Meta Qlub Ibsin Jibdew Iwieġbu

FL-​1989, IX-​XHIEDA TAʼ JEHOVAH FIL-​POLONJA ġew irrikonoxxuti legalment bħala organizzazzjoni reliġjuża. Xhieda li kienu ġew arrestati minħabba n-​newtralità Kristjana tagħhom bdew jinħelsu bil-​ftit il-​ftit, u fil-​ħabs dawn ħallew warajhom lil ħafna ħabsin li tant kienu jixtiequ jitgħallmu iktar dwar il-​Bibbja mingħandhom. Dan hu r-​rakkont taʼ kif ġo ħabs minnhom, ix-​Xhieda taʼ Jehovah jħabirku biex jgħinu lil dawk li xi darba kellhom qalbhom iebsa, ħalli huma jwieġbu għall-​qawwa tal-​Kelma t’Alla.

F’WOŁÓW, belt bi 12,000 abitant fil-​Majjistral tal-​Polonja, hemm peniten­zjarju li għandu mal-​200 sena u li fih jinżammu xi wħud mill-​agħar kriminali tal-​Polonja. Minn mindu x-​xogħol tax-​Xhieda taʼ Jehovah ġie rrikonoxxut uffiċjalment, huma ħabirku biex iwasslu l-​aħbar tajba tas-​Saltna lill-​ħabsin hemmhekk, u dan jagħmluh b’entużjażmu kbir.

X’kien li fetħilhom it-​triq? Kienet ittra indirizzata lid-​diretturi kollha tal-​ħabsijiet fil-​Polonja maħruġa mill-​Ministeru tal-​Ġustizz­ja fi Frar taʼ l-​1990. L-​ittra wissiethom li ma kellhom “jikkaġunaw l-​ebda diffikultà” lil dawk il-​ħabsin li riedu jirċievu l-​pubblikazz­jonijiet tal-​Watch Tower jew li riedu jiltaqgħu max-​Xhieda taʼ Jehovah. Ix-​Xhieda, li xi wħud minnhom qattgħu snin twal fil-​ħabs taʼ Wołów, kienu jafuhom sew lil dawk il-​ħabsin li kienu saru qalbhom iebsa. Madankollu, huma straħu fuq Jehovah biex ibierek l-​isforzi tagħhom sabiex iħallu l-​verità tal-​Bibbja trattab il-​qlub ibsin taʼ ħabsin oħrajn.

Jinbeda x-​Xogħol

“Kien diffiċli biex jinbeda l-​programm,” jgħid Ħuna Czesław li kien ġie awtorizzat biex iżur il-​ħabs ġewwa Wołów, u li kien mill-​belt taʼ Wrocław, madwar 40 kilometru ’l bogħod. “Kellna ħafna diskussjonijiet twal maʼ l-​uffiċjali tal-​ħabs sakemm irnexxielna nikkonvinċuhom li ‘s-​servizzi reliġjużi’ tagħna huma taʼ benefiċċju għall-​priġunieri.”

Biex jikkomplika l-​affarijiet, jiftakar Paweł, sieħeb Czesław, “fizzjal imlaħħaq insista li l-​ħabsin kienu qegħdin sempliċement jużaw is-​servizzi reliġjużi bħala skuża għall-​qligħ materjali.” Imma meta fl-​1991, tlett irġiel li darba kienu kriminali perikolużi ppreżentaw lilhom infushom għall-​magħmudija, l-​awtoritajiet tal-​ħabs bidlu l-​attitudni tagħhom, u l-​kooperazz­joni tjiebet.

