Int Ottimist jew Pessimist?

“KIEN żmien mill-​aħjar, u żmien mill-​agħar; . . . kienet ir-​rebbiegħa tat-​tama, u x-​xitwa taʼ qtigħ il-​jies; kien żmien meta quddiemna kellna kollox u ma kellna xejn.” Il-​kliem tal-​ftuħ tal-​kapulavur letterarju taʼ Charles Dickens A Tale of Two Cities (Ġrajja Taʼ Żewgt Ibliet, traduzzjoni taʼ Karmenu Vassallo), jikkuntrasta b’sengħa kbira kif il-​ġrajjiet jistgħu jeffettwaw il-​ħsibijiet tagħna, is-​sentimenti tagħna, u l-​ħarsa tagħna lejn l-​affarijiet.

Iż-żewġt ibliet li saret referenza għalihom kienu Londra u Pariġi matul it-​taqlib tar-​Rivoluzzjoni Franċiża. Għaċ-​ċittadini mgħakksin fi Franza tas-​seklu 18, il-​proklamazzjoni tar-​rivoluzzjoni dwar id-​drittijiet tal-​bniedem kienet tabilħaqq “ir-​rebbiegħa tat-​tama.” Imma għal dawk taʼ l-​ancien régime, jew is-​sistema politika li kienet qed tispiċċa, kienet “ix-​xitwa taʼ qtigħ il-​jies,” li kienet twassal għall-​mewt u l-​qerda.

Ottimiżmu jew pessimiżmu? Kollox kien jiddependi fuq maʼ liema naħa kont iżżomm. U għadu hekk sal-​lum.

Żmien biex Teżamina Lilek Innifsek

Int ottimist? Tħares int lejn l-​aspett pożittiv tal-​ħajja, billi dejjem tantiċipa l-​aħjar li jistaʼ jiġri? Jew int inklinat li tkun pessimist, tħares b’mod negattiv lejn il-​prospetti li għandek, billi tittama għall-​aħjar imma fl-​istess ħin tistenna li kollox se jmur ħażin?

Sittin sena ilu, ir-​rumanzier Amerikan James Branch Cabell ġabar b’dan il-​mod iż-​żewġ filosofiji li kienu f’konflitt: “L-​ottimist jiddikjara li ngħixu fl-​aqwa dinja li qatt tistaʼ teżisti; u l-​pessimist jibżaʼ li dan huwa minnu.” Jekk tħoss li din hija ħarsa pjuttost ċinika, eżamina l-​fatturi favur u kontra taʼ biss tliet aspetti tad-​dinja tal-​lum kif inhuma ppreżentati hawn taħt. Imbagħad analizza r-​reazzjonijiet tiegħek, u staqsi lilek innifsek, ‘Jien ottimist jew pessimist?’

Paċi Dejjiema: Kemm-il reġjun fejn hemm l-​inkwiet fid-​dinja tistaʼ ssemmi? L-​Irlanda, l-​ex Jugoslavja, il-​Lvant Nofsani, il-​Burundi, l-​Irwanda​—dawn mill-​ewwel jiġu f’moħħok. Dawn u konflitti oħrajn jistgħu qatt jiġu solvuti biex tiġi assigurata paċi globali permanenti? Hija d-​dinja riesqa lejn il-​paċi?

Stabbiltà Ekonomika: Fil-​waqt li qegħdin jittamaw li jkun hawn għaqda monetarja sa l-​1999, pajjiżi membri taʼ l-​Unjoni Ewropea qegħdin jiffaċċjaw serjament problemi bl-​inflazzjoni u bis-​self lill-​gvern f’forma taʼ ishma. Fi bnadi oħrajn, il-​korruzzjoni qed tmermer l-​istruttura ekonomika taʼ ħafna pajjiżi Amerikani u Afrikani, fejn l-​inflazzjoni tpoġġi piż li kważi ma jifilħuhx, u problemi etniċi għadhom iġibu l-​firda. Hija stabbiltà ekonomika dinjija preċiż quddiemna?

Il-Qgħad: Fl-​elezzjoni nazzjonali taʼ l-​1997, il-​knejjes Britanniċi ngħaqdu biex iħeġġu lill-​partiti politiċi kollha biex ipoġġu x-​xogħol għal kulħadd fin-​naħa taʼ fuq taʼ l-​aġenda tagħhom. Imma bi kważi 30 fil-​mija tan-​nies eliġibbli għax-​xogħol li jinsabu mingħajr impjieg jew m’għandhomx xogħol biżżejjed, jistaʼ jkun hemm xogħol permanenti għal kulħadd​—speċjalment għal dawk li għadhom żgħar?

Kemm hu faċli li jiġuk ħsibijiet pessimisti! Madankollu, hemm bażi biex tkun ottimist, u nistidnuk tikkunsidra kif inhu possibbli li tiżviluppa ħarsa ottimista.

[Stampa f’paġna 3]

Ir-​Rivoluzzjoni Franċiża

[Sors]

Mill-​ktieb Pictorial History of the World