Ferħ Maħżun Għal Dawk li Jsibu l-Verità
FL-ATTIKU tiegħu, raġel Finlandiż sab il-ktieb The Divine Plan of the Ages. Hu beda jaqrah dak il-ħin stess u wara ftit qal bejnu u bejn ruħu, ‘Din hija l-verità; din hija l-verità.’ Malli niżel mill-attiku, qal lill-mara tiegħu, “Sibt il-vera reliġjon.”
Din l-esperjenza m’hijiex tas-soltu fil-mod li bih dan ir-raġel sab il-verità, imma ħafna mix-Xhieda taʼ Jehovah jistgħu jirrakkontaw xi reazzjoni simili. Kollha kemm huma jistgħu jgħidulek dwar il-ferħ li jiġi meta ssib il-verità. Dawn l-esperjenzi li ġejjin juruh ċar dan.
Tagħlim Veru Tal-Bibbja Jġib Ferħ
Margarita Königer trabbiet fi Munich, il-Ġermanja, matul it-Tieni Gwerra Dinjija. Djar imwaqqgħin bil-bombi u qegħdin jaqbdu kienu dehra frekwenti. Ħuha miet fil-gwerra. Hekk kif attendiet għal funzjonijiet fi knisja Kattolika, semgħet talb jingħad għal bżonnijiet tas-suldati Ġermaniżi u l-führer, Hitler. Wara l-gwerra, irċeviet borża taʼ studju biex tattendi kulleġġ fl-Istati Uniti bħala parti minn programm taʼ bdil taʼ studenti biex jistudjaw barra minn pajjiżhom. Sabet li n-nies kienu dħulin magħha, u għalhekk qagħdet taħseb dwar x’kien li jqanqal lil nies, li x-xewqa naturali tagħhom hija li jgħixu fil-paċi, biex ma jafdawx u biex jobogħdu lil xulxin matul żmien taʼ gwerra. Lura fi Munich, ġiet f’kuntatt max-Xhieda taʼ Jehovah, u permezz taʼ studju tal-Bibbja magħhom, sabet it-tweġibiet għall-mistoqsijiet tagħha. Hi tgħid: “Ġejt murija mill-Bibbja li l-forzi taʼ l-ispirti mill-agħar huma involuti . . . Il-Bibbja ssejħilhom ‘[i]l-ħakkiema tad-dinja,’ u, fil-fatt, tgħid li Satana ‘qiegħed jiżvija lill-art abitata kollha kemm hija.’ . . . Meta tqis l-azzjonijiet demoniċi li ma jogħġbux lil Alla tal-ġnus u l-popli, kemm hija raġonevoli u sodisfaċenti din it-tweġiba!”—Efesin 6:12; Rivelazzjoni 12:9.
Margarita tkompli: “Ġabli ferħ kbir ferm meta tgħallimt dwar il-provvediment t’Alla biex isolvi l-problemi taʼ l-art. Le, m’huwiex se jkun permezz taʼ xi ideoloġija jew amministrazzjoni umana, bħalma huwa propost minn edukaturi dinjin. Minflok, il-Bibbja turi li gvern ġdid tas-sema se jieħu ħsieb l-affarijiet taʼ l-art. . . . Ġesù Kristu għallem lis-segwaċi tiegħu biex jitolbu: ‘Ħalli tiġi saltnatek.’ . . . Bdejt nara li din is-saltna hija gvern reali u li permezz tagħha biss se tinkiseb paċi ġenwina mad-dinja kollha.” Għal kważi 30 sena, Margarita qdiet bħala missjunarja f’xi ħames pajjiżi Afrikani—u għaddiet l-aħħar 19-il sena tipproklama l-verità lin-nies umlin taʼ Ouagadougou, f’Burkina Faso.
L-esperjenza taʼ Margarita m’hijiex unika. Ħafna rreaġixxew bl-istess mod pożittiv meta sabu li l-kleru tal-Kristjaneżmu fuq iż-żewġ naħat tal-battalja talbu lil Alla għar-rebħa. Uħud taʼ qalb onesta jaraw ir-raġonevolezza taʼ l-ispjegazzjoni tal-Bibbja li Alla m’għandu x’jaqsam xejn mal-gwerer tal-bniedem imma li dawn jiżviluppaw minħabba li “d-dinja kollha qiegħda taħt il-poter tal-wieħed mill-agħar.” Dawn l-uħud li jfittxu l-verità jitgħallmu li l-Kristjani veri m’għandhom ikunu “ebda parti mid-dinja.” imma għandhom jibqgħu newtrali fil-kwistjonijiet tagħha. Billi jirrikonoxxu li x-Xhieda taʼ Jehovah ħadu waqfa bħal din, dawn l-uħud interessati ġodda jsiru konvinti li sabu l-verità. Uħud bħal dawn jikbru fit-tama u l-ferħ hekk kif jiksbu għarfien li dejjem jiżdied rigward għala Alla ppermetta l-ħażen u kif dalwaqt se jġib il-paċi u kundizzjonijiet taʼ tjieba fuq l-art permezz tas-Saltna tiegħu.—1 Ġwann 5:19; Ġwann 17:16; Mattew 6:9, 10.