“Bdejna billi tajna xiehda lill-​ħabsin, lill-​familji tagħhom li kienu jiġu jżuruhom fil-​ħabs, kif ukoll lil dawk li kienu jaħdmu fil-​penitenzjarju,” jispjega Czesław. “Imbagħad qlajna permess biex nippridkaw l-​aħbar tajba minn ċella għall-​oħra, verament eċċezzjoni mhux tas-​soltu. Fl-​aħħar, meta sibna l-​ewwel ftit li kienu interessati, ħallewna nużaw sala żgħira biex nikkonduċu studji tal-​Bibbja u nagħmlu laqgħat Kristjani ġo fiha.” Iva, Jehovah fetaħ it-​triq għal dawk il-​qlub ibsin tal-​priġunieri.

Programm Effettiv taʼ Edukazzjoni

Dik is-​sala ċkejkna malajr bdiet issir żgħira ħafna għalina. Ladarba kemm il-​priġunieri mgħammdin u kemm l-​aħwa li kienu jiġu minn barra kienu bdew jieħdu sehem fix-​xogħol taʼ l-​ippridkar, kien hemm daqs 50 ħabsi li bdew jattendu għal-​laqgħat. “Domna iktar minn tliet snin nagħmlu l-​laqgħat hemmhekk, u l-​priġunieri kienu jattendu għal-​laqgħat taʼ kull ġimgħa regolarment,” jispjega wieħed mill-​anzjani taʼ dak il-​post. Għalhekk, f’Mejju taʼ l-​1995 ngħataw il-​permess biex jużaw sala akbar.

L-aħwa responsabbli kif jiddeterminaw min jistaʼ jattendi għal-​laqgħat li jsiru fil-​ħabs? “Għandna lista taʼ priġunieri li juru interess sinċier għall-​verità,” jispjegaw Ħutna Czesław u Zdzisław. “Jekk ħabsi ma jagħmilx progress jew jonqos li jattendi għal-​laqgħat għal kull ħaġa taʼ xejn, u b’hekk ikun qed juri nuqqas t’apprezzament għal dawn il-​provvedimenti, ismu jitħassar mil-​lista u ninformaw lid-​direttur tal-​ħabs.”

Matul l-​istudji tal-​Bibbja li jikkonduċu, l-​aħwa jgħallmu wkoll lill-​priġunieri kif jippreparaw sew għal-​laqgħat u kif jużaw il-​letteratura tagħna b’mod effettiv. B’hekk, meta l-​ħabsin jiġu għal-​laqgħat, ikunu ppreparati sew u jipparteċipaw minn jeddhom. Huma jagħmlu kummenti li jibnu, jużaw il-​Bibbji tagħhom b’sengħa kbira, u japplikaw il-​pariri għalihom infushom, billi taʼ spiss jinkludu fil-​kummenti tagħhom osservazzjonijiet bħal, ‘Mela rrid nagħmel din jew dik.’

“B’kollox, fil-​ħabs taʼ Wołów qed jinżammu 20 studju tal-​Bibbja. Tmienja minnhom jikkonduċuhom tliet pubblikaturi priġunieri,” jgħid is-​segretarju tal-​kongregazzjoni. Kell­hom ukoll riżultati tajbin waqt l-​ippridkar minn ċella għall-​oħra u waqt il-​passiġġati tagħhom fil-​bitħa tal-​ħabs. Per eżempju, matul l-​għaxar xhur, minn Settembru taʼ l-​1993 sa Ġunju taʼ l-​1994, qassmu 235 ktieb, kważi 300 browxer, u 1,700 rivista. Reċentement, żewġ uffiċjali tal-​ħabs talbu għal studju tal-​Bibbja.

Assembleat Speċjali Jġibu l-​Ferħ

Maż-​żmien, żdied element ieħor mal-​programm taʼ edukazzjoni f’dan il-​ħabs, jiġifieri, l-​assembleat speċjali. Indokraturi li jivvjaġġaw u aħwa kkwalifikati oħrajn jiġu fil-​ġimm tal-​ħabs biex jippreżentaw il-​partijiet prinċipali tal-​programmi taʼ l-​assemblea tas-​circuit u tal-​jum t’assemblea speċjali. L-​ewwel assemb­lea speċjali saret f’Ottubru taʼ l-​1993. Attendew ħamsin ħabsi, u “familji sħaħ, inkluż nisa u tfal żgħar, ġew minn Wrocław,” irrapportat il-​gazzetta Słowo Polskie, u l-​attendenza totali kienet taʼ 139. Il-​waqfa taʼ nofsinhar fil-​programm taʼ l-​assemblea pprovdiet opportunità għal ikla ppreparata mill-​aħwa nisa, kif ukoll ħin għal sħubija Kristjana mill-​aħjar.

