Żjara Storika Tferraħ Gżira

Kuba, gżira sabiħa fil-​Karibew, reċentement esperjenzat staġun mhux tas-​soltu taʼ rifreskar spiritwali. It-​tmiem taʼ l-​1998 ġab miegħu barka tant mistennija lix-​Xhieda taʼ Jehovah li jgħixu f’dan il-​pajjiż taʼ l-​Indji tal-​Punent. Għall-​ewwel darba f’iktar minn 30 sena, membri tal-​Ġemgħa li Tiggverna tax-​Xhieda taʼ Jehovah, kif ukoll 15-il delegat ieħor li kienu qed jakkumpanjawhom, ngħataw permess iżuru l-​pajjiż. Il-​viżitaturi kienu ċittadini taʼ l-​Awstralja, taʼ l-​Awstrija, tal-​Belġju, tal-​Gran Britannja, taʼ l-​Italja, taʼ New Zealand, u taʼ Puerto Rico.

DIN kienet ġrajja storika għal 82,258 pubblikatur tas-​Saltna hemmhekk u s-​87,890 li ngħaqdu magħhom biex jiċċelebraw l-​Ikla taʼ fil-​Għaxija tal-​Mulej fir-​rebbiegħa taʼ l-​1998.

Mill-1 sas-​7 taʼ Diċembru, 1998, Lloyd Barry, John Barr u Gerrit Lösch żaru d-​Dar Betel f’Havana u attendew uħud mill-​Konvenzjonijiet Distrettwali “Il-​Mod taʼ Ħajja t’Alla” li nżammu f’Kuba. Ħadu pjaċir li setgħu jiltaqgħu m’anzjani li jivvjaġġaw u jsiru jafu iktar mill-​qrib lil xi uffiċjali pubbliċi Kubani.

“Għalija u għal marti dan kien mument teokratiku li jisboq f’ħajjitna,” qal John Barr. “Ħutna l-​għeżież f’Kuba huma tant mimlijin biż-​żelu għall-​verità! Ġejt lura nħossni li l-​fratellanza globali tagħna hija verament prezzjuża!” “Din il-​ġimgħa storika għenitni nikseb fehma aħjar tas-​sitwazzjoni taʼ ħutna hemmhekk,” żied Lloyd Barry.

Matul l-​aħħar ħames snin, ix-​Xhieda taʼ Jehovah f’Kuba ngħataw iktar libertà tal-​qima u kummenti minn awtoritajiet Kubani jġiegħel lil dak li jkun jemmen li dawn jixtiequ li dan kollu jkompli.

F’Settembru taʼ l-​1994, operazzjoni taʼ stampar ġiet stabbilita fid-​Dar Betel taʼ Havana. Għal darb’oħra, ix-​Xhieda taʼ Jehovah setgħu jiltaqgħu bil-​miftuħ u jagħtu xiehda minn dar għal dar. Wara ftit, fl-​1998, l-​awtoritajiet taw permess li ssir din iż-​żjara taʼ delegazzjoni internazzjonali taʼ 18-il Xhud taʼ Jehovah, inkluż tliet membri tal-​Ġemgħa li Tiggverna.

Rijunjoni Mimlija Ferħ

Meta waslet fl-​ajruport taʼ José Martí f’Havana, id-​delegazzjoni kienet milqugħa b’mod ospitabbli minn kontinġent t’uffiċjali pubbliċi u grupp mid-​Dar Betel, fosthom wieħed mill-​aħwa li kien jiftakar l-​aħħar żjara li saret f’Kuba minn membru tal-​Ġemgħa li Tiggverna​—Milton Henschel—​fl-1961. Dak iż-​żmien il-​ħu kellu 12-il sena; issa huwa indokratur li jivvjaġġa.