Prinċipji Veri Tal-Bibbja Jġibu Ferħ
Daniel Rosero mill-Ekwador ħass li l-ħajja kienet bla skop, u għalhekk taha għax-xorb. Il-knisja li kien jattendi għallmitu li l-unika ħaġa li kellu jħares ’il quddiem għaliha kienet il-mewt u infern tan-nar. Hu wieġeb, “Jien sejjer ninħaraq, mela ħallini ħa nixrob!” Kellu familja taʼ tmienja min-nies li ma kienx qiegħed imantni, u kien dejjem jiġġieled maʼ martu, Delia. Il-folja nqalbet darba l-Ħadd fil-għodu meta żaruhom ix-Xhieda taʼ Jehovah u bdew jistudjaw il-Bibbja. L-ewwel darba li Daniel attenda assemblea tas-circuit tax-Xhieda taʼ Jehovah, irrealizza li kien sab il-verità. Hu jgħid: “L-organizzazzjoni impressjonatni. In-nies kienu jingwalawha, ħafna minnhom, flimkien. Kont tistaʼ tħoss l-imħabba fil-folla. Ħadd ma pejjep. L-ebda kliem baxx. . . . Niftakarni naħseb, ‘Din hija l-verità!’ Ma kenitx il-biżaʼ mill-mewt jew il-biżaʼ mill-aħħar tad-dinja li qanqlitni. Kienet l-indafa taʼ l-organizzazzjoni.”
Il-familja Rosero kollha kemm hi saru Xhieda taʼ Jehovah. Il-ħajja tal-familja tagħhom u s-sitwazzjoni ekonomika tagħhom marru għall-aħjar hekk kif applikaw il-prinċipji tal-Bibbja. Delia Rosero tgħid: “Taf xejn, dan kollu huwa dovut għall-verità tal-Bibbja. Min jaf kieku x’sar minnhom it-tfal tiegħi mingħajr il-Kelma t’Alla? Is-sebgħa li huma kollha mgħammdin u mexjin tajjeb. Il-verità kienet tfisser ħajja kompletament ġdida, hena ġdida, għalija.”
L-esperjenza tal-familja Rosero m’hijiex unika. Ħafna fi żmienna huma inkwetati minn problemi. Raġuni waħda hija li l-livelli morali pprovduti fil-Bibbja ġeneralment m’għadhomx irrispettati, bħalma kienu mill-ġenerazzjonijiet taʼ qabel. Il-biċċa l-kbira tar-reliġjonijiet segwew din it-tendenza, jew għan-nom tat-tolleranza jew minħabba li jħossu li la tbiddlu ż-żminijiet il-morali taʼ qabel m’għadhomx moda. Mela, bħal oħrajn, il-familja Rosero tħallew iteftfu mingħajr il-gwida tal-Bibbja. Madankollu, meta nies umlin bħal dawn jibdew jifhmu l-ħarsa t’Alla dwar il-morali u l-ħajja tal-familja, bla telf taʼ żmien japplikaw dak li jitgħallmu. Mir-rakkonti tagħhom nistgħu naraw ir-riżultati tajbin talli għamlu hekk.
Il-Ferħ Irid Jiġi Kkultivat
Dan ma jfissirx, madankollu, li Kristjan hu fi stat kostanti t’ewforja. Ovvjament, id-diffikultajiet li n-nies inġenerali jiffaċċjaw, bħalma huma l-qagħad, il-mard, u l-mewt, jeffettwaw lill-Kristjani wkoll. Il-Kristjani jridu wkoll jiġġieldu kontinwament kontra l-imperfezzjonijiet u d-djufijiet tagħhom stess. Ir-rakkont tal-Bibbja jgħid li Lot kien “imnikket ferm bis-sehem tan-nies li jisfidaw il-liġi f’kondotta laxka” fil-belt taʼ Sodom. Kristjani leali ma jistgħux jevitaw sentimenti simili meta jaraw li kundizzjonijiet mill-agħar huma prevalenti.—2 Pietru 2:7, 8.
Madankollu, dawk li sabu l-verità għandhom vantaġġ. Per eżempju, wieħed li jemmen u li qiegħed jitnikket minħabba xi ħadd li miet m’għandux għalfejn ‘isewwed qalbu sewwa sew bħalma jagħmlu wkoll il-bqija li m’għandhomx tama.’ In-niket tiegħu m’huwiex se jkun bla tarf. Dan huwa minnu rigward problemi oħrajn ukoll. Il-persuna li sabet il-verità taf li t-tbatijiet preżenti huma biss temporanji. It-tama tagħmilha eħfef li tissaporti waqt diffikultajiet. Mod taʼ ħajja bbilanċjat ukoll jgħin.—1 Tessalonkin 4:13.
Pawlu ta dan it-tħeġġiġ lill-Kristjani: “Dejjem ithennew fil-Mulej. Għal darb’oħra se ngħid, Ithennew!” (Filippin 4:4) Dan juri li waqt li l-ferħ jistaʼ jintlaħaq minn kull wieħed u waħda minna, huwa wkoll possibbli li xi ħadd ma jkollux. L-anzjetajiet taʼ din is-sistema qadima t’affarijiet jistgħu jkunu ostaklu. Barra minn dan, il-Bibbja tgħidilna li għandna bżonn nikkultivaw il-ferħ, waħda mill-frott taʼ l-ispirtu t’Alla. (Galatin 5:22) Jekk tieħu kontinwament l-għarfien tal-verità u tfakkar lilek innifsek dwar ir-rikkezzi spiritwali li dan ġab u għadu jġib, il-ferħ tiegħek m’huwiex se jonqos. Se jsir iktar b’saħħtu hekk kif nersqu lejn iż-żmien meta Alla “se jimsaħ għalkollox kull demgħa” minn għajnejn in-nies u meta la “għali u la agħjat u lanqas uġigħ” ma se jkunu iżjed.—Rivelazzjoni 21:4. (w95 4/15)
[Stampi f’paġna 8]
Ħafna huma impressjonati mill-ferħ u l-organizzazzjoni tajba fl-assembleat tax-Xhieda taʼ Jehovah