Minn Appartamenti Għoljin fl-​Ibliet Għal Tundra Deżolata—Morru Għand in-​Nies

LA X-​XITA, la l-​borra, la s-​silġ, la l-​ilpup, la l-​iljuni tal-​muntanji, u lanqas territorju ostili ma setgħu jmewtu l-​ispirtu tagħhom taʼ determinazzjoni. B’veloċità taʼ l-​għaġeb, huma għaddew bil-​galopp 3,000 kilometru, billi qasmu kampanja fil-​beraħ, xmajjar imfawrin, u widien fondi biex iġorru posta urġenti lejn il-​Kosta tal-​Punent. Min kienu?

Kienu r-​rikkieba żgħażagħ u taʼ gazz tal-​pony express.a X’kien li qanqal spirtu intens bħal dan f’dawn l-​irġiel żgħażagħ? X’aktarx l-​isfida, l-​avventura, u s-​sodisfazzjon taʼ li jwasslu l-​posta. Taʼ interess, kull rikkieb kien iġorr Bibbja fil-​basket tas-​sarġ flimkien mal-​posta taʼ prijorità.

Iktar minn seklu wara, spirtu akbar taʼ determinazzjoni, entużjażmu, u devozzjoni qiegħed jintwera minn iktar minn 113,000 proklamatur devot tas-​Saltna minn mal-​Kanada kollha. X’inhi l-​motivazzjoni tagħhom? Imħabba għal Alla u għall-​proxxmu tispirahom iqassmu l-​verità tas-​Saltna bil-​paġna stampata u bil-​fomm. Din il-​verità li tagħti l-​ħajja hija bil-​wisq iktar urġenti minn kwalunkwe posta mqassma mill-​pony express. Iva, huwa l-​messaġġ prezzjuż tas-​Saltna mill-​Bibbja Mqaddsa, l-​istess ktieb li kien jinstab fil-​basktijiet tas-​sarġ li kellhom ir-​rikkieba tal-​pony express.—Proverbji 2:21, 22; Isaija 2:2-4; 61:2; Mattew 22:37-39; 24:14.

Immotivati mill-​Imħabba għal Jehovah u għan-​Nies

Ix-​Xhieda taʼ Jehovah jħobbu jitkellmu man-​nies dwar is-​Saltna. Issibhom jagħmlu dan f’appartamenti għoljin fl-​ibliet, f’komunitajiet remoti tat-​tundra, f’terminals taʼ l-​ajruporti, fit-​toroq u f’postijiet pubbliċi oħrajn, u fuq it-​telefon. Għala f’postijiet varji bħal dawn?

L-istili taʼ ħajja li qed jinbidlu minħabba kundizzjonijiet ekonomiċi u demografiċi huma taʼ sfida formidabbli biex jinstabu n-​nies fid-​djar. F’ħafna każi, kemm ir-​raġel u kemm il-​mara jaħdmu biex jieħdu ħsieb in-​neċessitajiet materjali bażiċi tal-​familja u taʼ spiss jittraskuraw il-​bżonnijiet spiritwali. Fost pressjonijiet u tensjonijiet bħal dawn, huma jeħtieġu disperatament messaġġ taʼ tama li jqawwi l-​qalb. Ix-​Xhieda taʼ Jehovah jwieġbu bil-​ferħ. Billi jużaw id-​diskrezzjoni u l-​qalb tajba, huma joħolqu opportunitajiet biex iwasslu l-​aħbar tajba lil kull xorta taʼ nies b’manjiera li tappella u li tqanqal il-​ħsieb.—1 Timotju 2:3, 4.

F’Lingwi Oħrajn: Meta Ġesù kkmanda lis-​segwaċi tiegħu biex ‘jagħmlu dixxipli,’ hu ħalla post għal inizjattiva u determinazzjoni f’li jitwassal il-​messaġġ taʼ tama lin-​nies taʼ kull lingwa. (Mattew 28:19) Bħal ħafna pajjiżi oħrajn, il-​Kanada saret soċjetà mħallta b’kulturi u lingwi differenti, u ħafna proklamaturi tas-​Saltna addattaw ruħhom billi tgħallmu lingwi ġodda.

Per eżempju, koppja miżżewġa, li huma ministri full-time f’Edmonton, Alberta, raw f’belthom il-​bżonn li jintlaħqu nies li kienu jitkellmu biċ-​Ċiniż Mandarin. L-​ewwel, madankollu, il-​koppja kellhom bżonn jitgħallmu l-​lingwa, u għalhekk ikkuntattjaw student universitarju li kien jitkellem bil-​Mandarin. Hu qabel li jgħallimhom il-​lingwa u fl-​istess ħin jitgħallem veritajiet Bibliċi mingħandhom. X’sitwazzjoni ideali! Fi żmien 24 xahar dawn iż-​żewġ proklamaturi devoti tas-​Saltna kienu kkwalifikati li jgħallmu bil-​Mandarin. Fl-​istess waqt, l-​għalliem/student tagħhom ikkwalifika għall-​magħmudija Kristjana.

