Turment Etern—Għala Duttrina li Tinkwetak?

“Smajt li biddiltuh lill-​kappillan tagħkom. X’ġara?”

“Sewwa, hu kien igħidilna li lkoll kemm aħna sejrin l-​infern.”

“Il-​kappillan il-​ġdid xi jgħid?”

“Il-​kappillan il-​ġdid igħid li aħna sejrin l-​infern, ukoll.”

“Mela x’differenza hemm?”

“Sewwa, id-​differenza hi li meta qalha l-​qassis taʼ qabel, kien qisu qiegħed jieħu pjaċir biha; imma meta jgħidha l-​ġdid, qisha qiegħda taqsamlu qalbu.”

DIN l-​istorja, li tidher fi ktieb bl-​istampi, tirrifletti bil-​mod uniku tagħha kif ħafna għalliema tal-​Bibbja, kif ukoll dawk li jmorru l-​knisja, m’humiex komdi bid-​duttrina tal-​infern. F’kuntest akbar, tikkonferma wkoll l-​osservazzjoni tat-​teologu Kanadiż Clark H. Pinnock: “Mill-​artikli kollha tat-​teoloġija li nkwetaw il-​kuxjenza umana matul is-​sekli, jien naħseb li ftit setgħu kkaġunaw anzjetà akbar mill-​interpretazzjoni aċċettata tal-​infern bħala kastig konxju taʼ dejjem fil-​ġisem u r-​ruħ.”

Implikazzjonijiet Morali

Ħafna, allura, għala huma nkwetati dwar ix-​xeni tal-​infern li huma ppreżentati fil-​Kristjaneżmu? Il-​professur Pinnock igħid: “L-​idea li ħlejqa konxja trid tgħaddi minn tortura fiżika u mentali għal żmien bla tmiem hija verament inkwetanti, u l-​ħsieb li dan jiġi fuqhom b’digriet divin joffendi l-​konvinzjoni tiegħi dwar l-​imħabba t’Alla.”

Iva, it-​tagħlim taʼ turment etern jippreżenta problema morali. Per eżempju, Kristjani sinċieri jirriflettu fuq il-​mistoqsijiet imqajmin mit-​teologu Kattoliku Hans Küng: “Għandu dak Alla taʼ mħabba . . . joqgħod jara għall-​eternità kollha din it-​tortura fiżika u psikoloġika bla tmiem, bla tama, bla ħniena, bla mħabba, u krudili tal-​ħlejjaq tiegħu?” Küng ikompli: “Huwa kreditur daqshekk qalbu iebsa? . . . Kieku x’naħsbu dwar bniedem tad-​demm u l-​laħam li ssodisfa l-​għatx tiegħu għall-​vendetta b’tali mod li qatt ma tistaʼ tkun fil-​paċi miegħu u li jissodisfah?”a Tabilħaqq, kif jistaʼ dak Alla li jgħidilna fil-​Bibbja li aħna rridu nħobbu l-​għedewwa tagħna jixtieq jittortura l-​għedewwa tiegħu għall-​eternità? (1 Ġwann 4:8-10) Mhux taʼ b’xejn li xi nies jikkonkludu li n-​natura tal-​infern sempliċement mhix kompatibbli man-​natura t’Alla, u li din id-​duttrina ma tagħmilx sens morali.

Ħafna kredenti oħrajn jipprovaw isikktu l-​kuxjenza tagħhom billi jevitaw dawn il-​mistoqsijiet. Li jdawru wiċċhom in-​naħa l-​oħra, iżda, ma jġagħalx lil dan it-​taħwid jisparixxi. Mela ejjew niffaċċjaw il-​kwistjoni. X’inhuma l-​implikazzjonijiet morali nvoluti f’din id-​duttrina? Fil-​Criswell Theological Review, il-​professur Pinnock jikteb: “Turment taʼ dejjem ma tistax tittollerah minn lat morali għaliex ipinġi lil Alla bħala mostru għatxan għad-​demm li jieħu ħsieb Auschwitz taʼ dejjem għall-​vittmi li lanqas biss iħallihom imutu.” Hu jistaqsi: “Kif jistaʼ xi ħadd li għandu ħniena ġo fih jibqaʼ kalm waqt li jikkontempla idea bħal din [id-duttrina tradizzjonali tal-​infern]? . . . Kif jistaʼ jkun li l-​Kristjani jipproġettaw alla krudil u vendikattiv daqshekk?”

