istudju tal-Bibbja bl-Afrikaans, bl-Ingliż, u bil-Ġermaniż. Dan ix-xogħol kollu żgur li ma kienx għal xejn.

Per eżempju, ikkunsidra lil Bernhard Baade, minatur Ġermaniż. Fl-1929 irċieva provvista taʼ bajd minn bidwi li geżwer kull bajda f’paġna minn pubblikazzjoni tas-Soċjetà. Bernhard qara kull paġna bil-ħerqa, waqt li beda jhewden dwar min kien kiteb il-ktieb. Eventwalment wasal fl-aħħar paġna, li kien fiha indirizz Ġermaniż tas-Soċjetà. Bernhard bagħat għal iktar letteratura u sar l-ewwel Namibjan li ħa waqfa għall-verità.

Jaslu Ħaddiema Full-Time

Fl-1950, erbaʼ missjunarji mħarrġin fl-Iskola taʼ Gilgħad (Watchtower Bible School of Gilead) waslu fin-Namibja. In-numru taʼ missjunarji kiber għal tmienja sa l-1953. Dawn inkludew lil Dick u Coralie Waldron, koppja Awstraljana miżżewġa. Huma għadhom qed jaqdu hawnhekk fedelment. Ħafna proklamaturi full-time oħrajn tas-Saltna mill-Afrika t’Isfel u minn pajjiżi oħrajn ħadu sehem ukoll fil-ġbir tal-ġawhar spiritwali tan-Namibja. Missjunarji oħrajn, kif ukoll gradwati taʼ l-Iskola tat-Taħriġ Ministerjali, intbagħtu lejn in-Namibja.

Fattur ieħor li kkontribwixxa għat-tkabbir spiritwali fin-Namibja kien u għadu t-traduzzjoni u l-ippubblikar taʼ letteratura Biblika fil-lingwi lokali ewlenin, bħall-Ħerero, il-Kwangali, il-Kwanjama, in-Nama/Damara, u l-Indonga. L-uffiċċju tat-traduzzjoni u d-dar għal ħaddiema volontieri full-time ilhom joperaw fil-belt kapitali, Windhoek, sa mill-1990. Karen Deppisch, li ħadet sehem maʼ żewġha fix-xogħol taʼ l-evanġelizzar full-time f’partijiet differenti tan-Namibja, tgħid: “Ħafna jiskantaw meta noffrulhom letteratura bil-lingwa tagħhom stess, speċjalment minħabba li ftit li xejn jeżistu kotba taʼ kwalunkwe tip f’dik il-lingwa partikulari.”

L-Illostrar tal-Ġawhar

Xi wħud mill-ġojjelli letterali tan-Namibja ġew illostrati biċ-ċaqliq tal-mewġ u tar-ramel matul eluf taʼ snin. Imma, m’għandniex xi ngħidu, dawn il-proċessi naturali ma jipproduċux ġawhar ħaj. Jeħtieġ sforz biex bnedmin imperfetti ‘jinżgħu l-bniedem il-qadim’ u jilbsu l-bniedem il-ġdid li jixbah lil Kristu. (Efesin 4:20-24) Per eżempju, il-venerazzjoni t’antenati mejtin hija tradizzjoni qawwija fost ħafna tribujiet tan-Namibja. Dawk li ma jwettqux atti taʼ qima lill-antenati taʼ spiss jiġu persegwitati minn membri tal-familja u mill-ġirien. Meta individwi jitgħallmu mill-Bibbja li l-mejtin “ma jafu xejn,” ikunu qed jiffaċċjaw prova. (Koħèlet 9:5) B’liema mod?

Xhud mill-Ħerero jispjega: “Kienet sfida kbira li nkun ubbidjenti lejn il-verità. Aċċettajt studju tal-Bibbja max-Xhieda taʼ Jehovah, imma domt biex napplika l-affarijiet li kont qed nitgħallem. L-ewwel, kelli niċċekkja jekk kienx se jkolli sigurtà billi ma nipprattikax it-twemmin tradizzjonali. Per eżempju, kont ngħaddi bil-karozza minn ċerti postijiet fin-Namibja mingħajr ma nieqaf inqiegħed ġebla jew ninżaʼ l-kappell b’tislima lill-mejtin. Bil-mod il-mod, ikkonvinċejt ruħi li ma kien se jiġrili xejn talli ma nqimx lill-antenati mejtin. Kemm jien ferħan li Jehovah bierek l-isforzi tiegħi biex ngħin lill-familja tiegħi u lil uħud interessati oħrajn jitgħallmu l-verità!”

Il-Ħtieġa għal Minaturi Spiritwali

Qabel il-wasla tal-missjunarji fl-1950, kien hemm biss pubblikatur wieħed taʼ l-aħbar tajba fin-Namibja. In-numru kiber b’mod stabbli għal quċċata taʼ 995. Madankollu, għad fadal ħafna xogħol x’isir. Fil-fatt, xi reġjuni bilkemm intmessu. Qiegħed int f’pożizzjoni li taqdi fejn il-ħtieġa għal proklamaturi żelużi tas-Saltna hija kbira? Mela, jekk jogħġbok, ejja san-Namibja u għinna nsibu u nillostraw iktar ġawhar spiritwali.—Qabbel Atti 16:9.

[Mappa/Stampi f’paġna 26]

(Għall-formazzjoni sħiħa tat-test, ara pubblikazzjoni)

L-AFRIKA

IN-NAMIBJA

[Stampi]

In-Namibja hija pajjiż li fih ġawhar mill-isbaħ

[Sorsi]

[Stampi f’paġna 26]

L-aħbar tajba qed tiġi pridkata lill-gruppi etniċi kollha tan-Namibja

[Stampa f’paġna 28]

Tistaʼ taqdi fejn il-ħtieġa għal proklamaturi tas-Saltna hija akbar?