Il-​Knejjes Jammettu Ħtijiethom

“Il-​Papa Jgħaddi Ġuri lill-​Knisja.” “L-​Inkwiżizzjoni u l-​Anti-Semitiżmu​—Il-​Knisja Qed Tipprepara l-​Mea Culpa Tagħha.”a “Mea Culpa għall-​Olokawst.” “Il-​Metodisti Jitolbu Skuża lill-​Indjani taʼ l-​Amerka tal-​Punent.”

QRAJT int titli bħal dawn fil-​gazzetti? Donnu li dejjem iktar spiss, il-​knejjes qegħdin jieħdu t-​tort u jitolbu skuża għal dak li għamlu matul is-​sekli. Il-​mezzi tax-​xandir qegħdin jagħtu prominenza, bla ma jaqtgħu xejn, lil stqarrijiet taʼ mea culpa ġodda li jagħmel il-​Papa.

Meta l-​Papa Jitlob Maħfra

Bejn l-​1980 u l-​1996, Ġwanni Pawlu II ‘rrikonoxxa l-​ħtijiet storiċi tal-​Knisja jew talab maħfra’ mill-​inqas 94 darba, jgħid il-​kummentatur għall-​Vatikan Luigi Accattoli fil-​ktieb tiegħu Quando il papa chiede perdono (Meta l-​Papa Jitlob Maħfra). Skond Accattoli, “fil-​Knisja Kattolika, il-​Papa biss għandu dritt jagħmel stqarrija taʼ mea culpa.” U hekk għamel, billi rrefera għall-​iktar paġni kontroversjali taʼ l-​istorja Kattolika​—il-​Kruċjati, il-​gwerer, l-​appoġġ lid-​dittatorjati, il-​firda fil-​knejjes, l-​anti-Semitiżmu, l-​Inkwiżizzjonijiet, il-​Mafja, u r-​razziżmu. F’memorandum li ntbagħat fl-​1994 lill-​kardinali (li huwa meqjus minn xi wħud bħala l-​iktar dokument importanti tal-​pontifikat), Ġwanni Pawlu II ppropona “ammissjoni ġenerali u millennjali tad-​dnubiet.”

Xi prelati segwew l-​eżempju tal-​Papa. F’Diċembru taʼ l-​1994, il-​gazzetta Taljana Il Giornale rrapportat: “Ħafna isqfijiet Amerikani dehru fuq it-​televixin u talbu maħfra pubblikament.” Għal xiex? Talli ssottovalutaw il-​problema taʼ qassisin li jabbużaw sesswalment mit-​tfal, għad-​dannu taʼ ħafna vittmi żgħar. F’Jannar taʼ l-​1995, il-​gazzetta La Repubblica għamlet rapport dwar “ġest li bħalu qatt ma sar qabel fl-​istorja tal-​Kattoliċiżmu kontemporanju”​—ġiet ittrattata l-​problema tas-​skiet li żamm Papa Piju XII f’konnessjoni maʼ l-​Olokawst. F’Jannar taʼ l-​1995, l-​istess gazzetta rrapportat li l-​episkopat tal-​Ġermanja talab maħfra għall-​“ħafna ħtijiet” tal-​Kattoliċi Rumani li appoġġjaw id-​delitti tan-​Nazi. Diversi knejjes Protestanti wkoll bdew jikkritikaw lilhom infushom.

Għala?

Il-​Bibbja tinkuraġġina biex nitolbu maħfra meta jkollna tort, u ħafna juru l-​approvazzjoni tagħhom meta l-​knejjes jikkritikaw lilhom infushom. (Ġakbu 5:16) Imma l-​knejjes għala qed jagħmlu hekk? Dan kif għandu jeffettwa l-​mod kif inħarsu lejhom?

[Nota taʼ taħt f’paġna 3]