Billi juri l-​influwenza ħażina li din id-​duttrina jistaʼ jkollha fuq l-​imġieba taʼ xi bniedem, Pinnock jikkummenta: “Jien saħansitra ninsab imħasseb dwar liema atroċitajiet ikkommettew dawk li kienu jemmnu b’wieħed Alla li jittortura lill-​għedewwa tiegħu?” Hu jikkonkludi: “M’huwiex dan konċett li jinkwetak ħafna u li hemm bżonn li wieħed jerġaʼ jaħseb fuqu?” Iva, jekk krudeltà bħal din hija attribwita lil Alla, mhux taʼ b’xejn li wħud sensittivi li jmorru l-​knisja qegħdin jeżaminaw mill-​ġdid in-​nar tal-​infern. U x’jaraw? Problema oħra tikkonfronta l-​idea taʼ turment etern.

L-​Infern u l-​Ġustizzja

Ħafna minn dawk li jaħsbu dwar id-​duttrina tradizzjonali tal-​infern isibu li din donnha tagħti stampa t’Alla bħala li jaġixxi b’mod inġust, u għalhekk toffendi s-​sens naturali tagħhom taʼ ġustizzja. B’liema mod?

Issib tweġiba waħda meta tqabbel id-​duttrina taʼ turment etern maʼ livell taʼ ġustizzja mogħtija minn Alla: “Għajn għal għajn, sinna għal sinna.” (Eżodu 21:24) U għall-​argument, applika mad-​duttrina tan-​nar tal-​infern dik il-​liġi divina mogħtija lil Iżrael tal-​qedem, liġi taʼ ħlas eżatt għad-​dnub. Liema konklużjoni taħseb li tasal għaliha? Li dawk il-​midinbin biss li kkaġunaw turment etern jixirqilhom turment etern ugwali bi tpattija​—turment etern għal turment etern. Imma ladarba l-​bnedmin (huma kemm huma mill-​agħar) jistgħu jikkaġunaw turment li jispiċċa, li jiġu ssentenzjati għal turment etern joħloq nuqqas taʼ proporzjon bejn id-​delitti tagħhom u l-​penalità infinita tan-​nar tal-​infern.

Ngħiduha kif inhi, is-​sentenza kienet tkun iebsa wisq. Kienet tmur wisq iktar minn “għajn għal għajn, sinna għal sinna.” Meta tikkunsidra t-​tagħlim taʼ Ġesù li jimmodera l-​idea taʼ ritaljazzjoni, int forsi tammetti li l-​veri Kristjani jkollhom diffikultà f’li jaraw sens taʼ ġustizzja fit-​turment etern.—Mattew 5:38, 39; Rumani 12:17.

Jiġġustifikaw id-​Duttrina

Xorta waħda, ħafna kredenti jkomplu jipprovaw jiġġustifikaw id-​duttrina. Kif? L-​awtur Britanniku Clive S. Lewis jitkellem għal ħafna difensuri fil-​ktieb tiegħu The Problem of Pain: “M’hemmx duttrina oħra li kont inneħħi iktar bil-​qalb mill-​Kristjanità minn din, li kieku kelli s-​setgħa. Imma għandha l-​appoġġ sħiħ tal-​Iskrittura u, speċjalment, taʼ kliem il-​Mulej tagħna nnifsu.” B’hekk, dawk li jappoġġjawh jistqarru li t-​turment etern huwa tal-​biżaʼ, imma fl-​istess nifs, isostnu li d-​duttrina hija obbligatorja għaliex huma jħossu li l-​Bibbja tgħallimha. Jinnota t-​teologu Pinnock: “Billi jammettu l-​kruha tagħha, huma jittamaw li jagħtu prova tal-​fedeltà li ma titħarrikx tagħhom lejn il-​Bibbja u ċertu eroiżmu f’li jemmnu verità terribbli bħal din għaliex tgħallimha l-​Iskrittura. Iġagħluha tinstemaʼ qisha li l-​infallibiltà tal-​Bibbja kienet tiddependi minnha. Imma huwa verament hekk?”

Int ukoll forsi tistaqsi jekk il-​fedeltà lejn il-​Bibbja tħallilekx għażla ħlief li taċċetta din id-​duttrina. Il-​Bibbja x’tgħid tassew?

[Nota taʼ taħt]