Meta d-​delegati waslu fid-​Dar Betel, intlaqgħu b’bukketti taʼ gladjoli, ward, ġiżimin u margeriti sofor u ħomor, imkabbrin minn wieħed mill-​aħwa apposta għal dik l-​okkażjoni. Kien hemm biki taʼ ferħ hekk kif il-​familja taʼ Betel tat merħba lid-​delegati. Iktar tard, ilkoll ħadu sehem f’ikla Kubana taʼ majjal mixwi, ross u fażola, insalata, jukka bil-​mojo (zalza magħmula mit-​tewm u ż-​żejt taż-​żebbuġa), u frott frisk. Wara l-​ikla kull membru tal-​Ġemgħa li Tiggverna ta taħdita inkuraġġanti dwar it-​teżor tas-​servizz taʼ Betel. Partikolarment kommoventi kienu l-​kummenti taʼ Ħuna Lösch peress li dan tkellem maʼ l-​aħwa bl-​Ispanjol. Il-​familja taʼ Betel hija magħmula minn 48 ħaddiem volontier regulari u 18 mill-​aħwa li jgħinu fuq bażi temporanja.

Għalkemm kotba u Bibbji għal ħutna f’Kuba jiġu stampati fl-​Italja, l-​edizzjonijiet bla kulur tar-​rivisti It-​Torri taʼ l-​Għassa u Stenbaħ! isiru fil-​pajjiż stess, fuq żewġ magni mimeografiċi. Jirrikjedi sigħat twal u xogħol manwali ripetituż fi kwartieri żgħar biex jipproduċu r-​rivisti meħtieġa kollha. Il-​volontieri jistmaw it-​teżor tas-​servizz tagħhom lejn Jehovah b’mod verament speċjali.—2 Korintin 4:7.

Punti Prinċipali tal-​Konvenzjoni

It-​18-il membru tad-​delegazzjoni nqasmu fi tliet gruppi sabiex jattendu konvenzjonijiet distrettwali li saru fi tliet lokalitajiet​—Havana, Camagüey, u Holguín. F’kull ġurnata mit-​tlett ijiem, grupp kbir t’aħwa, inkluż ħafna anzjani u pijunieri, ġew mistidnin jattendu f’kull lokalità. Ix-​Xhieda lokali ntqalilhom li din kienet se tkun okkażjoni speċjali, imma ma kinux jafu li membri tal-​Ġemgħa li Tiggverna kienu se jkunu preżenti. Immaġina x’sorpriża ħadu hekk kif, il-​Ġimgħa filgħodu, raw lil dawn l-​aħwa għeżież u lin-​nisa tagħhom neżlin minn fuq il-​karozzi tal-​linja li nkrew apposta!

Il-konvenzjonijiet saru f’faċilitajiet fil-​miftuħ mibnijin mill-​aħwa bil-​permess taʼ l-​awtoritajiet. Fil-​post fejn saret il-​konvenzjoni taʼ Havana, fuq waħda mill-​ġebliet tad-​daħla kien hemm imnaqqax “Salm 133:1.” Dan fakkar lill-​aħwa fil-​kliem misjub f’dik l-​iskrittura: “Kemm hi ħaġa sabiħa u ħelwa, li l-​aħwa jgħammru flimkien!” Ċertament, waqt il-​konvenzjoni, f’dak il-​post kien hemm sħubija Kristjana tajba u pjaċevoli.

Il-viżitaturi rrimarkaw dwar kemm it-​taħditiet u l-​intervisti ngħataw b’mod eċċellenti, u baqgħu impressjonati mill-​preżentazzjoni tad-​drama, li kienet ibbażata fuq l-​istorja Biblika taʼ Danjel kapitlu 3, ambjentata f’Babilonja tal-​qedem. Waħda oħt ikkummentat: “L-​atturi kollha kienu eċċellenti, u s-​sinkroniżmu taʼ l-​ilħna sar tant tajjeb li ma kontx tinduna li l-​vuċijiet kienu rrekordjati minn qabel. . . . Il-​Babiloniż mill-​agħar deher li kien verament mill-​agħar, u t-​tliet Ebrej kienu sodi u determinati.”