Esperjenzi simili qed jitgawdew fi bliet oħrajn hekk kif proklamaturi tas-​Saltna, immotivati mill-​imħabba, jitgħallmu lingwi bħall-​Pollakk, ir-​Russu, u l-​Vjetnamiż.

Waqt Vjaġġi fit-​Triq: Bħar-​rikkieba tal-​pony express fis-​seklu li għadda, li vvjaġġaw waħedhom, xi proklamaturi tas-​Saltna fil-​qalba tal-​British Columbia jivvjaġġaw waħedhom. Ħafna mill-​ħin tagħhom iqattgħuh fix-​xogħol sekulari tagħhom isuqu trakkijiet enormi bl-​injam minn ġo kampanja salvaġġa għal impjanti taʼ sserrar. Dan jirrikjedi kuntatt kontinwu maʼ sewwieqa tat-​trakkijiet oħrajn permezz tas-​CB (citizens band) radio, biex jikkomunikaw dwar l-​ammont taʼ traffiku u l-​perikli fit-​toroq.

Billi jużaw il-​kreattività tagħhom, dawn il-​proklamaturi tas-​Saltna jużaw is-​CB radio tagħhom b’mod uniku. Jibdew diskussjonijiet fuq is-​CB billi jsemmu ġrajjiet kurrenti. Imbagħad bis-​sengħa jirreferu għall-​Bibbja. F’każ minnhom, wieħed mis-​sewwieqa wieġeb għal dak li l-​Bibbja tgħid rigward it-​tama għall-​mejtin. (Ġwann 5:28, 29; Atti 24:15) Il-​mewt taʼ sewwieq sieħbu f’aċċident tat-​triq iddisturbatu profondament. Bi gratitudni hu aċċetta studju tal-​Bibbja u issa jistaʼ jinstemaʼ jipproklama l-​aħbar tajba lil ħaddiema sħabu u lil ħbiebu. Iktar minn hekk, b’ferħ għalih, studju tal-​Bibbja nbeda maʼ l-​armla tal-​ħabib mejjet tiegħu. Xi premju talli ttieħdet l-​inizjattiva biex jiġi ppreżentat il-​messaġġ tal-​verità li jagħti l-​ħajja b’dan il-​mod mhux tas-​soltu!

Bl-Ajru: Meta jkunu jridu jqassmu l-​messaġġ prezzjuż tal-​verità, proklamaturi żelużi tas-​Saltna jmorru fejn qegħdin in-​nies, billi ‘jidħlu fl-​irħula’ b’ajruplani żgħar. (Mattew 10:11, 12) Xi ftit żmien ilu, żewġ gruppi bl-​ajruplani, imqanqlin miż-​żelu li jiddikjaraw l-​aħbar tajba u minn buthom stess, marru għand in-​nies imxerrdin fil-​medda vasta tat-​tundra deżolata. Kull grupp bl-​ajruplan għamel xi 3,000 kilometru u niżel f’14-il komunità differenti, billi resqu 250 kilometru viċin iċ-​Ċirku Artiku. Dawn il-​proklamaturi enerġetiċi komplew għal sebat ijiem sħaħ jilħqu lin-​nies iżolati minn distanzi kbar.

U kien dan kollu vallapena? Aħseb ftit dwar l-​impatt pożittiv li l-​messaġġ tal-​Bibbja kellu fuq dawn il-​komunitajiet. Il-​ministri viżitaturi għenu biex jimtela bżonn spiritwali vitali meta indikaw il-​fatturi ewlenin taʼ l-​iskop taʼ Jehovah għal ġenna fuq l-​art fil-​futur qarib. (Mattew 5:3) Żmien twil wara li jkunu telqu dawk li ġarrew il-​messaġġ, in-​nies taʼ qalb onesta fil-​komunitajiet se jkunu jistgħu jaqraw mill-​524 Bibbja u għajnuniet għall-​istudju tal-​Bibbja u t-​3,000 rivista li tpoġġew f’idejhom.—Qabbel Atti 12:24.