Minn dakinhar ’l hawn saru sebaʼ assembleat speċjali oħrajn, u l-​benefiċċji laħqu mhux biss lil dawk fil-​ħabs imma anki lil dawk taʼ barra. Meta Oħt kellmet lil wieħed li darba kien ħabsi ġewwa Wołów u li issa kien jgħix ġol-​belt, dan għall-​ewwel kien pjuttost negattiv. Imma meta qaltlu li ċertu ħabsi kien sar Xhud, ir-​raġel ma setax jemmen: “Kif jistaʼ jkun, dak il-​qattiel issa sar Xhud?” B’riżultat taʼ dan, ir-​raġel aċċetta studju tal-​Bibbja.

Seħħet Bidla Meraviljuża

Dan il-​programm taʼ edukazzjoni fuq skala kbira tassew rattabhom il-​qlub ibsin tal-​ħabsin? Ejjew inħallu lilhom jirrakkontaw l-​istejjer tagħhom.

“Qatt ma kont naf min huma l-​ġenituri tiegħi għaliex dawn abbandunawni meta kont għadni żgħir, u l-​iktar li kont inħossni mweġġaʼ kien minħabba li ħadd ma kien iħobbni,” jistqarr Zdzisław, bniedem ħosbien di natura. “Kmieni f’ħajti, ġejt involut fil-​kriminalità, billi eventwalment wettaqt delitt. Is-​sens taʼ ħtija ġagħalni nikkunsidra l-​possibbiltà li nikkommetti suwiċidju, u kont b’mod iddisprat qed infittex tama vera. Imbagħad, fl-​1987, ġiet f’idi r-​rivista t-​Torri taʼ l-​Għassa. Minnha sirt naf dwar it-​tama taʼ l-​irxoxt u l-​ħajja taʼ dejjem. Billi rrealizzajt li kien għad hemm tama, neħħejt l-​idea li nagħmel suwiċidju minn ġo moħħi u bdejt nistudja l-​Bibbja. Issa sirt naf xi tfisser l-​imħabba permezz taʼ Jehovah u taʼ l-​aħwa.” Dan li darba kien qattiel, ilu mill-​1993 bħala qaddej ministerjali u pijunier awżiljarju, u s-​sena l-​oħra sar pijunier regulari.

Tomasz, min-​naħa l-​oħra, mill-​ewwel aċċetta studju tal-​Bibbja. “Madankollu, ma kontx qed inkun sinċier,” hu jistqarr. “Kont qed nistudja sempliċement għax kont nieħu pjaċir niffanfra meta nispjega t-​twemmin tax-​Xhieda taʼ Jehovah lil oħrajn. Imma l-​verità tal-​Bibbja ma tantx kont qed neħodha bis-​serjetà. Darba waħda, iddeċidejt li mmur għal-​laqgħa Kristjana. Il-​priġunieri mgħammdin tant laqgħuni tajjeb. Irrealizzajt li minflok ma noqgħod nipprova niffanfra b’kemm naf, kien hemm bżonn li nrattab il-​qalb iebsa li kelli u nbiddel il-​mentalità tiegħi.” Tomasz beda jilbes il-​personalità Kristjana ġdida. (Efesin 4:22-24) Illum, huwa Xhud iddedikat u mgħammed, u l-​għaxqa tiegħu hi li jippriedka minn ċella għall-​oħra.