Rappreżentanti taʼ l-​Uffiċċju taʼ l-​Affarijiet Reliġjużi u uffiċjali oħrajn tal-​gvern li ġew biex jaraw il-​konvenzjonijiet faħħru lill-​aħwa għall-​organizzazzjoni u l-​kondotta tajba tagħhom. Ħuna Barry esprima l-​gratitudni sinċiera tiegħu għat-​trattament eċċellenti li ġie estiż mill-​awtoritajiet Kubani lejn id-​delegati barranin. Bil-​wieqfa u b’ċapċip entużjażmanti, taʼ spiss għal numru mhux ħażin taʼ minuti, l-​aħwa esprimew l-​apprezzament li kellhom għat-​taħditiet, u wkoll għall-​fatt li l-​awtoritajiet ippermettew li jsiru l-​konvenzjonijiet. “Dan hu iktar milli stennejna​—konvenzjoni internazzjonali fiċ-​ċokon!” qalet waħda familja Kristjana. “Kienet xi ħaġa taʼ l-​għaġeb, għax tat evidenza tal-​qawwa kbira li għandu Jehovah biex iwettaq il-​wegħdi tiegħu.”

Il-konvenzjonijiet ipprovdew ukoll opportunità biex oħrajn isiru jafu aħjar lix-​Xhieda. Wieħed mis-​sewwieqa tal-​karozzi tal-​linja attenda l-​konvenzjoni s-​Sibt u wkoll il-​Ħadd. Qal li kien semaʼ ħafna xorti fuq ix-​Xhieda taʼ Jehovah, imma issa sar jaf li huma nies twajbin u li jħobbu l-​paċi.

“Affarijiet li Qatt ma se Ninsew”

In-​nies taʼ Kuba impressjonawhom lid-​delegati bil-​korteżija u l-​ħbiberija li wrew. Il-​Kubani huma nies ħabrieka, taʼ prinċipju, u qalbhom tajba. “Mhux l-​ewwel darba li xi nies li ma nafuhomx offrew l-​għajnuna tagħhom,” qal wieħed mid-​delegati.

Id-delegati baqgħu impressjonati b’mod profond bil-​fidi, il-​ferħ, u l-​imħabba murija mix-​Xhieda sħabna ġewwa Kuba. Minkejja ostakli kbar, huma għamlu lil Jehovah l-​fortizza tagħhom. (Salm 91:2) John Barr qal: “Kien hemm tant affarijiet li kienu taʼ sorpriża pjaċevoli għalija, f’din l-​ewwel żjara tiegħi taʼ Kuba​—is-​sbuħija tal-​pajjiż, il-​karattru pjaċevoli taʼ dawk li ltqajt magħhom, u fuq kollox, l-​entużjażmu jixgħel tax-​Xhieda Kubani. Qatt f’ħajti ma smajt kant ħiereġ hekk mill-​qalb taʼ l-​għanjiet tas-​Saltna tagħna u applaws hekk fit-​tul meta affarijiet spiritwali laqtulhom qalbhom! Dawn huma affarijiet li qatt ma se ninsew. Se nibqgħu ngħożżuhom għal dejjem.”

Salm 97:1 jgħid: “Ħa . . . jifirħu l-​ħafna gżejjer.” Tabilħaqq, ix-​Xhieda taʼ Jehovah fil-​gżira taʼ Kuba ferħu minħabba iż-​żjieda fil-​libertà li jqimu lil Alla, u minħabba ż-​żjara storika taʼ din id-​delegazzjoni internazzjonali.

[Stampi f’paġna 8]

Ħafna familji attendew il-​Konvenzjonijiet Distrettwali speċjali “Il-​Mod taʼ Ħajja t’Alla” f’Kuba

[Stampa f’paġna 8]

Id-​Dar Betel f’Havana reġgħet infetħet fl-​1994

[Stampa f’paġna 8]

Membri tal-​Ġemgħa li Tiggverna jawtografaw Bibbji li ngħataw bħala rigal lill-​uffiċjali pubbliċi.