Bit-Telefon: Eluf taʼ wħud li jgħixu fl-​ibliet joqogħdu f’appartamenti għoljin ħafna u li għandhom sistema taʼ sigurtà sofistikata. Minkejja dan, proklamaturi dedikati tas-​Saltna jkomplu jaħdmu b’żelu u diskrezzjoni. Kif jirnexxilhom imorru fejn qegħdin dawn in-​nies? Fil-​waqt li kuntatt wiċċ imbwiċċ huwa preferibbli, taʼ spiss l-​interkom fl-​intrata taʼ l-​appartamenti jintuża b’suċċess. Meta dan m’huwiex possibbli, huma jħallu lis-​swabaʼ tagħhom jagħmlu x-​xogħol, billi jċemplu lin-​nies bit-​telefon.

Għodwa waħda mara anzjana wieġbet it-​telefon tagħha. Wara tislima fil-​qosor u bl-​edukazzjoni, ġiet mistoqsija jekk kinitx taħseb li għad ikun hawn żmien meta n-​nies se jkunu jistgħu jimxu fit-​toroq bil-​lejl fis-​sigurtà. Inqrawlha xi skritturi biex jiżgurawha li l-​paċi se tkun abbundanti fil-​futur. (Salm 37:10, 11; Danjel 2:44; Mattew 6:9, 10) Hi qablet li tinżamm konversazzjoni bit-​telefon il-​ġimgħa taʼ wara fl-​istess ħin biex jiġi diskuss għala nistgħu nemmnu l-​wegħdi taʼ Alla. Wara xahar studju tal-​Bibbja fuq it-​telefon, b’qari taʼ paragrafi minn għajnuna għal studju tal-​Bibbja u billi saru mistoqsijiet addattati, il-​proklamatriċi tas-​Saltna rċeviet tifħir mill-​mara talli kull ġimgħa kienet titħaddet fuq daqstant suġġetti differenti. Kien wasal il-​waqt li jiġi deskritt il-​ktieb taʼ studju u kopja persunali tiġi offruta lilha. Saru arranġamenti biex jiltaqgħu personalment. Tassew, ix-​Xhieda taʼ Jehovah wrew imħabbithom lejn in-​nies, u n-​nies qed iwieġbu, billi jirrikonoxxu li Jehovah qiegħed maʼ dawn il-​predikaturi Kristjani.—Qabbel l-1 Korintin 14:25.

Bil-Paġna Stampata: Proklamaturi tas-​Saltna fil-​provinċja taʼ Quebec fejn il-​Franċiż huwa l-​lingwa predominanti, ukoll qed imorru fejn qegħdin in-​nies. Ministru li jivvjaġġa osserva: “Għal bosta snin l-​aħwa ħassew li ma kien qed isir ebda progress minħabba l-​oppożizzjoni ħarxa mill-​knisja. Imma permezz tax-​xogħol bla heda li għamlu l-​aħwa u ż-​żjajjar ripetuti tagħhom, il-​Bibbja, li kważi kważi kienet ktieb mhux magħruf u moqri biss mill-​minoranza, issa għandha postha fil-​parti l-​kbira tad-​djar.”

Riżultati eċċitanti qed jitgawdew hekk kif evanġelizzaturi ġodda jiġu mil-​livelli kollha tas-​soċjetà taʼ Quebec, inkluża l-​komunità medika. Dan huwa l-​każ taʼ wieħed tabib. Martu, hija nfisha proklamatriċi tas-​Saltna, kienet taʼ spiss tiddiskuti t-​tama tal-​Bibbja miegħu. Anzjan tal-​kongregazzjoni aġixxa fil-​pront u ħa l-​inizjattiva biex jistieden lit-​tabib għal-​laqgħa tal-​kongregazzjoni fiż-​żmien li kien qed jiġi studjat il-​browxer Id-​Demm Kif Jistaʼ Jsalvalek Ħajtek? Hu ġie u pparteċipa wkoll. Billi kien impressjonat bil-​kwalità u l-​profondità spiritwali tad-​diskussjonijiet, hu aċċetta li jsirlu studju persunali tal-​Bibbja. Issa hu wkoll huwa proklamatur tas-​Saltna.

L-użu effettiv tar-​rivisti kellu rwol importanti f’li jiġbed lin-​nies lejn il-​Bibbja. Ma tistax tgħid liema artiklu se jkun l-​influwenza motivanti li tiġbed lil xi ħadd lejn il-​verità. Waħda proklamatriċi tas-​Saltna offriet ħarġa taʼ Stenbaħ! lill-​ġâra tagħha li ma riditx tismaʼ l-​messaġġ imma li kienet interessata fl-​insetti. Ir-​ritratt fl-​artiklu taʼ l-​Awake! tat-​22 taʼ Novembru, 1992, “Chagas’ Disease​—A Kiss of Death” qajmilha l-​kurżità. Impressjonata b’dak li qrat, hi talbet għal iktar rivisti. Inbeda studju tal-​Bibbja, u fi żmien sitt xhur kienet qed tagħti xiehda lil oħrajn.