Pressjonijiet mill-​Ħbieb taʼ Qabel

Dawk li saru jafu bil-​verità tal-​Bibbja minn ġol-​ħabs kellhom pressjonijiet kbar mill-​ħbieb taʼ qabel taċ-​ċella u mill-​uffiċjali tal-​ħabs. Wieħed minnhom jiftakar: “Il-​ħin kollu kienu jgħaddu ż-​żmien bija u jwaqqgħuni għaċ-​ċajt. Imma żammejt f’moħħi l-​kliem inkuraġġanti taʼ l-​aħwa. ‘Ibqaʼ itlob lil Jehovah,’ qaluli. ‘Aqra l-​Bibbja tiegħek u tħoss il-​paċi ġewwa fik.’ Dan tassew għeni.”

“Sħabi l-​priġunieri bla ħniena qalu ħafna kattiveriji kontrija,” jgħid Ryszard, ħu mgħammed u li hu robust. “‘Tistaʼ tmur għal-​laqgħat tiegħek, imma tipprovax tkun prominenti u tippretendi li int aħjar, OK?’ kienu jwissuni. Tgħidx kemm kelli nsofri meta għamilt bidliet f’ħajti minħabba li applikajt il-​prinċipji tal-​Bibbja. Kienu jħarbtuli s-​sodda, jitf­għuli l-​letteratura tal-​Bibbja ’l hemm u ’l hawn, u kienu jagħmluli mand­ra fil-​parti tiegħi taċ-​ċella. Kont nitlob lil Jehovah biex jgħinni nikkontrolla lili nnifsi u mbagħad kont naqbad u nnaddaf il-​parti taċ-​ċella tiegħi bil-​kwiet. Wara ftit dawn l-​attakki waqfu.”

“Meta l-​priġunieri sħabna jaraw li nkunu ħadna deċiżjoni soda biex naqdu lil Jehovah,” jgħidu xi priġunieri mgħammdin oħrajn, “il-​pressjoni tieħu xejra oħra. X’aktarx jgħidulna, ‘Ftakru, intom ma tistgħux tixorbu, tpejpu, jew tigdbu iktar.’ Pressjoni bħal din tgħin biex wieħed jikkontrolla lilu nnifsu, u b’hekk malajr ineħħi kwalunkwe vizzju jew abbuż. Tgħin ukoll biex wieħed jikkultiva l-​frott taʼ l-​ispirtu.”—Galatin 5:22, 23.

Isiru Qaddejja Ddedikati t’Alla

Bil-​permess taʼ l-​awtoritajiet tal-​ħabs, l-​ewwel magħmudija seħħet fil-​ġimm fir-​rebbiegħa taʼ l-​1991. Zdzisław kien il-​kandidat ferħan. Għal din l-​okkażjoni attendew tnax-il ħabsi, u 21 ħu u oħt mill-​kongregazzjonijiet. Il-​laqgħa kell­ha effett inkuraġġanti fuq il-​priġunieri. Ftit minnhom tant għamlu progress rimarkevoli, li iktar tard f’dik is-​sena tgħammdu żewġ ħabsin oħrajn. Sentejn wara, fl-​1993, kien hemm żewġ magħmudijiet, u sebaʼ ħabsin oħrajn issimbolizzaw id-​dedikazzjoni tagħhom lil Jehovah!

Waqt li rrapportat dwar il-​magħmudija li saret f’Diċembru, il-​gazzetta lokali, Wieczór Wrocławia, osservat: “In-​nies kontinwament deħlin fis-​sala tal-​ġimm, jifirħu b’xulxin u jieħdu b’idejn xulxin. Ħadd ma jħossu ħuta barra mill-​ilma hawnhekk. Dawn jifformaw familja waħda kbira, magħqudin fil-​ħsieb, fil-​mod taʼ ħajja tagħhom, u f’li jaqdu Alla wieħed, Jehovah.” Dik il-​“familja waħda kbira” dakinhar kienet tikkonsisti f’135 persuna, inkluż 50 ħabsi. Ejjew niltaqgħu maʼ ftit minnhom.

