Żjara fl-​Art Imwiegħda

NISSOPONU li ħabib qallek li xtralek​—bħala rigal—​dar ġdida fjamanta f’ambjent sabiħ u kwiet. ‘Min jaf kif inhi?’ tgħid bejnek u bejn ruħek. Bla dubju tkun ħerqan li tara din id-​dar int innifsek, li tidħol fiha u tispezzjona kull kamra. Wara kollox, din hija d-​dar ġdida li se toqgħod fiha!

Fl-1473 Q.E.K., Jehovah għadda lill-​ġens taʼ Israel tal-​qedem dar ġdida​—l-​Art Imwiegħda, strixxa taʼ territorju li kienet madwar 500 kilometru mit-​Tramuntana san-​Nofsinhar u 55 kilometru wiesgħa, bejn wieħed u ieħor.a Imqiegħda f’dak li kien imsejjaħ il-​Fertile Crescent (art għammiela forma taʼ kwart taʼ qamar), l-​Art Imwiegħda kienet post li titgħaxxaq tgħix fih, mogħni bil-​karatteristiċi uniċi tiegħu.

Imma għala għandek tkun interessat illum f’“dar” li kienet mogħtija lil xi ħadd ieħor, speċjalment lil xi ħadd li għex snin ilu? Għax għarfien dwar din l-​art storika jistaʼ jkabbarlek l-​apprezzament għar-​rakkonti Bibliċi. “Fl-​art tal-​Bibbja,” kiteb il-​Professur Yohanan Aharoni, “il-​ġeografija u l-​istorja huma tant minsuġin flimkien li ebda waħda ma tistaʼ tiġi mifhuma sewwa mingħajr l-​għajnuna taʼ l-​oħra.” Barra minn hekk, fl-​aqwa tagħha l-​Art Imwiegħda pprovdiet eżempju fiċ-​ċokon taʼ dak li l-​Ġenna taħt is-​Saltna t’Alla dalwaqt se tkun tfisser għall-​umanità mad-​dinja kollha!—Isaija 11:9.

Jekk Jehovah setaʼ jipprovdi art hekk sinjura u sabiħa għall-​poplu tiegħu tal-​qedem, ċertament li jistaʼ jagħti lill-​qaddejja leali tiegħu taż-​żmien modern ġenna glorjuża li tkun testendi maʼ l-​art kollha​—b’muntanji, widien, xmajjar, u għadajjar. Iva, l-​Art Imwiegħda tal-​qedem bid-​diversità kollha tagħha kienet iddewwaq biss naqra mill-​ġenna spiritwali li x-​Xhieda tiegħu jgawdu llum u mill-​Ġenna futura tad-​dinja l-​ġdida. Hemmhekk, il-​wegħda mniżżla f’Salm 37:29 se tkun imwettqa: “Il-​ġusti jirtu l-​art, u jgħammru fiha għal dejjem.” (w96 8/15)

[Nota taʼ taħt]

[Sors taʼ l-​istampa f’paġna 3]

Garo Nalbandian