F’Postijiet Pubbliċi: Il-​liġi Kanadiża tippermetti l-​libertà tal-​kelma f’postijiet pubbliċi, bħalma huma l-​ajruporti. Fl-​Ajruport Internazzjonali taʼ Halifax, proklamaturi tas-​Saltna javviċinaw b’mod diskret lil vjaġġaturi bejn it-​titjiriet, billi jdaħħluhom f’konversazzjonijiet. Mistoqsijiet f’waqthom u li jwasslu għall-​punt jiġu wżati biex jidderieġu l-​konversazzjoni lejn il-​Bibbja. Peress li jġorru Bibbja żgħira u xi letteratura, huma jistgħu jwieġbu għal bżonnijiet spiritwali. Kirurgi, xjenzati, avukati, piloti, membri tal-​kleru, pulizija, sewwieqa tat-​taksi, inġiniera, għalliema, nies tal-​militar, u politikanti minn pajjiżi barranin huma fost dawk li semgħu l-​messaġġ tas-​Saltna b’dan il-​mod u ġarrew magħhom żrieragħ tal-​verità biex jinbtu f’pajjiżi ’l bogħod.—Kolossin 1:6.

Kmieni għodwa waħda fl-​ajruport, wieħed raġel aċċetta r-​rivisti It-​Torri taʼ l-​Għassa u Stenbaħ! Imbagħad qal minn taħt l-​ilsien b’vuċi kalma: “Le, ma jistax ikun, mhux ix-​Xhieda taʼ Jehovah!” Għala rreaġixxa hekk? Ir-​raġel kien Musulman devot li ftit qabel kien qiegħed jitlob fil-​kappella taʼ l-​ajruport. Hu kien talab lil Alla biex jurih l-​għerf, id-​dehen, u l-​verità. Il-​ħsieb li x-​Xhieda taʼ Jehovah kienu tweġiba immedjata għat-​talba tiegħu sempliċement ħallietu mbellah.

Tassew, il-​proklamaturi kuraġġużi tas-​Saltna fil-​Kanada ma jħallu xejn ifixkilhom milli jippreżentaw il-​messaġġ prezzjuż tas-​Saltna. Ma jħallu la lingwi barranin, la toroq imħarbtin u maħmuġin, la komunitajiet remoti, lanqas bini taʼ appartamenti fl-​ibliet b’sigurtà sofistikata jiskuraġġuhom. Huma ddeterminati li jqassmu l-​messaġġ taʼ Alla għall-​ħajja lil dawk taʼ qalb onestà li qed ifittxu l-​verità. Flimkien mal-​fratellanza mad-​dinja kollha taʼ ħaddiema sħabhom, huma jobdu bla egoiżmu l-​kmand taʼ Ġesù biex ‘imorru jagħmlu dixxipli.’—Mattew 28:19.

[Nota taʼ taħt]

[Kaxxa f’paġna 27]

Proklamaturi tas-​Saltna li Jirnexxu Jużaw it-​Telefon

Xi wħud qalu: “Hello. Jien jisimni [agħti ismek]. Kont qed nitkellem fil-​qosor man-​nies fil-​blokk tiegħek dwar kif tistaʼ tinkiseb il-​paċi. Taħseb li qatt se jkun hawn paċi mad-​dinja kollha? [Agħti ċans għal tweġiba.] Biex isserraħ rasek, jien m’iniex qed nagħmel xi stħarriġ jew inbigħ xi ħaġa. Minflok, kont qed naqsam il-​ħsieb mill-​Iskrittura Mqaddsa li Alla attwalment se jġib il-​paċi.” Imbagħad il-​konversazzjoni tistaʼ tkompli b’diskussjoni Skritturali qasira.

Oħrajn qalu: “Il-​lejla t-​tajba. Jien jisimni [agħti ismek]. Jien volontier fl-​inħawi tiegħek. Kont qed nieħu l-​opinjonijiet taʼ individwi li jgħixu fil-​blokk tiegħek. Ħafna huma kkonċernati dwar is-​sigurtà persunali meta jħarsu lejn il-​vjolenza u l-​kriminalità li qed jiżdiedu fl-​inħawi tagħna. Tikkonċernak lilek din il-​ħaġa? [Agħti ċans għal tweġiba.] Taħseb li qatt se jkun hawn żmien meta d-​dinja kollha se tħossha fis-​sigurtà?” Agħti ċans għal risposta, u kompli b’messaġġ Skritturali.