Jerzy, li tgħammed f’Ġunju, jgħid: “Għalkemm snin ilu kelli xi ftit kuntatt mal-​verità tal-​Bibbja, ġo fija kelli qalb iebsa. Frodi, divorzju mill-​ewwel mara tiegħi, relazzjonijiet illeċiti maʼ Krystyna, tarbija barra miż-​żwieġ, u l-​fatt li kont dieħel u ħiereġ il-​ħabs​—din kienet ħajti.” Billi ra kif kriminali oħrajn taʼ qalb iebsa saru Xhieda waqt li kienu fil-​ħabs, hu beda jistaqsi lilu nnifsu: ‘Nistaʼ jien ukoll insir raġel aħjar?’ Hu talab għal studju tal-​Bibbja u beda jattendi għal-​laqgħat. Madankollu, il-​vera bidla seħħet meta sar jaf mill-​prosekutur pubbliku li Krystyna kienet ilha tliet snin li saret waħda mix-​Xhieda taʼ Jehovah. “Bqajt imbellah!” jgħid Jerzy. “Ħsibt, ‘U jien? X’qed nagħmel?’ Irrealizzajt li biex inkun approvat minn Jehovah, kelli nirranġa ħajti.” Bħala riżultat, seħħet rijunjoni taʼ ferħ fil-​ħabs​—maʼ Krystyna u binthom Marzena taʼ 11-il sena. F’qasir żmien illegalizzaw iż-​żwieġ tagħhom. Għalkemm għadu l-​ħabs u jkollu l-​burdati tiegħu, reċentement Jerzy tgħallem il-​lingwa bis-​sinjali waħdu u kapaċi jgħin lill-​priġunieri li huma torox.

Mirosław kien diġà involut f’attivitajiet kriminali meta kien għadu l-​iskola primarja. Tgħidx kemm kien jammira dak li kienu jagħmlu ħbiebu, u malajr beda jagħmel bħalhom. Kien seraq jew ta xebgħa lil diversi wħud. Imbagħad spiċċa l-​ħabs. “Meta sibt ruħi l-​ħabs, mort għand il-​qassis għall-​għajnuna,” jistqarr Mirosław. “Imma kont ferm iddiżappuntat. Għalhekk, iddeċidejt li noqtol ruħi b’idejja billi nieħu l-​velenu.” Preċiż f’dak il-​jum li ppjana li jneħħi ħajtu, ġie ttrasferit ġo ċella oħra. Hemmhekk sab kopja taʼ It-​Torri taʼ l-​Għassa li kienet titkellem dwar l-​iskop tal-​ħajja. “L-​informazzjoni sempliċi u ċara wriet li kienet sewwa sew dak li kelli bżonn,” hu jżid. “Issa ridt ngħix! Għalhekk, tlabt lil Jehovah u tlabt lix-​Xhieda għal studju tal-​Bibbja.” Hu malajr għamel progress fl-​istudju tiegħu tal-​Bibbja u tgħammed fl-​1991. Issa qed jaqdi bħala pijunier awżiljarju fil-​ħabs, u għandu l-​privileġġ li jippriedka minn ċella għall-​oħra.

Sa dak iż-​żmien kienu tgħammdu 15-il priġunier. Is-​sentenzi tagħhom f’daqqa jammontaw għal kważi 260 sena. Xi wħud ġew meħlusin qabel għax tnaqqsitilhom is-​sentenza tagħhom. Priġunier minnhom naqqsulu 10 snin mis-​sentenza tiegħu taʼ 25 sena. U ħafna minn dawk li wrew interess waqt li kienu fil-​ħabs, tgħammdu u saru Xhieda wara li ġew meħlusin. Barra minn hekk, hemm erbaʼ detenuti oħrajn fil-​ħabs li qed jippreparaw għall-​magħmudija.

Għarfien mill-​Awtoritajiet tal-​Ħabs

“Il-​bidla fl-​attitudni tal-​ħabsin kienet partikolarment taʼ min jinnotaha,” jgħid rapport tal-​ħabs. “Ħafna waqfu jpejpu, u qed iżommu ċ-​ċelel tagħhom nodfa. Bidliet bħal dawn fil-​kondotta huma evidenti f’ħafna ħabsin.”

Il-gazzetta Życie Warszawy tirrapporta li l-​mániġment tal-​penitenz­jarju ġewwa Wołów ammetta li “dawk li kkonvertew huma ddixxiplinati; ma joħolqux problemi lill-​għassiesa tal-​ħabs.” L-​artiklu jinnota wkoll li dawk li nħelsu qabel għax tnaqq­sitilhom is-​sentenza tagħhom integraw sew fiċ-​ċirku tax-​Xhieda taʼ Jehovah u ma jerġ­għux lura għall-​kriminalità.

U x’inhi l-​opinjoni tad-​direttur tal-​ħabs? “Ix-​xogħol tax-​Xhieda taʼ Jehovah f’dan il-​penitenz­jarju huwa apprezzat ferm u t’għajnuna,” hu jgħid. Id-​direttur jammetti li “matul l-​istudju tagħhom tal-​Bibbja [max-Xhieda], il-​valuri u l-​livelli tal-​ħabsin jinbidlu, u dawn jagħtuhom forza ġdida li tiggwidahom f’ħajjithom. Il-​kondotta tagħhom hija verament prudenti u edukata. Huma ħaddiema diliġenti, u ma joħolqu kważi ebda problemi.” M’għandniex xi ngħidu, kummenti favorevoli bħal dawn mill-​awtoritajiet jieħdu gost bihom ix-​Xhieda li jaħdmu mal-​ħabsin fil-​ħabs taʼ Wołów.

Dawn ix-​Xhieda li jżuru l-​ħabs japprezzaw bis-​sħiħ il-​kliem taʼ Ġesù: “Jiena nagħraf in-​nagħaġ tiegħi, u n-​nagħaġ tiegħi jagħrfu lili, . . . huma jisimgħu leħni, u jkun hemm merħ­la waħda, ragħaj wieħed.” (Ġwann 10:14, 16) Lanqas saħansitra l-​ħitan tal-​ħabs ma jistgħu jżommu lura lir-​Ragħaj mill-​Aħjar, Ġesù Kristu, milli jiġbor uħud bħal nagħaġ. Ix-​Xhieda ġewwa Wołów huma grati li għandhom il-​privileġġ li jieħdu sehem f’dan is-​servizz ferrieħi. U jfittxu lil Jehovah għall-​barka kontinwa tiegħu f’li jgħinu lil ħafna iktar qlub ibsin iwieġbu għall-​aħbar tajba tas-​Saltna qabel ma jiġi t-​tmiem.—Mattew 24:14.

[Kaxxa f’paġna 27]

Problema taʼ “adult tifel”

“Taʼ spiss, wara li wieħed ikun ilu l-​ħabs għal ftit taż-​żmien, jitlef is-​sens taʼ xi jfisser li jgħix fil-​libertà, jew għalih waħdu,” josservaw ix-​Xhieda li jaħdmu fil-​penitenzjarju taʼ Wołów. “Essenzjalment ikun hemm problema taʼ ‘adult tifel,’ bniedem li meta jiġi meħlus mill-​ħabs ma jkunx jaf kif jieħu ħsieb tiegħu nnifsu. Huwa għalhekk li l-​irwol tal-​kongregazzjoni huwa ferm iktar milli sempliċement ngħallmuh il-​verità tal-​Bibbja. Irridu wkoll nippreparawh biex isir parti mill-​komunità, u nwissuh dwar perikli u tentazzjonijiet ġodda li għandu mnejn jiffaċċja. Għalkemm irridu noqogħdu attenti li ma nkunux protettivi żżejjed, irridu ngħinuh biex jibda ħajja ġdida.”